ߛߟߊߕߌ߯ ߓߘߍ /…
ߓߊߘߋ߲߫ ߗߍ߬ߡߊ߲ ߣߌ߫ ߡߛߏ߬ߡߊ߲ ߠߎ߬ ߸ ߘߋߣߍ߲ ߣߌ߫ ߡߐ߰ߓߊ ߸ ߛߓߍ߬ߞߏ ߞߊ߬ߣߌ߲߬ߓߊ߮ ߣߴߊ߬ ߟߊߝߛߊ߬ߓߊ߮ ߸ ߒ߬ ߠߊ߫ ߝߏ߬ߟߌ ߓߎ߰ߓߎ߰ߣߍ߲ ߦߋ߫ ߊߟߎ߫ ߟߊ߫ ߸ ߓߊߘߋ߲ߧߊ ߝߏ߬ߟߌ ߟߊ߫ ߸ ߡߙߌߞߋߟߋ߲ߢߐ߲߯ߦߊ ߝߏ߬ߟߌ ߟߊ߫ ߡߐ߰ߓߊ ߟߎ߬ ߞߐ ߟߊߥߟߌ߬ߟߌ ߛߍ߬ߘߏ߲ ߝߏ߬ߟߌ ߟߊ߫ ߞߏ߫ ߊߟߎ߫ ߣߌ߫ ߖߐ߫ ߊߟߎ߫ ߣߌ߫ ߞߏ߲߫ ߸ ߊߟߎ߫ ߦߋ߫ ߕߏߟߌ߫ ߘߐ߫.
ߏ ߕߊ߬ߡߌ߲ ߞߐ߫ /…
ߊ߲ ߓߊߘߋ߲߫ ߞߊߟߊ߲ߞߋ߫ ߡߊ߲߬ߘߋ߲߬ ߡߌߙߌ߲ߘߌ ߸ ߛߟߊߕߌ߯ ߒߞߏ ߡߊ߲߬ߕߎ߬ߙߋ ߟߎ߬ ߸ ߡߊ߲߬ߘߋ߲߬ߞߊ ߟߎ߫ ߟߋ߬ ߞߊ߲߫ ߦߋ߫ ߞߏ߫ ߞߟߌߟߌ ߦߋ߫ ߗߋ߫ ߊ߬ ߟߊߡߌ߬ߘߊ ߦߋ߫ ߗߋ߫.
ߒ߬ߞߵߊ߬ߛߐߍ ߸ ߞߏ ߓߍ߯ ߟߊߘߍ߬ߣߍ߲ ߜߟߍ߬ߦߊ ߣߴߊ߬ ߕߙߐߦߊ ߦߋ߫ ߜߊ߬ ߟߊ߫ ߡߐ߰ ߟߊ߫ ߞߊ߬ ߓߍ߲߬ ߌ ߟߢߊ ߟߋ߫ ߡߵߊ߬ ߟߊ߫ ߸ ߏ߬ ߞߘߐ ߦߋ߫ ߟߋ߬ ߞߏ߫ ߌ ߓߊ߯ ߟߊ߫ ߞߏ ߟߊ߫ ߞߏߕߊ߲߫ ߊ߬ ߛߍ߱ ߘߌ߫ ߞߎ߲߫ ߌ ߘߐ߫ ߞߵߊ߬ ߕߙߐ ߜߊ߲߫ ߌ ߞߎ߲߬ߠߊ߫، ߊ߲ߠߎ߬ ߟߊ߫ ߞߟߌߟߌ ߣߌ߲߬ ߦߋ߫ ߏ߬ ߟߋ ߘߌ߫ ߸ ߓߊߏ߬ ߡߍ߲ ߣߊ߬ ߥߟߋߟߌ ߞߍ߫ ߟߊ߫ ߏ߬ ߣߌߛߐߘߌߦߊߣߍ߲߫ ߸ ߊ߬ ߟߊߡߌ߬ߘߊ߬ߓߊ߮ ߝߣߊ߫ ߛߍߥߊߣߍ߲߫ ߏ߬ ߘߌ߫.
ߒ ߟߊߣߍ߲߫ ߊ߬ ߟߊ߫ ߏ߬ ߟߋ ߣߊ߬ ߞߟߌߟߌ ߟߊߡߌ߬ߘߊ߬ߓߊ߮ ߣߌ߲߬ ߓߍ߯ ߛߋ߫ ߟߊ߫ ߞߣߍ ߣߌ߲߬ ߞߊ߲߬ ߡߎߢߍ ߣߌ߫ ߡߎߙߌ ߘߌ߫ ߸ ߞߊ߬ ߝߋ߲߫ ߞߐ߬ߣߐ߲߬ ߡߍ߲ ߘߌߕߐ߫ ߊ߬ ߡߊ߬ ߥߟߊ߫ ߡߍ߲ ߝߕߐ߫ ߊ߬ ߦߋ߫.
ߓߊ ߞߏ߫ ߝߌ߬ߟߊ ߏ߬ ߦߋ߫ ߒ߬ ߡߌ߬ߙߌ߲߬ߘߌ ߦߟߌߡߊߞߏ ߟߋ߬ ߘߌ߫ ߡߍ߲ ߕߍ߫ ߘߐߞߏߟߏ߲ߧߊ߫ ߟߊ߫. ߓߊߏ߬ ߞߏ߫ ߌ ߓߊ߯ ߡߐ߱ ߞߟߌ߫ ߣߴߌ ߡߊ߫ ߝߋ߲߫ ߘߌ߫ ߊ߬ ߡߊ߬ ߌ ߘߌ߫ ߝߋ߲߫ ߝߐ߫ ߊ߬ ߦߋ߫،..
ߏ߬ ߓߟߏߡߵߊ߲ ߓߊߘߋ߲ ߠߎ߬ ߸ ߊ߬ ߛߊ߲ߖߌ߫ ߥߐߙߐ߲ߥߌ߬ߟߊ ߟߋ߫ ߣߌ߲߬ ߞߛߍߞߛߍ߫ ߒߞߏ ߓߊ߯ߙߊ߫ ߡߐ߬ߟߐ߲߬ߡߊ ߘߏ߫ ߦߋ߫ ߸ ߡߍ߲ ߦߋ߫ ߛߋ߲߬ߠߊ߫ ߞߎ߲߬ߕߊ߮ ߣߌ߲߬ ߞߘߐ߫ ߡߙߐߕߐߕߐ߫߸ ߏ߬ ߡߍ߲ ߦߴߊ߲ ߓߍ߯ ߣߌߘߐߞߏ ߘߌ߫ ߞߊ߬ߣߌ߲߫ ߸ ߣߊߟߌ߬ߡߎ߲߫ ߒߞߏ ߕߍ߬ߘߍ ߘߌ߫ ߘߎߢߊ߫ ߞߊ߲߫ ߥߙߍߓߊ ߟߎ߫ ߝߍ߬ ߡߌߞߙߏߛߐߝߕ ߘߟߊߡߌߘߊ߫ ߞߊ߲ߞߋ ߘߐ߫ ߸ ߊ߬ ߣߴߊ߬ ߢߐ߲߰ߘߐ ߟߎ߬ ߘߐ߫.
ߏ߬ ߘߏ߲߬ ߘߊߡߌ߬ߘߊ ߡߊ߫ ߝߐ߫ ߊߟߎ ߡߐ߬ߓߊ߬ ߞߟߊߒߞߋ ߟߎ߬ ߞߐ߫ ߝߋߎ߫ ߸ ߊ߬ ߡߊ߬ ߝߐ߫ ߗߍ߭ ߟߎ߬ ߞߐ߫ ߊ߬ ߡߊ߫ ߝߐ߫ ߡߏ߬ߛߏ ߟߎ߬ ߞߐ߫ ߸ ߊ߬ ߡߊ߫ ߝߐ߫ ߡߐ߰ߞߘߐ߬ߓߊ ߟߎ߬ ߞߐ߫ ߊ߬ ߡߊ߫ ߝߐ߫ ߞߊߡߋߙߋ߲ ߠߎ߬ ߞߐ߫ ߸ ߤߊߟߌ߬ ߘߋ߲߫ ߢߋߙߌ߲߫ ߞߊߙߏ߫ ߞߋߟߋ߲ ߊ߬ ߡߊ߫ ߝߐ߫ ߏ߬ ߞߐ߫ ߡߊ߲߬ߘߋ߲߬ ߖߡߊߣߊ ߟߎ߬ ߞߣߐ߫ ߊ߬ ߣߴߊ߬ ߕߌ߲߬ߞߎߘߎ߲ ߠߎ߬ ߘߐ߫ ߓߡߊߣߊ߲ߠߊ߫ ߸ ߡߊ߬ߣߋ߲߬ߞߊ߬ߟߊ߫ ߸ ߡߊ߲߬ߘߋ߲߬ߞߏ߬ߟߊ߫ ߣߌ߫ ߖߎ߬ߟߊ߬ߘߎ߯.
ߏ ߡߊ߬߸ ߊ߬ߟߎ߫ ߝߏ߬ߢߊ ߖߍ߬ߘߍߖߍ߬ߘߍ ߝߐߢߊ߫ ߕߍ߫ ߒ߬ ߞߣߐ߫ ߡߍ߲ ߕߊ߬ߡߌ߲߬ߣߍ߲߫ ߕߊ߲߬ߘߏ߬ߟߌ ߞߊ߲߬، ߓߊ ߥߟߌߢߌߡߊ ߡߊ߫ ߕߏ߫ ߕߊ߲߬ߘߏ߬ ߛߏ߫ ߊ߬ ߡߊ߫ ߕߏ߫ ߢߐ߲߯ ߛߏ߫ ߸ ߛߏ߲߭ ߓߘߊ߫ ߥߊ߫ ߌ ߗߍ ߘߌ߫. ߏ ߘߏ߲߬ ߦߋ߫ ߕߎ߬ߢߊ߫ ߟߋ߬ ߘߌ߫ ߖߊ߯ߕߋ߬ ߸ ߓߊߏ߬ ߊߟߊ߫ ߡߊ߫ ߞߊ߯ߙߌ߫ ߕߊ߲߬ߘߏ߫ ߡߊ߬.
ߣߴߏ߬ ߕߍ߫ ߊ߬ߟߎ߫ ߞߵߊ߬ ߞߍ߫ ߊ߬ߟߎ߫ ߖߘߍ߬ ߟߋ߬ ߦߋ߫ ߊ߬ߟߎ߫ ߖߘߍ߬ߞߏ ߘߐ߫ ߸ ߊߟߎ߫ ߣߴߊߟߎ߫ ߓߐ߲ߛߐ߲߫ ߣߊ߬ߕߐ ߟߎ߬ ߦߋ߫ ߸ ߦߏ߫ ߒߞߏ ߛߓߍߛߎ߲߫ ߞߊ߲ߡߊߛߙߋߡߊ ߛߌ߲ߘߌߓߊ߮ ߞߊ߬ ߓߊ߯ߙߊ ߞߍ߫ ߊ߬ ߖߘߍ߬ ߦߋ߫ ߢߊ ߡߍ߲ ߞߊ߲߬ ߸ߊ߬ ߣߴߊ߬ ߡߌ߬ߙߌ߲߬ߘߌ߫ ߣߊ߬ߕߐ ߟߎ߬ ߦߋ߫ ߣߊߟߌ߬ߡߎ߲߫ ߊ߲ߠߎ߬ ߘߌ߫ ߝߏ߫ ߞߊ߬ ߘߎߢߊ߫ ߓߊ߲߫ (ߊ.ߘ.).
ߓߊߘߋ߲߫ ߓߘߍ ߟߎ߬ ߸ ߘߟߊߡߌߘߊߟߌ ߓߊ߯ߙߊ ߞߎߡߊ ߟߊߛߋ߫ ߘߊ߫ ߟߏ߲ ߡߍ߲ ߠߊ߫ ߀߁/߀߁/߂߀߁߇ ߟߊ߫ ߸ ߞߵߊ߬ ߡߙߌߣߊ߲ ߦߌ߬ߘߊ߬ ߸ ߊ߬ ߣߴߊ߬ ߓߊ߯ߙߊ ߢߊ߲ߞߊ߲ ߣߴߊ߬ ߖߐ߲߰ߣߍ߲ ߸ ߞߊ߬ ߓߍ߲߬ ߏ߬ ߟߏ߲ ߞߏߢߊߦߋߢߊ ߡߊ߬ ߸ ߒߞߏߞߏ ߟߊߒߠߦߊߓߊ߯ ߡߐ߰ ߂߀߀߀ ߣߌ߫ ߞߐ߫ ߖߊ߲߫ ߠߋ߫ ߞߵߊ߬ߟߎ߬ ߕߟߏߡߊߟߐ߬ ߓߊ߯ߙߊ߫ ߓߛߍ ߣߌ߲߬ ߟߊߛߋߞߊ߲ ߠߊ߫ ߏ߬ ߟߏ߲ ߸ ߊ߬ߟߎ߬ ߟߊ ߞߏߛߐ߲߬ ߒߞߏߞߏ ߟߊ߫ ߸ ߊ߬ߟߎ߫ ߞߵߊ߬ߟߎ߬ ߥߙߊߞߴߊ߬ ߓߊ߯ߙߊ ߞߍ߫ ߞߊߡߵߊ߬ߟߎ߬ ߛߋߞߏ ߟߊ߫ ߸ ߊ߬ߟߎ߫ ߛߍ߬ߓߍ ߣߴߊ߬ߟߎ߬ ߛߍ߲ߓߍ ߟߊ߫ ، ߞߊ߬ ߘߌ߬ߢߍ߫ ߊ߬ߟߎ߬ ߟߊ߫ ߟߏ߲ߜߍ ߘߙߐߡߍ ߘߐ߫ ߞߵߊ߬ ߘߏ߲߬ ߓߊ߯ߙߊ ߣߌ߲߬ ߘߟߊ߫ ߸ ߞߊ߬ ߘߌ߬ߢߍ߬ ߛߎ ߛߎ߬ߣߐ߮ ߘߐ߫ ߊ߬ ߞߏ ߛߎߘߊ߲ߧߊ ߡߙߌ ߟߊ߫ ߸ ߞߊ߬ ߘߌ߬ߢߍ߬ ߊ߬ ߖߍ߬ߘߍ ߞߎ߲߬ߞߊ߲߬ߞߏ ߟߎ߬ ߘߐ߫ ߞߵߊ߬ ߞߍ߫ ߡߌ߬ߙߌ߲߬ߘߌ ߗߋߢߊ ߘߌ߫.
ߒ߬ߓߊ߬ ߓߌ߬ ߛߊ߫ ߸ ߊ߲ ߘߴߊ߬ ߝߐ߫ ߊߟߎ߫ ߦߋ߫ ߒߞߏ߫ ߊ߲ ߘߟߊߝߎ߬ ߊ߲ ߘߟߊߝߍ߫߹ ߊߟߎ߫ ߦߋ߫ ߛߍߥߊ߫ ߊߟߎ߫ ߦߋ߫ ߣߌߛߐߘߌߦߊ߫ ߸ ߊߟߎ߫ ߥߍ߬ߣߍ ߟߋ߫ ߛߊ߬ߦߌ߲߬ߣߍ߲߫ ߊߟߎ߫ ߡߊ߬.
ߣߴߊߟߎ߫ ߞߵߊ߲ ߡߍ߲ߣߍ߲ ߦߋ߫ ߤߊ߲߯ ߛߊ߲ߖߌ߫ ߥߐߙߐ߲ߥߌ߬ߟߊ ߣߌ߲߬ ߸ ߒ߬ ߡߊ߫ ߓߍ߲߬ ߒ߬ ߛߋ߲߬ߡߊ߬ ߟߋ߬ ߖߏߣߊ߫ ߸ ߦߏ߫ ߞߊ߬ߙߊ߲߬ߡߐ߯ ߛߟߏ߬ߡߊ߯ߣߊ߫ ߞߊ߬ ߛߊ߲߬ ߇ ߞߍ߫ ߢߊ ߡߍ߲ ߞߊ߲߬ ߖߐ߫ ߊ߬ ߡߊ߫ ߞߊ߲ߡߊߛߙߋߞߏ ߢߊߦߋ߫߸ ߞߵߊ߬ ߕߘߍ߬ ߜߎ ߊ߬ ߕߎ߲߬ ߦߋ߫ ߛߍ߬ߘߏ߲ ߠߊ߫ ߢߊߛߐ߬ߘߐ߲߬ ߞߊߡߊ߬ ߡߊ߲߬ߘߋ߲߫ ߝߘߏ߬ߓߊ߬ߞߊ߲ ߘߐߞߣߍ ߟߊ߫ ߛߓߍߟߌ ߘߐ߫،، ߏ߬ ߡߊ߫ ߕߊ߬ ߘߏ߫ ߜߘߍ߫ ߡߊ߬ ߸ ߓߊߏ߬ ߌ ߓߊ߯ ߟߐ߯ߢߌߣߌ߲ߠߊ ߡߍ߲ߣߍ߲ ߦߋ߫ ߥߊ߭ ߘߐ߫ ߊ߬ ߡߊ߫ ߓߍ߲߬ ߊ߬ ߛߋ߲߬ߡߊ߬ ߜߍ߲߬ ߝߍ߬ߙߍ߲߬ߞߏ ߟߋ߬ ߘߐ߫ ߖߏߣߊ߫ ߢߐ߲߬ߛߐ߲ ߠߎ߬ ߘߐ߫ ߓߍ߬ߛߍ.
ߏ ߛߐ߬ߘߐ߲߬ߓߊ߬ߟߌ߬ߦߊ߬ ߖߏߣߊ ߟߋ߬ ߦߋ߫ ߟߐ߯ߢߌߣߌ߲ߠߊ ߟߐ߬ ߟߊ߫ ߟߐ߮ ߣߌ߫ ߢߐ߲߬ߛߐ߲ ߛߎ߮ ߓߍ߯ ߢߌߣߌ߲߫ ߠߊ߫ ߸ ߡߍ߲ ߓߍ߯ ߞߐߝߟߌ ߦߋ߫ ߜߊ߬ߘߏ߲߬-ߟߐ߰-ߞߏ ߘߌ߫.
ߣߴߌ ߞߵߊ߲ ߝߣߊ߫ ߡߍ߲ߣߍ߲ ߦߋ߫ ߸ ߊ߲ ߞߵߊ߲ ߓߟߏߞߍ߫ ߛߌߟߊ߫ ߛߌߦߊߡߊ߲ߓߊ ߟߋ߬ ߟߊ߫ ߡߍ߲ ߓߍ߯ ߞߐߝߟߌ ߦߋ߫ ߒߞߏ ߕߍ߬ߘߍ ߘߌ߫ ߞߊ߲߫ ߞߎ߲ߓߊ ߟߎ߫ ߝߍ߬ ߘߟߊߡߌߘߊߢߐ߲߰ߘߐ ߘߐ߫.
ߊ߬ ߝߟߐ: ߊ߬ ߓߍ߯ ߘߊߡߌ߬ߘߊ߬ߣߍ߲߫ ߡߌߞߙߏߛߐߝߕ ߞߏߟߊߘߍ ߞߍ߲߬ߠߊ߬-ߓߊ߯ߙߊ ߟߋ߫ ߡߊ߬ ߸ ߏ߬ ߡߍ߲ ߝߟߐ߫ ߞߊ߬ ߒߞߏ ߕߍ߬ߘߍ߫ ߊ߬ ߟߊ߫ ߞߊ߲ߞߋ ߘߐ߫. ߞߊ߬ ߒߞߏ ߓߊ߯ߙߊ ߟߎ߫ ߣߐ߬ߦߊ߫ ߕߟߋ߬ߓߊ߮ ߟߎ߬ ߟߊ߫ ߝߏ߫ ߞߊ߲߫ ߂߁߂ ߦߴߊ߬ ߓߟߏ߫ ߕߋ߲߬ߕߋ߲߬.
ߝߌߟߊߣߊ߲߫: ߓߍ߯ ߦߋ߫ ߜ߭ߎߜ߭ߎߟ ߞߊ߬ߟߊߡߊ߬ ߸ ߏ߬ ߝߣߊ߫ ߦߋ߫ ߛߋߒߞߏߟߦߊ߫ ߞߏߟߊߘߍ߫ ߝߌ߬ߙߌ߲ߞߐ߲߬ߞߐ߲ ߘߏ߫ ߟߋ߬ ߘߌ߫ ߓߟߐߟߐ ߟߊ߫߸ ߣߴߊ߬ ߟߊ߫ ߘߟߊߡߌߘߊߟߌ߫ ߞߊ߲ߞߋ߲ ߓߘߊ߫ ߛߋ߫ ߞߊ߲߫ ߁߃߄ ߣߌ߫ ߞߐ߫ ߘߐ߫.
.jpg){kind=link}
ߊ߬ ߛߓߊߣߊ߲߫: ߜ߭ߟߐߓߛ ߞߏߟߊߘߍ ߌߙߑߟߊ߲ߘ ߸ ߏ߬ ߝߣߊ߫ ߦߋ߫ ߘߟߊߡߌߘߊߟߌ߫ ߞߊ߲ߞߋߓߊ ߘߏ߫ ߟߋ߬ ߘߌ߫ ߞߊ߲߫ ߗߡߍ߬ ߦߙߌߞߊ߫ ߦߋ߫ ߡߍ߲ ߓߟߏ߫.
ߊ߬ ߣߊ߯ߣߌ߲ߣߊ߲߫: ߞߊߟߌߝߎߙߑߣߌ߫ ߖߊ߯ߓߘߊ߫ ߓߟߋߓߟߋ ߘߏ߫ ߝߍ߬ߓߊ߯ߙߊ ߊ߬ߟߋ߬ ߘߊߞߎ߲ ߣߌ߲߬ ߘߐ߫ ߸ ߞߊ߬ߝߏ ߏ߬ ߡߍ߲ ߖߊ߯ߓߘߊ ߘߏ߫ ߝߟߐ߫ ߞߊ߬ ߒߞߏ ߟߊߕߘߍ߬ ߞߊ߲߫ ߖߡߊ߬ߣߍ߲߬ߕߌ߮ ߟߎ߬ ߡߊߘߍ߬ߡߍ߲ ߘߐ߫ ߢߎߡߍߙߋ߲ߦߊߟߌ ߞߊߡߊ߲ ߞߣߐ߫ ߸ ߝߴߏ ߣߊ߬ ߘߊ߫ ߟߊߓߊ߲߫ ߒߞߏ ߘߏߝߙߍߕߍߟߌ ߘߊߡߌ߬ߘߊ ߡߊ߬ ߁߉߉߉ ߟߊ߫ ߸ ߞߵߊ߬ ߟߊߞߎߙߊ߲߫ ߛߊ߲ߖߌ߫ ߥߐ߯ߙߐ߫ ߞߐ߫ ߂߀߀߅ ߟߊ߫، ߏ߬ ߡߍ߲ ߣߎ߬ߡߊ ߣߊ߬ ߒߞߏ ߛߋ߫ ߟߊ߫ ߕߟߋ߬ߓߊ߮ ߓߍ߯ ߞߣߐ߫ ߓߌ߬ ߝߐߟߌ߫ ߘߐ߫ ߊ߬ ߣߌ߫ ߜߋߟߋ߲ߜߋߟߋ߲ ߠߎ߬ ߟߊ߫.
ߟߏ߯ߟߎߣߊ߲߫ ߣߴߊ߬ ߟߊߓߊ߲: ߝߘߊ߬ߝߌ߲߬ߠߊ߫ ߘߎ߲߬ߘߎ߬ߡߊ߬ ߞߏߟߊߘߍ ߞߎߣߎ߲ߣߍ߲ ߘߏ߫ ߝߣߊ߫ ߝߍ߬ߓߊ߯ߙߊ ߡߊ߬ߟߌ߬ ߞߊ߲ߓߍ߲߫. ߣߴߊ߬ ߡߊ߫ ߢߊ߬ ߏ߬ ߦߴߊ߲ ߓߘߊߞߏ ߟߋ߬ ߘߌ߫ ߒ߬ ߖߍ߬ߘߍ ߓߟߏ߫ ߞߊ߬ ߓߊ߲߫.
ߊ߲ ߘߏ߲߬ ߟߊߣߍ߲߫ ߞߘߐ ߟߋ߫ ߊ߬ ߟߊ߫ ߞߏ߫ ߛߌߟߊ߫ ߟߏ߯ߟߎ ߣߌ߲߬ ߓߍ߯ ߦߋ߫ ߞߐߝߟߌ߫ ߞߋߟߋ߲߫ ߠߋ߬ ߟߊߓߐ߫ ߟߊ߫ ߸ ߊ߬ߟߎ߬ ߟߊ߫ ߞߐߝߟߌ ߟߎ߬ ߟߊߛߐ߬ߘߐ߲߬ ߛߌߟߊ ߟߎ߫ ߟߋ߬ ߕߍ߫ ߢߊ߫ ߞߋߟߋ߲߫ ߘߌ߫ ߢߊ ߘߏ߫ ߞߊ߲߬ ߛߊ߫.
ߣߊ߲߬ߝߟߏ߬ߦߊ ߛߌߟߊ ߝߍ߬ ߓߊߘߋ߲ ߠߎ߬: ߢߌߣߌ߲߫ ߞߍ߫ ߘߊ߫ ߘߟߊ߫ ߆߀.߀߀߀ ߟߋ߫ ߡߊ߬ ߂߀߁߇ ߟߊ߫ ߞߎߡߦߊ߫ ߛߊ߲ߜߡߊ߫ ߅߀߀.߀߀ ߓߊ߯ߙߊ߫ ߞߊߡߊ߬ ߞߊ߬ ߡߌߞߙߏߛߐߝߕ ߊߖ߭ߎߙ ߛߊ߬ߙߊ߫ ߞߊ߬ ߓߍ߲߬ ߓߊ߯ߙߊ߫ ߞߍߣߍ߲ ߡߊ߬ ߛߊ߲ߖߌ߫ ߟߏ߯ߟߎ߫ ߞߘߐ߫.
ߊ߬ ߦߋ߫ ߛߊ߲߬ ߛߓߊ߬ ߓߐ߫ ߟߊ߫ ߟߏ߲ ߡߍ߲ ߠߊ߫ ߸ ߊ߬ ߣߊ߬ ߘߊ߫ ߢߊߦߋ߫ ߞߏ߫ ߓߊ߯ߙߊ ߣߌ߲߬ ߓߍ߲߬ߣߍ߲߫ ߥߍ߬ߣߍ ߟߋ߬ ߘߐ߫ ߸ ߡߍ߲ ߕߴߛߋ߫ ߣߊ߲߬ߝߟߏ߬ߦߊ߫ ߟߴߊ߬ ߢߊ߲ߞߊ߲ ߓߏ߲߬ߧߊ ߞߏߛߐ߬، ߓߊߏ߬ ߛߊ߲ߜߡߊ߫ ߥߊ߯߅߀߀ ߕߴߊ߬ ߘߐ߫ ߝߏߦߌ߬ ߘߌ߫ ߝߕߌߣߍ߲߫ ߞߐ߫ ߸ ߦߏ߫ ߘߋ߲ߣߍ߲ ߛߊ߲ߖߌ߫ ߛߓߊߟߡߊ ߊ߬ ߛߌ߲ߡߌ߲ߞߊ߲ ߝߐ ߘߐ߫.
ߓߊ߯ߙߊ ߛߌߟߊ ߝߍ߬: ߡߐ߰ ߃߅ ߟߋ߫ ߞߵߊ߬ ߕߐ߮ ߛߓߍ߫ ߏ߬ ߘߐ߫ ߏ߬ ߟߏ߲߸ ߡߐ߰ ߥߐ߯ߙߐ߫ ߞߊ߬ ߘߏ߫ ߞߍ߫:
ߞ. ߓߊ߬ߓߊ߫ ߡߊ߬ߡߊߘߌ߫ ߖߊ߰ߣߍ߫.
ߞ. ߛߏ߬ߟߏ ߝߙߊ߬ߓߊ ߘߐ߫ ߛߌ߬ߛߋ߫.
ߞ. ߦߛߎߝߎ߫ ߖߊ߰ߓߌ߫.
ߞ. ߊߘߡߊ߫ ߖߓߊ߬ߕߍ߫.
ߞ. ߝߘߊ߬ߝߌ߲߫ ߥߎ߬ߟߊ߬ߙߋ߫.
ߊ߬ ߞߏ ߣߊ߬ ߘߊ߫ ߞߛߊ߫ ߞߵߊ߬ ߕߏ߫ ߡߐ߰ ߛߊ߬ߓߊ߫ ߡߊ߬ ߞߐ ߟߊ߫ ߸ ߘߟߊߡߌߘߊߟߌ ߘߍ߬ߘߊ߬ߓߊ ߟߎ߫ ߝߍ߬ ߸ ߖߊ߯ߓߘߊ ߟߎ߫ ߝߍ߬ ߸ ߏ߬ ߟߎ߬ ߟߊ߫ ߟߊ߬ߛߌ߲߬ߠߌ߲ ߣߎ߬ߡߊ߬ ߞߊ߬ ߓߊ߯ߙߊ ߡߛߍ߬ߞߍ߬ߡߛߍߞߍ ߘߊߓߊ߲߫.
ߞ. ߓߊ߬ߓߊ߫ ߡߊ߬ߡߊߘߌ߫ ߖߊ߰ߣߍ߫.
ߞ. ߛߏ߬ߟߏ ߝߙߊ߬ߓߊ ߘߐ߫ ߛߌ߬ߛߋ߫.
ߞ. ߖߌ߬ߓߙߌߟߊ߫ ߖߊ߰ߣߍ߫.
ߡߐ߰ ߡߊߘߊ߲ߣߍ߲ ߢߌ߲߬ ߠߎ߬ ߛߋ߫ ߘߊ߫ ߞߊ߬ ߞߘߐߝߐߟߊ߲ ߒߞߏ-ߊ߲ߜ߭ߌߟߋ ߥߟߊ߫ ߒߞߏ-ߝߊߙߊ߲ߛߌ ߓߊ߯ߙߊ߫ ߓߊ߯ߙߊ߫ ߓߛߍ ߣߌ߲߬ ߛߎߘߊ߲߫ ߞߊߡߊ߬.
ߡߐ߰ ߡߊߘߊ߲ߣߍ߲ ߢߌ߲߬ ߠߎ߬ ߛߋ߫ ߘߊ߫ ߞߊ߬ ߞߘߐߝߐߟߊ߲ ߒߞߏ-ߊ߲ߜ߭ߌߟߋ ߥߟߊ߫ ߒߞߏ-ߝߊߙߊ߲ߛߌ ߓߊ߯ߙߊ߫ ߓߊ߯ߙߊ߫ ߓߛߍ ߣߌ߲߬ ߛߎߘߊ߲߫ ߞߊߡߊ߬ ߸ ߞߊ߬ ߛߋ߫ ߞߎߡߦߊ߫ ߞߊ߲ߞߋ ߘߏ߫ ߘߐߓߍ߲߬ ߠߊ߫ ߞߊ߬ ߞߎߡߦߊ߫ ߞߋ߲߬ߥߟߎ߬ ߥߐ߯ߙߐ߫ ߟߊߘߊ߲߫.
ߞߊ߬ ߒߞߏ ߝߙߊ߬ ߞߊ߲߫ ߄߀ ߘߏ߫ ߞߊ߲߬ ߞߐߕߐ߮ ߘߏ߫ ߘߐ߫ ߸ ߞߎߡߊߖߟߎ߫ ߛߊ߲ߜߡߊ߫ ߃߀߀߀ ߦߴߏ߬ ߞߣߐ߫ ߘߎߢߊ߫ ߞߏ ߓߍ߯ ߘߏ߫ ߞߊ߲߬.
ߞߊ߬ ߒߞߏ ߝߙߊ߬ ߞߊ߲߫ ߂߀߀ ߘߏ߫ ߝߣߊ߫ ߞߊ߲߬ ߞߐߕߐ߮ ߘߏ߫ ߘߐ߫ ߸ ߞߎߡߊߖߟߎ߫ ߛߊ߲ߜߡߊ߫ ߆߀߀߀ ߦߴߏ߬ ߞߣߐ߫ ߘߎߢߊ߫ ߞߏ ߘߏ߫ ߓߍ߯ ߞߊ߲߬ ߞߐߘߍ߫.
ߓߌ߬ߟߊ߬ߢߐ߲߰ߡߊ ߛߌߟߊ ߝߍ߬: ߓߊ߯ߙߊ ߢߌ߲߬ ߠߎ߬ ߦߋ߫ ߛߋ߲߬ߠߊ߫ ߕߎ߬ߡߊ ߡߍ߲ ߠߊ߫ ߸ ߊ߲ ߞߊ߬ ߢߐ߲߯ߦߋ߫ ߛߌߦߊߡߊ߲߫ ߞߍ߫ ߞߏߟߊߘߍߓߊ߫ ߛߌߦߊߡߊ߲߫ ߝߍ߬ ߒߞߏ ߟߊ߫ ߞߏ ߡߌ߬ߘߊ߬ߢߊ ߞߊ߲߬ ߘߟߊߡߌߘߊߟߊ߲ ߠߎ߬ ߛߌߟߊ ߝߍ߬، ߊ߬ߟߎ߬ ߣߴߊ߬ߟߎ߬ ߟߊߛߌߦߊߦߊ ߊ߬ ߓߍ߯ ߓߎ߲ߓߎ߲ߣߍ߲߫ ߕߎ߲߬ ߦߋ߫ ߞߊ߲ ߟߐ߲ߕߊ߫ ߛߊ߲ߜߡߊ߫ ߛߌߦߊߡߊ߲߫ ߠߋ߬ ߡߊ߬ “ߘߐߣߋ ߝߊ߬ߙߊ߲߬ߛߌ ߘߐ߫” ߥߟߊ߫ “ߘߕߊ ߊ߲߬ߞߌߟߋ ߘߐ߫” ߞߊ߬ ߝߟߐߦߊ ߘߌ߫ ߒߞߏ-ߊ߲ߞߌߟߋ ߡߊ߬ ߞߊ߲ ߓߍ߯ ߦߋ߫ ߛߎߡߊ߲߫ ߠߊ߫ ߏ߬ ߡߍ߲ ߡߊ߬.
ߞߏߟߊߘߍ ߏ߬ ߟߎ߫ ߘߏ߲߬ ߞߵߊ߲ ߡߊߜߍ߲߫ ߓߊ߯ߙߊ ߞߍߞߌߦߊ ߣߌ߫ ߟߐ߲ߕߊ߫ ߘߟߊߡߌ߬ߘߊ߬ߕߊ߫ ߛߌߦߊߡߊ߲߫ ߠߊ߫ ߘߊߞߎ߲ ߓߍ߯ ߘߐ߫ ߞߵߊ߬ ߝߙߊ߬ ߒ߬ ߕߊ߫ ߞߘߐ߬ߡߊ߲ ߠߎ߫ ߞߊ߲߬ ߸ ߏ߬ ߟߎ߫ ߘߏ߲߬ ߞߊ߬ ߞߏ߫ ߛߌߦߊߡߊ߲߫ ߢߵߊ߲ ߡߊ߬.
ߏ ߓߟߏߡߊ߬ ߊ߲ ߞߊ߬ ߞߊ߲-ߝߌߟߡߊ߫ ߛߊ߲ߜߡߊ ߓߙߍ߬ߦߊ߫ ߛߐ߬ߘߐ߲߬ ߓߊ߯ߙߊ ߘߌ߫ ߘߊߡߌ߬ߘߊ߬ ߡߍ߲ ߡߊ߬ ߸ ߊ߬ ߣߌ߫ ߞߵߊ߬ ߟߊߕߟߐ߬ ߞߊ߲ߞߋߟߋ߲ߡߊ߫ ߞߐߕߐ߮ ߢߊߓߐߣߍ߲ ߠߎ߬ ߟߊ߫، ߒ߬ߓߵߊ߲ ߣߊ߬ ߏ߬ ߟߋ ߓߍ߯ ߟߊߓߌ߬ߟߊ߬ ߟߊ߫ ߒ߬ ߠߊ߫ ߛߌߟߊ߫ ߡߊߝߟߍߣߍ߲߫ ߟߏ߯ߟߎ ߟߎ߬ ߦߋ߫ ߸ ߣߊߟߌ߬ߡߎ߲߫ ߘߟߊߡߌߘߊ ߛߌߟߊ߫ ߟߏ߯ߟߎ߫ ߞߏߝߐߣߍ߲ ߘߌ߫ ߸ ߞߊߕߙߍ߬ߕߍ߫ ߖߊ߯ߓߘߊ ߟߎ߫ ߡߊ߬.
ߏ߬ ߓߍ߯ ߝߣߊ߫ ߞߵߊ߬ ߟߊߓߊ߯ߙߴߊ߬ ߕߊ߫ ߢߊ߫ ߞߊ߲߬ ߞߎ߬ߞߎߓߊ߬ ߕߟߋ߬ߓߊ߰ ߤߏߞߌ ߟߎ߬ ߗߋߢߊߘߊ߮ (ߛߍߙߑߝ߭ߍߙ) ߞߣߐ߫.
ߊ߬ ߕߎ߲߬ ߦߋ߫ ߣߌ߲߬ ߓߍ߯ ߝߣߊ߫ ߘߊߘߐ߫ ߟߋ߬ ߞߏ߫ ߊ߬ߟߎ߬ ߟߊ߫ ߕߙߏ߬ߞߏ ߟߎ߬ ߦߋ߫ ߟߊߞߐ߯ ߟߊ߫ ߟߋ߬ ߞߊ߲߫ ߞߎߘߊ ߟߎ߬ ߟߊ߫ ߸ ߒߞߏ ߘߏ߲߬ ߦߴߊ߬ߟߎ ߓߟߏ߫ ߞߊ߲߫ ߞߎߘߊ ߘߏ߫ ߟߋ߬ ߘߌ߫، ߏ ߡߊ߬ ߤߊߟߌ߫ ߓߌ߬ ߏ߬ ߟߎ߬ ߟߊߞߐ߮ ߦߋ߫ ߛߋ߲߬ߠߊ߫ ߒߞߏ ߟߊ߫ ߞߵߊ߬ ߣߊߙߏ߲߫ ߊ߲߬ߞߌߟߋ ߘߐ߫ ߸ ߞߊ߬ ߘߎߢߊ߫ ߞߊ߲ ߕߐ߬ߡߊ ߟߎ߬ ߟߊߛߐ߬ߘߐ߲߬.
ߒ߬ߓߊ߬ ߟߊ߬ߞߐ߰ߟߌ߬ ߖߏߣߊ ߞߐߝߍ߬ ߸ ߊ߬ ߦߌ߬ߘߊ߬ ߘߊ߫ ߞߏ߫ ߡߐ߰ ߕߍ߫ ߞߊ߲ ߝߊ߲߭ ߓߍ߯ ߟߊߘߏ߲߬ ߠߊ߫ ߘߟߊߡߌߘߊ߫ ߞߊ߲ߞߋ ߞߣߐ߫ ߘߋ߬ ߸ ߞߏ߬ߣߌ߲߬ ߖߊ߬ߕߋ ߘߏ߫ ߟߋ߬ ߦߋ߫ ߟߊߘߏ߲߬ ߠߊ߫ ߸ ߞߊ߲ߞߋ ߘߴߊ߬ ߖߘߍ߬ ߘߐ߲߬ߘߐ߰ߣߍ߲߬ ߡߊߞߊ߬ߙߊ߲߬ ߏ ߡߊ߬ ߟߊߞߐ߰ߟߌ ߛߌߟߊ ߝߍ߬ ߸ ߤߊߟߌ߬ ߣߴߊ߬ ߡߊ߫ ߟߊߞߐ߯ ߞߎߡߦߊ ߡߍ߲ ߠߊ߫ ߏ߬ ߘߐ߫ ߞߊ߲ ߘߏ߫ ߘߐ߫ ߸ ߊ߬ ߘߌ߫ ߛߋ߫ ߏ߬ ߢߐ߲߰ ߟߊߘߊ߲߫ ߠߴߊ߬ ߖߘߍ߬ ߦߋ߫ ߦߏ߫ ߘߋߣߍ߲ ߦߋ߫ ߛߋ߫ ߟߴߊ߬ ߡߙߌ ߟߎ߬ ߝߐ߫ ߟߊ߫ ߢߊ ߡߍ߲ ߞߊ߲߬ ߸ ߞߵߊ߬ ߕߘߍ߬ ߊ߬ ߡߊ߲ߛߊ ߟߎ߬ ߡߊ߫ ߏ߬ ߓߍ߯ ߝߐ߫ ߊ߬ ߦߋ߫ ߸ ߓߊߏ߬ ߞߊ߲ ߓߊߖߎ ߟߎ߬ ߓߘߊ߫ ߘߝߴߊ߬ ߛߣߐ߬ߡߍ ߘߐ߫ ߞߊ߬ ߓߊ߲߫.
ߟߊ߬ߞߐ߰ߟߌ ߡߊߞߊ߬ߝߏ: ߒ߬ߓߊ߬ ߓߊߏ߬ ߞߍߟߊ߲ ߝߌ߬ߙߌ߲ߞߐ߲߬ߞߐ߲ ߠߎ߬ ߓߘߊ߫ ߟߊߞߐ߯ ߒߞߏ ߞߎߡߦߊ߫ ߓߊߖߎ߫ ߛߊ߲ߜߡߊߦߊߣߍ߲߫ ߛߌߦߊߡߊ߲߫ ߠߊ߫ ، ߞߵߊ߬ ߟߊߥߌ߬ߟߌ߫ ߊ߬ ߡߊߞߊ߬ߙߊ߲ ߡߊ߬ ߛߊ߲ߜߡߊ ߛߎ߯ߓߍ߯ߛߎ߯ߓߍ߯ ߟߊ߫ ߸ ߓߊߏ߬ ߞߊ߲ ߕߍ߫ ߓߊ߲߫ ߠߊ߫ ߝߐ߫ ߟߊ߫.
ߘߊ ߘߏ߫ ߓߘߊ߫ ߟߊߞߵߊ߲ ߧߋ߫ ߜ߭ߎߜߎߟ ߟߊ߫ ߕߋ߲߬ߕߋ߲߬߸ ߞߵߏ߬ ߟߎ߬ ߟߊ߫ ߞߊ߲ߞߋ ߡߊߛߐ߫ ߒߞߏ ߟߐ߲ߕߊ ߟߎ߬ ߡߊߞߊ߬ߝߏ߬ߟߌ ߟߊ߫ ߡߌ߬ߙߌ߲߬ߘߌ ߓߟߏ߫ ߛߊ߫ ߟߊߞߐ߰ߟߌ ߘߌ߫ ߕߊ߬ߡߌ߲߫ ߛߋ߲߬ߠߊ߬ߞߊߟߌߦߊ߫ ߟߊ߫.
ߏ߬ ߦߋ߫ ߟߋ߬ ߦߏ߫ ߛߣߍ߬ߕߌ߮ ߣߴߊ߬ ߘߋ߲ ߠߎ߬߸ ߞߊ߬ ߕߎ߲߭ ߡߢߊ߫ ߝߊ߭ ߓߟߏ߫ ߥߟߊ߫ ߞߐ߬ߘߐ ߸ ߘߋ߲ߣߍ߲ ߠߎ߬ ߘߴߊ߬ ߥߌ߬ߟߌ ߡߎ߬ߕߎ߲߬ ߛߊ߫ ߞߊ߬ ߜߍߓߊ ߥߟߌ߬ ߕߎ߬ߡߊ߬ߣߍ߲߫ ߞߘߐ߫.
ߒߞߏ ߕߎ߲߭ ߥߟߌ߬ߟߌ ߏ߬ ߘߐ߫ ߸ ߛߌߦߊߡߊ߲߫ ߓߘߊ߫ ߡߢߊ߫ ߡߐ߱ ߣߌ߫ ߗߋߢߊߘߊ߮ ﴿ߛߍߙߑߝߍߙ﴾ ߟߎ߬ ߓߟߏ߫ ߞߊ߬ ߓߊ߲߫ ߸ ߡߐ߰-ߐ-ߡߐ߰ ߘߌ߫ ߛߋ߫ ߓߟߐߟߐ߫ ߟߊߓߊ߯ߙߊ ߟߊ߫ ߝߣߊ߫ ߸ ߏ߬ ߓߍ߯ ߘߌ߫ ߛߋ߫ ߕߘߍ߬ ߟߊ߫ ߡߊ߬ߥߟߌ߬ߟߌ ߓߊ߯ߙߊ ߘߐ߫ ߡߎ߬ߕߎ߲߬ ߜ߭ߎߜ߭ߎߟ ߡߊߛߐߟߌ ߛߌߟߊ ߝߍ߬ ߒߞߏ ߟߐ߲ߕߊ ߟߎ߬ ߟߊ߫،..
ߒ߬ߓߊ߬ ߣߌ߫ ߥߛߊ߬ߕߊ߫ ߛߐ߬ߘߐ߲߬ ߘߊ߫ ߕߎ߬ߡߊ ߡߍ߲ ߠߊ߫ ߢߐ߲߯ߝߍߓߊ߯ߙߊ ߘߐ߫ ߜ߭ߎߜ߭ߎ߬ߟ ߓߟߏ߫ ߸ ߒߞߏ ߘߌ߫ ߝߙߊ߬ ߞߊ߲ ߕߐ߭ ߟߎ߫ ߞߊ߲߬ ߞߣߍߡߊ߬ ߦߏ߫ ߊߟߎ߫ ߢߊ߫ ߓߍ߫ ߞߣߍߡߕߊ ߏ߬ ߟߎ߬ ߟߊ߫ ߢߊ ߡߍ߲ ߞߊ߲߬ ߣߌ߲߬߸ ߞߵߊ߬ ߕߘߍ߬ ߡߐ߰ ߕߍ߫ ߣߊ߬ ߞߎߡߊ߫ ߛߌ߫ ߘߌ߫ ߡߎ߬ߕߎ߲߬ ߡߍ߲ ߢߐ߲߰ ߕߍ߫ ߊ߬ ߓߟߏ߫ ߊ߬ ߟߊ߫ ߞߊ߲ߞߋ ߞߣߐ߫ ߢߊ ߘߏ߫ ߞߊ߲߬.
ߏ߬ ߢߊߦߌ߬ߘߊ߬ߕߐ ߝߟߍ߫…..
ߞߏ߬ߣߌ߲߬ ߊ߲ ߓߍߣߊ߫ ߖߌ߬ߦߊ߬ߖߟߎ߬ߣߍ߲߫ ߞߍ߫ ߣߌ߲߬ ߞߊ߲߬ ߞߊ߬ ߡߐ߱ ߟߎ߫ ߘߍ߬ߡߍ߲߬ ߊ߬ ߟߊ߫ ߓߊ߯ߙߊ߫ ߢߊ ߟߊ߫ ߣߌ߫ ߊߟߊ߫ ߛߐ߲߬ ߘߊ߫.
ߞߊߟߌߝߐߙߑߣߌ߫ ߖߊ߯ߓߘߊ߫ ߕߊ߫ ߘߟߊߡߌߘߊߟߊ߲ ߡߊ߬ߝߟߍ߬ߕߊ ߝߟߐ ߝߟߍ߫߸ ߡߍ߲ ߓߘߊ߫ ߝߟߐ߫ ߒߞߏ ߣߌ߫ ߊ߲߬ߜ߭ߌߟߋ ߦߟߍ߬ߡߊ߲߬ ߠߊ߫ ߢߐ߲߮ ߘߐ߫߸ ߊ߬ ߣߌ߫ ߞߊ߬ ߓߐ߫ ߝߊ߬ߙߊ߲߬ߛߌ߬ߞߊ߲ ߝߣߊ߫ ߘߐ߫ ߞߊ߬ ߕߊ߯ ߒߞߏ ߘߐ߫߸ ߊ߲ ߧߴߏ߬ ߡߊ߬ߝߟߍ߬ߟߌ ߘߏ߫ ߞߍ߫ ߢߐ߲߮ ߝߍ߬ ߦߊ߲߬ ߦߊߣߌ߲߬ ߓߐߞߏ߫ ߝߌߟߊߣߊ߲ ߕߍ߫ .
ߟߊߓߊ߲ ߘߐ߫: ߛߌߟߊ߫ ߜߘߍ ߕߐ߭ ߡߍ߲ ߠߎ߬ ߡߊ߫ ߓߊ߲߫ ߟߊߓߌ߬ߟߊ߬ ߟߊ߫ ߡߌ߬ߙߌ߲߬ߘߌ ߦߋ߫ ߡߎߣߎ߲߬ ߸ ߏ߬ ߟߎ߬ ߦߴߊ߬ߟߎ߫ ߕߎ߬ߡߊ ߡߊߞߐ߬ߣߐ߲߬ ߣߌ߫ ߊߟߊ߫ ߛߐ߲߬ ߘߊ߫..
ߒ߬ߓߊ߬ ߊߟߎ߫ ߣߌ߫ ߕߘߍ߬ ߞߏ߬ ߢߌߡߊ߫ ߜ߭ߎߜ߭ߎߟ ߡߊߛߐ ߘߐ߫ ߞߵߊ߬ ߟߊߞߐ߯ ߒߞߏ ߟߐ߲ߕߊ ߟߎ߬ ߟߊ߫ ߜߊߟߌߜߊߟߌ߫ ߸ ߛߊ߫ ߒߞߏ ߘߌ߫ ߓߌ߬ߟߊ߬ ߞߣߍߡߊ߬ ߓߍ߯ ߛߊ߬ߥߏ߬ ߘߐ߫ ߸ ߊ߬ ߣߌ߫ ߛߊ߫ ߥߊߟߌ߫ ߟߐ߲ߣߌ߲ ߠߎ߬ ߞߟߏߜߍ ߟߎ߬ ߟߊߦߌ߬ߙߌ߲߬ߘߌ߬ߟߌ ߘߌ߫ ߣߐ߰ߦߴߊ߲ ߡߊ߬ ߞߊߟߌߦߊ߫ ߘߐ߫.
ߊ߲ ߧߴߊߟߎ߫ ߝߏ߬ ߟߊ߫. ߊߟߎ߫ ߣߌ߫ ߖߐ߫.
ߞߊ߬ߙߊ߲߬ߡߐ߯ / ߓߊ߬ߓߊ߫ ߡߊ߬ߡߊߘߌ߫ ߖߊ߰ߣߍ߫
ߒߞߏ ߥߙߎߞߌ ߛߌ߲߬ߝߏ߲߬ߢߊ߬ߟߌ߬ ߖߊ߯ߓߡߊ ߞߊ߲ߕߌ߮/ ߀߈/߂߇/߂߀߂߃
ߛߏ߬ߟߏ ߝߙߊ߬ߓߊ-ߘߐ߫ ߛߌ߬ߛߋ߫