ߊߟߊ߫ ߕߐ߮ ߟߊ߫ ߡߊ߬ߡߌ߬ߣߊ߬ߟߊ߫ ߟߋ߬ ߤߌߣߟߊ߫ ߟߋ߬.
ߛߟߊߕߌ߯ ߓߘߍ /…
ߓߊߘߋ߲߫ ߗߍ߬ߡߊ߲ ߣߌ߫ ߡߛߏ߬ߡߊ߲ ߠߎ߬ ߸ ߘߋ߲ߣߍ߲ ߣߌ߫ ߡߐ߰ߓߊ ߸ ߛߓߍ߬ߞߏ ߞߊ߬ߣߌ߲߬ߓߊ߮ ߣߴߊ߬ ߟߊߝߛߊ߬ߓߊ߮ ߸ ߒ߬ ߠߊ߫ ߝߏ߬ߟߌ ߓߎ߰ߓߎ߰ߣߍ߲ ߦߴߊߟߎ߫ ߦߋ߫ ߸ ߓߊߘߋ߲ߧߊ ߝߏ߬ߟߌ ߟߊ߫ ߸ ߡߙߌߞߋߟߋ߲ߢߐ߲߯ߦߊ ߝߏ߬ߟߌ ߟߊ߫ ߸ ߞߏ߫ ߊߟߎ߫ ߣߌ߫ ߖߐ߫ ߊߟߎ߫ ߣߌ߫ ߞߏ߲߫ ߸ ߊߟߎ߫ ߦߋ߫ ߕߏߟߌ߫ ߘߐ߫.
ߏ ߕߊ߬ߡߌ߲ ߞߐ߫ /… [ ߣߌ߲߬ ߛߐ߲߬ߞߌ߲߫ ߞߵߊ߬ ߖߌ߬ߦߊ߬ߖߟߎ ߝߟߍ߫ ]
ߊ߲ ߓߊߘߋ߲߫ ߡߊ߲߬ߘߋ߲߬ ߡߌߙߌ߲ߘߌ ߸ ߛߟߊߕߌ߯ ߒߞߏ ߡߊ߲߬ߕߎ߬ߙߋ ߟߎ߬ ߸ ߡߊ߲߬ߘߋ߲߬ߞߊ ߟߎ߫ ߟߋ߬ ߞߊ߲߫ ߞߏ߫ ߞߟߌߟߌ ߗߋ߫ ߊ߬ ߟߊߡߌ߬ߘߊ ߦߋ߫ ߗߋ߫.
ߒ߬ߞߵߊ߬ߛߐߍ ߸ ߣߌ߲߬ ߝߌ߬ߟߊ ߓߍ߯ ߞߍ ߗߋ ߘߌ߫ ߏ ߣߐ߰ߦߊ ߣߴߊ߬ ߜߟߍ߬ߦߊ ߦߋ߫ ߓߐ߫ ߟߴߊ߬ߟߎ߬ ߦߟߌߡߊߞߏ ߞߍߢߊ ߟߋ߬ ߘߐ߫ ߝߋ߲ ߠߊ߫ ߸ ߥߋ߯ߟߋߟߌ ߞߍߣߍ߲߫ ߡߍ߲ ߡߊ߬.
ߏ߬ ߓߟߏߡߊ߬ ߸ ߣߴߊ߬ ߕߘߍ߬ ߘߊ߫ ߞߏ߫ ߞߟߌߟߌߟߊ ߣߌ߫ ߞߟߌߣߍ߲ ߓߍ߯ ߓߘߊ߫ ߘߏ߫ ߞߍ߫ ߦߟߌߡߊߞߏ ߏ ߛߌ߰ߒߢߣߊ ߘߐ߫ ߸ ߊ߬ߟߎ߬ ߦߋ߫ ߣߊ߬ ߟߊ߫ ߜߙߊ߬ ߟߊ߫ ߞߟߌߟߌߟߊ ߟߊ߫ ߞߟߌߟߌ ߟߊߡߌ߬ߘߊ ߡߊ߬ ߟߋ߬ ߞߋߟߋ߲ߘߌ߫ ߸ ߦߏ߫ ߊ߲ ߣߊ߬ ߢߐ߲߮ ߓߍ߲߬ ߠߊ߫ ߞߣߍ ߣߌ߲߬ ߞߊ߲߬ ߢߊ ߡߍ߲ ߞߊ߲߬ ߣߌ߲߬ ߸ ߖߐ߲߬ߛߴߊ߲ ߘߌ߫ ߘߟߊߝߎߟߌ ߣߌ߫ ߘߟߊߝߍߟߌ ߞߍ߫ ߢߐ߲߮ ߦߋ߫ ߒ߬ ߦߟߌߡߊߞߏ ߟߊ߫ ߸ ߊ߲ ߕߎ߲߬ ߦߴߊ߲ ߟߊ߫ ߟߊ߫ ߡߍ߲ ߡߙߌ ߘߌ߫ ߞߊ߬ ߥߟߌ߬ ߊ߬ ߘߌ߫ ߕߎ߬ߡߊ߬ߓߍ߯.
ߓߊߘߋ߲߫ ߛߟߊߕߌ߮ ߟߎ߬ ߸ ߊ߬ ߞߊߙߏ߫ ߛߋߦߌ߲߫ ߠߋ߫ ߣߌ߲߬ ߊ߲ ߞߊ߬ ߢߐ߲߯ߓߍ߲ ߣߌ߲߬ ߢߐ߲߰ ߞߍ߫ ߢߊ߫ ߞߋߟߋ߲ ߣߌ߲߬ ߡߊ߬ ߞߣߍ߫ ߞߋߟߋ߲߫ ߞߊ߲߬ ߸ ߞߊ߬ ߓߍ߲߬ ߊ߲ ߣߌ߫ ߡߌߞߙߏߛߐߝߕ ߣߌ߫ ߞߏߟߊߘߍߓߊ߫ ߜߘߍ ߟߎ߫ ߟߊ߫ ߞߏ ߟߎ߫ ߘߊ߲߬ߕߍ߰ߟߌ ߡߊ߬ ߒߞߏ ߡߌߙߌ߲ߘߌ ߦߋ߫ ߸ ߞߵߊ߬ ߟߐ߬ ߒߞߏ ߟߊߕߘߍ߬ߟߌ ߡߵߊ߬ߟߎ߬ ߟߊ߫ ߞߊ߲߫ ߓߌߦߙߌߞߊ ߟߎ߫ ߝߍ߬ ߡߍ߲ ߠߎ߬ ߛߋ߫ ߟߊ߫ ߦߟߍ߬ߡߊ߲߬ ߠߊ߫ ߢߐ߲߮ ߘߐ߫ ߘߟߊߡߌߘߊߟߌ ߛߌߟߊ ߝߍ߬.
ߊ߲ ߞߵߊ߬ ߦߌ߬ߘߊ߫ ߏ߬ ߟߏ߲ ߞߊ߲ߠߊ߫ ߞߏ߫ ߊ߲ ߧߋ߫ ߛߌߟߊ߫ ߦߙߌߞߊ߫ ߟߋ߫ ߞߊ߲߬ ߊ߬ ߓߊ߯ߙߊ ߘߐ߫ ߸ ߡߍ߲ ߓߍ߯ ߓߌ߬ߟߊ߬ߣߍ߲߫ ߞߏ߲߬ ߞߋߟߋ߲߫ ߡߊ߬ ߥߟߊ߫ ߞߐߝߟߌ߫ ߞߋߟߋ߲߫ ߡߊ߬ ߸ ߣߊߟߌ߬ߡߎ߲߫ ߘߟߊߡߌߘߊߟߌ߫ ߞߍߒߖߘߍ߬ߦߋ ߘߌ߫.
ߜߊ߬ߙߊ ߏ߬ ߟߋ ߛߋ߲߬ߝߍ߬ ߊ߲ ߞߵߊ߲ ߣߌߛߐߘߌߦߊߞߏ ߘߏ߫ ߦߌ߬ߘߊ߫ ߞߊ߬ ߓߍ߲߬ ߜ߭ߎߜ߭ߎߟ ߡߊߛߐ߫ ߦߙߐ ߛߌ߲ߘߟߌ ߘߊ߲߬ߕߍ߰ߟߌ ߡߊ߬ ߸ ߞߏߟߊߘߍ߫ ߝߌ߬ߙߌ߲ߞߐ߲߬ߞߐ߲ ߏ ߖߍ߬ߘߍ ߞߊ߬ ߡߍ߲ ߘߊߦߟߍ߬ ߊ߲ ߓߊ߯ߙߊߢߐ߲߯ߦߊ ߛߌߟߊ ߝߍ߬ ߞߵߊ߬ ߞߍ߫ ߒߞߏ ߡߌߙߌ߲ߘߌ ߦߋ߫ ߸ ߒߞߏ ߟߊߕߘߍ߬ ߞߊߡߵߊ߬ߟߎ߬ ߟߊ߫ ߘߟߊߡߌߘߊߞߊ߲ߞߋ ߘߐ߫ ߞߊ߲߫ ߁߃߄ ߝߍ߬.
ߡߊߛߐߟߌ ߓߊ߯ߙߊ ߣߌ߲߬ ߞߵߊ߬ ߕߘߍ߬ ߟߋ߬ ߊ߲ ߓߘߊ߫ ߛߊ߲ߖߌ߫ ߇ ߞߍ߫ ߟߐ߲ߕߊ߫ ߟߊߘߍ ߟߊ߫ ߊ߬ ߓߊ߯ߙߊ ߖߎ߬ߓߌߟߊ ߞߊ߫ ߞߊ߲߫ ߞߊ߬ ߞߍ߫ ߡߍ߲ ߘߌ߫، ߞߏ߬ߣߌ߲߬ ߞߍߒߖߘߍ߬ߦߋ ߘߐ߰ߛߐ߬ߘߐ߯ߛߐ ߓߊ߯ߙߊ߫ ߓߟߋ߬ߓߟߋ ߏ߬ ߣߴߊ߬ ߕߊ߫ ߸ ߣߌ߫ ߘߓߊ߬ߞߎ߬ߘߎ߲߬ߣߍ߲ ߡߊ߫ ߛߋ߫ ߣߎ߲߬ߓߟߊ߫ ߟߊ߫ ߝߊ߲ߕߏ߲ߜߏ ߟߊ߫ ߖߊ߬ߙߌ߬ߛߐ߰ߟߊ߫ ߸ ߊ߬ ߕߍ߫ ߟߊߕߍ߰ ߝߋߎ߫.
ߊ߲ ߞߵߊ߬ ߟߐ߲߫ ߡߊߛߐߟߌ ߏ߬ ߘߊߦߟߍ߬ߟߌ ߟߋ߫ ߝߍ߬ ߜ߭ߎߜ߭ߎߟ ߓߟߏ߫ ߸ ߞߏ߫ ߊ߲ ߓߘߊ߫ ߛߋ߫ ߒߞߏ ߘߌ߫ ߘߎߢߊ߫ ߛߎߡߊߥߙߏ߫ ߞߊ߲ߕߍߟߊ߫ ߝߊ߲ߕߏ߲ߜߏ ߟߊ߫ ߸ ߡߍ߲ ߞߍߕߐ߫ ߒ߬ ߠߞߊߟߌߦߊ߫ ߟߊ߫ ߓߊ߯ߙߊ ߟߊ߫ ߸ ߣߴߊ߬ ߡߊ߫ ߢߊ߬ ߒߞߏ ߓߊ߯ߙߊ ߞߐ߫ ߕߏ߲߬ߜߏ ߖߍ߬ߘߍ ߟߊ߫ ߞߊ߲ߞߏ ߘߟߊߡߌߘߊߟߌ ߗߍߡߐ߮ ߓߟߏ߫ ߸ ߞߏ߫ ߊ߬ ߖߊ߬ߙߌ߬ߛߐ߯.
ߒ߬ߓߊ߬ ߞߊߙߏ߫ ߇ ߕߊ߬ߡߌ߲ ߞߐ߫ ߡߊߛߐߟߌ ߏ߬ ߘߐ߫ ߸ ߓߊߘߋ߲߫ ߡߐ߰ ߅߃ ߡߍ߲ ߠߎ߫ ߞߵߊ߬ߟߎ߬ ߕߐ߮ ߛߓߍ߫ ߊ߬ ߥߊߟߋߦߊ߫ ߞߊߡߊ߬ ߸ ߊ߬ ߟߐ߲߫ ߘߊ߫ ߏ ߡߊ߬ ߞߏ߫ ߒߞߏ ߡߌߙߌ߲ߘߌ ߓߴߦߋ߲߬ ߝߛߊߦߌ߫ ߞߊ߬ ߓߍ߲߬ ߊ߬ߟߎ߬ ߟߊ߫ ߘߏߣߍ߲߫ ߞߍ ߡߊ߬ ߸ ߤߊߟߌ߬ ߣߴߊ߬ ߕߘߍ߬ ߘߊ߫ ߞߏ߫ ߓߘߍ߬ ߡߊ߫ ߞߍ߫ ߸ ߤߊߟߌ߬ ߣߌ߫ ߞߍߣߍ߲ ߞߍ߫ ߘߊ߫ ߞߎߡߦߊ߫ ߞߋߟߋ߲߫ ߔߋ߫ ߟߋ߬ ߘߌ߫، ߒߞߏ ߕߐ߲-ߖߊ߯ߓߡߊ ߟߊ߫ ߞߎߟߎ߲ߖߋߟߌ߫ ߓߟߋ߬ߓߟߋ ߦߋ߫ ߏ߬ ߟߎ߬ ߦߋ߫ ߘߏ߲߯ ߸ ߊ߬ߟߎ߫ ߞߵߊ߬ ߞߍ߫ ߊ߬ߟߎ߫ ߖߘߍ߬ ߟߋ߬ ߦߋ߫.
ߊ߲ ߠߊ߫ ߞߎߟߎ߲ߖߋߟߌ߫ ߓߟߋ߬ߓߟߋ ߦߋ߫ ߡߐ߰ ߂߀߀߀ ߣߌ߫ ߞߐߖߊ߲ ߦߋ߫ ߡߍ߲ ߠߎ߫ ߞߊ߬ ߒ߬ ߠߊߡߌ߬ߘߊ߬ ߓߟߏߟߊߘߍ ߞߎ߲߬ߖߏߣߊ ߟߎ߫ ߛߊ߬ߙߊ ߘߐ߫ ߸ ߊ߲ ߧߋ߫ ߏ߬ ߟߎ߬ ߡߍ߲ ߠߎ߫ ߣߎ߬ߡߊ߬ ߞߣߍ ߣߌ߲߬ ߞߊ߲߬ ߣߌ߲߬ ߸ ߏ߬ ߟߎ߬ ߡߍ߲ ߠߎ߬ ߛߋ߫ ߘߴߊ߬ ߢߊߦߋ߫ ߟߊ߫ ߞߊ߬ߓߌ߯ ߛߊ߲ߖߌ߫ ߇ ߓߌ߬ ߢߍ߫ ߸ ߞߏ߫ ߟߏ߲߫ ߘߌߣߊ߬ ߛߋ߫ ߊ߲ ߛߋߕߐ߫ ߛߣߌߥߊߞߊ߲ ߣߌ߫ ߦߙߏߓߊߞߊ߲ ߣߌ߫ ߊߙߊߓߎߞߊ߲ ߠߎ߫ ߦߟߍ߬ߡߊ߲߬ ߠߊ߫ ߒߞߏ ߘߐ߫ ߟߏ߲ ߡߍ߲ ߸ ߊ߬ ߣߌ߫ ߞߊ߬ ߛߓߍ ߗߋ߫ ߊ߲ ߘߍ߬ߢߐ߰ ߊߟߌߡߊ߲ߗߍ ߣߌ߫ ߊ߲߬ߞߌ߬ߟߋ߬ߡߛߏ ߣߌ߫ ߍ߲ߘߎ߫ ߞߊߡߋߙߋ߲ ߡߊ߬ ߒߞߏ ߘߐ߫ ߸ ߊ߬ ߘߴߊ߬ ߦߟߍ߬ߡߊ߲߫ ߊ߬ ߟߊ߫ ߞߊ߲ ߘߐ߫ ߞߵߊ߬ ߞߊ߬ߙߊ߲߬ ߥߟߍߟߍ߫߹ ߞߏ߫ ߓߍ߯ ߣߌ߫ ߗߋ߫ ߸ ߊ߬ߟߎ߬ ߣߌ߫ ߛߟߏ߬ߡߊ߰ߣߊ߬ ߟߊ߬ߝߛߊ߫.
ߤߊߟߌߓߌ߬ ߊ߲ ߧߋ߫ ߓߍ߯ ߞߎߟߎ߲ߖߋ߫ ߟߊ߫ ߸ ߞߵߊ߬ ߘߊߡߌ߬ߘߊ߫ ߞߊ߬ߙߊ߲߬ߡߐ߯ ߛߟߏ߬ߡߊ߯ߣߊ߫ ߡߊ߬ ߸ ߊ߬ ߞߐߙߍ ߡߊ߬ ߸ ߊ߬ ߣߌ߫ ߒߞߏ ߞߊߙߊ߲ߘߋ߲߫ ߞߎ߲߬ߝߟߐ ߟߎ߫ ߡߊ߬ ߸ ߏ߬ ߟߎ߬ ߡߍ߲ ߠߎ߬ ߞߍߣߍ߲߫ ߓߍ߯ ߞߊ߬ߙߊ߲߬ߡߐ߰ ߖߏߣߊ ߘߌ߫ ߒߞߏ ߝߊ߯ߘߐߞߍ߫ ߝߟߐ ߕߟߊ ߞߎ߲߬ߕߊ߮ ߘߐ߫ ، ߊ߲ ߧߋ߫ ߒߞߏ ߕߐ߲ ߓߍ߯ ߝߏ߬ ߟߊ߫ ߝߣߊ߫ ߞߵߊ߬ ߛߐ߰ߡߊ ߞߍ߫ ߒ.ߢ.ߦ.ߘ ߣߌ߫ ߒ.ߛ.ߟ.ߢ.ߘ. ߘߌ߫ ߖߌ߬ߣߍ߫ ߸ ߊ߬ ߣߌ߫ ߒ.ߡ.ߦ. ߒ.ߟ.ߦ. ߘߌ߫ ߡߊߟߌ߫ ߞߊ߲ߓߍ߲߫ ߸ ߊ߬ ߣߌ߫ ߞ.ߞ.ߕ. ߘߌ߫ ߜߋ߲-ߞߐ߰ߖߌ߬ߘߊ ߟߊ߫ ، ߊ߬ ߣߌ߫ ߞߙߎ߬ߞߊ߲߬ߝߎߥߊ߫ ߜߊ߬ߙߊ ߡߌߛߌ߬ߙߊ߲߬ ߥߛߎ߬ ߖߊ߲ ߏ߬ ߟߊ߫..
ߝߏ߬ߟߌ ߏ߬ ߢߐ߲߰ ߦߋ߫ ߛߋ߫ ߟߊ߫ ߒߞߏߕߐ߲ ߕߐ߬ߡߊ ߟߎ߫ ߡߊ߬ ߡߍ߲ ߠߎ߬ ߛߌ߲ߘߌߣߍ߲߫ ߞߐߟߊ߫ ߦߟߍߘߐߞߍ߫ ߝߌ߬ߟߊ߫ ߕߊ߬ߣߌ߲߬ߣߍ߲ ߣߌ߲߬ ߞߣߐ߫ ߣߊߟߌ߬ߡߎ߲߫ ߒߞߏ ߋߙߐߔߎ߬ ߘߌ߫ ߊ߬ ߣߌ߫ ߜߍߞߊ߲ߠߊ ߒߞߏߕߐ߲߫ ߦߙߌߞߊ߫ ߦߋ߫ ߛߍ߲ߓߊ߫ ߡߍ߲ ߖߌ߲߬ߓߊ߲ ߞߘߐ߫ ߞߊ߲ߞߊ߲߫ ߕߌ߲߬ߞߎߘߎ߲ ߘߐ߫ ߕߎ߬ߡߊ ߢߌ߲߬ ߠߊ߫ ߸ ߞߊߕߙߍ߬ߕߍ߫ ߡߊ߲߬ߘߋ߲߫ ߓߍ߬ߙߍ ߛߌ߯ߙߌ߲߫ ߣߌ߫ ߓߊ߬ߣߊ߲߬ߞߘߐ߫ ߣߌ߫ ߒߛߙߍߜߘߍ߬ ߣߌ߫ ߞߐߣߊߞߙߌ߫ ߣߌ߫ ߓߡߊ߬ߞߐ߫ ߘߏ߲߬ߞߏ ߟߎ߫ ߡߊ߬ ߸ ߊ߬ ߣߌ߫ ߒ.ߛ.ߘ.ߕ. ߓߊ߲ߞߐߞ ߣߌ߫ ߊߡߙߌߞߌ߬ ߒߞߏߕߐ߲ ߛߌ߲߬ߝߏ߲ ߠߎ߬ ߣߌ߫ ߒߞߏ ߞߊ߬ߙߊ߲ ߥߙߎߞߌ-ߘߍ߭ ߞߊ߲ߕߌ߮ ߊߟߌߡߊ߲ߘߎ߯، ߊ߬ ߣߌ߫ ߕߐ߲߫ ߛߌ߲ߘߌߣߍ߲߫ ߜߘߍ ߟߎ߬ ߡߐ߰ ߂߀߀߀ ߟߊ߫ ߓߟߏߟߊߘߍ ߞߐ ߘߐ߫ ߸ ߦߙߐ ߘߐߜߙߐ߬ߣߍ߲߫ ߡߍ߲ ߓߍ߯ ߞߏߝߐ ߡߊ߬ ߞߣߵߊ߬ ߛߋ߫ ߓߌ߬ ߟߊ߫ ߝߊ߬ߖߡߊߣߊ ߟߎ߬ ߞߣߐߟߊ ߣߴߊ߬ ߞߐߞߊ߲ߠߊ ߘߐ߫ ߞߏ߫ ߊߟߎ߫ ߣߌ߫ ߞߏ߲߫،..
ߊ߬ߟߎ ߡߍ߲ ߠߎ߬ ߞߍߣߍ߲߫ ߒߞߏ ߝߏ߬ߘߏ ߘߐߦߙߌߥߊߓߊ߮ ߟߎ߬ ߘߌ߫ ߘߊߞߎ߲ ߓߍ߯ ߘߐ߫ ߸ ߞߵߏ߬ ߞߍ߫ ߢߐ߲߯ߘߝߊߓߟߏߡߊ߬ ߞߎ߲߬ߕߊ߬ ߞߟߊߒߞߋ ߟߎ߬ ߟߊߓߊ߯ߙߊ ߣߴߊ߬ߟߎ߬ ߥߊߟߋߦߊ ߘߐ߫ ߒߞߏ ߟߊߥߙߎߞߌ ߛߌߟߊ ߞߊ߲߬.
ߏ߬ ߞߐ߫ ߓߊߘߋ߲ ߠߎ߬ ߸ ߡߐ߱ ߥߋ߯ߟߋ ߘߌߦߊ ߟߋ߬ ߘߏ߫ ߘߌ ߘߴߊ߬ ߡߊ߬ ߥߟߊ߫ ߞߊ߬ ߘߏ߫ ߝߐ߫ ߊ߬ ߦߋ߫ ߸ ߊ߲ ߓߘߊ߫ ߛߋ߫ ߏ߬ ߘߊߞߎ߲ ߠߋ߬ ߘߐ߫ ߣߌ߲߬ ߡߎ߬ߕߎ߲߬ ߛߊ߫،..
ߏ߬ ߓߟߏߡߊ߬ ߸ ߒߞߏ ߥߙߎߞߌ ߛߌ߲߬ߝߏ߲߬ߧߊ߬ߟߌ߬ ߖߊ߯ߓߡߊ ߦߴߊ߬ ߟߊߛߋ߫ ߟߊ߫ ߸ ߞߏ߫ ߒߞߏ ߡߌߙߌ߲ߘߌ ߣߊ߬ ߖߌ߰ߦߊ ߡߍ߲ ߟߊ߫ ߟߴߊ߬ߟߎ߬ ߘߐ߫ ߓߊ߯ߙߊ߫ ߡߐ߬ߟߐ߲߬ߡߊ ߣߌ߲߬ ߥߊߟߋߦߊ ߘߐ߫ ߸ ߣߌ߫ ߒ߬ ߠߊ߫ ߡߐ߰ߓߊ߬ ߛߊߣߌ߲ ߠߎ߫ ߘߌ߬ߢߍ߬ ߘߊ߫ ߡߍ߲ ߠߎ߬ ߦߋ߫ ߞߣߍ ߞߊ߲߬ ߦߊ߲߬ ߒ߬ ߠߊ߫ ߗߍ߬ߡߐ߮ ߟߎ߬ ߘߌ߫ ߸ ߊ߲ ߧߋ߫ ߟߊ߬ߛߋ߬ߟߌ߬ߞߊ߲ ߏ߬ ߟߊߛߋ߫ ߊ߬ߟߎ߬ ߞߙߊ߫ ߘߐ߫:
ߏ߬ ߘߐ߫ ߦߊ߯ߟߊ߫ ߡߐ߰ ߓߊ ߏ߬ ߘߏ߫ ߦߋ߫ ߦߊ߲߬ ߓߊ߬؟ ߖߊ߬ߙߌ߬ߛߐ߬ ߛߌߦߊ ߞߊ߲ߕߍ߫ ߞߐߙߍ ߦߋ߫ ߞߣߍ ߞߊ߲߬ ߓߊ߬ ߛߌ߲ߘߌߓߊ߮ ߣߐ߭ ߘߐ߫؟ ߛߓߍߛߎ߲ ߛߌ߲ߘߌߓߊ߮ ߟߊ߫ ߞߊ߬ߙߊ߲߬ߘߋ߲߬ ߖߏߣߊ ߘߏ߫ ߟߎ߫ ߦߋ߫ ߞߣߍ ߞߊ߲߬ ߓߊ߬؟ ߥߟߊ߫ ߒߞߏ ߕߐ߲ߓߊ߫ ߖߏߣߊ ߟߎ߬ ߘߏ߫ ߦߋ߫ ߞߣߍ߲ ߞߊ߲߬ ߓߊ߬؟
ߐ߲߬ߤߐ߲߫ ߦߊ߯ߟߊ߫ ߊߟߎ߫ ߓߘߊ߫ ߘߌ߬ߢߍ߫ ߊ߲ ߧߋ߫ ߟߊ߬ߛߋ߬ߟߌ ߞߍ߫ ߊߟߎ߫ ߞߙߊߘߐ߫ ߓߊ߬؟
ߒ߬ߓߊ߬ ߊ߲ ߘߟߊߝߎ߬ ߸ ߊ߲ ߘߟߊߝߍ߫: ߥߊ߬ߛߌߥߊ߬ߙߊ ߡߍ߲ ߣߊ߬ߕߐ߫ ߣߌ߲߬ ߸ ߘߓߊ߬ߕߊ ߟߋ߬ ߦߴߊ߲ ߣߌ߫ ߏ߬ ߕߍ߫ ߡߎ߬ߕߎ߲߬ ߸ ߜ߭ߎߜ߭ߎ߬ߟ ߓߘߴߊ߬ ߦߌ߬ߘߊ߫ ߒ߬ ߠߊ߫ ߞߏ߫ ߒߞߏ ߘߌ߫ ߝߊ߬ߙߴߊ߬ߟߎ߬ ߟߊ߫ ߞߊ߲߫ ߁߃߄ ߞߊ߲߬ ߏ߬ ߞߣߐ߫ ߸ ߞߵߊ߬ ߞߍ߫ ߞߊ߲߫ ߁߃߅߲ ߘߌ߫ ߸ ߒߞߏ ߓߍߣߊ߬ ߛߓߍ߫ ߕߊ߲߬ ߠߋ߬ ߊ߬ߟߎ߫ ߝߍ߬ ߊ߲߬ߞߌߟߋ ߘߐ߫ ߞߏ߫: NKo ߸ ߛߓߍߘߋ߲߫ ߞߎ߲ߓߊ߫ ߝߌ߬ߟߊ߬ ߣߌ߫ ߡߌ߬ߛߍ߲߬ߡߊ߲߬ ߞߋߟߋ߲߫ ߘߐ߫ ߞߊ߬ߣߌ߲߫.
ߏ ߕߊ߬ߡߌ߲ ߞߐ߫: ߖߊ߲߬ߕߏ߬ߒ߬ߘߐ߫ ߞߘߎ߬ߜߍߟߍ߲ ߡߍ߲ ߟߊߣߍ߲߫ ߏ ߞߊ߲߬ ߞߊ߬ ߓߍ߲߬ ߝߘߏ߬ ߞߎߘߊ߫ ߓߋ߬ߣߍ߲ ߓߍ߯ ߞߍߗߏ߮ ߡߊ߬ ߸ ߏ߬ ߦߋ߫ ߕߏ߲ߘߋ߫ ߘߊ߲ߘߐ߫ ߟߋ߬ ߘߌ߫:
߁- ߊ߬ ߦߋ߫ ߕߏ߫ ߒ߬ ߦߟߌߟߊ߫ ߒߞߏ ߟߊߕߘߍ߬ߟߌ ߏ߬ ߘߐ߫ ߞߏ߫ ߘߎߢߊ߫ ߓߍߓߊ߯ߦߊ ߝߋ߲ ߓߍ߯ ߦߋ߫ ߛߐ߰ ߟߊ߫ ߡߙߍ߬ߛߍ߬ߦߊ ߟߋ߫ ߡߊ߬ ߸ ߞߣߊ߬ ߕߏ߫ ߘߝߊ߫ ߟߊ߫ ߕߎ߬ߜߍ߬ߕߎ߬ߜߍ߬ߦߊ ߞߐ߬ߣߐߡߊ߬ ߛߎ߲ߞߎ߲ ߘߐ߫ ، ߊ߬ ߣߌ߫ ߤߊߟߌ߬ ߒ߬ ߖߍ߬ߘߍ ߟߊ߫ ߓߊ߯ߙߊ ߟߎ߬ ߘߐ߫ ߥߍ߬ߣߍ ߣߐ߬ ߡߍ߲ ߓߌ߬ߟߊ߬ ߟߊ߫ ߛߋ߲߬ߠߊ߫، ߒߞߏ ߝߣߊ߫ ߣߊ߬ߕߐ߬ ߞߍ߫ ߟߊ߫ ߘߊߞߎ߲߫ ߞߋߟߋ߲ ߏ߬ ߟߋ ߘߐ߫ ߜ߭ߎߜ߭ߎߟ ߟߊ߫ ߞߊ߬ ߘߝߊ ߛߌߟߊ ߡߌ߬ߘߊ߫ ߞߊ߬ ߕߊ߯ ߢߍ߫.
߂- ߌ ߦߴߊ߬ ߟߐ߲߫ ߞߏ߫: ߘߏ߫ ߢߊ߬ߞߏ ߟߋ߬ ߘߏ߫ ߕߙߐߞߏ߫ ߘߌ߫ ، ߏ߬ ߟߋ ߦߴߊ߬ ߞߍ߫ ߟߊ߫ ߡߐ߱ ߢߊ߬ߞߏ ߛߋ߲߬ߠߊ߬ߛߎߡߦߊ ߞߎ߲߭ ߘߏ߫ ߟߎ߫ ߦߋ߫ ߓߐ߫ ߟߊ߫ ߢߊ߬ߞߏ߬ߕߌ߰ ߜߘߍ ߟߎ߬ ߟߊ߫ ߛߋ߲߬ߡߊ߬ߕߐߙߐ߲ߜߐ ߟߋ߬ ߘߐ߫ ߕߎ߬ߡߊ߬ ߓߍ߯ ߸ ߏ߬ ߓߍ߯ ߟߋ߫ ߛߋ߲߬ ߦߋ߫ ߒߞߏ ߟߊ߫ ߢߍߕߊ߮ ߘߐ߫ ߸ ߞߏ߬ߣߌ߲߬ ߞߏ߫ ߛߎߘߊ߲ߕߊ ߘߐߛߊ߬ߢߊ߫ ߕߍ߫ ߡߊ߰ߙߌ ߓߘߊ߫ ߓߊ߲߫ ߞߕߌ߫ ߟߊ߫ ߡߍ߲ ߠߊ߫.
߃- ߏ߬ ߓߟߏߡߊ߬ ߸ ߒߞߏ ߟߊߕߟߋ߬ߓߊ߰ߦߊ߬ߕߐ ߁߉߉߉ ߟߊ߫ ߞߊ߲ߡߊߛߙߋ ߘߏ߫ ߟߎ߫ ߕߎ߲߬ ߕߴߛߋ߫ ߟߊ߫ ߟߊߕߋߟߋ߲߫ ߠߊ߫ ߛߌ߰ߙߊ߬ߟߊ߲ ߠߎ߫ ߞߎ߲߬ߠߊ߫ ߝߋߎ߫ ، ߏ ߕߎ߬ߡߊ ߞߍ߫ ߘߊ߫ ߒ߬ ߘߏ߫ ߟߎ߫ ߢߣߊ߫، ߏ߬ ߘߐ ߸ ߤߊߟߌ߬ ߘߟߊߡߌߘߊߟߌ ߘߝߊߓߊߟߌߦߊ ߞߣߊ߫ ߡߐ߰ ߛߌ߫ ߕߙߐ߫ ߏ߬ ߘߐ߫ ߸ ߊ߲ ߧߋ߫ ߞߍ߫ ߞߊ߲ ߕߐ߭ ߟߎ߫ ߝߍ߬ ߞߣߍ ߞߊ߲߬ ߡߎߣߎ߲߬ ߘߐߙߐ߲߫.
߄- ߒߞߏ ߓߌ߬ߟߊ߬ߛߊ߲߬ߞߎߘߊ ߕߟߋ߬ߓߊ߮ ߟߊ߫ “ߥߌ߲ߘߏߛ” ߝߢߐߘߊ߫ ߇ ߟߋ߬ ߝߟߐ߫ ߣߌ߫ ߒߞߏ ߖߌ߰ ߘߊ߫ ߸ ߞߎߡߊߘߋ߲ ߛߓߍߘߋ߲ ߠߎ߫ ߕߎ߲߬ ߕߴߛߋ߫ ߟߊ߫ ߣߙߊ߫ ߟߊ߫ ߢߐ߲߮ ߠߊ߫ ߢߊ߫ ߛߌ߫ ߞߊ߲߬، ߒ߬ ߛߌߦߊߡߊ߲߫ ߞߵߏ߬ ߝߣߊ߫ ߦߋ߫ ߸ ߞߏ߬ߣߌ߲߬ ߓߌ߬ ߘߏ߲߬ ߸ ߤߊߟߌ߫ ߡߊ߲߬ߛߊ߬ߙߋ߲߬ ߞߊߡߋߙߋ߲ ߓߍ߯ ߘߐ߫ ߘߐ߰ߡߊ߲ ߦߋ߫ ߛߋ߫ ߟߊ߫ ߛߓߍߟߌ ߞߍ߫ ߟߊ߫ ߛߌߛߍ߲߬ ߕߐߟߍ߫ ߣߌ߫ ߜߟߍ߬ߦߊ߫ ߕߍ߫.
߅- ߞߎ߲߬ߝߟߐ ߘߐ߫ ߜߋߟߋ߲ߜߋߟߋ߲ ߠߎ߫ ߕߎ߲߬ ߕߍ߫ ߒߞߏ ߦߋ߫ ߟߊ߫ ߸ ߜߋߟߋ߲ߜߋߟߋ߲߫ ߞߊ߲ߞߋ ߓߍ߯ ߦߴߊ߬ ߦߋ߫ ߟߊ߫ ߛߌߛߍ߲߬ ߝߏ߫ ߝߛߐߞߐߙߌ ߟߎ߬ ߸ ߏ ߘߏ߲߬ ߕߍ߫ ߒߞߏ ߣߐ߬ ߘߌ߫.
߆- ߕߎ߬ߡߊ߬ ߖߏߣߊ ߟߊ߫ ߸ ߒߞߏ ߛߓߍߟߌ ߖߌ߬ߦߟߊ߬ߡߊ ߟߋ߫ ߕߘߍ߬ ߦߋ߫ ߟߊ߫ ߓߟߐߟߐ ߟߊ߫ ߞߊ߲߬ߖߊ߬ߡߊ߯ߘߌ߫ ߣߌ߫ ߝߊ߬ߞߏߟߌ.ߣߍߕ ߟߊ߫، ߛߓߍߘߋ߲߫ ߕߎ߲߬ ߕߍ߫ ߦߋ߫ ߟߊ߫ ߝߋߎ߫، ߊ߬ ߓߌ߬ ߝߐߟߌ߫ ߘߐ߫ ߸ ߥߞߌ-ߔߘߋߞߎ߫ ߞߍߦߙߐ ߦߋ߫ ߒߞߏ ߟߊ߫ ߸ ߥߊߟߌߡߐ߯ ߘߍ߬ߘߊ߬ ߓߟߋߓߟߋ ߟߎ߬ ߟߊ߫ ߞߘߐߓߌ߲ߓߌ߲ߠߌ߲ ߛߘߊߘߐ߫ ߊ߬ߟߎ߫ ߖߍ߬ߘߍ ߝߍ߬ ߡߍ߲ ߥߊߘߌ߫ ߕߍ߫ ߓߐ߫ ߟߊ߫ ߡߊ߲߬ߘߋ߲߬ߞߊ߬ ߛߌ߫ ߞߎ߲߬ ߸ ߊ߲ ߘߌ߫ ߏ߬ ߡߊߛߐߓߊ߯ ߞߊߡߋߙߋ߲ ߠߎ߬ ߝߏ߬ ߦߙߐ ߣߌ߲߬ ߘߐ߫ ߦߊ߲߬ ߞߵߊ߬ ߓߍ߯ ߝߊ߬ߙߊ߫ ߟߊ߲߬ߛߌ߬ߣߍ߬ ߝߏߝߣߊ߫ ߓߊߕߍ߫ ߣߝߊ߬ߖߌ߬ߞߊ ߣߌ߫ ߟߊ߬ߡߌߣߌ߲ ߛߌ߬ߛߋ߫ ߣߏߙߊߛߏߓߊ߫ ߞߊ߲߬.
ߏ߬ ߘߐ߫ ߸ ߝߍ߭ ߏ߬ ߟߎ߬ ߣߴߊ߬ ߢߐ߲߰ߘߐ߬ ߞߏߝߐߓߊߟߌ ߟߎ߬ ߓߘߊ߫ ߞߍ߫ ߘߐ߬ߝߐ ߘߌ߫ ߓߌ߬߹.
ߣߌ߲߬ ߓߍ߯ ߝߐ߫ ߞߎ߲ ߠߋ߬ ߸ ߓߊߏ߬ ߘߟߊߡߌߘߊߟߌ ߣߊ߬ߕߐ߫ ߓߐ߫ ߟߊ߫ ߟߋ߬ ߞߊߙߏ߫ ߞߋߟߋ߲߫ ߣߌ߫ ߞߐ߫ ߓߌ߬ ߞߐ߫:
ߊ- ߥߊߟߌߞߊ߲ ߠߎ߬ ߕߍߣߊ߬ ߛߋ߫ ߘߟߊߡߌ߬ߘߊ߬ ߟߊ߫ ߒߞߏ ߘߐ߫ %߁߀߀ ߦߏ߫ ߊ߲ ߦߟߌ߫ ߦߴߊ߬ ߘߝߊ ߟߊ߫ ߢߊ ߡߍ߲ ߌߞߘߐߞߘߐ߫ ߣߌ߲߬ ߸ ߓߊߏ߬ ߊ߬ ߡߙߍ߬ߛߍ ߟߋ߬ ߡߎߣߎ߲߬.
ߋ- ߒߞߏ ߞߎߡߊߘߋ߲ ߠߎ߬ ߘߟߊߞߢߊߣߍ߲߫ ߕߍߣߊ߬ ߞߍ߫ ߟߊ߫ ߞߵߊ߬ ߞߎ߲߭ ߞߍ߫ ߟߐ߲ߕߊ߫ ߛߐ߬ߘߐ߲߬ߣߍ߲ ߠߎ߫ ߝߘߏ߬ߢߐ߲߰ߡߊ ߘߌ߫ ߸ ߒߞߏ ߡߊ߫ ߓߊߓߋ߬ ߡߍ߲ ߠߎ߬ ߘߐ߫ ߢߊ߫ ߞߋߟߋ߲߫ ߡߊ߬ ߸ ߘߟߊߡߌߘߊ ߓߊ߯ߙߊ ߕߊ߬ߕߐ߫ ߏ߬ ߟߎ߬ ߡߍ߲ ߠߎ߬ ߞߎߡߊߘߋ߲ ߠߎ߫ ߡߊ߬.
ߞߏ߬ߣߌ߲߬ ߊ߬ ߛߐߍ:
- ߓߊ߯ߙߊ߫ ߞߟߊߒߞߋ߫ ߛߊߞߍߣߍ߲ ߡߍ߲ ߠߎ߬ ߓߘߊ߫ ߓߊ߲߫ ߞߍ߫ ߟߊ߫ ߣߌ߫ ߕߐ߲-ߖߊ߯ߓߡߊ ߣߴߊ߬ ߓߊ߯ߙߊߢߐ߮ ߟߎ߬ ߣߌ߫ ߞߏߝߌ߫ ߊߣߊߣߌ߲߬ ߖߊ߯ߓߘߊ ߣߌ߫ ߣߌ߫ ߛߑߕߊ߲ߝߐߙ ߖߊ߯ߓߘߊ ߕߊ߯ ߘߊ߫ ߏ߬ ߟߎ߬ ߡߊߟߐ߬ WMT23 ߖߊ߯ߓߊ߫ ߕߙߏߞߏ ߟߎ߬ ߘߟߊߡߌߘߊߟߌ ߜߊ߬ߙߊ ߘߐ߫ ߛߌ߲ߞߊߔߎߙ ߞߏߟߌ߲ߞߏ߬ߟߌ߲ ߆-߁߀/߂߀߂߄ ߠߊ߫ ߸ ߡߋߕߊ =ߝߍߛߓߎߞ” ߞߏߟߊߘߍ ߟߊ߫ ߞߘߐߓߌ߲ߓߌ߲ߠߌ߲ ߠߊ߫.
- ߊ߬ ߣߌ߫ ߓߊ߯ߙߊ߫ ߛߍ߲ߛߍ߲ߣߍ߲߫ ߜߘߍ߫ ߟߎ߫ ߞߊ߬ ߓߍ߲߬ ߞߎߡߊߘߋ߲ ߠߎ߬ ߢߣߊߕߐ߬ߡߐ߲ ߣߌ߫ ߞߎ߬ߙߎ߲߬ߘߎ ߟߎ߬ ߥߊߟߋߦߊ ߡߊ߬ ߓߊ߯ߙߊ߫ ߡߐ߬ߟߐ߲߬ߡߊ ߣߌ߲߬ ߞߊߡߊ߬.
ߦߟߌߟߊ߲ߘߌߦߊ߫ ߘߍ߲߰ߦߊ߬ߣߍ߲ ߣߊ߬ߕߐ߫ ߘߟߊߡߌߘߊߟߌ ߓߊ߯ߙߊ ߟߎ߬ ߟߊߞߐ߯ ߟߊ߫ ߏ߬ ߟߎ߫ ߟߋ߬ ߟߊ߫ ߟߏ߲߫ ߣߊ߬ߕߐ ߟߎ߬ ߞߣߐ߫ ߜߊߟߌߜߊߟߌ߫ ߸ ߏ߬ ߞߍߕߐ߫ ߛߊ߲߬ ߞߎߘߊ ߂߀߂߅ ߟߋ߬ ߟߊ߫ ߡߎ߬ߕߎ߲߬ ߸ ߞߊ߬ ߓߍ߲߬ ߜ߭ߎߜ߭ߎ߬ߟ ߣߴߊ߲ ߕߍߟߊ ߢߍߥߟߊ ߡߊ߬ ߸ ߡߍ߲ ߓߘߊ߫ ߟߊߕߊ߬ߡߌ߲߬ ߊ߲ ߡߊ߬ ߞߊ߬ ߓߊ߲߫.
ߏ߬ ߟߋ ߞߍߕߐ߫ ߟߢߊ߬ߟߌ ߘߊߡߌߘߊ ߘߌ߫ ߛߊ߫ ߸ ߞߊ߬ ߘߟߊߡߌߘߊߟߌ ߓߘߍ߬ߦߊ ߞߛߊߞߊ ߟߊߦߟߍ߬، ߒ߬ߓߵߊ߬ ߕߊ߬ߡߌ߲߬ߕߐ߫ ߘߝߊ߫ ߟߊ߫ ߕߋ߲߬ ߠߋ߬ ߛߊ߲߬ ߣߊ߬ߕߐ ߟߎ߬ ߞߣߐ߫.
ߣߌ߲߬ ߓߍ߯ ߝߐߞߎ߲ ߠߋ߬ ߸ ߓߊߏ߬ ߊ߰ ߡߊ߬ߣߋ߲߬ߞߊ߫ ߡߙߊ߬ߞߊ߬ ߓߐ߲ߛߐ߲ ߢߌ߲߬ ߠߎ߬ ߣߌ߫ ߡߙߊ߬ߞߊ߬ߘߋ߲ ߠߎ߬ ߢߣߊ߫ ߟߋ߬ ߞߏ߫ ߊ߬ߟߎ߬ ߘߌ߫ ߛߋ߫ ߊ߬ߟߎ߬ ߟߊ߫ ߝߘߊ߬ߝߌ߲߬ߞߊ߲߫ ߛߓߍߣߍ߲ ߒߞߏ ߦߟߍ߬ߡߊ߲߬ ߣߴߊ߬ߟߎ߬ ߓߊ߯ߙߊߢߐ߯ ߛߣߌߥߊ ߟߎ߬ ߦߋ߫ ߛߣߌߥߊߞߊ߲ ߘߐ߫ ߞߊߙߏ߫ ߥߐ߯ߙߐߣߊ߲߫ ߣߊ߬ߕߐ ߞߐߝߍ߬.
ߐ߲߬ߤߐ߲߮ ߸ ߞߏ߫ ߖߋ߬ߝߙߋ ߦߴߊ߬ ߛߌ߰ ߢߊ߲ߛߊ߲ ߠߊ߫ ߡߎߣߎ߲߬ ߘߋ߬ ߞߊ߬ ߓߎ߬ߘߐ߬ߝߍ߬ߟߊ ߡߊߞߐ߬ߣߐ߲߬، ߞߏ߫ ߛߐߣߌ߲߫ ߊ߬ ߓߍ߫ ߢߊ߬. ߏ߬ ߟߋ. ߊߟߎ߫ ߣߌ߫ ߖߐ߫.
ߞߊ߬ߙߊ߲߬ߡߐ߯ / ߓߊ߬ߓߊ߫ ߡߊ߬ߡߊߘߌ߫ ߖߊ߰ߣߍ߫
ߒߞߏ ߥߙߎߞߌ ߛߌ߲߬ߝߏ߲߬ߢߊ߬ߟߌ߬ ߖߊ߯ߓߡߊ ߞߊ߲ߕߌ߮
ߞߏ߲ߞߏߘߌ߬ߓߌ/߂߁/ߞߜ.߇߈߉ – ߂߀߂߄