ߒߞߏ ߟߊߥߙߎߞߌ߫ ߓߘߊ߫ ߞߍ߫ ߡߊ߲߬ߘߋ߲߬ߞߊ ߓߍ߯ ߡߊ߬ ߛߋ߲ߛߋߘߋ߲ ߘߌ߫ ߓߌ߬߸ߏ߬ ߟߋ߫ ߞߏߛߐ߲߬،ߡߊ߲߬ߘߋ߲߫ ߛߌ߰ߓߊ߮ ߣߴߊ߬ ߕߎߙߊ߲ߒߞߋ߫ ߛߌߦߊߡߊ߲߫ ߦߋ߫ ߥߙߎߞߟߌ߫ ߛߌߟߊ߫ ߢߌߣߌ߲ ߞߊ߲߬ ߒߞߏ ߛߓߍߛߎ߲߫ ߢߍ߫ ߘߊߞߎ߲߫ ߓߍ߯ ߘߐ߫. ߏ߬ ߟߋ ߞߊ߬ ߞߊ߬ߣߌ߲߬ߦߋ ߘߏ߫ ߟߎ߫ ߟߐ߬ ߟߐ߬ߦߙߐ ߘߏ߫ ߡߊߡߌ߬ߣߊ߬ ߟߊ߫ ߔߘߋߞߎ ߛߙߊ߬ߓߊߟߌ ߞߊ߲߬ ߣߊߟߌ߬ߡߎ߲߬ ߥߞߌߔߋߘߌߦߊ ߘߌ߫. ߏ߬ ߟߋ ߖߊ߬ߕߋ߬ߘߐ߬ߛߌ߰ ߞߍߦߙߐ (ߥߞߌߡߋߘߌߦߊ ߌ߲ߞߎߓߋߕߐ߬) ߟߊߞߊ߬ ߘߊ߫ ߁߁ߙߋ߲ ߂߇ ߟߊ߫ ߘߓߊ߬ߕߊ ߕߋ߬ߟߋ ߂߂ ߡߊ߬. ߒߞߏ ߡߊ߫ ߛߴߊ߬ ߟߐ߬ߘߎ߮ ߡߊߛߐ߬ߘߐ߲߬ ߠߊ߫ ߥߞߌߔߋߘߌߦߊ ߞߍߦߙߐ ߟߎ߬ ߘߐ߫߸ ߝߏ߫ ߘߓߊ߬ߕߊ ߕߋ߬ߟߋ ߂߆ ߡߊ߬. ߞߵߏ߬ ߞߎ߲߭ ߞߍ߫ ߕߟߋ߬ߓߊ߰ߦߊ߬ߟߌ ߛߋ߲߬ߠߊ߬ߛߎߡߦߊ ߘߌ߫ ߝߘߊ߬ߝߌ߲߬ߠߊ߫ ߕߟߋ߬ߓߋ ߡߊ߲߬ߘߋ߲߬ ߖߡߊߣߊ ߟߎ߬ ߘߐ߫. ߒߞߏ ߓߘߴߊ߬ ߕߊ߬ ߞߣߍߜߍ߫ ߏ߬ ߟߋ ߡߊߛߐ߬ߘߐ߲߬ ߣߌ߲߬߸ ߞߵߊ߬ ߓߐ߫ ߥߞߌߞߊ߲ ߘߍߘߍ߲ߒߝߍ߭ߦߊ ߟߊ߫߸ ߞߵߊ߬ ߞߍ߫ ߊ߬ ߕߊ߬ ߞߊ߲߫ ߓߟߏߡߊߞߊ߬ߣߍ߲ ߘߌ߫ ߥߞߌߔߘߋߞߎ ߞߊ߲߬߸ ߏ߬ ߓߍߣߊ߬ ߞߍ߫ ߛߊߓߎ߫ ߘߌ߫ ߒߞߏ߫ ߞߊߙߊ߲ߘߋ߲ ߣߴߊ߬ ߞߊ߬ߙߊ߲߬ߡߐ߮ ߟߎ߬ ߢߍ߫߸ ߞߊ߬ ߢߌߣߌ߲ߠߌ߲ ߣߐ߬ߦߊ ߣߐ߰ߦߊ߬ ߓߍ߯ ߢߍ߫ ߕߐߟߍ߫߹ ߞߵߊ߲ ߞߛߌ߫ ߊ߲ ߠߊ߫ ߘߐ߬ߝߐ ߟߎ߬ ߢߌߣߌ߲߫ ߡߊ߬ ߝߊ߬ߙߊ߲߬ߛߌ ߣߴߊ߲ߜ߭ߑߟߍ ߟߎ߬ ߘߐ߫. ߖߊ߬ߕߋ߬ߘߐ߬ߛߌ߮ ߣߌ߲߬ ߡߞߊߣߌ߲߫ ߝߟߐ ߞߍ߫ ߘߊ߫ ߞߙߊ߬ߡߐ߯ ߝߊ߬ߞߏ߬ߟߌ߬ ߣߌ߫ ߞߙߊ߬ߡߐ߯ ߓߊ߬ߓߊ߫ ߟߎ߫ ߟߋ߬ ߓߟߏ߫. ߞߊ߬ ߓߍ߲߬ ߥߞߌߔߋߘߌߦߊ ߟߐ߲ߓߊߟߌߦߊ ߣߴߊ߬ ߖߊ߬ߕߋ߬ߘߐ߬ߛߌ߰ ߞߍߦߙߐ ߓߊ߯ߙߊ ߟߊ߫ ߜߟߍ߬ߦߊ ߡߊ߬߸ ߒߞߏ ߟߊ߫ ߥߙߎߞߌ ߟߊߘߌߦߊߢߍ ߣߴߊ߬ ߕߊ ߒߞߏ ߛߏ߬ߝߊ ߟߎ߬ ߓߟߏ߫߸ ߡߐ߰ ߛߌߦߊߡߊ߲߫ ߠߎ߫ ߟߋ߬ ߢߌߣߌ߲߫ ߘߊ߫ ߓߊ߯ߙߊ߫ ߣߝߊ߬ߡߊ ߣߌ߲߬ ߓߟߏߦߊ ߡߊ߬߸ ߞߏ߬ߣߌ߲߬ ߏ߬ ߡߊ߫ ߛߋ߫ ߞߍ߫ ߟߊ߫ ߞߊ߬ ߓߍ߲߬ ߞߏ ߣߴߊ߬ ߞߍߢߊ ߡߊ߬. ߓߊ߯ߙߊ߫ ߞߊߟߊ߲ߞߋ ߞߟߊ߬ߥߟߎ ߣߌ߲߬ ߞߍ߫ ߘߊ߫ ߘߊߞߎ߲߫ ߓߟߋߓߟߋ ߝߌ߬ߟߊ ߟߋ߬ ߘߐ߫ ߕߊ߲߬ ߘߐ:
ߞߎߡߘߊ ߟߎ߬ ߟߊߦߍ߬ߟߍ.
ߊ߬ ߣߌ߫ ߞߍߦߙߐ ߛߓߍߟߌ ߟߎ߬ ߘߟߊߡߌ߬ߘߊ.
ߞߋ߬ߥߎ߬ߣߍ߲߬ߞߋߥߎ ߟߎ߬߸ ߏ߬ ߟߎ߬ ߞߍߓߊ߮ ߟߎ߬ ߓߍߣߊ߬ ߢߊߝߐ߫ ߒ߬ ߓߟߏ߫ ߝߊߙߊ߲ߝߊ߯ߛߌ߫ ߓߟߏߡߊ߬.
ߊ _ ߞߎߡߘߊ߫ ߟߊߦߟߍߟߊ ߟߎ߬.
ߏ߬ ߟߎ߬ ߓߍ߯ ߟߊߘߍ߬ߣߍ߲ ߦߋ߫ ߡߊ߲߬ߘߋ߲߬ߞߊ ߟߎ߬ ߟߋ߬ ߘߌ߫߸ ߡߍ߲ ߠߎ߬ ߞߵߊ߬ߟߎ߬ ߣߌߞߎ߬ߣߎ߲߬ ߥߞߌߔߋߘߌߦߊ ߣߌ߲߬ ߡߊߛߐ ߘߐ߫ ߤߊ߲߯ ߊ߲ ߛߋ߫ ߘߊ߫ ߘߊߞߎ߲ ߣߌ߲߬ ߘߐ߫ ߦߊ߲߬, ߏ߬ ߟߎ߬ ߛߙߍߘߍ ߟߎ߬ ߝߟߍ߫:
ߞߊ߬ߙߊ߲߬ߡߐ߮ ߦߛߎߝߎ߫ ߖߊ߬ߓߌ߬߸ ߕߙߎߞߌ߫.
ߞߊ߬ߙߊ߲߬ߡߐ߯ ߟߊ߲߬ߛߌ߬ߣߍ߫ ߞߎ߲ߝߊ߲ߕߐ ߝߏߝߣߊ߫߸ ߒߛߙߍߜߘߍ߫.
ߞߊ߬ߙߊ߲߬ߡߐ߯ ߟߊ߬ߡߌߣ ߡߊ߲߬ߘߋ߲߬ߡߏߙߌ߫ ߛߌ߬ߛߋ߫߸ ߣߏߙߊߛߏߓߊ߫.
ߏ߬߬ ߟߎ߫ ߟߋ߬ ߞߍ߫ ߘߊ߫ ߡߐ߰ ߝߟߐ߫ ߟߎ߬ ߘߌ߫߸ߡߍ߲ ߠߎ߬ ߞߊ߬ ߞߎߡߘߊ߫ ߛߌ߲ߘߌ߫ ߘߊߡߌ߬ߣߊ߬ ߥߞߌߔߋߘߌߦߊ ߞߣߐ߫߸ ߊ߬ߟߎ߫ ߕߎ߲߬ ߦߋ߫ ߓߊ߯ߙߊ߫ ߕߐ߬ߣߐߡߊ߫ ߣߌ߲߬ ߢߊߝߐ߫ ߟߊ߫ ߒߞߏߡߐ߮ ߟߎ߬ ߢߍ߫ ߓߟߐߟߐ߫ ߛߌߟߊ ߟߎ߬ ߣߌ߫ ߓߊ߬ߘߏ߬ߢߐ߲߰ߦߊ߬ߘߊ ߟߎ߬ ߘߐ߲߬ ߛߐ߲߬. ߞߊ߬ ߓߍ߲߬ ߒߞߏߡߐ߮ ߟߎ߬ ߥߊ߬ߞߊߟߌ ߡߊ߬ ߒߞߏ ߟߊߛߓߊ߬ߕߌ߬ ߘߊߞߎ߲ ߠߎ߬ ߓߍ߯ ߟߊ߫߸ ߡߐ߰ ߛߌߦߊߡߊ߲߫ ߠߎ߫ ߝߣߊ߫ ߞߊ߬ ߞߍߦߙߐ ߣߌ߲߬ ߡߊߛߐ ߘߊߡߌ߬ߣߊ߬ ߜߟߐߡߌ߲ ߠߊ߫. ߦߏ߫: ߡߏߙߌ ߡߊ߬ߣߊ߲߬ߓߟߊ߬ߞߊ ߖߊ߰ߣߍ߸ ߡߊ߬ߙߐߞߎ߬, ߊߓߎߓߊߞߊߙ ߓߣߊ߬ߡߏ߬ߙߌ߬ߘߎ߮ ߕߎ߬ߙߋ߸ ߟߓߌ߫, ߛߊ߲߬ߛߊ߲߬ߘߐ߫ ߊߡߙߊ߫ ߞߎߦߊߕߍ߫߸ ߛߌ߯ߙߌ߲߫, ߊߘߊߡߊ߫ ߡߜ߭ߊ߬ߛߊ߫߸ ߊߟߏߡߊ߲ߘߎ߯, ߊ߬ ߣߌ߫ ߡߐ߰ ߛߌߦߊߡߊ߲߫ ߜߘߍ߫ ߟߎ߫߸ ߡߍ߲ ߠߎ߬ ߓߍ߯ ߕߐ߮ ߕߍ߫ ߛߋ߫ ߛߓߍ߫ ߟߊ߫ ߦߊ߲߬.
ߋ ߺ ߞߍߦߙߐ ߞߐ߯ߙߍߦߊ߫ ߞߎߡߊߘߋ߲ ߠߎ߬ ߘߟߊߡߌ߬ߘߊ.
ߘߟߊߡߌߘߊߟߌ ߣߌ߲߬ ߓߊ߯ߙߊ ߝߣߊ߫ ߞߍ߫ ߘߊ߫ ߡߐ߰ ߘߊ߲ߘߐ߫ ߟߎ߫ ߟߋ߬ ߝߣߊ߫ ߓߟߏ߫. ߏ߬ ߟߎ߬ ߛߙߊߛߌ߰ ߕߐ߫ ߊ߲ ߓߟߏ߫ ߞߌ߬ߣߊ߬ߦߊ ߟߋ߬ ߡߊ߬߸ ߞߏ߬ߣߌ߲߬ ߊ߬ ߞߍߕߐ߫ ߕߍ߫ ߓߊ߯ߙߊ ߣߌ߫ ߒߞߏ ߝߊ߰ߡߎ߲߬ߠߌ߲ ߞߛߊ߬ߓߌ ߡߊ߬, ߏ߬ ߟߎ߬ ߝߣߊ߫ ߝߟߍ߫:
ߊ ߺ ߡߊ߬ߡߊ߬ߘߌ߫ ߘߎ߲ߓߎߦߊ߫ ߝߊ߬ߞߏߟߌ߫߸ ߊ.ߘ.
ߋ ߺ ߞߙߊ߬ߡߐ߯ ߓߊ߬ߓߊ߫ ߖߊ߰ߣߍ߫߸ ߞߊ߯ߤߌ߬ߙߊ߬.
ߌ ߺ ߞߙߊ߬ߡߐ߯ ߟߊ߲߭ߛߌ߬ߣߍ߬ ߞߎ߲ߝߊ߲ߕߐ ߝߏߝߣߊ߸ ߒߛߙߍߜߘߍ߬.
ߍ ߺ ߞߊ߬ߙߊ߲߬ߡߐ߯ ߟߊ߬ߡߌߣ ߡߊ߲߬ߘߋ߲߬ߡߏߙߌ߫ ߛߌ߬ߛߋ߫߸ ߣߏߙߊߛߏߓߊ߫.
ߎ ߺ ߞߊ߬ߙߊ߲߬ߡߐ߮ ߦߛߎߝߎ߫ ߖߊ߬ߓߌ߬߸ ߕߙߎߞߌ߫.
ߏ ߺ ߡߏߙߌ ߡߊ߬ߣߊ߲߬ߓߟߊ߬ߞߊ ߖߊ߰ߣߍ߸ ߡߊ߬ߙߐߞߎ߬.
ߏ߬ ߟߎ߫ ߟߋ߬ ߞߵߊ߬ߟߎ߫ ߣߌ ߞߎ߬ߣߎ߲߬ ߘߟߊߡߌߘߊߟߌ ߣߌ߲߬ ߘߊߞߘߐ߫߸ ߊ߬ߟߎ߬ ߛߋ߫ ߘߊ߫ ߗߋߛߓߍ߫ ߥߊ߯ ߛߓߊ߬ ߣߌ߫ ߞߐ߫ ߟߎ߫ ߘߟߊߡߌ߬ߘߊ߬ ߡߊ߲߬ߘߋ߲߬ ߡߌߙߌ߲ߘߌ ߟߎ߬ ߟߊߝߙߍ߫ ߞߊ߲ߡߊ߬. ߕߎ߬ߢߊ ߟߊ߫، ߏ߬ ߦߋ߫ ߓߊ߯ߙߊ߫ ߞߟߊ߬ߥߟߎ ߟߋ߬ ߘߌ߫߸ ߞߏ߬ߣߌ߲߬ ߗߋߛߓߍ߫ ߥߊ߯ ߃߈ ߜߘߍ߫ ߟߎ߫ ߦߋ߫ ߡߊ߲߬ߘߋ߲߬ ߘߐߞߐ߬ߣߐ߲ ߞߊ߲߬ ߡߎߣߎ߲߬ ߛߴߊ߲ ߘߌ߫ ߛߓߊ߬ߕߌ߫.
ߌ ߺ ߞߙߎ ߃߲ ߦߋ߫ ߛߋ߲ߒߞߏߟߊ ߟߎ߬ ߟߋ߬ ߘߌ߫.
ߏ߬ ߟߎ߬ ߦߋ߫ ߡߌ߬ߙߌ߲߬ߘߌ߬ ߜߘߍ ߟߎ߬ ߡߐ߱ ߟߎ߬ ߟߋ߬ ߘߌ߫߸ ߡߍ߲ ߠߎ߬ ߕߍ߫ ߒߞߏ߫ ߝߐߟߊ ߟߎ߬ ߝߋ߲߫ ߘߌ߫߸ ߏ߬ ߟߎ߫ ߣߵߊ߬ߟߎ߬ ߕߊ߫ ߓߊ߯ߙߊ ߣߌ߲߬ ߞߍ߫ ߟߊ߫ ߡߐ߰ߦߊ ߟߊߝߊ߬ߛߊ ߟߋ߬ ߡߊ߬߸ ߊ߬ ߣߌ߫ ߛߴߊ߬ߟߎ߬ ߘߌ߫ ߞߏ ߘߏ߫ ߞߍ߫߸ ߡߍ߲ ߘߌ߫ ߛߋ߫ ߞߏߝߐ߫ ߟߴߊ߬ߟߎ߬ ߞߐ߫. ߏ߬ ߟߎ߬ ߝߣߊ߫ ߝߟߍ߫:
ߊ ߺ ߊߡߌߙ ߊߤߊߙߏߣߌ߫߸ ߏ߬ ߦߋ߫ ߗ߭ߎߌ߬ߝߎ ﴿ ߦߊ߬ߤߎ߯ߘߎ ﴾ ߟߋ߬ ߘߌ߫ ߞߊ߬ ߓߐ߫ ߌߛߑߙߊߌߟ. ߊ߬ߟߋ ߟߋ߬ ߞߍ߫ ߘߊ߫ ߡߐ߰ ߝߟߐ ߘߌ߫߸ ߡߍ߲ ߞߊ߬ ߒߞߏ ߟߊ߫ ߟߐ߬ߘߎ߰ ߛߐߘߐ߲ ߞߴߊ߬ ߤߊߡߌ߲ ߘߌ߫߸ ߦߏ߫ ߊ߬ ߖߍ߬ߘߍ ߟߋ߬ ߞߍߕߐ߫ ߊ߬ ߕߣߐ߬ߓߐ߫ ߟߊ߫. ߊ߬ ߞߊ߬ ߓߊ߯ߙߊ ߞߍߢߊ ߟߎ߬ ߟߊߓߌ߬ߟߴߊ߲ ߠߊ߫߸ ߞߵߊ߲ ߢߍߡߌ߬ߘߊ߫߸ ߞߵߊ߲ ߛߊߞߍ߫ ߊ߲ ߠߊ߫ ߝߎ߬ߕߎ߲߬ߕߌ ߟߎ߬ ߘߐ߫߸ ߊ߬ ߣߌ߫ ߞߊ߬ ߞߋ߬ߥߎ߬ߣߍ߲߬ߞߋߥߎ ߟߎ߬ ߞߟߊߓߎ ߘߏ߲߬ ߊ߲ ߠߊ߫ ߞߊ߲ ߘߍ߬ߡߍ߲ ߠߊ߫. ߊߡߌߙ ߊߤߊߙߏߣߌ߫ ߞߊ߬ ߘߍ߬ߡߍ߲ ߡߍ߲ ߞߍ߫ ߒߞߏ ߦߋ߫ ߥߞߌߔߋߘߌߦߊ ߓߊ߯ߙߊ ߣߌ߲߬ ߘߐ߫߸ ߏ߬ ߕߍ߫ ߓߊ߲߫ ߟߊߞߊ߬ߟߌ߬ ߟߊ߫ ߢߊ߫ ߛߌ߫ ߡߊ߬. ߊ߬ ߣߌ߫ ߞߋ߬ߥߎ߬ߣߍ߲߬ߞߋߥߎ ߡߍ߲ ߠߎ߬ ߞߊ߬ ߒߞߏ ߟߊߘߏ߲߬ߠߌ߲ ߓߊ߯ߙߊ ߟߎ߬ ߞߍ߫ ߢߐ߲߮ߝߍ߬߸ ߒ߬ ߡߴߏ߬ ߟߎ߫ ߓߍ߯ ߟߐ߲߫߸ ߞߎߡߊ߫ ߕߴߊ߬ߟߎ߫ ߟߐ߬ߘߎ߮ ߟߎ߬ ߡߊ߬߸ ߒߠߋ ߞߊ߬ ߡߍ߲ ߞߋߟߋ߲ ߟߐ߲߫߸ ߏ߬ ߟߋ ߦߋ߫:
ߖߐ߲߭ߣ ߤߙߊߟߘ ߛߐߓߊ߬ ߘߌ߫.
ߖߐ߲߭ߣ ߤߙߊߟߘ ߛߐߓߊ߬ ߦߋ߫ ߣߐߙߑߝ߭ߍߛߌߞߊ ߟߋ߬ ߘߌ߫߸ ߡߍ߲ ߘߐ߰ߘߏ߲߬ߣߍ߲߬ ߦߋ߫ ߞߊ߲ ߠߎ߬ ߟߊߛߓߊ߬ߕߌ ߟߊ߫ ߥߞߌ ߟߎ߬ ߞߊ߲߬߸ ߊ߬ ߞߊ߬ ߟߐ߬ߘߎ߰ ߓߊ߫ ߞߍ߫ ߒߞߏ ߓߊ߯ߙߊ ߘߐ߫.
ߗߊߙߑߟߌߛ ߙߊߌߟߌ߫ ߦߋ߫ ߊ߲߬ߜ߳ߌ߬ߟߋ߬ߘߎ߰ߞߊ ߟߋ߬ ߘߌ߫߸ ߡߍ߲ ߘߐ߰ߘߏ߲߬ߣߍ߲߬ ߦߋ߫ ߡߊ߲߬
ߘߋ߲߬ߞߊ߲ ߠߎ߬ ߟߊ߫ ߞߏ߫ ߟߊ߫߸ ߊ߬ ߜߋ߲ߜߋ߲߫ ߒߞߏ߫ ߛߓߍߛߎ߲ ߣߌ߫ ߒߝߊߦߌ߲߫ ߛߓߍߛߎ߲ ߠߎ߬..
ߡߐ߱ ߟߎ߬ ߡߊߞߟߌ ߥߞߌߔߋߘߌߦߊ ߡߊߛߐ ߡߊ߬
ߒ߬ ߧߴߊ߬ ߢߌߣߌ߲߫ ߠߊ߫ ߒߞߏߡߐ߮ ߟߎ߬ ߓߍ߯ ߟߊߘߍ߬ߣߍ߲ ߝߍ߬߸ ߒߞߏ ߊ߬ߟߎ߬ ߦߴߊ߬ߟߎ߬ ߢߌ߲ ߓߊ߲ߓߊ߲߫ ߊ߬ߟߎ߬ ߘߊߜߟߏ ߘߐ߫߸ ߞߊ߬ ߞߟߊߓߎ ߕߊ߬ ߒߞߏ ߟߊ߫ ߞߍߦߙߐ ߣߌ߲߬ ߡߊߛߐ ߘߐ߫. ߞߊ߬ߕߎ߲߰ ߒߞߏ ߟߊ߫ ߞߘߐߕߏ ߕߟߋ߬ߓߊ߰ߦߊ߬ߟߌ ߣߌ߫ ߓߟߐߟߐߞߏ ߟߎ߬ ߘߐ߫߸ ߏ߬ ߟߋ ߞߊ߬ ߒߞߏ߫ ߞߊߙߊ߲ߘߋ߲ ߠߎ߬ ߟߐ߬ ߘߊߘߐߝߙߊߢߐ߲߯ߦߊ ߟߎ߬ ߟߊ߫ ߓߌ߬ߟߊ߬ߢߐ߲߰ߡߊ ߞߙߏߝߏ ߟߎ߬ ߞߊ߲߬. ߊ߬ ߣߌ߫ ߞߊ߬ ߟߊ߫ ߊ߲ ߓߊ߯ߙߊߣߐ ߟߎ߬ ߟߊ߫ ߞߏߖߎ߯ߦߊ߫߹ ߡߐ߱ ߘߏ߲߬ ߞߓߊ߫ ߘߴߌ ߖߍ߬ߘߍ ߣߐ߭ ߡߴߌߘߐ߫߸ ߏ߬ ߦߋ߫ ߟߊߓߊ߲ ߠߊ߫ ߛߟߊ߬ߦߊ ߟߋ߬ ߡߊ߬. ߏ߬ ߟߋ ߞߍߕߐ߫ ߊ߲ ߟߐ߬ ߟߊ߫ ߒߞߏ ߟߐ߬ߘߎ߮ ߞߏߝߐ߫ ߟߊ߫ ߖߊ߬ߡߊ ߦߋ߫߸ ߛߴߊ߬ߟߎ߬ ߘߴߊ߬ ߟߐ߲߫ ߊ߲ ߧߋ߫ ߘߊߞߎ߲ ߡߍ߲ ߘߐ߫߸ ߊ߬ ߣߴߊ߲ ߣߌ߫ ߡߍ߲ ߦߴߊ߬ ߞߊ߲߫.
ߞߏ߬ߣߌ߲߬ ߊ߲ ߘߌ߫ ߣߵߏ߬ ߟߎ߬ ߕߏ߫ ߝߐ߰ߓߍ߫ ߣߊ߬ߕߐ ߟߊ߫.
ߖߊ߬ߕߋ߬ߘߐ߬ߛߌ߰ ߜߘߍ ߟߎ߬
ߊߟߎ߫ ߦߴߊ߬ ߟߐ߲߫ ߞߏ߫ ߖߊ߬ߕߋ߬ߘߐ߬ߛߌ߯ ߣߝߊ߬ߡߊ߬ ߜߘߍ߫ ߟߎ߫ ߦߋ߫ ߦߋ߲߬߸ ߡߍ߲ ߠߎ߬ ߡߊ߲ߝߌ߬ߛߊ߬ ߒߞߏ ߡߊ߬ ߢߊ߫ ߛߌ߫ ߡߊ߬. ߏ߬ ߟߎ߬ ߢߍߛߐ߲ ߠߎ߬ ߝߟߍ߫:
ߥߞߌߞߎߋߕ ߖߌ߬ߦߊ߸
ߖߌ߬ߦߊ߬ߖߟߎ ߟߎ߬߸ ߘߌ߯ߣߊ߫ ߞߎߡߊ ߟߎ߬߸ ߛߊ߲߬ߘߊ ߟߎ߬߸ ߊ߬ ߣߌ߫ ߏ߬ ߟߎ߫ ߟߊߡߎߣߎ߲ߧߊ ߞߎߡߊ ߣߝߊ߬ߡߊ ߟߎ߬ ߟߋ߬ ߦߋ߫ ߛߓߍ߫ ߟߴߊ߬ߟߋ߬ ߞߣߐ߫.
ߥߞߌߓߎߞ: ߞߊ߬ߝߊ ߟߎ߬ ߟߋ߬ ߦߋ߫ ߟߊߘߊ߲߫ ߠߴߊ߬ߟߋ߬ ߞߣߐ߫.
ߥߞߌߘߕߊ: ߘߐ߬ߛߙߋ ߞߟߊ߬ߟߊ߬ߡߊ ߟߎ߬ ߟߋ߬ ߦߋ߫ ߓߌ߬ߟߊ߬ ߟߴߊ߬ߟߋ߬ ߞߣߐ߫.
ߥߞߌߛ߭ߐ߲ߣߍߙ: ߞߘߐߦߌߘߊߟߊ߲ ߠߎ߬ ߦߋ߫ ߡߊߞߍ߲߰ ߠߴߊ߬ߟߋ ߟߋ߬ ߞߣߐ߫.
ߥߞߌߡߊߣߌߦߊ. ߟߌ߬ߤߟߊ ߟߎ߬ ߟߊߘߍ߬ߓߊ߮: ߞߙߊ߬ߡߐ߯ ߟߊ߬ߡߌߣ ߡߊ߲߬ߘߋ߲߬ ߡߏߙߌ߫ ߛߌ߬ߛߋ߫/ ߟߊ߲߰ߛߌߣߍ߫ ߞߎ߲ߝߊ߲ߕߐ ߝߏߝߣߊ߫
www.nqo.wikipedia.org :ߞߍߦߙߐ ߕߐ߮
ߛߏ߬ߟߏ ߝߙߊ߬ߓߊ-ߘߐ߫