ߊߟߎ߫ ߛߊ߲߬ߓߍ-ߛߊ߲߬ߓߍ߫ ߞߊ߬ ߓߍ߲߬ ߡߊ߲߬ߘߋ߲߫ ߛߊ߲߬ߞߎ߲ ߇߉߁߭ ߞߊߙߏ߫ ߝߟߐ ߣߌ߲߬ ߡߊ߬

ߊߟߊ߫ ߕߐ߮ ߟߊ߫ ߡߊ߬ߤߌ߬ߣߊ߬ߟߊ߫ ߟߋ߬ ߤߌߣߟߊ߫ ߟߋ߬
ߣߊߟߌ߬ߡߎ߲߫ ߒߞߏ ߛߓߍߛߎ߲ ߛߌ߲ߘߌ ߛߊ߲߬ߞߎ߲߬ߓߍ߲ ߛߊ߲ߖߌ߫ ߇߇߲ ߝߣߊ߫ ߘߌ߫ ߸ ߌߡ.߂߀߂߆ ߣߌ߲߬ ߠߊ߫.
ߏ ߕߊ߬ߡߌ߲ ߞߐ߫/…
ߊߟߊ߫ ߕߌ߲ߞߌ ߣߌ߫ ߖߐ ߞߍ߫ ߊ߲ ߛߟߊߕߌ߯ ߡߊ߬ߡߊߘߌ߫ ߣߴߊ߬ ߘߏ߲߬ߞߏ ߣߴߊ߬ ߘߍ߬ߢߐ߮ ߟߎ߬ ߓߍ߯ ߦߋ߫، ߞߵߊ߬ߟߎ߫ ߞߐ߲߬ߘߐ߲߬ߞߏ߬ ߢߌߡߊ ߞߍ߫ ߘߏ߲߯،..
ߊ߲ ߧߋ߫ ߡߊ߰ߙߌ ߡߊߘߌߦߊ߫ ߟߊ߫߸ ߊ߰ ߤߌߣߊ߫ ߝߘߊ߬ߝߌ߲߬ ߠߎ߬ ߟߊ߫߸ ߞߵߊ߲ ߠߊ߫ ߖߘߍ߬ߟߐ߲ ߝߏ߲߬ߘߏ ߟߎ߬ ߟߊߢߊ߬߸ ߊ߬ ߣߌ߫ ߞߵߊ߬ߟߎ߬ ߟߊߥߊ߬ߙߵߊ߲ ߧߋ߫߸ ߊ߲ ߓߐߛߎ߲ ߣߴߊ߲ ߓߋ߲ߓߊ ߟߎ߫ ߞߊ߬ ߡߍ߲ ߠߎ߬ ߛߌߟߊ ߓߐ߫ ߡߐ߰ߦߊ ߥߎ߬ߛߎ ߞߎ߲߬ߕߊ߮ ߞߘߐ߫ ߝߎߚߎ߯ ߝߏ߫ ߞߣߵߊ߬ ߓߌ߬ߟߊ߫ ߞߙߎ߬ߞߊ߲߬ߝߎߥߊ߫ ߜߊ߬ ߣߌ߫ ߒߞߏ ߛߓߍߛߎ߲ ߛߌ߲ߘߌ ߡߊ߬ ߞߣߵߊ߬ ߓߌ߬ߟߊ߫ ߓߌ߬ ߟߊ߫، ߊߟߊߡߊ߬ ߡߊ߰ߙߌ ߟߊ߫ ߤߌߣߊ ߣߴߊ߬ ߟߊ߫ ߢߊ߬ߒߠߊ ߏ߬ ߟߎ߫ ߣߐ߰ߦߊ߬ ߘߴߊ߲ ߧߋ߫ ߞߵߊ߬ ߝߊ߬ߙߊ߫ ߒ߬ ߘߎߢߊߘߐߕߍ߯ߢߐ߮ ߡߌ߬ߙߌ߲߬ߘߌ߬ ߜߘߍ ߟߎ߬ ߕߊ߫ ߓߍ߬ߘߍ ߜߊ߲߬ߛߊ߲ ߠߎ߬ ߡߊߣߐ߬ߟߌ ߣߴߊ߬ߟߎ߬ ߟߊߡߍ߬ߙߍ߲ ߞߊ߲߬ ߊ߲ ߓߟߏߕߊ ߟߎ߫ ߝߍ߬ ߕߎ߬ߡߊ߬ߓߍ߯، ߊߟߴߊ߬ ߞߍ߫ ߕߋ߲߬ ߠߋ߬ ߘߍ߯.
ߊ߲ ߓߊߘߋ߲߫ ߝߘߊ߬ߝߌ߲߬ ߡߌߙߌ߲ߘߌ߸ ߡߐ߰ߦߊ ߥߟߏߛߟߎ߸ ߊߟߎ߫ ߛߊ߲߬ߓߍߛߊ߲߬ߓߍ߫ ߞߊ߬ ߓߍ߲߬ ߊ߲ ߠߊ߫ ߡߊ߲߬ߘߋ߲߫ ߛߊ߲߬ߞߎ߲ ߞߊߙߏ߫ ߝߟߐ ߘߊߡߌߘߊ ߣߌ߲߬ ߡߊ߬߸ ߣߊߟߌ߬ߡߎ߲߬ « ߞߏ߲ߞߏߘߌ߬ߓߌ » ߞߊߙߏߓߊ ߣߌ߲߬ ߘߌ߫.
ߊߟߎ߫ ߛߊ߲߬ߓߍߛߊ߲߬ߓߍ߫ ߡߊ߲߬ߘߋ߲ ߠߎ߬ ߟߊ߫ ߦߋߟߋ߲ߘߐߦߊ ߞߊߙߏߓߊ ߣߌ߲߬ ߠߊ߫߸ ߣߊߟߌ߬ߡߎ߲߫ ߊ߬ߟߋ߬ ߞߏ߲ߞߏߘߓߌ߫ ߞߋߟߋ߲ ߣߌ߲߬ ߘߌ߫߸ ߒߞߏ ߛߓߍߛߎ߲߫ ߞߊ߲ߡߊߛߙߋߡߊ ߛߌ߲ߘߌ߫ ߞߊߙߏ.
ߊ߲ ߧߋ߫ ߛߊ߬ߦߌ߬ ߟߴߊߟߎ߫ ߝߏ߬ߟߌ ߡߊ߬ ߕߎ߲߯ ߊ߬ߟߋ߬ ߞߊߙߏ ߣߌ߲߬ ߞߍߟߌ ߘߐ߫ ߒ߬ ߠߊ߫ ߢߐ߲߯ߠߊߞߎߣߎ߲߫ ߞߊߙߏ ߘߌ߫߸ ߊ߲ ߧߋ߫ ߒ߬ ߠߊ߫ ߖߘߍ߬ߞߟߊ߬ߡߦߊ ߣߌ߫ ߒ߬ ߥߙߎߞߌߞߏ ߟߎ߬ ߖߊ߲߬ߖߏ߲ ߠߎ߬ ߘߐߝߐ߰ߓߍ߬ ߟߊ߫ ߢߐ߲߮ ߦߋ߫ ߡߍ߲ ߘߐ߫ ߓߘߍߞߍ߭ ߘߍ߬ߘߐ߬ߦߊ ߢߐ߲߯ߓߍ߲߫ ߞߣߍ ߟߎ߬ ߣߌ߫ ߓߊ߲߬ߓߋ ߟߎ߫ ߞߊ߲߬.
ߏ߬ ߓߟߏߡߵߊ߲ ߓߊߘߋ߲߫ ߛߊߣߌ߲ ߠߎ߬߸ ߒ ߞߵߊ߬ ߟߐ߲߫ ߗߐ߫ ߞߏ߫ ߊߟߎ߫ ߦߴߊ߬ ߞߊ߬ߟߊߡߊ߬߸ ߞߏ߫ ߞߊߙߏ ߣߌ߲߬ ߦߋ߫ ߥߊ߲߬ߞߙߊ߬ ߓߐ߲ߛߐ߲ ߠߎ߬ ߟߊ߫ ߖߊ߲߬ߖߏ߲߬ߓߊ ߟߎ߬ ߞߊߙߏ ߛߊ߲߬ ߞߎ߲ߢߐ߲߮ ߟߋ߬ ߘߌ߫߸ ߞߊߕߙߍ߬ߕߍ߫ ߞߙߎ߬ߞߊ߲߬ߝߎߥߊ߫ ߜߊ߬ߙߊ ߣߌ߫ ߒߞߏ ߛߓߍߛߎ߲ ߛߌ߲ߘߟߌ ߖߊ߲߬ߖߏ߲߬ߓߊ߫ ߝߌ߬ߟߊ ߓߍ߲߭ ߞߊߙߏߓߊ ߣߌ߲߬ ߡߊ߬߸ ߏ߬ ߡߍ߲ ߝߌ߬ߟߊ ߓߍ߯ ߞߊ߬ ߥߛߊ߬ߞߍ߫ ߡߊ߲߬ߘߋ߲߬ߞߊ ߟߎ߬ ߟߊ߫ ߛߊ߲߬ߞߎ߲߬ߞߏ ߘߐ߫߸ ߣߴߊ߬ ߡߊ߫ ߢߊ߬ ߞߏ߫ ߘߎߢߊߞߏ ߣߌ߲߬ ߕߍߣߊ߫ ߘߊ߲߬ ߠߊ߫ ߝߊ߯ߘߐߞߍ ߣߌ߲߬ ߡߊ߬߸ ߊ߬ ߘߏ߲߬ ߓߍߣߊ߫ ߕߎ߬ߜߍ߬ߕߎ߬ߜߍ߫ ߟߋ߬ ߝߏ߫ ߞߊ߬ ߕߊ߯ ߛߋ߫ ߡߊ߰ߙߌ ߛߊ߬ߥߏ߬ߣߊ߲߬ ߕߎߡߊ ߡߊ߬ ߝߊ߯ߘߐߞߍ ߣߌ߫ ߛߋ߰ߘߐ߬ߞߍ߬ ߥߟߎߡߊ߫ ߣߊ߬ߕߐ ߟߎ߬ ߞߣߐ߫ ߝߎߚߎ߫ ߦߊ߬ߣߌ߲߫ ߡߊ߰ߙߌ ߦߋ߫ ߘߊ߲߬ߛߌ߰ ߘߎ߰ߞߟߏ ߟߊ߫ ߓߍߓߊ߯ߦߊ ߟߊ߫.
ߞߏ߬ߣߌ߲߬ ߓߊߏ߬ ߡߊ߲߬ߘߋ߲ ߠߎ߬ ߦߴߊ߬ ߝߐ߫ ߟߊ߫ ߞߏ߫ « ߡߐ߰ ߞߋ߬ߟߋ߲߬ߞߏ߫ ߟߋ߬ ߓߍ߯ ߟߊ߫ »߸ ߡߊ߰ߙߌ ߦߋ߫ ߡߌ߬ߙߌ߲߬ߘߌ ߟߊߞߎߣߎ߲ ߣߴߊ߬ ߟߊߞߛߌ ߛߘߌ߬ ߟߊ߫ ߡߍ߲ ߠߎ߫ ߞߐ߬ߢߐ ߟߊ߫߸ ߊ߲ ߕߊ߫ ߡߐ߰ ߞߋߟߋ߲ ߏ߬ ߟߋ ߣߊ߬ ߡߊ߲߬ߘߋ߲߬ ߡߌߙߌ߲ߘߌ ߟߊ߫ ߞߊ߬ߞߘߐߞߘߐ ߣߌ߫ ߞߊ߬ߞߘߐ ߟߎ߬ ߥߟߏߡߊ߫ ߟߊ߫ ߞߵߊ߬ ߝߙߵߊ߬ߟߎ߬ ߟߊ߫ ߞߊ߬ߞߎߘߊ ߞߊ߲߬߸ ߞߣߵߊ߬ ߦߋ߫ ߞߏ߫ ߛߊ߲߬ߞߎ߲ ߠߎ߬ ߦߋ߫ ߕߊ߬ ߟߊ߫ ߡߌ߬ߙߌ߲߬ߘߌ ߟߊ߫ ߖߊ߲߬ߖߏ߲߫ ߟߊߞߊ߬ߟߌ߬ߕߊ߫ ߞߘߐ߬ߓߊߟߌ ߟߎ߫ ߟߋ߫ ߡߵߊ߬ ߡߌ߬ߙߌ߲߬ߘߌ ߛߣߐ߬ߡߍ ߘߐ߫ ߘߎߢߊ߫ ߞߎ߲߬ߕߊ߮ ߞߣߐ߫߸ ߞߊ߬ ߓߊ߲߫ ߞߵߊ߬ ߟߊߕߍ߰ ߊ߬ ߟߊ߫ ߞߊ߬ߙߊ߲߬ߘߋ߲ ߠߎ߬ ߦߋ߫ ߝߐߟߌ ߣߌ߫ ߛߓߍߟߌ ߘߐ߫߸ ߞߏ߫ ߣߴߊ߲ ߞߍ߫ ߘߊ߫ ߛߊ߲߬ߞߎ߲߫ ߡߌ߬ߘߊ߬ ߟߊ߫߸ ߞߏ߫: ߞߙߎ߬ߞߊ߲߬ߝߎߥߊ߫ ߛߊ߲߬ߞߎ߲ ߠߋ߫ ߓߍ߲߬ߣߍ߲߫ ߊ߬ ߘߐ߫ ߞߏߛߓߍ߫ ߞߊ߬ߡߊߛߐ߬ߘߐ߲߫ ߏ ߖߊ߲߬ߖߏ߲ ߘߊߓߐߞߎ߲ ߣߴߊ߬ ߞߏ߲߭ ߣߴߊ߬ ߣߐ߬ߝߍ߬ߞߏ ߟߎ߬ ߓߍ߯ ߟߐ߲ ߝߍ߬ ߘߐߞߣߍߓߟߏߡߊ߬ ߥߙߊߕߊߕߊ߫.
ߛߊ߲߬ߞߎ߲ ߘߊߡߌߘߊ߫ ߞߊߙߞߏ ߘߐ߫ ߏ߬ ߘߐ߫߸ ߏ߬ ߢߊߦߋߢߊ ߡߊߕߍ߰ߣߍ߲߫ ߊ߬ ߟߊ߫ ߢߊߝߐߟߌ ߟߎ߫ ߟߋ߬ ߞߣߐ߫߸ ߣߴߊ߬ ߡߊ߫ ߢߊ߬ ߕߏ߲ߘߋ߫ ߘߊ߲ߘߐ ߢߌ߲߬ ߠߎ߬ ߟߐ߲ ߞߐ߫:
• ߞߙߌߣߊ߬ ߞߟߊߓߍ߲ ߟߊߞߎߙߊ߲ ߁߂߃߅ ߛߡߊ߬ߘߏ߲߬ߘߊ ߟߊ߫.
• ߓߍ߯ ߟߐ߬ߟߌ ߕߊ߯ ߟߊ߫ ߛߡߊ߬-ߞߍ߬-ߦߙߐ ߟߊ߫ ߛߍ߬ߣߍ ߘߐ߫ ߛߏ߫߸ ߛߣߍ߬ߞߍ߬ߓߊߟߌߦߊ ߞߣߊ߫ ߣߊ߬ ߞߐ߲ߞߐ ߘߌ߫ ߏ߬ ߛߊ߲߬ߠߊ߬ߞߊ ߁߂߃߆ ߟߊ߫.
• ߛߎ߬ߡߊ߲߬ߠߊ߬ߘߏ߲ ߓߍ߯ ߓߊ߲ ߡߊߞߐ߬ߣߐ߲ ߕߟߋ߬ߡߊ ߘߊߡߌߘߊ߫ ߞߊߙߏ ߟߊ߫ ߞߙߎ߬ߞߊ߲߬ߝߎߥߊ ߜߊ߬ߙߊ ߞߍ߫ ߞߊߡߊ߬.
• ߕߟߋ߬ߡߊ ߞߊߙߏ߫ ߝߌߟߊߣߊ߲ ߞߍ ߜߊ߬ߙߊ ߞߣߍ ߡߊߕߍ߰ߟߌ ߣߌ߫ ߜߊ߮ ߣߌ߫ ߜߊߟߊ߲ ߠߎ߬ ߣߌ߫ ߓߊ߲߬ߓߋ ߟߎ߫ ߜߊ߬ߛߌ߬ߟߌ ߟߊ߫ ߓߙߊߕߌ߮ ߟߎ߬ ߓߟߏ߫ ߜߊ߬ߙߊ ߛߌ߲߬ߝߏ߲߬ߧߊ߬ߣߍ߲ ߥߊߟߋߦߊ߫ ߞߊߡߊ߬ ߞߊ߲߬ߜߍ ߟߎ߬ ߓߟߏ߫ ߡߐ߰ߓߊ ߟߎ߬ ߟߊ߫ ߟߐ߬ߒ߬ߞߋ߬ߟߊ ߣߴߊ߬ߟߎ ߢߣߊ߫.
• ߜߊ߬ߙߊ ߘߊߡߌ߬ߘߊ߬ߟߌ ߕߟߋ߬ߡߊ ߞߊߙߏ߫ ߛߓߊߣߊ߲ ߠߊ߫ ߝߎߚߎ߫ ߝߏ߫ ߕߟߋ߬ ߄߀.
• ߞߎ߬ߙߎ߲߬ߘߎ߫ ߁߅߀ ߟߊߘߊ߲ ߕߟߋ߬ ߄߀ ߞߎ߲߬ߕߊ߮ ߞߣߐ߫߸ ߊ߬ ߣߌ߫ ߞߊ߬ ߖߘߍ߬ߡߊ߬ߖߎ߯ ߡߌ߬ߘߊ߬ߣߍ߲ ߠߎ߬ ߞߕߌ߫ ߞߙߌߣߊ߬ ߛߎߘߊ߲ߓߊ߮ ߟߎ߬ ߓߟߏ߫.
• ߞߊ߬ ߜߊ߬ߙߊ ߟߊߞߎߙߊ߲߫ ߡߊ߲߬ߛߊ߬-ߞߎ߬ߘߊ߬-ߟߊ߬ߛߌ߮ ߡߊ߬ ߡߊ߲߬ߘߋ߲߬ߞߎߘߊ߫ ߞߎ߲߬ߠߊ߫߸ ߞߊ߬ ߕߊ߯ ߊ߬ ߟߊߛߌ߰ ߊ߬ ߟߊ߫ ߥߊ߰ߣߍ߲ ߘߐ߫ ߡߊ߲߬ߘߋ߲߬ ߞߎߓߋ ߟߊ߫ « ߢߊ߬ߣߌ߲߬ߓߊ߫ » ߕߟߋ߬ ߄߀ ߘߝߊ ߡߊ߬.
ߒ߬ߓߊ߬ ߞߏ ߟߎ߬ ߘߊߕߐߡߦߊߢߊ ߝߏߘߋ߫ ߛߟߏ߬ߡߊ߯ߣߊ߫ ߓߟߏ߫ ߘߐ߬ߝߐ ߢߊߝߐߢߊ ߡߊ߬ ߢߊ ߣߌ߲߬ ߞߊ߲߬ ߟߊ߬ߘߛߏ߬ߓߟߏߡߊ߬ ߒ߬ ߓߟߏ߫߸ ߏ߬ ߟߋ ߣߊ߬ ߞߙߎ߬ߞߊ߲߬ߝߎߥߊ߫ ߜߊ߬ߙߊ ߞߊߙߏ ߞߍ߫ ߟߊ߫ « ߞߏ߲ߞߏߘߌ߬ߓߌ » ߞߊߙߏߓߊ ߣߌ߲߬ ߘߌ߫ ߛߋ߲ߛߋߘߋ߲߫.
ߓߊߏ߬ ߡߊ߲߬ߘߋ߲߫ ߞߋ߲߬ߘߋ ߥߟߊ߫ -ߞߋߣߌߞߋ߫- ߛߌߦߊ߫ « ߛߊ߲ߞߐ » ߣߌ߫ ߛߌ߬ߞߘߐ ߟߎ߬ ߓߍ߯ ߦߋ߫ ߟߊߘߏ߲߬ ߠߊ߫ « ߓߌ߲ߠߊߥߎߟߋ߲ » ߠߋ߬ ߟߊ߫߸ ߞߵߏ߬ ߟߊߕߎ߲߰ߠߊ߬ ߞߊߙߏ ߞߍ߫ ߞߣߍߡߊߕߍ߮ ߣߴߊ߬ ߘߐߓߍ߲߭ ߘߌ߫ « ߞߏ߲ߞߏߜߍ » ߟߊ߫߸ ߞߵߏ߬ ߟߊߕߎ߲߰ߠߊ ߞߍ߫ ߜߊ߬ߙߊ ߡߐ߰ߓߊ߬ ߡߊߞߟߌߣߍ߲ ߠߎ߬ ߣߴߊ߬ ߢߣߊߓߊ߯ߦߟߊ ߟߎ߬ ߟߊߛߣߍ ߣߴߊ߬ߟߎ߬ ߟߊߓߍ߲߭ ߣߌ߫ ߜߊ߬ߙߊ ߞߍߟߌ ߘߌ߫ « ߕߙߊߓߊ » ߟߊ߫.
ߊ߰ ߜߍ ߟߋ߬ ߘߐ߫ ߣߌ߲߬ ߘߐ߫߸ ߞߏ߫ ߜߊ߬ߙߊ ߘߊߡߌ߬ߘߊ߬ߣߍ߲߬ ߓߊ߯ ߞߍ߫ ߕߙߊߓߊ ߕߎ߬ߡߊ ߛߊ߬ߓߊ ߛߌ߫ ߟߊ߫ -ߕߟߋ߬ ߕߊ߲߬ ߝߟߐ߸ ߥߟߊ߫ ߕߊ߲߫ ߝߌߟߊߣߊ߲߸ ߤߊߡߊ߲ߕߍ߫ ߕߊ߲߫ ߛߓߊߣߊ߲- ߕߟߋ߬ ߓߌߣߊ߯ߣߌ߲ ߦߋ߫ ߘߝߊ߫ ߟߊ߫ ߞߏ߲߲ߞߏߘߌ߬ߓߌ ߕߎ߬ߡߊ߫ ߛߊ߬ߓߊ ߟߋ߬ ߞߣߐ߫ -ߊ߬ ߕߟߋ߬ ߁߀ ߝߟߐ߸ ߥߟߊ߫ ߕߟߋ߬ ߁߀ ߝߌߟߊߣߊ߲߸ ߤߊߡߊ߲ߕߍ߫ ߕߟߋ߬ ߁߀ ߛߓߊߣߊ߲ ߠߊ߫ ߛߎߋ߫-، ߣߌ߲߬ ߞߘߐ ߦߋ߫ ߟߋ߬߸ ߞߏ߫ ߡߊ߰ߙߌ߫ ߖߘߊ߫ ߛߏ߰ߟߏ߲߫ ߞߘߎ߬ߡߊ ߞߐ߲ߘߍ߫ ߡߍ߲ ߛߎߥߊ߲ߘߌ߫ ߘߊ߫ ߜߊ߬ߙߊ ߢߣߊߓߊ߮ ߟߎ߬ ߓߟߏ߫ ߝߊ߲߰ߡߊ ߘߌ߫ ߏ߬ ߟߏ߲ ߞߊ߲ߠߊ߫߸ ߏ߬ ߛߍ߲߬ߛߍ߲߬ ߘߊ߫ ߞߊ߬ ߕߊ߯ ߊ߬ ߣߐ߬ߡߐ߫ ߊ߬ ߟߊ߫ ߛߋߓߊ߯ߦߊ ߣߴߊ߬ ߟߊ߫ ߡߊ߲߬ߛߊ߬ߦߊ ߥߊ߰ߣߍ߲ ߞߊ߲߬ ߞߏ߲ߞߏߘߌ߬ߓߌ ߟߋ߬ ߟߊ߫ « ߢߊ߬ߣߌ߲߬ߓߊ߬ » ߛߏ ߞߣߐ߫.
ߒ߬ߓߊ߬ ߓߊߏ߬߸ ߘߎߢߊ߫ ߡߌ߬ߙߌ߲߬ߘߌ߫ ߛߊ߲߬ߞߎ߲߬ߕߌ߮ ߓߍ߯ ߟߊ߫ ߛߊ߲߬ߞߎ߲ ߦߋ߫ ߘߊߡߌ߬ߘߊ߬ ߟߴߊ߬ߟߎ߬ ߟߊ߫ ߖߊ߲߬ߖߏ߲߬ߓߊ ߘߏ߫ ߟߋ߫ ߡߊ߬߸ ߏ߬ ߟߋ ߣߊ߬ ߥߊ߲߬ߞߙߊ߬ ߛߌߦߊ ߟߎ߬ ߟߊ߫ ߛߊ߲߬ߞߎ߲߬ߞߏ ߕߊ߬ ߟߊ߫ ߡߊ߲߰ ߛߏ߲߬ߖߘߊ߫ ߟߊߛߌ߰ߟߌ ߏ ߡߊ߬ ߛߋߓߊ߯ߦߊ ߥߊ߰ߣߍ߲ ߘߐ߫ ߊ߬ ߢߣߊߓߊ߮ ߟߎ߬ ߓߟߏ߫߸ ߞߙߎ߬ߞߊ߲߬ߝߎߥߊ߫ ߜߊ߬ߙߊ ߟߊߞߎߙߊ߲ ߟߊߓߊ߲ߣߍ߲߫ ߏ߬ ߡߍ߲ ߡߊ߬߸ ߞߵߏ߬ ߞߍ߫ ߡߊ߲߬ߘߋ߲߫ ߝߊ߲߰ߡߟߊ߬ߓߊ ߘߊߡߌ߬ߘߊ߬ߣߍ߲ ߘߌ߫ ߞߊ߬ ߕߏ߫ ߓߊߟߏ߫ ߘߐ߫ ߝߊ߯ߘߐߞߍ߫ ߟߏ߯ߟߎ߫ ߡߊߜߍ߲߫ ߞߎ߲߬ߕߊ߯ ߞߣߐ߫.
ߞߏ߲ߞߏߘߌ߬ߓߌ ߞߊߙߏ ߣߌ߲߬ ߛߎߥߊ߲ߘߌ ߟߋ߬ ߞߋߟߋ߲ ߞߏߛߐ߲߬߸ ߡߌ߬ߙߌ߲߬ߘߌ߬ ߞߋߟߋ߲ ߦߴߊ߬ ߟߊ߫ ߞߏ ߡߍ߲ ߠߎ߫ ߕߊ߬ ߟߊ߫ ߛߎ߲ߞߎ߲ ߖߊ߲߬ߖߏ߲߬ߓߊ ߘߏ߫ ߡߊ߬߸ ߦߏ߫ ߖߌߓߐߓߊ ߛߊ߲߭߸ ߝߐ߬ߝߐ ߛߊ߲߭߸ ߟߏ߬ߟߏ߬ߖߌ߮ ߛߊ߲߭߸ ߘߎ߰-ߦߙߍߦߙߍ ߛߊ߲߭߸ ߕߊߓߐߓߊ ߛߊ߲߭߸ ߣߍߣߍߓߊ ߛߊ߲߭߸ ߊ߬ ߣߌ߫ ߕߙߊߓߊ ߛߊ߲߭߸ ߓߟߏߓߐ߫ ߘߊ߫ ߏ߬ ߟߎ߬ ߓߍ߯ ߘߐ߫ ߟߋ߬ ߞߋߟߋ߲ߘߌ߫ ߘߏߦߌ߲߫، ߓߊ ߏ߬ ߟߎ߬ ߦߋ߫ ߛߎ߲ߞߎ߲ ߞߏ ߟߎ߫ ߟߋ߬ ߘߌ߫ ߡߍ߲ ߕߍ߫ ߡߌ߬ߙߌ߲߬ߘߌ߬ ߛߌ߫ ߟߊ߫ ߖߊ߲߬ߖߏ߲߬ ߘߌ߫.
ߌ ߕߍ߫ ߦߊ߬ߤߎ߬ߘߌߦߊ ߣߌ߫ ߌߛߊߟߞߊ ߣߌ߫ ߛߌ߬ߟߊ߬ߡߊ ߣߌ߫ ߤߌ߲ߘߌ ߣߌ߫ ߛߌߣߌ߲ߞߊ ߣߌ߫ ߌߙߊ߲ߞߊ ߣߌ߫ ߛߊ߲߬ߞߎ߲߬ߕߌ߰ ߡߌߙߌ߲ߘߌ߫ ߛߌ߫ ߟߊ߫ ߛߊ߲߬ߞߎ߲ ߕߊ߬ߣߍ߲ ߦߋ߫ ߟߊ߫ ߞߍߢߊ ߏ߬ ߘߏ߫ ߡߊ߬ ߏ߬ ߟߋ ߘߐ߫ ߡߎ߰ߡߍ߫.
ߒ߬ߓߊ߬ ߛߴߊ߲ ߘߌ߫ ߕߊ߬ߡߌ߲߫ ߡߌ߬ߙߌ߲߬ߘߌ ߟߊ߫ ߖߊ߲߬ߖߏ߲߬ߞߏ ߢߊߦߋ߫ ߟߊ߫߸ ߊ߬ ߦߴߊ߬ ߟߊ߫ ߛߊ߲߬ߞߎ߲ ߕߊ߬ ߟߊ߫ ߡߍ߲ ߡߊ߬ ߣߌ߫ ߛߎ߲ߞߎ߲ ߕߊ ߕߍ߫:
 ߖߡߊ߬ߣߊ ߓߍ߯ ߟߊ߫ ߘߍ߲ߒߖߘߍ߬ߟߊ ߟߏ߲ ߣߴߊ߬ ߞߊߙߏ ߣߴߊ߬ ߛߊ߲߭ ߦߴߊ߬ ߟߊ߫ ߛߊ߲߬ߞߎ߲ ߘߏ߫ ߟߋ߬ ߘߌ߫.
 ߡߐ߱ ߞߋ߬ߟߋ߲߬ߞߋ߬ߟߋ߲߬ߠߊ߫ ߡߏߦߌߟߏ߲ ߣߴߊ߬ ߞߊߙߏ ߣߴߊ߬ ߛߊ߲߭ ߦߴߊ߬ ߟߊ߫ ߛߊ߲߬ߞߎ߲ ߘߏ߫ ߟߋ߬ ߘߌ߫.
 ߛߌ߲߬ߝߏ߲߬ߧߊ߬ߟߌ߬ߘߊ߫ ߛߌ߲ߘߌߣߍ߲߫ ߕߎ߬ߡߘߊ߬ ߡߊߟߐ߲ߣߍ߲ ߓߍ߯ ߛߌ߲ߘߌ߫ ߟߏ߲ ߣߴߊ߬ ߞߊߙߏ ߣߴߊ߬ ߛߊ߲߭ ߦߴߊ߬ ߟߊ߫ ߛߊ߲߬ߞߎ߲ ߘߏ߫ ߟߋ߬ ߘߌ߫. ߞߊ߬ ߕߊ߯ ߏ߬ ߢߊ.
ߣߌ߲߬ ߠߋ߬ ߞߏߛߐ߲߬ ߏ߬ ߓߍ߯ ߦߴߊ߬ ߕߊ ߏ߬ ߢߊ߰ߢߊ߮ ߞߍ߫ ߟߊ߫ ߞߊ߬ ߓߍ߲߬ ߕߎ߬ߡߊ߬ߘߊ ߏ߬ ߟߎ߫ ߡߊ߬ ߛߊ߲߭ ߞߣߐ߫߸ ߞߏ߬ߣߌ߲߬ ߝߋߎ߫ ߛߎ߲ߞߎ߲ ߓߊ߲ߘߊߦߟߍߡߊ߲ ߣߴߊ߬ ߘߐߞߏ߫ ߖߊ߯ߓߊߕߐߦߊ ߞߏ ߟߎ߬ ߝߋ߲߫ ߕߍ߫ ߊ߬ ߛߌ߫ ߕߊ߫ ߘߌ߫.
ߒ߬ߓߊ߬ ߓߊߏ߬ ߞߊߙߏ ߣߌ߲߬ ߦߋ߫ ߊ߲ ߢߐ߲߮ ߕߟߏߘߓߐ߫ ߞߊߙߏ ߟߋ߬ ߘߌ߫ ߦߏ߫ ߊ߲ ߕߊ߬ߡߌ߲߬ ߘߊ߫ ߏ߬ ߢߊߝߐ ߞߊ߲߬ ߢߊ ߡߍ߲߸ ߊ߲ ߧߋ߫ ߣߌ߲߬ ߓߍ߯ ߘߊ߲߬ߕߍ߰ ߟߴߊߟߎ߫ ߦߋ߫ ߏ߬ ߟߋ ߘߐ߫ ߣߌ߲߬ « ߒߞߏ ߥߙߎߞߌ ߛߌ߲߬ߝߏ߲߬ߧߊ߬ߟߌ߬ߘߊ߫ ߖߊ߯ߓߡߊ » ߓߊ߲߬ߓߋ ߞߊ߲߬߸ ߓߊߏ߬ ߘߊߞߘߐ ߟߋ߬ ߞߎߡߊ ߝߐ߫ ߟߊ߫ ߕߟߏߞߎߘߊ ߦߋ߫، ߊ߬ ߘߐߛߊ߬ߦߌߛߊ߬ߦߌ ߏ߬ ߟߋ ߝߣߊ߫ ߦߴߊ߬ ߕߏ߫ ߟߴߊ߬ ߡߊ߬ ߘߎߢߊ߫ ߞߎ߲߬ߕߊ߮ ߞߣߐ߫، ߊ߲ ߧߋ߫ ߡߊ߰ߙߌ߬ߓߊ ߘߊߟߌ߫ ߟߴߊ߬ ߢߊߦߋߟߌߞߏ߫ ߢߌߡߊ ߟߊ߫.
ߊ߬ ߘߏ߲߬ ߡߍ߲ ߦߋ߫، ߡߊ߰ߙߌ߬ ߊߟߊ߫ ߖߊ߲߬ ߦߋ߫ ߡߊ߲߬ߘߋ߲߬ ߡߌߙߌ߲ߘߌ ߘߐ߫ ߟߋ߫ ߘߋ߬߸ ߓߊߏ߬ ߊ߬ߟߋ ߝߟߐ߫ ߟߋ߫ ߣߊ߬ ߡߊ߲߬ߘߋ߲߬ ߡߌߙߌ߲ߘߌ ߟߊ߫ ߛߊ߲߬ߞߎ߲ ߣߌ߲߬ ߞߣߍ ߡߊߕߍ߰ ߟߴߊ߲ ߧߋ߫ ߡߐ߰ߦߊ ߘߐ߬ߝߐ ߞߣߐ߫ ߞߊ߬ ߓߎ߬ߘߎ߲ ߓߐ߫ ߊ߬ ߟߊ߫ ߞߵߊ߬ ߟߛߊߣߌ߲ߧߴߊ߬ ߛߎߥߊ߲ߘߌ߫ ߕߎߡߊ ߢߍ߫ ߊ߲ ߓߟߏ߫، ߏ߬ ߞߍߣߍ߲߫ ߘߌ߬؟
• ߝߟߐ߫߸ ߌߛߊߟߞߊ ߟߎ߬ ߟߊ߫ ߛߊ߲߭ ߞߊߙߏ߫ ߝߟߐ ߕߎ߲߬ ߦߋ߫ « ߞߏ߲ߞߏߘߌ߬ߓߌ » ߣߌ߲߬ ߠߋ߬ ߘߌ߫، ߞߏ߬ߣߌ߲߬ ߡߊ߲߬ߛߊ ߘߏ߫ ߟߋ߫ ߞߵߊ߬ ߓߐ߫ ߊ߬ ߟߊ߫ ߞߵߊ߬ ߦߟߍ߬ߡߊ߲߫ « ߓߌ߲ߠߊߥߎߟߋ߲ » ߠߊ߫، ߡߐ߱ ߟߎ߬ ߟߓߊߟߌߦߊ ߏ߬ ߟߊ߫߸ ߊ߬ ߞߍ߫ ߘߊ߫ ߥߎߦߊߝߐ߫ ߞߊߙߏ ߘߌ߫ ߏ߬ ߟߎ߬ ߟߊ߫ ߡߟߋߞߎߦߊ ߘߐ߫ ߏ߬ ߟߋ ߘߐ߫، ߊ߬ ߘߏ߲߬ ߕߏ߫ ߘߊ߫ ߏ߬ ߡߊ߬.
• ߝߌߟߊߣߊ߲߫߸ ߊ߲ ߠߊ߫ ߕߏ߲ߘߋ ߟߎ߬ ߢߊߝߐߢߊ ߦߴߊ߬ ߦߌ߬ߘߊ߬ ߟߊ߫ ߞߏ߫ ߞߙߎ߬ߞߊ߲߬ߝߎߥߊ߫ ߜߊ߬ߙߊ ߞߍߣߍ߲߫ « ߞߏ߲ߞߏߘߌ߬ߓߌ » ߟߋ߬ ߟߊ߫ ߛߎߋ߫، ߡߊ߰ߙߌ ߣߵߊ߬ ߟߊߕߍ߰ ߟߊ߫ ߞߊ߬ ߓߍ߲߬ ߏ߬ ߟߋ ߡߊ߬.
• ߛߓߊߣߊ߲߫߸ ߕߎ߲߬ߞߎߙߎ߲߫ ߞߏ߬ߣߌ߲߬ ߕߍ߫ ߊ߬ ߘߐ߫ ߞߏ߫: ߒߞߏ ߛߓߍߛߎ߲߫ ߞߊ߲ߡߊߛߙߋߡߊ ߛߌ߲ߘߌߣߍ߲߫ « ߞߏ߲ߞߏߘߌ߬ߓߌ߫ » ߞߋߟߋ߲ ߏ߬ ߟߋ ߟߊ߫.
ߒ߬ߓߊ߬ ߣߌ߫ ߡߊ߰ߙߌ߬ ߊߟߊ߫ ߟߊ߫ ߞߣߍߡߊߕߍ߮ ߕߍ߫ ߡߊ߲߬ߘߋ߲߬ ߡߙߌߘߌ ߦߋ߫߸ ߞߊ߬ ߌߛߟߊߞߊ߫ ߛߊ߲ߞߎ߲ ߕߎ߬ߡߘߊ߬ ߝߟߐ ߓߐ߫ ߞߏ߲ߞߏߘߌ߬ߓߌ ߟߊ߫߸ ߊ߲ ߕߎ߲߬ ߓߊ߯ ߞߙߎ߬ߞߊ߲߬ߝߎߥߊ߫ ߜߊ߬ߙߊ ߕߎ߬ߡߊ߬ߘߊ ߥߟߊ߫ ߒߞߏ ߛߓߍߛߎ߲ ߛߌ߲ߘߌ߫ ߏ߬ ߝߋ߲-ߏ-ߝߋ߲߫ ߛߎߥߊ߲ߘߌ߫ ߊ߲ ߠߊ߫ ߛߊ߲߬ߞߎ߲߬ߞߏ ߘߐ߫߸ ߊ߬ ߕߎ߲߬ ߘߌ߫ ߖߊ߬ߕߋ߬ ߦߏ߫ ߊ߲ ߠߵߊ߬ ߕߊ߬ ߟߊ߫ ߌߛߊߟߞߊ߫ ߛߊ߲ߞߎ߲ ߕߎ߬ߡߊ߬ߡߊ߬ߘߊ ߟߋ߫ ߡߊ߬ ߛߎߋ߫߸ ߤߊߟߌ߬ ߣߴߊ߲ ߞߍ߫ ߘߊ߫ ߕߎ߬ߢߊ߫ ߞߊ߲߬ ߦߏ߫ ߊ߲ ߧߋ߫ ߢߊ ߡߍ߲ ߞߊ߲߬ ߣߌ߲߬ ߓߌ߬.
ߒ߬ߓߊ߬ ߣߌ߫ ߡߊ߰ߙߌ߬ ߊߟߊ߫ ߟߊ߫ ߞߣߍߡߊߕߍ߮ ߕߍ߫ ߡߊ߲߬ߘߋ߲߬ ߡߌߙߌ߲ߘߌ ߦߋ߫ ߛߊ߲߬ߞߎ߲߬ߞߏ ߘߐ߫߸ ߒߞߏ ߛߓߍߛߎ߲ ߛߌ߲ߘߌ ߕߎ߬ߡߊ߬ߘߊ -ߞߏ߲ߞߏߘߌ߬ߓߌ- ߕߎ߲߬ ߘߌ߫ ߝߏ߬ߘߏ߫ ߞߙߎ߬ߞߊ߲߬ߝߎߥߊ߫ ߜߊ߬ߙߊ ߕߎ߬ߡߊ߬ߘߊ ߡߊ߬، ߊ߬ߟߎ߫ ߘߏ߲߬ ߓߍ߲߬ߣߍ߲߫ ߞߊߙߏ߫ ߞߋߟߋ߲ ߏ߬ ߡߊ߬ ߟߋ߬߸ ߛߊ߫ ߣߌ߫ ߞߙߎ߬ߞߊ߲߬ߝߎߥߊ߫ ߜߊ߬ߙߊ ߡߊ߫ ߞߍ߫ ߒ߬ ߠߊ߫ ߛߊ߲߬ߞߎ߲߫ ߘߌ߫߸ ߒߞߏ ߛߓߍߛߎ߲ ߛߌ߲ߘߟߌ ߕߎ߲߬ ߘߌ߫ ߛߋ߫ ߞߍ߫ ߟߴߊ߬ ߘߌ߫ ߟߋ߬ ߛߎߋ߫، ߏ߬ ߘߏ߲߬ ߕߎ߲߬ ߓߊ߯ ߞߍ߫ ߢߊ߫ ߛߌ߫ ߞߊ߲߬ ߊ߬ « ߞߏ߲ߞߏߘߓߌ߫ » ߟߊߝߘߏ߫ ߕߎ߲߬ ߕߍ߫.
ߏ߬ ߘߐ߫߸ ߞߏ߲ߞߏߘߓߌߞߏ ߦߋ߫ ߒ߬ ߠߊ߫ ߞߊߙߏ߫ ߡߊ߲߬ߕߊ߬ߣߌ߲߬ߡߊ ߘߌ߫ ߕߋ߲߬ ߠߋ߬ ߓߊߘߋ߲ ߠߎ߬߸ ߡߊ߲߬ߘߋ߲߫ ߛߊ߲߬ߞߎ߲ ߠߋ߬߸ ߒߞߏ ߛߓߍߛߎ߲ ߛߌ߲ߘߌ߫ ߞߊߙߏ ߟߋ߬߸ ߊ߲ ߡߐ߬ߟߐ߲߬ߦߊ߬ ߞߊߙߏ ߟߋ߬، ߏ߬ ߓߟߏߡߊ߬߸ ߊ߬ ߡߊ߲߫ ߞߊ߲߫ ߏ߬ ߟߋ ߘߐ߫ ߢߊ ߛߎ߯-ߎ-ߛߎ߯ ߡߊ߬ ߊ߲ ߧߋ߫ ߞߍ߫ ߊ߲ ߞߎ߲߬ߝߍ߬ ߞߊߙߏ ߣߌ߲߬ ߠߊ߫ ߞߏߢߊ ߘߐ߫߸ ߞߵߊ߬ ߞߍ߫ ߥߎߦߊߝߐ ߣߌ߫ ߞߊ߬ߙߏ߲ ߢߐ߲߯ߠߠߊߥߍ߲ߖߍ߫ ߞߊߙߏ߫ ߜߊ߲ߛߊ߲ ߘߌ߫ ߒ ߘߊ ߦߋ߫ ߖߟߊ ߟߊ߫، ߕߎ߬ߢߊ ߞߊߙߏ ߟߋ߬߸ ߥߙߎߞߌ ߞߊߙߏ ߟߋ߬߸ ߒ߬ ߠߊߞߎߣߎ߲ ߞߊߙߏ ߖߊ߯ߕߋ ߟߋ߬، ߏ߬ ߓߟߏߡߊ߬ « ߒߞߏ ߥߙߎߞߌ ߛߌ߲߬ߝߏ߲߬ߧߊ߬ߟߌ߬ ߖߊ߯ߓߡߊ » ߛߓߍߘߊ ߣߴߊ߬ ߛߌ߲߬ߝߏ߲ ߠߎ߬ ߕߍ߫ ߓߊ߲߫ ߊ߬ ߝߐ߫ ߟߊ߫ ߒߞߏ ߡߌߙߌ߲ߘߌ ߦߋ߫ ߞߏ߫ ߊߟߎ߫ ߛߊ߲߬ߓߍߛߊ߲߬ߓߍ߫߸ ߥߟߴߊߟߎ߫ ߛߊ߲߬ߓߍ߲ߛߊ߲߬ߓߍ߲߫ ߞߊߙߏ ߣߌ߲߬ ߡߎ߰ߡߍ ߟߊ߫߸ ߞߊ߬ߓߌ߯ ߊ߬ ߟߏ߲߫ ߝߟߐ ߟߊ߫ ߞߊ߬ ߕߊ߯ ߛߋ߫ ߊ߬ ߟߏ߲߫ ߠߊߓߊ߲ ߡߌ߬ߛߍ߲߬ ߟߊ߬ߓߊ߲ ߠߊ߫.
ߏ߬ ߘߐ߫߸ ߊߟߎ߫ ߛߊ߲߬ߓߍߛߊ߲߬ߓߍ߫ ߝߊ߬ߘߌ߬ߘߐ߬ߞߍ߲ߘߍߦߊ߫ ߟߊ߫߸ ߖߘߍ߬ߟߐ߲߫ ߠߊ߫߸ ߛߌ߲߬ߝߏ߲߬ߧߊ߬ߟߌ߫ ߟߊ߫ ߥߙߎߞߌ߫ ߟߊ߫߸ ߒߞߏߟߊ߲ߘߌߦߊ߫ ߟߊ߫߸ ߊ߬ ߗߋߢߊ߬ߟߌ߫ ߟߊ߫ ߕߎ߬ߡߊ߬ߓߍ߯.
ߞߎ߲߬ߝߊ߮ ߘߐ߫،..
ߊ߲ ߧߋ߫ ߒߞߏ ߘߏ߲߬ߞߏ ߓߍ߯ ߡߊߛߙߊ߬ ߟߊ߫߸ ߛߟߏ߬ߡߊ߯ߣߊ߫ ߟߊߘߍ߲߱ ߠߊ߫ ߝߐߕߊ ߣߌ߫ ߞߍߕߊ ߘߐ߫߸ ߓߊ߯ߙߊ߫ ߓߟߏߕߍ߰ߓߊߟߌ ߘߐ߫ ߕߎߜߍ߯߸ ߞߵߏ߬ ߞߍ߫ ߥߍ߬ߣߍ ߘߐ߫ ߡߎ߬ߢߎ߲ ߞߐ߬ߣߐߡߊ߬߸ ߕߡߌߣߊ߲ߘߌߦߊ ߘߐ߫߸ ߊ߬ ߣߌ߫ ߢߊߟߐ߲ ߘߐ߫، ߞߵߏ߬ ߟߊߥߟߌ߬ ߛߴߊ߲ ߘߌ߫ ߕߊ߬ߡߌ߲߬ ߞߍ߫ ߟߴߊ߬ ߞߐ߫ ߢߌߡߊ߫ ߘߌ߫.
ߡߐ߰ ߞߣߴߊ߬ ߡߙߌ߫ ߝߋߎ߫ ߞߏ߫ ߒߞߏ ߡߐ߰ߟߊ߬ߡߊ ߟߋ߬ ߛߌ߬ߞߛߊߓߌ ߘߐ߫߸ ߊ߰ ߞߍ߫ ߊ߲ ߓߍ߯ ߞߣߐ߫ ߟߋ߬ ߞߏ߫ ߊ߬ ߟߊ߫ ߓߍߓߊ߯ߦߊ ߛߎߡߊ߲ߣߍ߲߫ ߘߎߢߊ߫ ߛߌ߭ ߕߐ߭ ߟߋ߫ ߡߊ߬߸ ߌ ߦߴߊ߬ ߟߐ߲߫ ߛߊ߲ߖߌ߫ ߓߌߛߋߦߌ߲߫ ߡߊߜߍ߲ ߕߍ߫ ߝߏߦߌ߬ ߘߌ߫ ߏ߬ ߟߊ߫ ߢߋߙߌ߲ߦߊ ߕߟߋ߬ ߝߟߐ ߘߐ߫، ߒ߬ߓߊ߬ ߊ߰ ߞߍ߫ ߊ߲ ߞߣߐ߫ ߕߋ߲߬ ߠߋ߬ ߛߎߋ߫ ߞߵߊ߬ ߟߊ߫ ߒߞߏ ߗߋߢߊ߬ߟߌ ߞߊ߲߬ ߘߊߞߎ߲ ߛߎ߮ ߓߍ߯ ߘߏ߫ ߘߐ߫ ߣߌ߫ ߢߌ߬ߣߊ߬ߓߐ߬ߟߌ߫ ߕߍ߫، ߞߏ߬ߣߌ߲߬ ߞߊ߬ ߓߘߍ߬ߡߊ ߜߊ߲߬ߛߊ߲ ߞߍ߫ ߒ߬ ߠߊ߫ ߞߏߟߊߕߊ߯ߡߢߊ ߘߌ߫߸ ߞߵߏ߬ ߓߍ߯ ߕߊ߬ ߞߵߊ߬ ߟߊ߫ ߓߍ߯ ߞߍ ߞߊ߲߬ ߒ߬ ߛߊ߬ߣߊ߲߬ߞߎ߲ ߘߌ߫ ߞߋߟߋ߲ߘߌ߫߹ ߏ߬ ߓߟߏߡߊ߬߸ ߞߟߍ߬ ߕߍ߫ ߥߦߐ߬ ߕߍ߫߸ ߝߎ߬ߙߎ߲߬ߞߎ߬ߟߌ߫ ߟߋ߫ ߖߘߍ߬ ߕߍ߫ ߡߐ߰ ߛߌ߫ ߟߊ߫߸ ߓߊߏ߬ ߓߍ߯ ߘߌ߫ ߞߏ ߘߏ߫ ߢߊ߬ ߒߞߏ ߦߋ߫ ߗߐ߫ ߊ߬ ߘߌ߫ ߡߍ߲ ߠߊߣߐ߬.
ߒߞߏ ߣߌ߫ ߛߋߒߞߏߟߦߊ ߟߊ߫ ߢߐ߲߯ߓߍ߲ ߓߌ߬ ߕߎ߬ߡߊ ߟߊ߫߸ ߊ߬ ߡߊ߫ ߘߊ߲߬ ߒߞߏ ߛߓߍߟߌ ߟߊߍ߲ߛߍ߲ ߡߊ߬ ߞߊ߬ߝߊ ߟߎ߬ ߘߐߙߐ߲߫ ߞߣߐ߫߸ ߊ߬ ߓߘߊ߫ ߛߋ߫ ߕߟߋ߬ߓߊ߮ ߟߎ߬ ߣߌ߫ ߓߟߐߟߐ ߞߊߡߊ߲ ߘߐ߫ ߞߏߛߓߍ߫. ߊ ߠߊ߫ ߞߊ߲ ߓߘߊ߫ ߟߊߘߏ߲߬ ߘߟߊߡߌߘߊߟߌ ߢߎߡߍߙߋ߲ߡߊ ߟߎ߬ ߘߐ߫ ߘߎߢߊ߫ ߟߐ߲ߠߌ߲ߧߊ ߜߊ߬ߙߊ߫ ߓߟߋߓߟߋ ߟߎ߬ ߘߐ߫. ߏ߬ ߦߋ߫ ߡߌ߬ߙߌ߲ߓߊ߫ ߟߋ߬ ߘߌ߫. ߊ ߧߋ߫ ߢߐ߲߯ ߓߟߏߡߌ߬ߘߊ߬ ߞߊ߬ ߒߞߏ ߟߊߘߏ߲߬ ߛߋߒߞߏߟߦߊ ߞߊߡߊ߲ ߘߐ߫ ߓߘߍߞߍ߭߸ ߞߵߊ߬ ߟߊߊ߯ߙߊ߫ ߊ ߠߊ߫ ߜߋߟߋ߲ߜߋߟߋ߲߫ ߝߙߍߕߍ߫ ߟߎ߬ ߛߓߍ ߘߐ߫߸ ߊ߬ ߣߌ߫ ߞߵߊ߬ ߞߍ߫ ߓߊ߯ߙߊ߫ ߞߊ߲ ߘߌ߫،ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߣߌ߫ ߒߞߏ ߡߊ߬ߞߊ߲߬ߞߊ߲߬ߠߌ߲ ߦߋ߫ ߘߊߡߌ߬ߘߊ߬ ߟߊ߫ ߒ߬ ߠߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߠߋ߬ ߝߣߊ߫ ߘߐ߫. ߊ ߧߋ߫ ߒߞߏ ߟߊߊ߯ߙߊ߫ ߊ ߠߊ߫ ߖߎ߬ߟߊ߬ߦߊ ߟߎ߬ ߘߐ߫߸ ߦߏ߫ ߊ ߠߊ߫ ߝߎ߲ߞߎ߲ ߠߎ߬ ߣߴߊ ߠߊ߫ ߜߍߓߏ߲ ߠߎ߬ ߟߊ߫ ߞߏߢߊ ߟߎ߬ ߘߐ߫. ߤߊߟߌ߬ ߣߴߊ ߦߋ߫ ߛߋ߫ ߟߊ߫ ߞߍ߫ ߟߊ߫߸ ߊ߲ ߧߋ߫ ߒ߬ ߠߊ߫ ߞߊ߲ ߛߓߍߟߌ ߟߊߓߊ߯ߙߊ߫. ߏ߬ ߘߌ߫ ߒߞߏ ߞߍ߫ ߞߊ߲߫ ߢߣߊߡߊ߫ ߘߌ߫ ߡߍ߲ ߦߋ߫ ߓߊߟߏ߫ ߟߊ߫ ߡߌ߬ߙߌ߲߬ߘߌ ߟߊ߫ ߢߣߊߡߊ ߞߎ߲߬ߕߊ߮ ߓߍ߯ ߘߐ߫߸ ߞߊ߬ ߓߐ߫ ߥߎ߬ߙߊ߬ߕߟߋ ߡߊ߬ ߞߊ߬ ߛߋ߫ ߥߎ߬ߙߊ ߣߌ߫ ߛߎ ߡߊ߬، ߡߊ߲߬ߘߋ߲߫ ߢߐ߲߯ߓߍ߲ ߣߌ߫ ߘߋ߲ߡߌߛߍ߲ ߠߎ߬ ߟߊߟߐ߲ߠߌ߲ ߞߙߎ߬ߞߊ߲߬ߝߎߥߊ߫ ߜߊ߬ߙߊ ߡߍ߲ ߞߍ߫ ߘߊ߫ ߞߏ߲ߞߏߘߌ߬ߓߌ ߟߊ߫߸ ߏ߬ ߦߴߊ߬ ߦߌ߬ߘߊ߬ ߟߊ߫ ߟߋ߬ ߞߏ߫ ߓߍ߲߭ ߣߌ߫ ߢߐ߲߯ߢߊߦߋ ߟߋ߬ ߡߊ߲߬ߘߋ߲߫ ߝߊ߲߬ߞߊ ߘߌ߫. ߊ ߧߋ߫ ߢߐ߲߯ ߠߊߘߍ߬߸ ߞߊ߬ ߓߊ߯ߙߊ߫ ߢߐ߲߯ ߝߍ߬ ߒߞߏ ߟߊߥߙߎߞߌ ߘߐ߫. ߊ߬ ߣߌ߫ ߝߣߊ߫߸ ߊ ߧߋ߫ ߒ߬ ߠߊ߫ ߘߋ߲ ߠߎ߬ ߣߌ߫ ߓߐ߲ߛߐ߲ ߠߎ߬ ߞߊ߬ߙߊ߲߬ ߒߞߏ ߟߊ߫߸ ߛߴߊ߬ߟߎ߬ ߘߌ߫ ߞߍ߫ ߛߓߊ߬ߕߌ ߣߌ߫ ߟߐ߲ߠߌ߲ ߕߊ߲ߓߊ߲ ߘߌ߫ ߛߌߣߌ߲߫. ߊ ߓߊ߯ ߞߍ߫ ߊ ߠߊ߫ ߛߊ߲߬ߞߎ߲ ߢߊ߰ߢߊ߮ ߞߍ߫ ߟߊ߫ ߞߏ߲ߞߏߘߌ߬ߓߌ ߟߊ߫ ߛߊ߲߬-ߏ-ߛߊ߲߬߸ ߊ ߧߋ߫ ߒ߬ ߖߘߍ߬ ߦߟߌߡߊߘߌߦߊ߫ ߞߏ߫ ߒߞߏ ߦߋ߫ ߡߊ߲߬ߘߋ߲߫ ߣߌ ߣߴߊ߬ ߢߊ ߟߋ߬ ߘߌ߫.
ߊߟߊ߫ ߦߋ߫ ߒߞߏ ߥߙߎߞߌ߫߸ ߊߟߊ߫ ߦߋ߫ ߡߊ߲߬ߘߋ߲߫ ߟߊߓߍ߲߬. ߊߟߊ߫ ߦߋ߫ ߤߌߣߊ߫ ߞߊ߲ߕߍ߫ ߛߟߏ߬ߡߊ߯ߣߊ߫ ߣߌ߫ ߒߞߏ ߞߊߙߊ߲ߡߐ߯ ߝߎߙߋ ߓߍ߯ ߟߊ߫. ߊߡߌ߯ߣߊ߫.
ߊߟߊ߫ ߤߌߣߊ߫ ߒߞߏ ߛߓߍߛߎ߲ ߛߌ߲ߘߌߓߊ߮ ߟߊ߫߸ ߊ߬ ߡߏߦߌߓߊ߮ ߟߎ߬ ߟߊ߫߸ ߊ߬ ߡߏߦߌߝߋ߲ ߠߎ߬ ߟߊ߫߸ ߒ߬ ߠߊ߫ ߡߐ߰ߓߊ߬ ߝߎߙߋ ߟߎ߬ ߣߌ߫ ߒߞߏ ߞߊߙߊ߲ߘߋ߲ ߓߍ߯ ߟߊ߫ ߞߵߊ߲ ߣߴߊ߬ ߞߍ߲ߘߍ ߟߎ߬ ߓߍ߯ ߡߍ߲߫ ߢߐ߲߮ ߓߟߏ߫، ߊߟߴߊ߬ ߞߍ߫ ߕߋ߲߬.

߂߀߂߆-߇߉߁-ߛߊ߲߬ߓߍߛߊ߲߬ߓߍ
ߞߊ߬ߙߊ߲߬ߡߐ߯/ ߓߊ߬ߓߊ߫ ߡߊ߬ߡߊߘߌ߫ ߖߊ߰ߣߍ߫.
ߒߞߏ ߥߙߎߞߌ ߛߌ߲߬ߝߏ߲߬ߧߊ߬ߟߌ߬ ߖߊ߯ߓߡߊ ߞߊ߲ߕߌ߮ – ߞ߫ߊ߯ߤߌ߬ߙߊ߬.