ߓߐ߬ߟߐ߲ߞߊ ߊߟߌߡߊߕߎ߫ ߓߙߋߕߋ߫ ߦߋ߫ ߥߎ߬ߦߊ߲߬ߞߌ߬ߟߌ߬ߟߊ߬ ߥߣߊ ߟߋ߬ ߘߌ߫ ߊߡߋߙߌߞߌ߬

ߓߐ߬ߟߐ߲ߞߊ ߊߟߌߡߊߕߎ߫ ߓߙߋߕߋ߫ ߦߋ߫ ߥߎ߬ߦߊ߲߬ߞߌ߬ߟߌߟߊ߬ ߥߣߊ ߟߋ߬ ߘߌ߫، ߞߊ߬ ߓߐ߫ ߞߊ߲ߞߊ߲߫ ﴿ ߡߊ߲߬ߘߋ߲߫ ߖߌ߬ߣߍ߫﴾  ߊ߬ ߡߊߖߌ߰ߣߍ߲߫ ߞߊߟߌߝߐߙߑߣߌ߫ ﴿ ߊߡߋߙߌߞߌ߬ ߞߊ߬ߝߏ߫ ߘߍ߬ߣߍ߲﴾  ߞߣߐ߫ ߕߋ߬ߕߋ߲߬، ߊ߬ ߓߘߊ߫ ߛߊ߲߬ ߂߀ ߣߌ߫ ߞߐ߫ ߞߍ߫ ߦߋ߲߬، ߊ߬ ߦߋ߫ ߘߊ߲ߘߟߊ߫ ߥߣߊ ߟߋ߬ ߘߌ߫ ߘߊ߲ߘߊߛߏ ߟߊ߫ ߦߋ߲߬، ߏ߬ ߟߋ߬ ߞߊ߬ ߕߎ߬ߡߊ߬ߙߋ߲߫ ߂ ߓߊ߬ߘߏ߬ߢߐ߰ߦߊ ߞߍ߫ ” ߓߊߘߎ߲ ߞߊ߬ߙߊ߲߬ߕߊ ” ߒߞߏ ߞߊߙߊ߲ߘߋ߲ ߠߎ߫ ߝߍ߬ ߞߊߙߏ ߢߌ߲߬ ߠߊ߫߸ ߊ߲ ߧߴߊ߬ ߝߍ߬ ߞߵߏ߬ ߟߋ߬ ߓߊ߬ߘߏ߬ߢߐ߰ߦߊ ߓߌ߬ߟߊ߫ ߞߊ߲߬ߖߊ߬ߡߊ߯ߘߌ߫ ߞߎ߲ߝߊ߲ߐߓߐߟߊ ߟߎ߫ ߛߊ߬ߥߏ ߘߐ߫، ߓߊߏ߬، ߊ߬ ߟߊ߫ ߞߎߡߊ ߟߎ߬ ߦߋ߫ ߞߎߡߊ߫ ߞߍߘߍ߲ ߜߊ߲߰ߛߊ߲߫ ߠߋ߬ ߘߌ߫، ߡߍ߲ ߓߍ߯ ߘߌ߫ ߤߊߞߟߌ߫ ߘߌ߫ ߡߐ߰ ߡߊ߬ ߓߌ߬ ߘߎߢߊ߫ ߘߐߕߍ߮ ߡߌ߬ߘߊ߬ ߢߊ ߘߐ߫، ߊߟߎ߫ ߦߋ߫ ߓߐ߬ߟߐ߲߬ߞߊ߫ ߊߟߌߡߊߕߎ߫ ߟߊ߫ ߞߎߡߊ ߟߎ߫ ߞߊ߬ߙߊ߲߬ ߦߊ߲߬: ߒ ߧߋ߫  ߡߍ߲ ߝߐ߫ ߟߊ߫ ߞߴߊ߬ ߓߍ߲߬ ߘߎߢߊ߫ ߡߙߊ߬ ߢߊ߬ ߞߎߘߊ ߞߊ߲ߞߋ ߞߊ߲߬، ߣߴߊ߬ ߦߋ߫ ߖߊ߯ߓߊߞߊ߲ߞߋߦߊ ߘߌ߫ ߓߌ߬ ߡߙߊ߬ ߢߊ߬ ߞߎߘߊ ߘߐ߫ ߕߋ߲߬ߕߋ߲߬ ߝߊ߲߬ߞߊ߬ߡߊ ߟߎ߬ ߓߟߏ߫،

ߝߘߊ߬ߝߌ߲߬ߠߊ߫ ߕߍ߫ ߛߋ߫ ߥߎ߬ߙߌ߬ߟߌ ߟߊ߫ ߝߋߎ߫ ߞߊ߬ ߕߏ߫ ߞߊ߲ߞߋߦߊ ߢߌ߲߬ ߞߊ߲߬، ߓߊߏ߬، ߊ߬ ߘߊߓߐߣߍ߲߫ ߕߍ߫ ߝߘߊ߬ߝߌ߲߬ߠߊ߫ ߟߊߥߙߎߞߌ ߛߌߟߊ߫ ߞߊ߲߬߸ ߊ߬ ߘߊߓߐߣߍ߲߫ ߊ߬ߟߋ߬ ߝߊ߲߬ߞߊ߬ߡߊ ߟߎ߬ ߟߊߥߙߎߞߌ߫ ߛߌߟߊ ߟߎ߬ ߡߊߞߊߘߊ߲ ߠߋ߬ ߘߐ߫، ߏ߬ ߓߟߏߡߊ߬، ߒߠߋ߬ ߊߟߌߡߊߕߎ߬ ߓߙߋߕߋ߫ ߛߍߥߊߣߍ߲߫ ߒߞߏ ߛߓߍߟߌ ߣߌ߫ ߒߞߏ ߞߊߙߊ߲ߘߋ߲ ߠߎ߬ ߣߌ߫ ߒߞߏ ߞߊߙߊ߲ߡߐ߮ ߟߎ߬ ߟߊ߫ ߞߏߛߓߍ߫، ߓߊߏ߬،  ߒߞߏ ߛߓߍߟߌ ߣߌ߲߬ ߛߘߊ߫ ߘߐ߫، ߏ߬ ߟߋ߬ ߞߍߕߐ߫ ߝߘߊ߬ߝߌ߲߬ ߘߋ߲ ߠߎ߫ ߘߍ߬ߡߍ߲߬ ߠߊ߫، ߞߵߊ߲ ߠߊ߫ ߡߌ߬ߙߌ߲߬ߘߌ ߟߊߞߎߣߎ߲߫ ߞߊ߬ ߓߐ߫ ߛߎ߬ߣߐ߮ ߘߐ߫، ߊ߬ ߣߌ߫ ߞߊ߬ ߝߘߊ߬ߝߌ߲߬ߠߊ߫ ߜߙߋ ߡߎ߰ߡߍ  ߕߟߊ߫ ߞߊ߬ ߓߐ߫ ߥߙߎߣߍ߫ ߞߎߘߦߊ ߘߐ߫߸ ߓߊߏ߬، ߣߌ߫ ߝߘߊ߬ߝߌ߲߬ߠߊ߫ ߡߌ߬ߙߌ߲߬ߘߌ ߡߊ߫ ߞߎߣߎ߲߫ ߞߊ߬ ߓߐ߫ ߛߎ߬ߣߐ߮ ߘߐ߫، ߝߘߊ߬ߝߌ߲߬ߠߊ߫ ߕߍ߫ ߛߋ߫ ߞߊ߬ ߕߟߊ߫ ߝߘߊ߬ߜߍ ߟߎ߬ ߟߊ߫ ߞߊ߲ߞߋ ߖߎ߯ ߡߊߗߍ߲߬ߣߍ߲ ߠߊ߫߸ ߓߊߏ߬، ߞߊ߲ߞߋ߫ ߟߋ߬، ߡߍ߲  ߡߊߗߍ߲߬ߣߍ߲߫ ߞߵߊ߲ ߕߏ߫ ߊ߬ ߘߐ߫، ߏ߬ ߟߋ߬ ߞߏߛߐ߲߬، ߤߊߟߌ ߣߴߌ ߞߵߊ߬ ߝߐ߫ ߞߵߌ ߘߌ߫ ߝߘߊ߬ߜߍ ߟߎ߬ ߟߊ߫ ߞߊ߲ߞߋ ߘߐߕߌߢߍ߫ ߝߘߊ߬ߝߌ߲߬ ߠߊ߫، ߌ ߖߍ߬ߘߍ ߓߊߘߋ߲ ߠߎ߫ ߟߋ߬ ߞߍߕߐ߫ ߌ ߞߟߍ߬ ߟߊ߫ ߡߎߣߎ߲߬، ߞߵߏ߬ ߟߊ߫ ߝߘߊ߬ߜߍ ߟߎ߫ ߟߊ߫ ߘߓߌ߬ߘߐ߬ߞߟߍ ߞߊ߲߬߸ ߊ߬ ߞߵߊ߬ ߦߌ߬ߘߴߊ߬ ߟߊ߫ ߓߊ߬ߘߏ ߕߣߐ߬ߡߊ ߢߌ߲߬ ߘߐ߫،

ߞߏ߫ ߒߞߏ ߞߊߙߊ߲ߘߋ߲ ߠߎ߬ ߦߴߊ߬ߟߎ߬ ߘߐߖߊ߬ ߞߊ߬ ߒߞߏ ߞߍ߫ ߞߊ߲ߞߋߓߊ߫ ߁ ߘߌ߫، ߡߍ߲ ߘߌ߫ ߝߘߊ߬ߝߌ߲߬ߠߊ߫ ߓߍ߯ ߟߊߝߏ߬، ߛߴߏ߬ ߘߌ߫ ߞߍ߫ ߛߊߓߎ߫ ߘߌ߫ ߞߵߊ߲ ߕߟߊ߫ ߝߘߊ߬ߜߍ߬ ߖߐ߲߬ߧߊ ߘߐ߫߸ ߓߐ߬ߟߐ߲߬ߞߊ߫ ߊߟߌߡߊߕߎ߫ ߓߙߋߕߋ߫ ߞߵߊ߬ ߦߌ߬ߘߊ߫ ߕߎ߲߯ ߞߏ߫ ߝߘߊ߬ߝߌ߲߬ߠߊ߫ ߞߊ߲ߕߌ߮ ߡߍ߲ ߠߎ߫ ߕߊ߬ߡߌ߬ߣߍ߲߫ ߦߏ߫: ߞߊ߲ߕߌ߯ ߛߋߞߎ߫ ߕߎ߬ߙߋ߫، ߒߞߎߥߊߡߍ߫ ߞߙߎ߬ߡߊ߫، ߕߐ߯ߡߊ߫ ߛߊ߲ߞߊߙߊ߲߫، ߞߊ߲ߕߌ߯ ߡߏߘߌ߬ߓߏ߬ ߞߋߕߊ߬، ߞߴߏ߬ ߟߎ߬ ߣߴߊ߬ߟߎ߫ ߢߐ߲߰ ߡߍ߲ ߠߎ߫ ߕߘߍ߬ ߝߘߊ߬ߝߌ߲߬ߠߊ߫ ߡߞߊߘߊ߲߫ ߠߊ߫، ߊ߬ ߣߌ߫ ߞߊ߬ ߛߍ߬ߘߏ߲߬ ߛߌߦߊߡߊ߲߫ ߞߍ߫ ߝߘߊ߬ߝߌ߲߬ߠߊ߫ ߜߙߋ ߟߊ߫ ߖߘߍ߬ߕߌ߰ߦߊ ߢߌߣߌ߲ ߘߐ߫، ߏ߬ ߟߎ߫ ߛߊ߬ߣߍ߲߫ ߌߞߘߐ߫، ߝߘߊ߬ߝߌ߲߬ߠߊ߫ ߜߙߋ ߣߡߊ߫ ߘߊ߫ ߞߊ߬ ߕߊ߯ ߗߌߙߏ߲ ߛߌߟߊ ߞߊ߲߬߸ ߞߵߏ߬ ߟߋ߬ ߞߏߛߐ߲߬، ߝߋ߲ ߓߍ߯ ߦߋ߫ ߝߘߊ߬ߝߌ߲߬ߠߊ߫ ߘߎ߰ ߞߘߐ߬ߟߊ ߣߴߊ߬ ߞߐߞߊ߲ߠߊ ߘߐ߫، ߞߐ߬ߣߵߏ߬ ߓߍ߯ ߣߴߊ߬ ߕߊ߫، ߝߘߊ߬ߝߌ߲߬ ߡߊ߲ߛߊ ߟߎ߬ ߦߴߊ߬ߟߎ߬ ߥߣߎߡߊ߫ ߟߊ߫ ߞߊ߬ ߕߊ߯ ߊ߬ߟߎ߫ ߢߐ߲߬ߞߌ߲߫ ߝߘߊ߬ߜߍ߬ ߡߊ߲ߛߊ ߟߎ߫ ߣߊ߰ ߟߊ߫، ߥߊߘߌ߫ ߢߌߣߌ߲߫ ߠߊ߫، ߞߵߊ߬ ߕߍ߬ߘߍ߫ ߘߏ߲߬ ߜߎ، ߥߊߘߌ ߕߍ߫ ߖߡߊ߬ߣߊ ߟߐ߬ ߟߊ߫، ߤߊߞߟߌ߫ ߢߌߡߊ ߣߌ߫ ߓߘߍ߬ߓߘߍ߬ߟߌ߬ ߢߌߡߊ ߣߌ߫ ߓߊ߫ߙߊ ߟߋ߬ ߖߡߊ߬ߣߊ ߟߐ߬ ߟߊ߫߸ ߞߏ߫ ߣߴ߬ߏ ߕߍ߫، ߛߊߣߌ߲߫  ߣߌ߫ ߣߐ߬ߓߊߟߌ ߣߌ߫ ߝߎߥߊ߲ߢߊߘߊ߲ ߣߌ߫ ߕߊߖߌ ߣߌ߫ ߘߎ߰ߞߘߐ߬ ߣߊ߲ߝߟߏ ߛߎ߮ ߓߍ߯ ߦߋ߫ ߝߘߊ߬ߝߌ߲߬ߠߊ߫، ߞߐ߬ߣߵߏ߬ ߓߍ߯ ߣߴߊ߬ ߕߊ، ߝߘߊ߬ߝߌ߲߬ߠߊ߫ ߟߋ߬ ߕߏߣߍ߲߫ ߞߐ߫ ߘߎߢߊ߫ ߜߙߋ ߓߍ߯ ߘߌ߫.

ߊ߬ ߟߊ߫ ߞߎߡߊ ߢߌ߲߬ ߠߎ߬ ߓߍ߯ ߕߘߍ߬ ߦߋ߫ ߝߘߊ߬ߝߌ߲߬ߠߊ߫ ߢߍߡߐ߮ ߟߎ߫ ߟߋ߬ ߞߊ߲߬، ߊ߬ ߞߎߡߊ߫ ߘߊ߫ ߝߘߊ߬ߝߌ߲߬ߠߊ߫ ߡߌ߲߬ߙߌ߲߬ߘߌ ߝߣߊ߫ ߞߊ߲߬، ߞߵߊ߬ ߦߌ߬ߘߊ߫ ߞߏ߫ ߡߐ߱ ߞߊ߫ ߞߊ߲߫ ߞߵߌ ߖߘߍ߬ ߘߊ߲ߞߎ߲߫ ߡߐ߱ ߟߋ߬ ߘߌ߫ ߦߏ߫ ߌ ߡߐ߰ ߢߐ߲߮ ߠߎ߬ ߦߋ߫ ߢߊ ߡߍ߲، ߞߏ߫ ߦߙߐ ߏ߬ ߟߐ߲ߓߊߟߌߦߊ ߟߋ߬ ߦߴߊ߬ ߞߍ߫ ߟߊ߫، ߊ߲ ߓߊߘߋ߲߫ ߡߛߏ ߟߎ߬ ߛߌߦߊߡߊ߲߫ ߦߋ߫ ߕߟߎ ߖߎ߮ ߟߎ߫ ߛߊ߲߬ ߠߊ߫ ߞߵߊ߬ߟߎ߫ ߝߊ߬ߘߌ ߥߎߙߊ߫، ߞߴߏ߬ ߘߏ߲߬ ߦߋ߫ ߕߌߢߍߟߌߓߊ߫ ߟߋ߬ ߟߊߛߋ߫ ߟߴߊ߬ߟߎ߫ ߡߊ߬، ߞߵߊ߬ߟߎ߬ ߕߴߊ߬ ߞߊ߬ߟߊߡߊ߬߸ ߞߵߏ߬ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫ ߝߋߎ߫، ߞߏ߫ ߝߘߊ߬ߜߍ ߟߎ߬ ߦߋ߫ ߝߘߊ߬ߝߌ߲ ߠߎ߫ ߛߐ߰ߙߐ߲߬ߧߊ ﴿ ߖߊ߲߭ ﴾ ߠߎ߬ ߢߌߣߌ߲߫ ߓߌ߬ ߞߵߏ߬ ߟߎ߬ ߓߊ߯ߙߊ߫ ߞߵߊ߬ ߞߍ߫ ߕߟߎ ߘߌ߫، ߝߘߊ߬ߜߍ߬ ߡߛߏ ߟߎ߫ ߦߴߏ߬ ߛߊ߲߬ ߣߊ߬ߝߟߏ߬ߓߊ߫ ߟߊ߫ ߞߵߊ߬ ߛߏ߬ߛߴߊ߬ߟߎ߫ ߝߊ߬ߘߌ ߟߎ߫ ߡߊ߬ ߞߘߐ߬ߦߊ ߕߎ߬ߡߊ ߟߎ߬ ߘߐ߫، ߛߴߊ߬ߟߎ߫ ߝߊ߬ߘߌ ߟߎ߬ ߞߣߊ߫ ߢߐ߬ߙߐ߲߬߸ ߏ߬ ߞߘߐ ߟߋ߬ ߞߏ߫ ߓߙߊߞߊ ߦߋ߫ ߝߘߊ߬ߝߌ߲߬ ߠߎ߫ ߝߊ߬ߘߌ ߛߎ߲ߞߎ ߠߋ߬ ߘߐ߫ ߞߊ߬ ߕߊ߬ߡߌ߲߫ ߝߘߊ߬ߜߍ ߟߎ߬ ߕߊ ߞߊ߲߬. ߊ߲ ߓߊߘߋ߲߫ ߡߛߏ ߢߌ߲߬ ߞߵߊ߬ ߦߌ߬ߘߊ߫ ߞߴߊ߬ߟߋ߬ ߦߋ߫ ߞߊߟߌߝߐߙߑߣߌ߫ ߞߊ߬ߝߏ ߡߍ߲ ߞߣߐ߫، ߝߘߊ߬ߝߌ߲ ߠߎ߬ ߡߊ߫ ߛߌߦߊ߫ ߦߋ߲߬ ߞߏߛߓߍ߫، ߞߴߏ߬ ߦߋ߫ ߞߍ߫ ߟߊ߫ ߛߊߓߎ߫ ߘߌ߫، ߊ߬ ߕߍ߫ ߝߘߊ߬ߝߌ߲߬ߞߏ ߟߎ߫ ߞߊ߬ߟߊߡߊ߬ ߞߏߛߓߍ߫، ߞߏ߫ ߝߏ߫ ߊ߬ ߓߊ߯ ߛߋ߫ ߣߌߦߐߙߑߞ ߥߟߊ߫ ߓߐߛߑߕߐ߲߫ ߝߊ߲߭ ߠߎ߬ ߘߐ߫. ߊ߲ ߧߋ߫ ߘߊ߲߬ ߠߊ߫ ߦߊ߲߬ ߕߋ߲߬ ߡߎߣߎ߲߬، ߊ߲ ߘߌߣߵߊ߬ ߓߟߏߟߊߕߎ߲߰ ߛߋ߲߬ߢߊ߬ ߜߘߍ߫. ߓߐ߬ߟߐ߲߬ߞߊ߫ ߊߟߌߡߊߕߎ߫ ߓߙߋߕߋ߫ ߞߐ߬ߣߌ߲ ߓߘߴߊ߬ ߦߌ߬ߘߴߊ߲ ߠߊ߫ ߞߏ߫ ߡߛߏ߬ߦߊ߫ ߕߍ߫ ߡߐߣߍ߫ ߘߌ߫߸ ߝߏ߫ ߣߌ߫ ߡߏ߬ߛߏ ߡߍ߲ ߞߵߊ߬ ߞߍ߫ ߡߐߣߍ ߘߌ߫، ߣߌ߲߬ ߢߐ߲߰ ߡߛߏ߬ߞߎ߲߬ ߛߌߦߊߡߊ߲߫ ߠߋ߬ ߕߊ߬ߡߌ߬ߣߍ߲߫ ߡߊ߲߬ߘߋ߲߫، ߦߏ߫ ߣߊ߰ߣߊ߫ ߕߙߌߓߊ߲߫، ߝߊ߬ߞߏߟߌ߫ ߡߏ߬ߛߏ߬ ” ߞߟߋ߬ߦߊ߬ߞߏ߲ߞߏ߫” ߊ߬ ߛߏ߰ߟߏ߲߬ ߞߐ߲ߘߍ߫ ߟߎ߫߸ ߊ߬ ߣߌ߫ ߛߌߦߊߡߊ߲߫ ߜߘߍ߫ ߟߎ߫.

ߟߊ߬ߘߍ߬ߟߌߟߊ: ߞߎ߬ߣߊ߬ߘߌ߫ ߞߋߕߊ߬/ ߓߊ߬ߣߊ߲߬ߞߘߐ߫

ߟߊ߬ߖߍ߲߬ߛߍ߲߬ߠߌ/ ߛߏ߬ߟߏ ߝߙߊ߬ߓߊ-ߘߐ߫