ߒߞߏ ߛߏ߬ߝߊ ߣߌ߫ ߥߎ߬ߦߊ߲߬ߞߟߌ߬ ߥߣߊ ߓߘߴߊ߬ ߟߊ߫

ߒߞߏ ߛߏ߬ߝߊ ߣߌ߫ ߥߎ߬ߦߊ߲߬ߞߟߌ߬ ߥߣߊ ߓߘߴߊ߬ ߟߊ߫
ߞߎߣߎ߲߬ ߛߌ߬ߣߌ߲߬ߟߏ߲ ߀߉/߂߈/߂߀߁߈߸ ߊ߲ ߓߋ߲ߓߊ߫ ߣߴߊ߲ ߝߊ߬ ߣߴߊ߲ ߞߘߐ߬ ߟߊ߰ߖߌ߬ / ߓߊߞߊ߬ߙߌ߫ ߞߊ߬ߓߊ߫ ߛߊ߬ߦߌ߬ ߘߊ߫ ߡߊ߰ߙߌ ߟߊ߫ ߝߙߍ ߘߐ߫،.. ߊ߲ ߧߋ߫ ߡߊ߰ߙߌ߬ߓߊ ߡߊߕߙߊ߫ ߟߊ߫ ߊ߬ ߦߋ߫ ߜߊ߲ߒߞߎ߲ߠߊ߫ ߞߍ߫ ߊ߬ ߦߋ߫ ߞߵߊ߬ ߡߊߞߕߏ߫ ߞߵߊ߬ ߖߌ߰ ߦߙߐ ߢߊ߬߸ ߞߵߊ߬ ߞߐ ߘߐߓߍ߲߬ ߞߵߊ߬ ߢߍ ߘߐߓߍ߲߬ ߞߊ߬ ߛߊ߬ߙߌ ߛߎߡߴߊ߬ ߡߊ߬߸ ߞߵߊ߬ ߕߊ߯ߟߌ ߡߎ߬ߢߎ߲ ߞߎ߲߫ ߒ߬ ߘߐ߫߸ ߊߟߴߊ߬ ߞߍ߫ ߕߋ߲߬.
ߏ߬ ߞߐ߫߸ ߒ ߢߊߖߌߞߎߘߎ߲ߕߐ ߦߋ߫ ߒ ߞߘߐ߬ ߓߊߞߊ߬ߙߌ߫ ߦߌ߬ߘߊ߬ ߟߊ߫ ߓߊߘߋ߲߫ ߒߞߏ ߞߊߙߊ߲ߘߋ߲ ߠߎ߬ ߟߊ߫ ߘߝߊߢߊ߫ ߘߊ߲ߘߐ ߣߌ߲߬ ߘߐ߫߸ ߛߴߊ߬ ߡߙߌߘߐ ߘߴߊ߬ߟߎ߫ ߘߍ߬ߡߍ߲߫ ߊ߬ߟߎ߬ ߟߊ߫ ߝߓߊ߬ߘߋ߲߬ߧߊ ߝߘߏ߬ߞߣߐ߬ߟߊ ߞߘߐߛߊ ߘߐ߫ ߞߵߊ߬ ߞߣߐߝߋ߲ ߠߎ߬ ߞߍ߫ ߖߏߙߏ߲ߕߊ߲߫.
ߏ߬ ߡߊ߬ ߓߊߘߋ߲ ߠߎ߬߸ ߒ ߞߘߐ߬ ߓߊߞߊ߬ߙߌ߬ ߞߍ߫ ߘߊ߫ ߝߓߊ߬ߘߋ߲߬ ߕߜߋ ߟߎ߬ ߘߏ߫ ߟߋ߬ ߘߌ߫ ߡߍ߲ ߢߐ߲߰ ߛߐ߬ߘߐ߲߬ ߜߏߡߊ߲߫ ߡߌ߬ߙߌ߲߬ߘߌ ߟߎ߬ ߢߊߝߍ߬߸ ߊ߬ ߟߊ߫ ߡߞߊ߬ߘߊ߲߬ߠߌ߲ ߛߎ߯ߦߊ ߥߙߍߓߦߊ ߞߏߛߐ߲߬ (ߡߐ߰ߦߊ߬ ߞߎ߲ߠߊ߫߸ ߝߘߊ߬ߝߌ߲߬ߠߊ߬ ߞߎ߲ߠߊ߫߸ ߡߊ߲߬ߘߋ߲߬ ߞߎ߲ߠߊ߫߸ ߊ߬ ߣߌ߫ ߤߊߟߌ߬ ߒߞߏ ߞߎ߲ߠߊ߫).
ߊ߬ߟߋ ߟߋ߬ ߞߍ߫ ߘߊ߫ ߒߞߏ ߥߎ߬ߦߊ߲߬ߞߟߌ߬ߟߊ ߝߟߐߝߟߐ ߘߌ߫ ߝߏߘߋ߫ ߛߟߏ߬ߡߊ߯ߣߊ߫ ߣߊ߬ߒ߬ߞߊߡߊ߭ ߞߐ߫ (ߊߟߊ߫ ߤߌߣߴߊ߬ߟߎ߬ ߟߊ߫)، ߊ߬ ߡߊ߫ ߘߌ߬ߢߍ߫ ߊ߬ ߖߘߍ߬ ߦߋ߫ ߏ߬ ߟߋ ߘߐ߫ ߞߊ߬ ߝߙߍ ߞߊ߬ߣߌ߲߬ ߘߎߢߊߘߐߕߍ߮ ߓߊ߯ߙߊ ߟߎ߫ ߝߍ߬ ߊ߬ ߡߙߌߘߐ ߟߎ߬ ߛߓߍߓߊߟߌߦߊ ߘߐ߫ ߓߟߏߞߘߐߜߊ ߕߐ߯ߘߐ߫، ߍ߲߬ߍ߲߫߸ ߊ߬ ߞߵߊ߬ ߡߙߌߘߐ ߟߊߛߋ߫ ߊ߬ ߞߎߡߢߊ ߣߴߊ߬ ߓߊ߯ߙߢߊ ߣߴߊ߬ ߟߊ߫ ߞߏ߫ ߟߊߕߊ߯ߡߢߊ ߘߐ߫ ߟߋ߬ ߡߎߣߎ߲߬ ߊ߬ ߘߎߢߊߘߐߕߍ߯ߢߐ߮ ߟߎ߬ ߦߋ߫.
ߝߣߊ߫߸ ߓߊߏ߬ ߊ߬ ߞߵߊ߬ ߟߐ߲߫ ߞߏ߫ ߡߐ߰ ߕߴߛߋ߫ ߞߍ߫ ߟߊ߫ ߝߎ߯ߝߊ߯ ߞߎߟߎ߲ߞߎߟߎ߲ߠߊ߫ ߘߌ߫ ߡߍ߲ ߦߴߊ߬ ߛߋ߲߬ߘߐ߫ ߝߊ߲߭ ߓߍ߯ ߝߍ߬ ߢߊߞߎߙߊߢߊߞߎߙߊ߫ ߞߵߊ߬ ߡߙߌߣߊ߲ ߟߊߛߋ߲߫ ߝߊ߲߬ߓߍ߯߸ ߊ߬ ߞߊ߬ ߞߊ߬ߟߊ ߕߊ߬ ߏ߬ ߟߋ ߘߐ߫ ߞߵߊ߬ ߡߙߌߘߐ ߟߎ߬ ߜߊ߲ߜߊ߲߫ ߘߎߢߊ߫ ߘߐ߫ ߡߐ߮ ߟߎ߬ ߦߋ߫ ߛߓߍߝߌߘߊ ߞߊ߲߬߸ ߏ߬ ߡߍ߲ ߣߊ߬ߕߐ߫ ߟߊߖߍ߲ߛߍ߲߫ ߠߊ߫ ߞߊ߬ ߞߎߟߎ߲ߞߎߟߎ߲߫ ߘߎߢߊ߫ ߢߊߝߍ߬ ߊ߬ ߣߌ߫ ߊ߬ ߡߌ߬ߙߌ߲߬ߘߌ߬ߢߐ߲߯ ߞߏ߫ ߟߛߊߟߊ ߟߎ߫ ߛߣߐ߬ߡߍ ߟߎ߬ ߘߐ߫ ߛߊ߲߭ ߠߎ߬ ߣߌ߫ ߝߊ߯ߘߐߞߍ ߟߎ߬ ߞߣߐ߫߸ ߊ߬ ߟߊ߫ ߞߝߊ߬ ߛߓߍߦߊߣߍ߲ ߠߎ߬ ߦߋ߫ ߏ߬ ߦߌ߬ߘߊ߬ߟߊ߲ ߘߌ߫ ߊ߬ ߞߊ߬ ߡߍ߲ ߠߎ߬ ߓߟߏ-ߟߊ-ߛߓߍߟߌ ߟߊߣߊ߬ ߒߠߋ ߞߊ߬ߙߊ߲߬ߡߐ߯/ ߓߊ߬ߓߊ߫ ߡߊ߬ߡߊߘߌ߫ ߖߊ߰ߣߍ߫ ߖߍ߬ߘߍ ߡߊ߬߸ ߞߵߊ߬ ߛߓߍ߫ ߣߍ߭ ߟߊ߫ ߒߞߏ ߟߊߢߎߡߍߙߋ߲ߦߊ ߕߎ߬ߡߊ߬ ߖߏߣߊ ߕߍߡߟߊ ߞߣߐ߫߸ ߞߵߊ߬ ߟߊߖߍ߲ߛߍ߲߫ ߦߏ߫ ߊ߬ ߦߟߌ߫ ߕߘߍ߬ ߊ߬ ߡߊ߬ ߢߊ ߡߍ߲.
ߛߟߊߕߌ߮ ߣߴߊ߲ ߞߘߐ߬ ߣߴߊ߲ ߞߊ߬ߙߊ߲߬ߡߐ߰ ߓߊߞߊ߬ߙߌ߫ ߞߊ߬ߓߊ߫ ߞߊ߬ ߥߎ߬ߦߊ߲߬ߞߌ߬ߟߌ ߥߓߊ߬ߞߏ߬ߞߍ ߟߋ߬ ߞߍ߫ ߏ߬ ߟߎ߬ ߛߓߍߦߊ ߘߐ߫ ߘߊߞߎ߲߫ ߛߌߦߊߡߊ߲߫ ߘߐ߫ ߘߋ߬߸ ߝߏ߫ ߞߊ߬ ߕߊ߯ ߊ߬ ߛߌ߰ ߡߊ߲߬ߘߋ߲߬ ߖߡߊߣߊ ߓߌ߬ߓߌ߭ ߟߎ߫ ߥߎ߬ߦߊ ߟߊ߫ ߞߵߊ߬ ߘߓߍ߫ ߊ߬ ߢߊߞߘߐ ߛߌ߲ߞߐ߲ ߡߊ߬ ߞߵߏ߬ ߕߐ߮ ߞߍ߫ ߞߏ߫ “ߥߊ߲߬ߞߙߊ߬ߘߎ߯ ߖߡߊ߬ߣߊ߬ߓߊ”، ߤߊ߲߫߸ ߦߊ߬ߣߌ߲߫ ߓߌ߬ ߖߐ߲߬ ߖߡߊ߬ߣߊ߬ ߞߘߐ߬ ߞߏߋߞߏߋ߫ ߕߊ߲߫ ߣߌ߫ ߞߐ ߢߌ߲߬ ߠߎ߫ ߕߋ߬ ߕߍ߫ ߞߵߊ߬ ߞߍ߫ ߒ ߞߘߐ߬ ߓߊߞߊ߬ߙߌ߬ ߟߊ߫ ߖߡߊ߬ߣߊ߫ ߟߊߝߐߣߍ߲ ߘߌ߫ ߦߏ߫ ߊ߬ ߦߋ߫ ߞߊ߬ߝߊ ߣߌ߲߬ ߞߣߐ߫ ߢߊ ߡߍ߲߸ ߓߌ߬ߓߌ߭ ߥߎ߬ߦߊ߬ߞߟߌ߬ߟߊ ߟߎ߫ ߖߍ߬ߘߍ ߓߎ ߘߴߊ߬ ߟߐ߲߫ ߝߊ߲߬ߞߊ ߡߍ߲ ߕߎ߲߬ ߦߴߊ߬ ߡߙߌߘߐ ߟߎ߬ ߟߊ߫، ߡߙߌߘߐ ߏ߬ ߟߋ ߘߏ߲߬ ߦߋ߫ ߟߊߞߎߣߎ߲ ߞߊ߲߬ ߘߋ߲ߡߌߛߍ߲ ߠߎ߫ ߝߊ߬ߘߌ ߘߐ߫ ߓߌ߲߬ ߕߋ߲߬ߕߋ߲߬ ߞߣߍ-ߞߣߍ߫ ߘߌ߫ ߓߐ߫߸ ߝߏ߫ ߡߊ߲߬ߘߋ߲߬ ߞߏ߬ ߞߎߡߊ ߓߘߊ߫ ߟߊ߫ ߘߐߡߌ߬ߣߊ߫ ߖߐ߲߬ߖߡߊߣߊ ߢߌ߲߬ ߠߎ߫ ߞߊ߲߬ ߞߏ߫: ߡߊ߲߬ߘߋ߫ ߖߌ߬ߣߍ߫߸ ߡߊ߲߬ߘߋ߲߫ ߡߊ߬ߟߌ߫߸ ߡߊ߲߬ߘߋ߲߫ ߞߊ߬ߘߌ߬ߛߊ߬ߦߊ߫߸ ߊ߬ ߣߌ߫..
ߊ߬ ߟߊ߫ ߓߊߖߎߟߞߊߦߊ ߟߊߝߊ߬ߛߊ ߟߋ߬ ߞߏߛߐ߲߬ ߣߊߣߌ߬ߡߎ߲߫ ߞߏ ߟߎ߬ ߣߌ߫ ߡߌ߬ߙߌ߲߬ߘߌ ߛߌߟߊߞߘߐ ߟߎ߫ ߓߌ߬ߟߊ߬ߓߊߟߌߦߊ ߣߌ߫ ߞߘߐ߬ߡߊ߲߬ ߟߊ߬ߝߛߊ ߘߌ߫߸ ߊ߬ ߣߌ߫ ߞߎߘߊ ߟߎ߬ ߜߘߌߛߌ߱ ߞߘߐ ߟߎ߫ ߞߊ߲߬ ߞߘߐ ߏ߬ ߟߎ߬ ߛߌ߲ߞߐ߲ ߘߌ߫ ߦߋ߫ ߢߊ ߡߍ߲ ߟߊ߬ߞߎ߬ߘߦߊ߬ߟߌ ߞߎ߲߬ߕߊ߮ ߞߣߐ߬ ߞߵߊ߬ ߟߊߛߊ߬߸ ߊ߬ ߡߴߊ߬ ߡߊ߰ߦߊ߬ ߤߊߟߵߊ߬ ߕߟߋ߬ߘߐ߬ߞߏ ߟߎ߬ ߡߊߦߟߍ߬ߡߊ߲ ߦߋ߫ ߛߋ߲߬ߧߊ߬ ߞߋߟߋ߲߫ ߞߵߊ߬ ߛߋ߫ ߕߏ߫ ߊ߬ ߘߐ߫.
ߏ߬ ߟߋ ߞߵߊ߬ ߟߐ߬ ߊ߬ ߓߊ߲߬ ߠߊ߫ ߤߊߟߌ߬ ߒߞߏ ߛߓߍߟߌ ߞߍߢߊ߫ ߞߎߘߊ ߟߎ߬ ߣߌ߫ ߛߓߍߟߌ ߞߎ߬ߙߎ߲߬ߘߎ߬ ߡߌ߬ߛߍ߲߬ ߞߎߘߊ ߘߏ߫ ߟߎ߫ ߘߐ߫ ߝߊߦߌ߲߫߸ ߓߊߏ߬ ߞߏ߫ ߘߋ߬ߙߌ߬ ߓߘߊ߫ ߞߍ߫ ߞߘߐ߬ߡߊ߲ ߠߊ߫߸ ߏ߬ ߡߊ߫ ߕߊ߬ ߖߎ߯ߦߊ߫ ߡߊ߬ ߘߋ߬߸ ߞߏ߬ߣߌ߲߬ ߊ߬ ߣߊ߬ ߛߌߟߊߞߘߐ ߟߋ߬ ߦߋ߫ ߟߴߊ߬ ߢߊߓߘߍ ߘߌ߫، ߡߍ߲ ߦߋ߫ ߏ߬ ߦߌ߬ߘߊ߬ߟߊ߲ ߘߌ߫߸ ߊ߬ ߞߊ߬ ߒߠߋ ߓߊ߬ߓߊ߫ ߖߍ߬ߘߍ ߡߊߛߊ߬ߙߴߊ߬ ߟߊ߫ ߞߊ߬ߝߊ ߟߎ߬ ߓߊߦߟߍߡߊ߲ ߘߐ߫߸ ߞߏ߫ ߞߵߊ߬ ߞߍ߫ ߖߐ߲ ߦߏ߫ ߊ߬ ߣߵߊ߬ ߞߍ߫ ߟߊ߫ ߢߊ ߡߍ߲ ߞߊ߲߬߸ ߞߎ߲߬ߞߎ߬ߘߎ߲߬ ߛߓߍߘߋ߲߫ ߟ ߣߌ߫ ߦ ߛߌ߫ ߞߣߊ߫ ߡߊߦߟߍ߬ߡߊ߲߫ ߞߊ߲ߠߊߘߌߦߊߟߊ߲ ߦߋ߫، ߒ߬ߞߊ߬ ߝߏ߫ ߞߐߟߋ߲ ߠߊ߫߸ ߣߴߊ߬ ߞߵߏ߬ ߟߎ߬ ߦߋ߫ ߞߵߊ߬ ߕߏ߫ ߦߋ߲߬.
ߒ߬ߓߊ߬ ߊߟߊߡߴߊ߬ ߡߙߌߘߐ ߣߴߊ߬ ߤߊߞߟߌߟߊ ߟߎ߬ ߓߐ߫ ߘߴߊ߲ ߧߋ߫߸ ߞߵߊ߲ ߞߍ߫ ߒ߬ ߖߘߍ߬ ߣߌ߫ ߒ߬ ߝߊ߬ߓߘߊ ߣߴߊ߲ ߡߌ߬ߙߌ߲߬ߘߌ ߣߴߊ߲ ߠߊ߫ ߜߙߋ ߟߊߝߛߊ߬ߓߊ߯ ߘߌ߫ ߊ߬ ߕߊ߫ ߝߓߊ߬ߘߋ߲߬ߧߊ ߛߞߊߣߌ߲ ߠߊ߫߸ ߖߐ߲߬ߛߴߊ߲ ߠߊ߫ ߛߏߡߐ߯ߦߊ ߞߟߏ ߣߴߊ߬ ߘߐ߬ߞߌߛߍ ߘߌ߫ ߕߏ߫ ߊ߲ ߘߐ߫ ߘߎߢߊ߫ ߞߎ߲߬ߕߊ߮ ߝߍ߬߸ ߡߍ߲ ߘߌ߫ ߣߊ߬ߒ߬ߞߡߊ߬ ߞߎߘߊ߫ ߟߎ߫ ߡߏߦߌ߫ ߡߌ߬ߙߌ߲߬ߘߌ ߦߋ߫߸ ߞߊ߬ ߕߊ߬ߡߌ߲߬ ߥߊ߰ߘߎ߯ ߛߌ߬ߛߋ߬ ߞߊ߯ߦߊ߫ ߡߊ߲ߛߊ ߟߎ߬ ߣߌ߫ ߛߏ߬ߛߏ߬ ߛߎߓߊ߯ ߞߌ߲߬ߞߌ߲ ߠߎ߬ ߟߊ߫߸ ߊ߬ ߣߌ߫ ߡߊ߲߬ߘߋ߲߬ ߡߊ߲ߛߊ ߟߎ߬ ߣߌ߫ ߓߊߡߊߣߊ߲ߠߊ߫ ߕߊ ߟߎ߬ ߟߊ߫߸ ߊ߬ ߣߌ߫ ߞߊ߬ ߕߊ߬ߡߌ߲߫ ߡߊ߲߬ߘߋ߫ ߝߊ߲߰ߡߊ߬ ߟߊ߬ߓߊ߲ ߛߊ߬ߡߘߎ߬ߜߍ߫ ߣߌ߫ ߖߛߎ߬ߟߊ߬ߕߍ߯ ߡߟߍ߬ߞߊ߫ ߛߋߞߎ߫ ߕߎ߬ߙߋ߬ ߣߌ߫ ߡߏߘߌߓߐ߬ ߟߎ߫ ߞߊ߲߬߸ ߊ߬ ߣߌ߫ ߞߊ߬ ߘߋ߲߫ ߠߎ߫ ߥߟߏ߫ ߥߎ߬ߦߊ߲߬ߞߌ߬ߟߌ ߞߐߝߟߌ ߘߌ߫ ߡߍ߲ ߘߌ߫ ߣߊ߬ߒߞߡߊ ߛߟߏ߬ߡߣߊ߬ ߞߊ߲ߕߍ߫ ߛߌߦߊߡߊ߲ ߡߏߦߌ߫ ߡߊ߲߬ߘߋ߲߬ ߡߌߙߌ߲ߘߌ ߦߋ߫ ߊ߬ ߣߌ߫ ߞߓߊ߬ߞߍ ߖߍ߬ߘߍ ߢߐ߲߰ ߥߙߍ߬ߓߊ. ߊߟߴߊ߬ ߞߍ߫ ߕߋ߲߬ ߊߟߴߊ߬ ߞߍ߫ ߕߋ߲߬.
ߏ߬ ߞߐ߫߸ ߊ߬ ߟߊ߫ ߞߝߊ߬ ߥߐ߯ߙߐ ߓߍ߯ ߣߍ߰ ߟߊ߬ ߛߓߍߟߌ ߦߴߊ߲ ߓߟߏ߫ ߡߎߣߎ߲߬߸ ߊ߬ ߢߎߡߍߙߋ߲ߡߊ ߞߊ߬ߣߌ߲߫، ߊ߲ ߧߴߊ߬ ߢߌߣߌ߲߫ ߠߊ߫ ߓߊߘߋ߲ ߓߍ߯ ߝߍ߬ ߞߊߕߙߍ߬ߕߍ߫ ߞߓߊ߬ߟߊ߬ߞߊ ߟߎ߫ ߡߊ߬߸ ߞߊ߬ߝߊ ߢߌ߲߬ ߠߎ߬ ߟߊߖߍ߲ߛߍ߲ߓߊߟߌ ߞߊߣߊ߬ ߕߏ߫ ߊ߬ ߣߊ߲߬ߝߟߏ߬ߦߊ߬ߞߏ ߟߊ߫ ߡߎ߬ߕߎ߲߫ ߡߎ߰ߡߍ߫߸ ߛߴߊ߬ ߘߌ߫ ߘߍ߬ߡߍ߲߬ ߞߎߘߊ߫ ߞߍ߫ ߒ߬ ߡߌ߬ߙߌ߲߬ߘߌ ߟߊߞߎߣߎ߲ ߘߐ߫ ߞߊ߬ ߟߊߝߐߟߌ ߟߎ߬ ߞߍߟߌ ߞߍ߫ ߜߍߘߐߞߏ ߘߌ߫ ߛߎߋ߫.ߊߟߎ߫ ߣߌ߫ ߖߐ߫.
ߞߊ߬ߙߊ߲߬ߡߐ߯ ߓߊ߬ߓߊ߫ ߡߊ߬ߡߊߘߌ߫ ߖߊ߰ߣߍ߫.