ߞߏ߲߬ߓߏ߬ߦߊ ߖߐ߲ߓߐ߲ ߓߊ߯ ߛߐ߬ߘߐ߲߬ ߡߌ߬ߙߌ߲߬ߘߌ ߡߍ߲ ߠߊ߫ ߞߊ߲ ߞߊ߬ߙߊ߲ ߘߐ߫߸ ߖߐ߲ߓߐߕߌ߮ ߟߎ߬ ߦߋ߫ ߡߌ߬ߙߌ߲߬ߘߌ ߏ߬ ߛߊ߬ߥߏ ߟߋ߬ ߞߍ߫ ߟߊ߫

ߞߏ߲߬ߓߏ߬ߦߊ ߖߐ߲ߓߐ߲ ߓߊ߯ ߛߐ߬ߘߐ߲߬ ߡߌ߬ߙߌ߲߬ߘߌ ߡߍ߲ ߠߊ߫ ߞߊ߲ ߞߊ߬ߙߊ߲ ߘߐ߫߸ ߖߐ߲ߓߐߕߌ߮ ߟߎ߬ ߦߋ߫ ߡߌ߬ߙߌ߲߬ߘߌ ߏ߬ ߛߊ߬ߥߏ ߟߋ߬ ߞߍ߫ ߟߊ߫

ߞߏ߲߬ߓߏ߬ߦߊ ߖߐ߲ߓߐ߲ ߓߊ߯ ߛߐ߬ߘߐ߲߫ ߡߌ߬ߙߌ߲߬ߘߌ ߡߍ߲ ߠߊ߫ ߞߊ߲ ߞߊ߬ߙߊ߲ ߘߐ߫߸ ߥߟߊ߫ ߡߌ߬ߙߌ߲߬ߘߌ ߡߍ߲ ߞߏߟߐ߲ߠߊ ߟߎ߬ ߓߊ߯ ߞߏ߲߬ߓߏ߬ߦߊ ߘߌ߫ ߡߍ߲ ߡߊ߬߸ ߕߎ߬ߡߊ߬ ߛߌߦߊߡߊ߲߫ ߖߐ߲ߓߐ߲ߕߌ߮ ߏ߬ ߟߎ߬ ߕߊ߫ ߞߍߕߊ ߦߋ߫ ߓߍ߲߬ ߠߊ߫ ߡߌ߬ߙߌ߲߬ߘߌ ߏ߬ ߘߌߦߊߣߊ߲ߞߏ ߣߴߊ߬ ߛߊ߬ߥߏ ߟߋ߫ ߡߊ߬߸ ߣߴߊ߬ ߡߊ߫ ߢߵߊ߬ ߤߊߞߟߌߟߊ ߞߎ߲߬ߕߋߟߋ߲ ߓߍ߲߬ߢߊ ߡߊ߬ ߞߏ߲߬ߓߏ߬ߦߊ ߘߌߓߊ߮ ߟߎ߬ ߢߣߊߦߊ ߡߊ߬، ߏ߬ ߟߋ ߞߏߛߐ߲߬ ߖߐ߲ߓߐ߲ߕߌ߮ ߟߎ߬ ߦߋ߫ ߖߐ߲ߓߐ߲ ߘߌߓߊ߮ ߟߎ߫ ߛߊ߬ߥߏ ߞߍ߫ ߟߴߊ߬ߟߎ߬ ߟߊ߫ ߘߎߢߊ߫ ߘߐߕߍ߮ ߕߐ߭ ߘߐ߫؟

ߣߌ߫ ߡߐ߰ ߞߵߏ ߖߊ߬ߕߋߡߌ߬ߘߊ߬ ߞߏ ߟߎ߫ ߡߌ߬ߘߊ߬ߢߊ ߘߐ߫߸ ߡߐ߰ ߕߴߛߋ߫ ߖߌ߰ ߟߊ߫ ߞߏ߲߬ߓߏ߬ ߖߐ߲߬ߓߐ߬ߕߌ߮ ߟߎ߬ ߟߊ߫، ߖߐ߲ߓߐ߲ߕߌ߯ߓߊ ߏ߬ ߟߎ߬ ߕߍ߫ ߒߞߏ ߞߊߙߊ߲ߘߋ߲ ߠߎ߬ ߡߊߛߌߟߊ߲߫ ߠߊ߫ ߏ߬ ߟߋ ߘߐ߫ ߡߎ߰ߡߍ߫، ߓߊߏ߬߸ ߖߐ߲ߓߐ߲ ߢߌ߲߬ ߠߎ߬ ߛߌߦߊߡߊ߲߫ ߦߋ߫ ߜߍߙߍ߲ߞߍߟߌ߫ ߖߐ߲ߓߐ߲ ߠߎ߫ ߟߋ߬ ߘߌ߫ ߡߍ߲ ߠߊ߫ ߜߍߙߍ߲ߞߍߟߌ ߞߍߢߊ ߢߡߊߘߏ߲߰ ߞߏ߬ߖߎ߮ ߕߴߛߋ߫ ߟߊߛߊ߬ ߟߊ߫ ߜߍ߫ ߘߐ߫߸ ߞߏ߬ߣߌ߲߬ ߊ߬ ߦߋ߫ ߟߊߛߊ߬ ߟߴߊ߬ߟߎ߫ ߝߍ߬ߞߏ ߣߴߊ߬ߟߎ߬ ߞߍߞߏ ߟߎ߬ ߘߐ߫ ߞߍ߬ߣߍ߲، ߏ߬ ߟߋ߬ ߦߴߊ߬ ߞߍ߫ ߟߊ߫߸ ߊ߬ ߦߋ߫ ߡߐ߰-ߐ-ߡߐ߰ ߓߟߏ߫߸ ߏ߬ ߕߍ߫ ߝߘߊ߬ߝߌ߲߬ߞߏ߫ ߝߍ߬ ߢߊ ߏ߬ ߞߊ߲߬ ߤߟߴߊ߬ ߖߍ߬ߘߍ ߓߊ߯ ߞߍ߫ ߝߘߊ߬ߝߌ߲ ߠߋ߬ ߘߌ߫߸ ߝߏ߫ ߞߋ߬ߟߋ߲߬ߞߋߟߋ߲߫،..

ߒ߬ߓߊ߬ ߤߊߟߌ߬ ߣߴߊ߬ ߘߌ߫ ߞߎ߲ ߞߍ߫ ߘߊ߫ ߟߐ߲ߠߌ߲ ߛߞߊߣߌ߲ ߘߌ߫ ߜߍ ߘߐ߫ ߛߊ߫߸ ߒ߬ߞߵߊ߬ ߞߎ߲߬ ߟߊߛߊ߬ߓߊߟߌ ߟߋ߬ ߦߋ߫ ߓߊ߫ ߘߐ߫ ߊ߬ ߘߌߓߊ߮ ߟߎ߬ ߓߟߏ߫، ߥߊߟߌ߫ ߞߊߙߊ߲ ߕߍ߫ ߞߏ߫ ߖߎ߯ ߘߌ߫ ߘߋ߬߸ ߏ߬ ߦߋ߫ ߓߊߓߊ ߟߋ߬ ߘߐ߫ ߡߌ߬ߙߌ߲߬ߘߌ߫ ߞߎߣߎ߲ߣߍ߲߫ ߖߘߍ߬ߞߟߊ߬ߡߊ߬ߓߊ߮ ߓߍ߯ ߓߟߏ߫ ߞߵߊ߬ ߖߘߍ߬ ߟߊߘߊ߲߫ ߏ߬ ߟߐ߲ߠߌ߲߫ ߢߊ߬ߕߣߐ߬ߡߊ ߟߎ߬ ߟߊ߫، ߒ߬ߞߵߊ߬ ߞߍߟߌ ߞߊ߬ ߡߐ߰ ߟߊߖߐ߬ ߊ߬ ߖߘߍ߬ ߡߊ߬ ߛߊ߫ ߊ߬ ߣߌ߫ ߝߋ߲߫ ߦߋߓߊߟߌߦߊߒߖߘߍ߬ߘߐ߸ ߏ߬ ߟߋ ߦߋ߫ ߓߐ߬ߣߐ ߘߐ߫ ߥߊߦߌߞߏߒߓߊ ߘߌ߫.

ߣߴߏ߬ ߕߍ߫ ߊ߬ߙߊ߬ߓߎ߬ ߞߙߊ߬ߡߐ߰ ߝߟߐ ߘߏ߫ ߟߎ߫ ߕߘߍ߬ ߓߴߦߋ߲߬ ߞߙߊ߬ߡߐ߯ ߛߟߏ߬ߡߊ߯ߣߊ߫ ߕߋ߬ߟߋ ߘߐ߫ ߝߛߊߦߌ߫߸ ߞߙߊ߬ߡߐ߯ ߛߟߏ߬ߡߊ߯ߣߊ߫ ߖߍ߬ߘߍ ߟߋ߬ ߞߊ߬ ߡߏߙߌ߫ ߞߏ߲ߓߏ ߏ߬ ߟߎ߬ ߣߴߊ߬ߟߎ߬ ߟߊ߫ ߕߊߟߓߌߘߋ߲ ߠߎ߫ ߞߊ߬ߙߊ߲߫ ߒߞߏ ߟߊ߫، ߦߏ߫ ߞߙߊ߬ߡߐ߯ ߝߏߘߋ߫ ߥߊ߬ߘߌ߬ߦߊ߬ߡߊ߯ߘߌ߫ ߖߊ߰ߣߍ߫߸ ߏ߬ ߞߊ߬ ߞߊ߬ߙߊ߲ ߞߍ߫ ߞߊ߲ߞߊ߲߫ ߗߍ߬ߝߌ߲߬ߠߊ߫ ߟߋ߬߸ ߞߊ߬ ߞߍ߫ ߞߊ߬ߙߊ߲߬ߕߓߊ߬ߕߌ߮ ߘߌ߫، ߊ߬ ߓߌ߬ ߝߐߟߌ߫ ߘߐ߫ ߊ߬ ߟߊ߫ ߞߊ߬ߙߊ߲߬ߘߋ߲ ߘߏ߫ ߟߋ߬ ߓߊߕߍ߫ ߣߝߊ߬ߖߌ߫ ߊ߬ߟߌ߬ߡߊ߬ߡߌ߲߬ߓߊ ߘߌ߫، ߊ߬ ߟߊ߫ ߞߊ߬ߙߊ߲߬ߘߋ߲ ߘߏ߫ ߟߋ߬ ߝߊߕߎߡߊ߫ ߞߊߙߌߝߟߊ߫ ߖߊ߰ߣߍ߫ ߝߣߊ߫ ߘߌ߫߸ ߊ߲ ߞߊ߬ߙߊ߲߬ߡߐ߯ ߓߊ߬ߓߊ߫ ߖߊ߰ߣߍ߬ ߣߊߘߋ߲ߡߊߞߘߐߞߍ ߡߍ߲ ߞߵߊ߬ ߞߊ߬ߙߊ߲߬ ߒߞߏ ߟߊ߫.

ߝߣߊ߫߸ ߊ߬ ߞߊ߬ ߞߙߊ߬ߡߐ߯ ߟߊ߰ߖߌ߬ ߛߐߣߛߊߡߊ߯ߘߌ߫ ߞߋߕߊ߬ ߝߣߊ߫ ߣߴߊ߬ ߟߊ߫ ߞߊ߬ߙߊ߲߬ߘߋ߲ ߠߎ߫ ߞߊ߬ߙߊ߲߫ ߏ߬ ߢߊ ߟߋ߫ ߞߊ߲߬߸ ߏ߬ ߡߐ߰ ߟߊߓߐߣߍ߲ ߘߏ߫ ߟߋ߬ ߞߊ߬ߙߌ߬ߝߟߊ߬ ߓߙߋߕߋ߫ ߘߌ߫߸ ߏ߬ ߝߣߊ߫ ߕߊ߯ ߘߊ߫ ߞߊ߬ߙߊ߲ ߞߍ߫ ߊߙߊߓߎߟߊ߫ ߡߌߛߌ߬ߙߊ߲߫ ߠߋ߬߸ ߟߊ߰ߖߌ߬ ߛߌ߬ߘߊ߬ߝߊ߫ ߞߵߏ߬ ߟߋ ߞߐߛߊߦߌ ߟߊߕߊ߯ ߟߏ߰ߙߏ߲߬ߓߏ߫ ߞߊ߬ߙߊ߲߬ߘߋ߲߬ߞߊߙߊ߲ ߠߊ߫ ߝߏ߫ ߊ߬ ߞߊ߬ ߥߎߟߘߊ ߞߊ߬ߙߊ߲߬ ߊߙߊߓߎ ߣߌ߫ ߒߞߏ ߓߍ߯ ߟߊ߫ ߞߋߟߋ߲ߘߌ߫، ߣߌ߫ ߡߐ߰ ߘߴߊ߬ ߟߊߓߐ߫ ߞߎߡߊ߫ ߝߍ߬ ߜߐ߬ߛߐ߲߬ߞߐ߬ ߛߌ߫ ߡߊ߫ ߘߏ߲߬ ߏ߬ ߟߎ߬ ߣߌ߫ ߞߙߊ߬ߡߐ߯ ߛߟߏ߬ߡߊ߯ߣߊ߫ ߕߍ߫ ߕߎ߬ߡߊ߬ ߖߏߣߊ ߏ߬ ߟߊ߫ ߢߊ ߛߎ߯-ߎ-ߛߎ߯ ߞߊ߲߬.

ߏ߬ ߟߎ߫ ߖߍ߬ߘߍ ߞߊ߬ ߒߞߏ ߞߊ߬ߙߊ߲߬ ߠߋ߬ ߝߏ߫ ߞߊ߬ ߞߊ߬ߝߊ ߘߏ߫ ߟߎ߫ ߛߓߍߦߊ߫ ߒߞߏ ߘߐ߫، ߞߊ߬ ߛߎ߬ߞߎ ߘߏ߫ ߟߎ߫ ߝߣߊ߫ ߘߐߓߍ߲߬ ߒߞߏ ߘߐ߫، ߝߏ߫ ߞߙߊ߬ߡߐ߯ ߛߟߏ߬ߡߊߣߊ߫ ߞߵߊ߬ ߖߌ߰ ߞߏ߫ ߞߙߊ߬ߡߐ߯ ߞߊ߬ߙߌ߬ߝߟߊ߬ ߓߙߋߕߋ ߢߌ߲߬ ߠߋ߬ ߞߍߕߐ߫ ߊ߬ ߣߘߐ߬ߛߌ߮ ߘߌ߫ ߒߞߏߞߏ ߘߐ߫، ߞߐ߬ߣߌ߲߬ ߏ߬ ߡߊߣߊ߬ ߞߍ߫ ߕߋ߲߬، ߓߊ ߏ߬ ߡߊ߫ ߛߌ߬ߖߊ߲߫ ߛߐ߬ߘߐ߲߬، ߏ߬ ߛߊ߲߬ߞߊ ߟߊߕߋ߭ ߡߍ߲ ߞߍ߫ ߘߊ߫ ߞߙߊ߬ߡߐ߯ ߛߟߏ߬ߡߊ߯ߣߊ ߦߋ߫، ߊ߬ ߞߵߊ߬ ߞߊ߲ߕߏ߫ ߞߏ߫ ߒߞߏ ߜߙߍ ߓߘߊ߫ ߞߊߘߌ߫ ߊ߬ ߟߊ߫، ߏ߬ ߊߙߊߓߎ߫ ߞߙߊߡߐ߮ ߡߍ߲ ߠߎ߫ ߞߊ߬ ߒߞߏ ߞߊ߬ߙߊ߲߬ ߕߎ߬ߡߊ ߖߏߣߊ ߏ߬ ߟߊ߫، ߏ߬ ߞߊߛߌߦߊ߫ ߞߏߛߓߍ߫.

ߞߊ߬ߕߎ߲߯߸ ߊߙߊߓߎ߫ ߞߊߙߊ߲ߘߋ߲ ߏ߬ ߢߍߛߐ߲ ߘߏ߫ ߟߋ߬ ߞߙߊ߬ߡߐ߯ ߓߊ߰ߓߊ߫ ߖߊ߰ߣߍ߫ ߘߌ߫߸ ߞߙߊ߬ߡߐ߯ ߛߟߏ߬ߡߊ߯ߣߊ߫ ߞߊ߬ ߒߞߏ ߞߝߊ߫ ߜߍߟߍ߲ ߛߌߦߊߡߊ߲߫ ߠߊߕߊ߬ߡߌ߲߫ ߏ߬ ߡߍ߲ ߡߵߊ߬ ߟߊߖߍ߲ߛߍ߲߫ ߞߊ߲ߡߊ߬، ߏ߬ ߘߏ߲߬ ߞߵߏ߬ ߓߐ߫ ߊ߬ ߛߌߟߊ ߝߍ߬، ߓߍ߯ ߦߴߊ߬ ߞߊ߬ߟߊߡߊ߬، ߏ߬ ߓߘߊ߫ ߒߞߏ ߟߊߦߟߍ߬ ߛߊߖߊ߲߫ ߞߎ߬ߟߋ߬ߞߎ߬ߟߋ ߟߊ߫ ߢߊ ߡߍ߲ ߓߌ߬، ߞߵߊ߬ ߕߘߍ߬ ߜߎ ߊߙߊߓߎ߫ ߞߊߙߊ߲ ߠߋ߫ ߞߵߊ߬ ߟߊߛߋ߫ ߡߌߛߌ߬ߙߊ߲߬.

ߊ߬ߙߊ߬ߓߎ߬ ߞߙߊߡߐ߯ ߡߍ߲ ߠߎ߬ ߝߣߊ߫ ߕߘߍ߬ ߘߊ߫ ߒߞߏ ߟߊߘߏ߲߭ ߘߐ߫ ߌߖ߭ߌߔߑߕ ߖߊ߯ߓߘߊ ߟߊ߫ ߂߀߀߂ ߟߊ߫، ߏ߬ ߘߏ߫ ߟߎ߫ ߟߋ߬ ߞߙߊ߬ߡߐ߯ ߣߎ߯ߤߊ߲߫ ߛߊ߰ߣߐ߫ ߘߌ߫، ߊ߬ ߣߌ߫ ߞߙߊ߬ߡߐ߯ ߝߏߘߋ߫ ߘߙߊ߬ߡߍ߸ ߤߊߟߌ߫ ߜߋߟߋ߲ߜߋߟߋ߲ ߡߍ߲ ߢߍߥߟߊ ߡߎ߰ߡߍ ߟߊߒߞߏߦߊ߫ ߘߊ߫ ߂߀߁߆ ߟߊ߫، ߞߙߊ߬ߡߐ߯ ߣߎ߯ߤߊ߲߫ ߢߌ߲߬ ߣߴߊ߬ ߓߊ߯ߙߊߢߐ߮ ߟߎ߫ ߟߋ߬ ߞߵߏ߬ ߣߊ߲߬ߝߟߏ߬ߦߊ߫، ߣߊߟߌߡߎ߲߫ ߞߙߊ߬ߡߐ߯ ߘߛߎ߬ ߟߊߡߌߣߌ߲ ߘߊ߯ߓߏ߫ ߣߌ߫ ߞߙߊ߬ߡߐ߯ ߟߊߦߌ ߟߊ߲߬ߛߌ߬ߣߍ߫ ߓߊ߲߬ߞߐ߫ ߞߐ߲ߘߍ߫ ߟߎ߫ ߘߌ߫، ߊ߬ ߣߴߊ߬ߟߎ߫ ߘߍ߲߬ߢߐ߰ ߜߘߍ߫ ߟߎ߫ ߓߊ߲ߞߐߞ ߦߋ߲߬، ߡߍ߲ ߠߎ߬ ߓߍ߯ ߕߐ߮ ߕߴߊ߲ ߓߟߏ߫ ߦߊ߲߬.

ߡߍ߲ ߠߎ߬ ߓߍ߯ ߡߊߘߊ߲ߣߍ߲ ߣߌ߲߬߸ ߣߴߌ ߞߊ߬ ߖߌ߬ߣߍ߫ ߣߌ߫ ߡߊ߬ߟߌ ߞߐߟߊ߫ ߊߙߊߓߎ߫ ߞߊߙߊ߲ߡߐ߮ ߟߎ߬ ߘߐߜߍ߫، ߌ ߘߌ߫ ߞߙߊ߬ߡߐ߯ ߎߡߊߙߎ߫ ߛߏߡߊߛߌ߫ ߞߊ߲ߕߍ߫ ߟߎ߫ ߣߌ߫ ߞߙߊ߬ߡߐ߯ ߌߛߊ߫ ߖߊ߬ߞߌ߬ߕߋ߫ ߣߌ߫ ߞߊ߬ߙߊ߲߬ߝߊ߫ ߡߏߙߌ߫ ߞߊ߬ߡߙߊ߫ ߟߎ߫ ߣߌ߫ ߞߙߊ߬ߡߐ߯ ߖߌ߬ߓߙߌߟߊ߫ ߖߊ߰ߣߍ߫ ﴿ ߓߊߕߍ߫ ߘߎ߬ߕߌ߰ߟߓߊ߬ߞߊ﴾ ߟߎ߬ ߣߌ߫ ߞߙߊ߬ߡߐ߯ ߡߊ߬ߡߊ߬ߘߌ߫ ߛߎ߬ߥߊ߬ߙߋ߫ ߟߎ߫ ߞߍ߫ ߞߐߟߊ߫ ߞߐߡߊߛߙߋ߫ ߟߎ߬ ߘߌ߫߸ ߞߊ߬ߙߊ߲߬ߝߊ߫ ߡߏߙߌ߫ ߞߡߊ߬ߙߊ߫ ߡߍ߲ ߞߏߝߐߣߍ߲߫ ߛߙߍߘߍ ߘߐ߫ ߦߊ߲߬، ߏ߬ ߟߋ߫ ߞߊ߬ ߓߎ߬ߞߊ߬ߙߌ ߣߌ߫ ߡߎߛߑߟߌߡ ߣߌ߫ ߣߊߡߎ߲ ߘߐ߰ߝߐ߬ߓߊ ߟߎ߬ ߘߟߊߡߌ߬ߘߊ߬ ߒߞߏ ߘߐ߫، ߊ߬ ߣߌ߫ ߞߎ߬ߙߊ߬ߣߊ ߖߌ߰ߞߎ߲ߧߊ، ߊ߬ ߣߌ߫ ߞߝߊ߬ ߛߌߦߊߡߊ߲߫ ߜߘߍ߫ ߟߎ߫، ߡߍ߲ ߦߙߌߞߊ ߘߌ߫ ߛߋ߫ ߁߀߀ ߢߐ߲߰ ߘߐ߫، ߞߙߊ߬ߡߐ߯ ߖߌ߬ߓߙߌߟߊ߫ ߖߊ߰ߣߍ߫ ߡߍ߲ ߦߋ߫ ߛߙߍߘߍ ߘߐ߫،  ߏ߬ ߟߋ ߥߟߌ߫ ߘߴߊ߬ ߞߊ߲ߡߊ߬ ߞߊ߬ ߒߞߏ ߟߊߛߋ߫ ߛߣߍ߬ߜ߭ߊ߯ߟߌ߫ ߣߌ߫ ߜ߭ߊ߲ߓߌߦߊ߫ ߣߌ߫ ߓߙߊߖ߭ߊߘߎ߯ ߣߌ߫ ߊ߲ߜ߭ߏߟߊ߫ ߖߡߊ߬ߣߊ ߟߎ߬ ߞߣߐ߫߸  ߏ߬ ߓߍ߯ ߦߋ߫ ߊߙߊߓߎ߫ ߞߙߊߡߐ߮ ߟߎ߫ ߟߋ߬ ߘߌ߫، ߡߍ߲ ߓߍ߯ ߞߊ߬ ߒߞߏ ߟߊߖߍ߲ߛߍ߲߫ ߊ߬ ߛߋߞߏ ߟߊ߫ ߦߟߍ߬ߘߐ߬ߞߍ߫ ߃ ߕߊ߬ߡߌ߬ߣߍ߲ ߢߌ߲߬ ߞߘߐ߫، ߞߏ߲߬ߓߏ߫ ߌߛߊ߫ ߖߊ߬ߞߌ߬ߕߋ ߡߍ߲ ߕߐ߯ ߦߋ߫ ߛߙߍߘߍ ߘߐ߫، ߏ߬ ߟߎ߫ ߟߋ߬ ߞߊ߬ ߒߞߏ ߞߎߙߊߣߊ ߛߊߞߍ߫ ߛߎ߰ߘߎ߬ߟߊ߫، ߞߙߊ߬ߡߐ߯ ߡߊ߬ߡߊ߬ߘߌ߫ ߛߎ߬ߥߊ߬ߙߋ߫ ߡߍ߲ ߕߐ߮ ߦߋ߫ ߛߙߍߘߍ ߘߐ߫، ߏ߬ ߟߋ߬ ߞߊ߬ ߞߊ߬ߝߊ߫ ߡߐ߬ߟߐ߲߬ߡߊ ߘߏ߫ ߛߓߍߦߊ߫ ߞߏ߫ ﴿ ߛߣߐ߬ߡߍ ߟߊ߫ ߖߌ߰ߙߌ߬ߖߐ߯ߙߐ﴾ ߏ߬ ߦߋ߫ ߞߊ߬ߝߊ߫ ߡߐ߲߬ߟߐ߲߬ߡߊ߬ߓߊ߫ ߟߋ߬ ߘߌ߫، ߓߊߏ߬ ߞߊ߬ߝߊ ߏ߬ ߦߋ߫ ߞߎߡߊ߫ ߟߊ߫ ߛߣߐ߬ߡߍ ߟߊ߫ ߖߊ߲߬ߞߊߙߏ ߡߍ߲ ߞߊ߲߬߸ ߏ߬ ߟߋ ߦߴߊ߲ ߠߊ߫ ߝߘߊ߬ߝߌ߲߬ߠߊ߫ ߡߐ߰ ߞߊ߬ߙߊ߲߬ߣߍ߲ %߉߀ ߟߊ߫.

ߝߙߋߞߋ ߡߍ߲ ߦߋ߫ ߦߋ߲߬ ߕߋ߲߬، ߏ߬ ߓߍ߯ ߦߋ߫ ߞߐߟߊ߫ ߊߙߊߓߎ߫ ߞߙߊߡߐ߮ ߘߏ߫ ߟߎ߫ ߟߊ߫ ߝߙߋߞߋ ߟߋ߬ ߘߌ߫، ߣߴߏ߬ ߕߍ߫ ߒߞߏ ߣߐ߬ ߞߊ߬ߙߊ߲߬ߠߊ߬ ߝߟߐ ߡߍ߲ ߠߎ߫ ߘߍ߬ߡߍ߲߬ ߠߊ߫߸ ߏ߬ ߟߋ ߊߙߊߓߎ߫ ߞߙߊߡߐ߮ ߟߎ߬ ߘߌ߫، ߓߊߏ߬ ߜߟߍ߬ߦߊ ߡߍ߲ ߕߘߍ߬ ߦߋ߫ ߛߌ߬ߟߡߊ߬ߦߊ ߘߌ߯ߣߊ ߟߊߛߋ ߘߐ߫߸ ߏ߬ ߟߎ߫ ߟߋ߬ ߞߵߏ߬ ߟߐ߲߫ ߓߍ߯ ߘߌ߫،..

ߒ߬ߓߊ߬ ߡߍ߲ ߦߋ߫ ߏ߬ ߘߐ߫߸ ߊߙߊߓߎ߫ ߞߙߊߡߐ߮ ߟߎ߬ ߓߍ߯ ߣߌ߫ ߒߞߏ ߞߊߙߊ߲ ߠߋ߫ ߕߎ߲߬ ߞߊ߫ ߞߊ߲߫ ߦߏ߫ ߖߏߣߊߓߊ߮ ߏ߬ ߟߎ߫ ߞߵߊ߬ ߞߍ߫ ߢߊ ߡߍ߲߸ ߛߊ߫ ߘߌ߯ߣߊ߫ ߟߐ߲ߠߌ߲ ߡߍ߲ ߦߴߊ߬ߟߎ߬ ߟߊ߫ ߏ߬ ߘߌ߫ ߕߊ߬ߡߌ߲߬ ߛߊߣߌ߲ߧߊ߫ ߟߊ߫ ߞߵߊ߬ ߟߊߦߟߍ߬ߡߊ߲߫ ߒߞߏ ߟߊ߫ ߓߐ߬ߘߐ ߘߐ߫، ߞߐ߬ߣߌ߬ ߏ߬ ߘߏ߫ ߟߎ߫  ߡߴߏ߬ ߞߍ߫ ߘߋ߬ ، ߝߏ߫ ߞߵߊ߬ ߞߍ߫ ߊߙߊߓߎ߫ ߛߓߍߟߌ ߣߌ߫ ߊߙߊߓߎ߲ ߞߊ߲ ߠߊߝߊ߬ߛߊ ߘߌ߫ ߝߊ߬ߛߏ߬ ߞߊ߲ ߠߎ߫ ߡߊ߬، ߓߍ߯ ߘߏ߲߬ ߦߴߊ߬ ߞߊ߬ߟߊߡߊ߬ ߞߏ߫ ߊߙߓߎ߫ ߛߓߍߟߌ ߡߍ߲ ߦߋ߫ ߣߌ߲߬، ߣߌ߫ ߞߎ߬ߙߊ߬ߣߊ ߛߓߍߣߍ߲߫ ߊ߬ ߟߊ߫، ߞߏ߫ ߊߙߊߓߎ߫ ߛߏߡߊ ߟߎ߬ ߟߊ߫ ߛߓߍߟߌ߫ ߕߊ߬ߣߍ߲ ߠߋ߫ ߏ߬ ߘߌ߫ ߛߌ߰ߢߐ߮ ߘߏ߫ ߟߎ߫ ߡߊ߬ ߞߊ߬ ߞߐ߲߰ ߛߌ߬ߟߡߊ߬ߦߊ ߣߊ߭ ߢߍ߫߸ ߞߎ߬ߙߊ߬ߣߊ ߘߏ߲߬ ߛߓߍ߫ ߘߴߊ߬ ߘߝߊߓߊߟߌ ߣߴߊ߬ ߘߐߞߣߍߓߊߟߌ ߏ߬ ߟߋ ߟߊ߫ ߝߎߚߎ߫ ߝߏ߫ ߛߌ߬ߟߊ߬ߡߊ ߟߎ߫ ߞߵߊ߬ ߘߊߘߐߓߍ߲߬ ߞߐ ߟߊ߫ ߞߵߊ߬ ߡߊߞߊ߬ߝߏ߬ ߝߋ߲߫ ߛߌߦߊߡߊ߲߫ ߠߴߊ߬ ߟߊߓߍ߲߬ ߞߊߡߊ߬ ߞߎ߬ߙߊ߬ߣߊ ߘߊߘߝߐߕߊ ߡߊ߬ ߡߍ߲ ߕߊ߲߬ߞߊ߬ߣߍ߲߫ ߛߣߐ߬ߡߍ ߟߎ߬ ߘߐ߫.

ߊ߬ ߣߌ߫ ߝߣߊ߫، ߓߊߘߙߌ߫ ߡߌ߬ߘߊ߬ߟߌ߬ߘߋ߲ ߡߍ߲ ߠߎ߫ ߟߐ߬ ߘߴߊ߬ߟߎ߫ ߞߎ߲߬ߡߊ߬ߞߊ ߘߌ߫ ߟߊ߫ ߛߊߣߌ߲ ߘߐ߫߸ ߣߴߏ߬ ߓߍ߲߬ߣߍ߲߫ ߕߘߍ߬ ߛߊߣߌ߲ ߞߌߘߊ߫ ߁ ߣߌ߫ ߛߌߘߐ߫ ߆߀߀ ߡߊ߬، ߏ߬ ߟߎ߬ ߡߍ߲ ߠߎ߫ ߞߊ߬ߙߊ߲߬ߣߍ߲߫ ߕߘߍ߬، ߞߋߟߓߊ߫ ߡߊ߬ߡߊ߬ߘߌ߫ ﴿ ߕ.ߖ. ﴾ ߞߵߏ߬ ߟߎ߬ ߛߏߡߊߟߡߊ ߏ߬ ߟߋ ߟߐ߬ ߛߌ߬ߟߡߊ߬ߘߋ߲ ߠߎ߫ ߞߊ߬ߙߊ߲߬ ߠߊ߫ ߞߊߙߏ߫ ߃ ߞߘߐ߫، ߞߵߏ߬ ߞߴߏ߬ ߟߎ߫ ߞߎ߲߬ߞߊ ߘߌ߫، ߛߊߣߌ߲ ߏ߬ ߡߐ߬ߟߐ߲ ߦߋ߫ ߓߍ߲߬ ߠߊ߫ ߘߟߊ߫ ߈߀߀߀߀ ߖߊ߬ߕߋ߫ ߟߋ߫ ߡߊ߬ ߓߌ߬، ߓߌ߬ ߛߌ߬ߟߊ߬ߡߊ ߖߐ߲ ߘߌ߫ ߘߌ߬ߢߍ߬ ߣߊ߲߬ߝߟߏ߫ ߞߐ߲߬ߜߍ߲ ߏ߬ ߘߐ߫ ߞߊߙߏ߫ ߃ ߞߊߙߊ߲ ߞߎ߲߬ߞߘߐ߫؟ ߞߐ߬ߣߌ߲߬ ߞߋߟߓߊ߫ ߡߊ߬ߡߊ߬ߘߌ߫ ﴿ ߕ.ߖ. ﴾ ߞߵߊ߬ ߟߐ߲߫ ߞߏ߫ ߛߌ߬ߟߡߊ߬ߘߋ߲ ߠߎ߬ ߞߊ߬ߙߊ߲ ߛߏߡߊ ߟߎ߬ ߓߟߏ߫ ߢߊ ߏ߬ ߡߊ߬، ߏ߬ ߞߊߝߌ߬ߛߊ߫ ߞߎ߲߬ߝߌ߲߬ߧߊ ߘߌ߫.

ߝߘߊ߬ߜߍ ߟߎ߬ ߝߣߊ߫ ߘߏ߲߬ ߕߎߡߊ ߝߘߊ߬ߝߌ߲߬ߠߊ߫ ߦߊ߲߬، ߊ߬ߟߎ߫ ߕߘߍ߬ ߊ߲ ߘߋ߲ ߠߎ߫ ߟߋ߬ ߡߌ߬ߘߊ߬ ߟߊ߫ ߜߏߦߊߜߏߦߊ ߟߊ߫ ߞߵߊ߬ߟߎ߫ ߘߏ߲߬ ߝߊ߬ߙߌ߲߬ߛߌ߬ ߞߊߙߊ߲ ߠߊ߫، ߊ߬ ߕߘߍ߬ ߝߐ߫ ߟߊ߫ ߞߊ߬ߙߊ߲ ߏ߬ ߝߣߊ߫ ߡߊ߬ ߕߎ߬ߡߊ ߏ߬ ߟߊ߫ ߞߏ߫ “ߞߊ߯ߝߙߌ߫ ߞߊߙߊ߲ ” ߏ߬ ߞߍ߫ ߘߊ߫ ߛߊߓߎ߫ ߘߌ߫ ߏ߬ ߟߏ߲، ߡߐ߰ ߛߌߦߊߡߊ߲߫ ߞߵߊ߬ ߓߊ߲߬ ߊ߬ ߘߋ߲ ߘߏ߲߬ ߠߊ߫ ߞߊ߯ߝߙߌ߫ ߞߊߙߊ߲ ߏ߬ ߟߊ߫، ߞߐ߬ߣߌ߲߬ ߊ߲ ߧߋ߫ ߓߌ߬ ߕߋ߬ߟߋ ߡߍ߲ ߘߐ߫ ߣߌ߲߬، ߛߌ߬ߟߡߊ߬ ߡߌߙߌ߲ߘߌ ߦߋ߫ ߣߊ߲߬ߝߟߏ ߡߍ߲ ߘߏ߲߬ ߠߊ߫ ߞߊ߯ߝߙߌ߫ ߞߊߙߊ߲ ߏ߬ ߟߊ߫ ߓߌ߬، ߏ߬ ߢߐ߲߰ ߕߍ߫ ߘߏ߲߬ ߠߊ߫ ߛߌ߬ߟߡߊ߬ ߞߊߙߊ߲ ߠߊ߫، ߥߟߊ߫ ߊߙߊߓߎ߫ ߞߊߙߊ߲ ߠߊ߫.

ߏ߬ ߓߟߏߡߊ߬، ߊ߲ ߓߌ߬ߡߐ߮ ߞߊ߫ ߞߊ߲߫ ߞߊ߬ ߤߊߞߟߌ߫ ߛߐ߬ߘߐ߲߬، ߏ߬ ߟߋ ߞߊߝߌ߬ߛߊ߫ ߘߋ߬ ߓߊߏ߬ ߊ߲ ߞߋߟߋ߲߫ ߕߍ߫ ߘߎߢߊ߫ ߘߐ߫߸ ߘߎߢߊ߫ ߘߏ߲߬ ߕߍ߫ ߕߏ߫ ߟߊ߫ ߞߎ߲߬ ߞߋߟߋ߲߫ ߠߊ߫، ߊ߲ ߧߋ߫ ߊߖ߭ߌ߫ ߖߡߊߣߊ ߟߎ߬ ߣߌ߫ ߋߙߐߔߎ߫ ߖߡߊߣߊ ߟߎ߬ ߘߐߜߍ߫ ߘߐߙߐ߲߫، ߛߴߊ߲ ߘߌ߫ ߢߊ߫ ߛߐ߬ߘߐ߲߬ ߞߏ ߟߎ߫ ߡߌ߬ߘߊ߬ ߢߊ ߡߊ߬، ߓߊߏ߬ ߘߌ߯ߣߊ߫ ߝߊ߰ߡߎ߲߬ߞߏ߬ߖߎ߮ ߦߋ߫ ߕߙߐߦߊ ߡߍ߲ ߠߊߛߋ߫ ߟߊ߫ ߡߐ߰ ߡߊ߬، ߏ߬ ߕߍ߫ ߊߟߊ߫ ߣߐ߬ ߘߌ߫ ߡߎ߰ߡߍ߫߸ ߣߴߊ߬ ߡߊ߫ ߢߊ߬ ߘߌ߯ߣߊ ߓߘߊ߫ ߓߊ߲߫ ߞߏ߫ ߛߌߦߊߡߊ߲߫ ߢߊߘߐߜߍ ߦߌ߬ߘߊ߬ ߟߴߊ߲ ߠߴߊ߬ ߞߟߏߜߍ ߟߎ߬ ߞߣߐ߫߸ ߡߍ߲ ߘߌ߫ ߡߐ߰ ߟߐ߬ ߊ߬ ߓߟߏߡߟߊ߫ ߟߴߊ߬ ߖߘߍ߬ ߡߊ߬ ߊ߬ ߗߏ߯ߦߊ ߦߟߍ߬ߡߊ߲ ߘߐ߫ ߞߵߊ߬ ߟߊߢߊ߬ ߣߌ߫ ߢߊߖߎ߮ ߟߋ߬߸ ߊߟߊ߫ ߦߋ߫ ߝߙߊ߬ ߟߴߊ߬ ߞߊ߲߬ ߏ߬ ߟߋ ߞߐ ߘߐ߫، ߣߴߏ߬ ߕߍ߫ ߡߍ߲ ߓߍ߯ ߦߋ߫ ߊߙߊߓߎߞߊ߲߫ ߠߝߊߛߊ ߟߊ߫ ߣߌ߲߬، ߏ߬ ߖߐ߲߫ ߞߊ߬ ߊߙߊߓߎ߫ ߞߊ߲ ߟߐ߲߫ ߟߐ߲ߞߏߕߌ߯ ߛߟߏ߬ߡߊ߯ߣߊ߫ ߞߊ߲ߕߍ߫ ߘߌ߫؟  ߒ ߞߴߏ߬ ߞߵߊ߬ ߖߘߍ߬ ߣߴߊ߬ ߟߊ߫ ߊߙߊߓߎߞߊ߲ߟߐ߲ ߏ߬ ߟߋ ߓߍ߯ ߦߋ߫ ߞߍ߬ ߞߵߊ߬ ߟߊߢߌߣߌ߲߫ ߞߏ߫ ߊ߬ ߦߋ߫ ߡߊ߰ߙߌ߬ߓߊ ߛߙߊ߬ߣߎ߲߬ߞߊ߲ ߥߊߟߋߦߊ߫ ߟߊ߫ ߊ߬ ߡߌ߬ߙߌ߲߬ߘߌ ߡߊߝߊ߲߭ ߘߐ߫߸ ߞߵߊ߬ ߓߐ߫ ߕߟߏߝߘߋߦߊ ߘߊߘߝߐߟߌ ߕߟߋ ߘߐ߫ ߞߵߊ߬ ߟߊߦߌ߬ߙߌ߲߬ߘߌ߫ ߢߊߝߏߘߋߦߊ ߛߓߍߘߐߞߊߙߊ߲ ߘߐ߫، ߓߊߏ߬ ߡߊ߰ߙߌ߬ߓߊ ߞߊ߲߫ ߦߋ߫ ߟߋ߬ ߞߏ߫: ﴿..ߊߟߊ߫ ߓߊ߬߸ ߊ߬ ߕߍ߫ ߡߌ߬ߙߌ߲߬ߘߌ߬ ߛߌ߫ ߗߏ߯ߦߊ ߡߊߝߊ߬ߟߋ߲߬ ߠߊ߫ ߝߏ߫ ߊ߬ߟߎ߬ ߓߊ߯ ߊ߬ߟߎ߫ ߖߘߍ߬ ߗߏ߯ߦߊ ߡߊߝߊ߬ߟߋ߲߬..﴾، ( ߛߊ߲ߜߊߟߌߡߊ ߟ.߁߁) ߐ߲ ߣߴߊ߬ ߡߊ߫ ߢߊ߬ ߞߏ߫ ߡߌ߬ߙߌ߲߬ߘߌ ߟߋ߬ ߦߴߊ߬ ߖߘߍ߬ ߡߊߝߊ߬ߟߋ߲߬ ߠߊ߫ ߡߊ߰ߙߌ ߖߍ߬ߘߍ ߕߊ߫ ߝߐߟߌ߫ ߘߐ߫ ߊ߬ ߦߴߊ߬ ߕߊ ߝߙߊ߬ ߟߊ߫ ߡߍ߲ ߞߊ߲߬߸ ߡߌ߬ߙߌ߲߬ߘߌ ߘߏ߲߬ ߕߍ߫ ߡߐ߰ ߞߋߟߋ߲߫ ߘߌ߫ ߥߟߊ߫ ߛߏ߫ ߞߋߟߋ߲߫ ߤߊߡߊ߲ߕߍ߫ ߖߡߊ߬ߣߊ߬ ߞߋߟߋ߲߫߸ ߝߏ߫ ߊ߬ ߦߋ߫ ߡߌ߬ߙߌ߲߬ߘߌ߬ ߞߋߟߋ߲ ߡߐ߱ ߓߍ߯ ߟߋ߬ ߕߊ߫ ߞߍߕߊ ߝߊ߬ߙߊ ߘߌ߫ ߢߐ߲߮ ߞߊ߲߬ ߦߟߍ߬ߡߊ߲ ߥߏ߬ߦߏ ߞߎ߲߬ߕߋߟߋ߲ ߘߐ߫ ߞߊ߬ ߕߊ߯ ߢߊߓߘߍ ߡߊ߬߸ ߟߐ߲ߠߌ߲ߞߏ ߕߐ߮ ߦߋ߫ ߡߐ߱ ߡߍ߲ ߠߎ߬ ߟߊ߫ ߏ߬ ߘߐ߫ ߏ߬ ߟߎ߬ ߣߌ߫ ߡߎ߲߬ ߞߍ ߞߊ߫ ߞߊ߲߫ ߝߊ߬ߘߋ߲߫.

ߒ߬ߓߊ߬ ߒߞߏ ߛߌ߲ߘߌߓߊ߮ ߞߍߣߍ߲߫ ߣߊ߬ߒߞߊ߲ߡߊ ߘߌ߫ ߢߊ ߡߍ߲ ߞߊ߲߬߸ ߕߎ߬ߡߊ ߟߊߖߊ߲߬ߧߊ ߦߋ߫ ߏ߬ ߟߋ ߡߊߞߊ߭ ߟߊ߫ ߟߏ߲-ߏ-ߟߏ߲߫߸ ߏ߬ ߜߎ ߦߋ߫ ߟߊߛߊ߬ ߟߴߊ߬ ߕߐ߮ ߣߴߊ߬ ߕߐ߮ ߞߕߐߡߊߝߐ ߘߐ߫ ߣߌ߲߬ ߢߊ ߞߏ߫:

ߊ߬ ߕߐ߮ ߞߕߐߡߊ߫ ߛߓߍߣߍ߲ ߞߊ߬ߙߊ߲߬ ߦߊ߲߬:  [ ߛߏ߬ߟߏ߬ߡߊߣߊ߫ ߞߊ߲ߕߍ߫ =  ߕߍ߫ ߞߊ߲ ߠߊߡߊ߬ߟߏ߬ ߛߏ߫ ]

ߛߏ߬ߟߏ ߝߙߊ߬ߓߊ–ߘߐ߫