ߛߌߣ ߕߊ߯ߡߊߘߐߕߊ߮ ߟߊ߬ߛߋ߬ߟߌ ߒߞߏ ߕߐ߲ ߠߎ߬ ߣߌ߫ ߒߞߏ ߡߌ߬ߙߌ߲߬ߘߌ ߡߊ߬.
ߞߎߣߎ߲ߟߏ߲ ߞߜ. ߇߉߀ / ߂߀߂߅ ߞߏ߲ߓߌߕߌ߮ ߕߋ߬ߟߋ߫ ߂߉ ߡߊ߬،
ߒ.ߥ.ߛ.ߖ. ߡߙߊ߬ߘߊ ߞߏߟߊߕߍ߮ ߞߊ߬ ߒߞߏ ߕߐ߲ ߓߍ߯ ߡߊߞߟߌ߫ ߟߊ߬ߘߍ ߘߏ߫ ߡߊ߬ ߥߛߊߔ ߞߊ߲߬ ߂߀ߙߋ߲ ߀߀ ߖߋߞߎ ߟߊ߫ ߸ ߞߊ߬ ߟߊ߬ߘߍ ߞߎ߲߬ߝߊ߰ ߂߁ߙߋ߲ ߁߆ߟߊ߫، ߟߊ߬ߘߍ ߞߎ߲߬ߠߊߛߌ߰ߣߍ߲߫ ߕߘߍ߬ ߒߥߛߖ ߞߊ߲ߕߌ߮ ߟߋ߬ ߓߟߏ߫ ߸ ߊ߬ ߘߊߦߟߍ ߓߏ߲߬ߧߊ ߘߏ߲߬ ߘߊ߫ ߛߟߊߕߌ߯ ߖߌ߰ߓߊ߬ ߛߌ߬ߟߊ߬ ߡߊ߯ߘߌ߫ ߡߊ߲߬ߖߊ߲߬ ߓߙߋߕߋ߫ ߟߋ߬ ߓߟߏ߫.
ߒ ߞߊ߬ߙߊ߲߬ߡߐ߯ ߓߊ߬ߓߊ߫ ߡߊ߬ߡߊߘߌ߫ ߖߊ߰ߣߍ߫ ߛߋ߫ ߘߊ߫ ߞߣߍ ߞߊ߲߬ ߛߊ߫ ߸ ߒ߬ߞߊ߬ ߓߟߐߟߐ ߞߙߏ߬ߝߏ ߖߐ߲ߝߐ߲ ߝߙߋߞߋ ߡߴߊ߬ ߘߍ߬ߡߍ߲߬ ߟߊ߬ߘߍ ߟߊߓߊ߲ ߠߊ߫ ߡߌߛߌ߬ߙߊ߲߬ (ߋߖ߭ߌߔߑߕ)
ߜߊ߬ߙߊ ߘߊߦߟߍ߬ߣߍ߲߸ ߞ. ߖߌ߬ߓߙߌ߬ߟߊ߫ ߖߊ߰ߣߍ߫ ߞߊ߬ ߒߞߏ-ߜ߭ߎߜ߭ߎߟ ߓߊ߯ߙߊ ߛߊ߲߬ ߈ ߘߊ߲߬ߕߍ߰ߟߌ ߞߐߣߐ߲ߞߎ߲ߓߊߘߏ߲ ߞߍ߫ ߸ ߞߏ߫ ߒߞߏ ߘߏ߲߬ ߘߊ߫ ߜ߭ߎߜ߭ߎߟ ߞߣߐ߫ ߇߈߉/߂߀߂߄ ߥߊ߬ߛߌ߬ߥߙߊ ߕߋ߬ߟߋ߫ ߂߇ ߕߊ߬ߡߌ߲߬ߣߍ߲ ߠߋ߬ ߟߊ߫ ߞߊ߲߫ ߂߄߃ ߘߌ߫ ߸ ߊ߬ ߣߊ߬ ߘߊ߫ ߞߍ߫ ߞߊ߲߫ ߂߄߉ ߘߌ߫ ߂߀߂߅ ߘߓߊ߬ߓߌߟߊ ߟߊ߫. ߞߊ߲߫ ߡߊߖߌ߰ߣߍ߲߫ ߁߁߅ ߡߍ߲ ߦߴߏ߬ ߟߎ߬ ߘߐ߫ « ߟߐ߲ߕߊߞߏ ߘߐ߫ » ߸ ߒߞߏ ߞߋߟߋ߲߫ ߠߋ߬ ߝߟߐ߫ ߞߵߊ߬ ߡߊ߬ߞߍߕߊ߫ ߓߊ߯ߙߊ ߟߊߞߎߙߊ߲߫ ߕߐ߭
ߟߎ߬ ߢߍ߫ ߸ ߞߵߏ߬ ߞߎ߲߭ ߞߍ߫ ߒߞߏߡߐ߮ ߟߎ߬ ߟߊ߫ ߘߐ߬ߖߊ߬ ߓߊ߯ߙߊ߫ ߡߙߐߕߐߕߐ ߘߌ߫.
« ߖߊ߯ߓߊ ߕߙߏߞߏ ߟߎ߬ ߘߟߊߡߌߘߊ߫ ߜߙߊ World Machine Translation « ߡߍ߲ ߦߋ߫ ߞߍ߫ ߟߊ߫ ߘߐ߫ ߛߊ߲߬-ߏ-ߛߊ߲߬ ߸ ߢߌ߬ߣߊ߲߬ ߕߊ߫ ߜߊ߬ߙߊ ߏ߬ ߞߍߕߐ߫ ߣߍߣߍߓߊ ߣߌ߲߬ ߕߟߋ߬ ߄-߉ ߕߍߟߊ ߟߋ߬ ߘߐ߫ ߛߖ߭ߎ߫
ߛߏ ߟߊ߫ ߛߌߣ ߖߡߊ߬ߣߊ ߞߣߐ߫ ߸ « ߖߊ߯ߓߊ߫ ߕߙߏߞߏ ߟߎ߬ ߘߟߊߡߌߘߊߟߌ߫ ߜߙߊ » ߏ ߛߌ߲߬ߝߏ߲߬ߧߊ߬ߟߊ ߟߎ߫ ߟߋ߫ ߣߊ߬ ߒߞߏ ߡߊߞߟߌ߫ ߟߊ߫ ߜߊ߬ߙߊ ߏ߬ ߢߣߊߓߊ߯ߦߊ ߘߐ߫ « ߕߐ߲-ߖߊ߯ߓߡߊ » ߛߌߟߊ ߝߍ߬ ߞߊ߬ ߓߍ߲߬ ߊ߬ߟߎ߬ ߣߌ߫ ߏ߬ ߟߊ߫ ߓߊ߯ߙߊߢߐ߲߯ߦߊ ߡߊ߬، ߣߴߌ ߞߵߊ߬ ߦߋ߫ ߒ߬ ߝߣߊ߫ ߣߐ߬ ߖߊ߬ߡߊ ߡߊߞߟߌ߫ ߟߊ߫ ߸ ߏ ߞߎ߲߲߭ ߦߋ߫ ߣߌ߲߬ ߓߏ߲߬ߧߊ ߟߊߛߋ ߟߋ߬ ߘߌ߫ ߒߞߏ ߕߐ߲ ߓߍ߯ ߟߊߘߍ߬ߣߍ߲ ߡߊ߬ ߦߏ߫ ߒߥߛߖ ߘߊ߬ߙߌ߬ߣߍ߲߫ ߏ߬ ߞߍ߫ ߟߊ߫ ߢߊ ߡߍ߲߸ ߓߊߏ߬ ߌ ߓߊ߯ ߖߊ߬ߡߊ ߥߋ߯ߟߋ߫ ߣߴߌ ߡߊ߫ ߝߋ߲߫ ߘߴߊ߬ ߡߊ߬، ߌ ߘߌ߫ ߘߏ߫ ߝߐ߫ ߊ߬ ߦߋ߫ « ߡߊ߲߬ߘߋ߲ ߠߎ߬ ߞߊ߲ ߠߴߏ߬ ߘߌ߫ ߞߘߐ߬ߡߊ߲߫ ».
ߡߊ߬ߞߟߌ߬ߟߌ߬ ߛߓߍ ߣߊ߬ ߘߊ߫ ߒ.ߥ.ߛ.ߖ. ߡߊ߬ ߞߏ߲ߓߌߕߌ߮ ߕߟߋ߬ ߁߁ ߠߋ߫ ߡߊ߬ ، ߊ߬ ߟߊߡߌ߬ߘߊ ߣߐ߰ߦߊ ߓߎ߲ߓߎ߲ߣߍ߲߫ ߛߋߞߏߦߊ߫ ߛߊ߬ߓߊ߫ ߟߋ߬ ߡߊ߬ ߸ ߣߴߏ߬ ߟߎ߬ ߘߝߊ߫ ߘߊ߫ ߘߐߙߐ߲߫ ߡߐ߰ ߘߌ߫ ߛߋ߫ ߥߟߋߟߌ ߟߊߡߌ߬ߘߊ߬ ߟߊ߫ ߞߊ߬ ߞߍ߫ ߜߊ߬ߙߊ ߞߣߍ ߞߊ߲߬ ߏ߬ ߓߊ߯ ߞߍ߫ ߘߎߢߊ߫ ߝߊ߲߬ ߛߌ߫ ߘߐ߫، ߏ߬ ߟߎ߫ ߟߋ߬:
- ߛߊ߲ߡߊߞߎߟߎ߲ ߖߐ߰ߣߍ،
- ߖߌ߬ߦߊ߬ߓߏ߲ ߖߐ߰ߣߍ ،
- ߕߐ߯ߛߓߍ ߖߐ߰ߣߍ ،
- ߞߵߏ߬ ߟߊ߫ ߘߏ߲߬ߛߓߍ߬ߞߏ ߡߛߍ߬ߞߍ߬ߡߛߍߞߍ ߟߎ߫ ߞߊ߲߬.
ߢߌ߬ߣߊ߲߫ ߛߋ߲߬ߧߊ ߣߌ߲߬ ߡߊ߬ ߸ ߒ߬ ߓߘߊ߫ ߕߎ ߟߎ߬ ߘߐߜߊ߬ߛߌ߬ ߛߊ߫ ߸ ߒ߬ߞߊ߬ ߞߎ߲߬ߠߊ߬ߛߌ߮ ߡߊ߫ ߛߋ߫ ߡߊ߬ߜߍ߲߬ߠߌ߲߬ ߞߍ߫ ߟߊ߫ ߞߊ߬ ߓߍ߲߬ ߣߌ߲߬ ߡߊ߬ ߦߏ߫ ߊ߬ ߞߊ߬ ߡߍ߲ ߞߍ߫ ߛߊߙߏ߲߬ߕߊ ߘߐ߫ ߞߊ߬ ߕߊ߯ ߝߟߏߙߌߘ (ߡߌߦߊߡߌ߫) ߛߏ ߟߊ߫ ߸ ߏ߬ ߡߍ߲ ߕߐ߯ߟߊߣߍ߲߫ ߡߊ߲߰ߘߋ߲ ߠߎ߬ ߟߊ߫ ߞߎߓߋ߫ « ߢߊ߬ߣߌ߲߫ » ߠߊ߫ ߡߊ߲߬ߘߋ߲߬ ߓߎߞߊ߬ߙߌ߬ ߝߌߟߊߣߊ߲ ߛߋ߫ ߛߊ߲ߞߎߘߊ ߘߐ߬ߝߐ ߕߊ߫ ߝߐߟߌ߫ ߘߐ߫.
ߏ߬ ߓߟߏߡߊ߬ ߸ ߡߊ߬ߜߍ߲߬ߠߌ߲߬ߠߊ ߟߎ߬ ߛߘߊ߫ ߘߐ߫ ߸ߛߌߟߊ ߓߘߊ߫ ߛߐ߬ߘߐ߲߬ ߝߙߋߞߋ ߝߊ߲߬ߓߊ ߡߊ߬.
ߞ.ߛߏ߬ߟߏ߫ ߝߙߊ߬ߓߊ-ߘߐ߫ ߞߊ߬ ߕߐ߬ߝߍ߬ߦߊ߬ߟߌ ߞߍ߫ ߏ߬ ߟߋ ߞߐ߫ ߸ ߞߏ߫ ߜ߭ߎߜ߭ߎߟ ߞߊ߲߫ ߦߋ߫ ߞߊ߲߫ ߁߁߅ ߡߍ߲ ߡߊ߬ ߞߏ߫ ߛߑߡߐߟ ߸ ߏ߬ ߟߎ߫ ߟߋ߬ ߦߋ߫ ߖߊ߬ߕߋ߬ ߟߊ߫ ߞߊ߲߫ ߠߎ߫ ߘߌ߫ ߡߍ߲ ߠߎ߬ ߟߊ߫ ߟߐ߲ߕߊ߫ ߓߊ߯ߙߊߣߍ߲ ߦߙߌߞߊ ߡߊ߲߫ ߛߌߦߊ߫ ߡߎߣߎ߲߬ ߸ ߒߞߏ ߟߋ߬ ߝߣߊ߫ ߖߊ߬ߕߋ߬ߣߍ߲߫ ߏ߬ ߞߊ߲߫ ߅ ߝߟߐ ߟߎ߬ ߘߐ߫ ߢߍߕߊ ߘߌ߫ ߛߎߘߊ߲ߓߟߏߡߊ߬ ߓߊ߯ߙߊ߫ ߞߍߣߍ߲ ߠߎ߬ ߘߐ߫ ، ߒߞߏ ߘߏ߲߬ ߡߊߥߟߋߣߍ߲߫ ߊ߬ ߕߊ߫ ߞߍߣߍ߲ ߏ ߖߌ߰ߦߊ ߟߋ߫ ߡߊ߬ ߸ ߊ߰ ߣߊ߬ ߏ߬ ߦߌ߬ߘߊ߬ ߜߊ߬ߙߊ ߘߐ߫ ߛߌߣ߸ ߣߴߊ߬ ߡߊ߫ ߢߵߊ߬ ߞߍ ߞߐ߫ ߞߊ߲߫ ߁߁߅ ߏ߬ ߟߎ߬ ߢߍߓߊ߮ ߘߌ߫߸.
ߓߊ߯ߙߊ ߡߍ߲ ߠߎ߬ ߝߐ߫ ߞߊ߲߫ ߏ߬ ߘߌ߫ ߸ ߏ߬ ߟߐ߬ߣߍ߲߫ ߞߊ߲ ߞߟߏߜߍ ߟߎ߫ ߟߋ߬ ߡߊ߬ ߸ ߊ߬ ߞߊ߲ߝߌߟߡߊ ߞߊ߬ߣߌ߲߫ ߸ ߞߵߏ߬ ߟߎ߬ ߞߍ߫ ߡߎߣߎ߲߬ ߞߵߊ߬ ߜߍ߫ ߛߏߘߊ߫، ߏ߬ ߟߋ ߞߐ߫ ߛߊ߫::
ߡߊ߲߬ߞߊ߲߫ ߘߟߊߡߌߘߊߟߌ ߓߊ߯ߙߊ ߝߣߊ߫ ߘߌ߫ ߘߊߡߌ߬ߣߊ߬ ߸ ߡߊ߲߬ߞߊ߲ ߕߴߛߋ߫ ߜߍ߫ ߟߊ߫ ߸ߣߌ߫߫ ߛߓߍߟߌ ߝߟߐ߫ ߡߊ߫ ߜߍ߫ ߸ ߞߟߏߜߍ ߟߎ߫ ߞߊ߬ߣߌ߲߫ ، ߟߊߜߍߟߌ ߣߌ߲߬ ߣߴߏ߬ ߓߊ߯ߙߊ ߖߐ߰ߣߍ ߟߎ߬ ߓߘߊ߫ ߘߊ߲߬ߕߍ߰ ߒ߬ ߓߟߏ߫ ߞߘߐ߬ߡߊ߲߫ ߸ ߏ߬ ߥߊߘߌ߫ ߟߊߘߍ ߖߍ߬ߘߍ ߓߘߊ߫ ߘߊߡߌ߬ߣߊ߬ ߒߞߏ ߡߌߙߌ߲ߘߌ ߓߟߏ߫ ߞߊ߬ ߓߊ߲߫ ، ߒ߬ߞߊ߬ ߥߊߦߌߞߊ߫ ߸ ߡߊ߲߬ߘߋ߲߬ߞߊ ߟߊ߫ ߝߛߊ߬ߒ߬ߞߏ߬ߡߊ߬ߦߊ ߟߴߊ߬ ߟߊߕߟߊ߫ ߟߴߊ߬ ߜߍ߬ߙߍ߲߬ߘߍ߬ߞߏ ߟߎ߬ ߘߐ߫ ߕߎ߬ߡߊ߬ߓߍ߯ ߊ߬ ߞߟߏߞߕߏ߫ ߥߞߊ߬ߟߌ߬ߣߍ߲ ߠߎ߬ ߛߌߟߊ ߝߍ߬ ߸ ߞߊߕߙߍ߬ߕߍ߫ ߒߞߏߡߐ߮ ߟߎ߫ ߡߊ߬ ، ߣߴߏ߬ ߕߍ߫ ߞߊ߲߫ ߜߘߍ ߡߌ߬ߙߌ߲߬ߘߌ ߟߎ߫ ߡߐ߰ ߞߋߟߋ߲߫ ߔߋ߫ ߟߴߊ߬ߟߎ߬ ߕߊ ߖߐ߲߰ߣߍ߲߬ߦߊ߬ ߟߊ߫ ߸ ߏ߬ ߣߴߊ߬ ߕߊ߫ ߓߊ߯ߙߊ ߝߣߊ߫ ߕߴߛߋ߫ ߞߍ߫ ߟߴߊ߬ ߕߎ߬ߡߊ߬ ߘߌߡߊ߲ ߠߊ߫.
ߞ. ߖߌ߰ߓߊ߬ ߛߌ߬ߟߊ߬ ߡߊ߯ߘߌ߫ ߡߊ߲߬ߖߊ߲߬ ߓߙߋߕߋ߫ ߞߊ߬ ߞߎߡߊ ߕߊ߬ ߸ ߞߊ߬ ߒ.ߥ.ߛ.ߖ. ߝߏ߬ ߘߐ߬ߖߊ ߟߊ߫ ߸ ߞߊ߬ ߕߌ߲ߞߌ߫ ߊ߬ߟߎ߬ ߦߋ߫ ، ߞߏ߫ ߛߌ߲߬ߝߏ߲߬ߧߊ߬ߟߌ ߟߋ߬ ߘߛߍߣߍ߲߫ ߒߞߏ ߡߌ߬ߙߌ߲߬ߘߌ ߘߐ߫ ߘߐߙߐ߲߫ ߸ ߏ߬ ߟߋ ߝߙߋߞߋ ߦߴߊ߲ ߞߊ߲߬ ߸ ߒߞߏ ߘߌ߲߬ߞߏ ߓߘߊ߫ ߛߌߦߊߦߊ߫ ߓߌ߬ ߞߏߛߓߍ߫.
ߟߊ߬ߘߍ ߞߊ߬ ߦߟߌߣߐ ߕߊ߬ ߞߎߡߊ ߏ߬ ߞߊ߲߬߸ ߞߏ߫ ߥߛߊ߬ߓߊ߰ߦߊ ߘߏ߫ ߘߌߣߊ߬ ߛߌ߰ ߛߋ߲߬ߞߊ߲߬. .
ߞߊ߬ߙߊ߲߬ߝߊ߫ ߛߏ߬ߟߏ߫ ߝߙߊ߬ߓߊ-ߘߐ߫ ߛߌ߬ߛߋ߬ ߞߎߡߊ߫ ߘߊ߫ ߢߟߊ ߦߟߌߟߊ߲ߘߌߦߊ߫ ߘߍ߲߰ߦߊ߬ߣߍ߲ ߝߣߊ߫ ߞߊ߲߬ ߸ ߞߏ߫ ߞߵߊ߬ߟߋ߬ ߕߏ߫ ߌ ߢߊ ߟߊ߫߸ ߥߟߍߟߊ ߦߴߊ߬ ߟߊ߫ ߸ ߊ߬ ߘߴߌ ߣߌ߫ ߡߐ߱ ߟߊ߫ ߓߊ߬ߘߏ߬ߢߐ߲߰ߦߊ ߘߟߊߡߌ߬ߘߊ߬.
ߞߊ߬ߙߊ߲߬ߝߊ߫ ߖߌ߬ߓߙߌ߬ߓߊ߫ ߖߊ߰ߣߍ߫ ߞߊ߬ ߥߟߍߟߊ ߘߟߊߡߌߘߊߟߌߟߊ ߝߣߊ߫ ߢߊ߬ߕߣߐ ߞߏߝߐ߫ ߸ ߓߊߏ߬ ߜߋߟߋ߲ߜߋߟߋ߲ ߠߎ߬ ߣߌ߫ ߞߍߟߊ߲ ߡߍ߲ ߠߎ߬ ߦߋ߫ ߡߊ߲߬ߞߊ߲ ߘߟߊߡߌ߬ߘߊ ߟߊ߫ ߞߊ߲߫ ߁߇߀ ߟߴߏ߬ ߟߎ߬ ߟߊ߫ ߕߊ߲߬، ߞߏ߬ߣߌ߲߬ ߞߵߌ ߣߴߌ ߞߎߡߊߢߐ߯ ߕߏ߫ ߞߎߡߟߊ ߜߋߟߋ߲ߜߋߟߋ߲ ߠߊ߫ ߝߊ߲ߞߢߊ ߘߐ߫߸ ߞߵߏ߬ ߞߎߡߊߢߐ߯ߦߊ ߘߟߊߡߌ߬ߘߊ߬߸ ߞߊ߲߫ ߇߀ ߟߋ߬ ߘߐߙߐ߲߫ ߦߴߏ߬ ߞߍ߫ ߟߊ߫ ߝߟߐ߫ ߸ ߒߞߏ ߡߊ߫ ߛߋ߫ ߏ߬ ߘߐ߫ ߝߟߐ߫.ߝߏ߫ ߣߴߊ߲ ߞߊ߬ ߞߐߟߊ߫ ߖߊߕߋߘߐߛߌ߮ ߣߌ߲߬ ߣߊ߲߬ߝߟߏ߬ߦߊ߫ ߞߵߊ߬ ߓߊ߯ߙߊ ߞߍ߫ ߦߊ߬ߣߌ߫ ߛߊ߲߬ ߣߊ߬ߕߐ ߕߍ߫، ߏ߬ ߘߐ߫ ߛߏ߭ ߦߋ߫ ߊ߫߬ ߓߙߏ߬ ߞߣߍ ߦߋ߫ ، ߓߊߏ߬ ߊ߬ ߞߍߟߌ ߘߍ߲ߣߴߊ߬ ߣߊ߬ߝߟߏ߬ߞߏ ߘߐߙߐ߲ ߠߋ߬ ߟߊ߫߸ ߡߍ߲ ߦߋ߫ ߓߍ߲߬ ߠߴߊߡߋߙߞߌ߫߾ ߂߆߇߅߉߇ ߡߊ߬߸ ߓߊߏ߬ ߊ߬ ߞߍߓߊ߮ ߟߎ߬ ߣߴߊ߬ ߖߐߙߊ߲ ߠߎ߬ ߓߍ߯ ߓߌߣߍ߲߫ ߠߋ߬.،
ߟߊߓߊ߲ ߘߐ߫߸ ߞߊ߬ߙߊ߲߬ߡߐ߰ ߎߡߊߙߎ߫ ߛߏߡߊߛߌ߫ ߞߊ߲ߕߍ߫ ߞߊ߬ ߝߏ߬ߟߌ ߣߌ߫ ߞߎߟߎ߲ߖߋߟߌ ߣߌ߫ ߕߌ߲ߞߌ ߞߍ߫ ߒ.ߥ.ߛ.ߖ. ߦߋ߫.
ߏ߬ ߟߋ ߞߍ߫ ߘߊ߫ ߟߊ߬ߘߍ ߞߎ߲߬ߝߊ߰ߣߍ߲ ߘߌ߫ ߡߎ߬ߕߎ߲߬ ߛߊ߫. .
ߞ. ߖߌ߰ߓߊ߬ ߛߌ߬ߟߊ߬ ߡߊ߯ߘߌ߫ ߡߊ߲߬ߖߊ߲߬ ߓߙߋߕߋ߫ ߟߊ߫ ߞߊ߲߬ߞߎߡߊ ߟߋ߬ ߞߵߊ߬ ߓߏ߬ߧߊ ߣߌ߫ ߜߟߌߦߊ ߟߊߛߋ߫ ߒߞߏ ߕߐ߲ ߠߎ߬ ߣߌ߫ ߒߞߏ ߡߌߙߌ߲ߘߌ߲ ߡߎ߰ߡߍ ߡߊ߬ ߘߎߢߊ߫ ߝߊ߲߭ ߓߍ߯. ߊߟߎ߫ ߣߌ߫ ߖߐ߫.
ߛߏ߬ߟߏ ߝߙߊ߬ߓߊ-ߘߐ߫