ߦߏ߫ ߊߟߎ߫ ߦߴߊ߬ߞߊ߬ߟߊߡߊ ߢߊ ߡߍ߲ ߞߏ߫ ߞߙߎ߬ߞߊ߲߬ߝߎߥߊ߫ ߜߊ߬ߙߊ ߦߴߌ ߘߐ߫ ߞߎ߬ߢߐ߲߮ ߣߌ߲߬ ߡߊ߬، ߏ߬ ߘߏ߲߬ ߓߊ߯ߞߍ߫ ߞߍ߫ ߟߊ߫ ߕߎ߬ߡߊ߬ ߛߌ߫، ߊ߬ ߦߋ߫ ߛߋ߲ߛߋߘߋ߲߫ ߠߋ߬ ߘߌ߫ ߕߐ߲߫ ߖߊ߯ߓߡߊ ߡߊ߬، ߞߵߊ߬ ߢߣߊߓߊ߯ߦߊ߫، ߣߴߊ߬ ߡߊ߫ ߢߊ߬ ߞߏ ߟߎ߬ ߟߊߝߘߏ߬ߓߊ߬ߦߊ ߡߙߌߦߊ ߕߊ߭ ߞߐ߫ ߕߐ߲߫ ߖߊ߯ߓߡߊ ߓߟߏ߫ ߞߊ߬ߦߌ߯ ߊ߬ ߛߌ߲ߘߌ߫ ߕߎߡߊ߫ ߖߏߣߊ ߟߊ߫߸ ߏ߬ ߟߋ ߞߏߛߐ߲߬، ߕߐ߲߫ ߖߊ߯ߓߡߊ ߞߏߟߊߕߍ߯ߘߊ ߞߵߊ߬ ߓߟߏߝߘߊ߫ ߕߐ߲ ߖߍ߬ߘߍ ߞߊ߲ߕߌ߯ ߛߙߍߞߍ߫ ߝߟߐ ߟߊ߫، ߣߊߟߌߡߎ߲߫ ߞߙߊ߬ߡߐ߯ ߡߊ߬ߘߎ߬ߓߊ߫ ߖߙߊ߬ ߘߌ߫߸ ߏ߬ ߡߍ߲ ߡߊߞߍߣߍ߲߫ ߞߎ߬ߗߟߊ߫ ߞߊ߬ߣߌ߲߬، ߦߋ߲߬ ߣߌ߫ ߓߡߊ߬ߞߐ߫ ߝߏ߬ߣߊ߲ ߦߋ߫ ߞߎߘߍ߫ ߄߀߀ ߢߐ߲߰ ߠߋ߬ ߘߌ߫߸ ߏ߬ ߟߊ߫ ߘߊ߲߬ߕߍ߰ߟߌ ߞߎ߲߬ߝߟߐ ߝߟߍ߫ ߣߌ߲߬:
ߞߙߎ߬ߞߊ߲߬ߝߎߞߊ߫ ߟߊߞߎߣߎ߲ ߖߊ߲߬ߖߏ߲ ߞߐߣߐ߲ߞߎ߲ߓߊߘߏ߲ ߠߎ߬߸ ߊߟߎ߫ ߣߌ߫ ߕߎ߬ߡߊ߬ ߒߞߏ߫ ߘߏ߲߬ߞߏ ߟߎ߬߸ ߒ߬ ߧߋ߫ ߞߙߎ߬ߞߊ߲߬ߝߎߥߊ߫ ߟߊߞߎߣߎ߲߫ ߓߊ߯ߙߊ ߟߎ߬ ߞߊ߲߬ ߛߌ߬ߓߌ߫. ߞߊ߬ߦߌ߯ ߞߎߣߎ߲߬ ߣߍߣߍߓߊ ߕߟߋ߬ ߝߟߐ ߒ߬ ߓߐ߫ ߘߊ߫ ߓߡߊ߬ߞߐ߫ ߕߎ߬ߡߊ߬ߙߋ߲߬ ߁߄ ߟߊ߫ ߞߵߊ߲ ߞߎ߲߬ ߟߊ߫ ߛߌ߬ߓߌ߫ ߞߊ߲߬ ߸ ߊ߲ ߛߋ߫ ߘߊ߫ ߦߋ߲߬ ߞߊ߬ ߓߍ߲߬ ߝߌ߬ߕߙߌ߬ ߡߊߜߍ߲ ߠߋ߬ ߡߊ߬ ߸
ߊ߲ ߖߌ߰ߦߊ߬ ߘߊ߫ ߖߌ߰ߦߊߓߏ߲߫ ߞߡߊ߬ߖߊ߲߫ ߠߋ߬ ߟߊ߫، ߞߙߎ߬ߞߊ߲߬ߝߎߞߊ߫ ߜߊ߬ߙߊ ߟߊߞߎߣߎ߲ ߞߎ߲߬ߓߍ߲ ߢߍߥߟߊ ߛߌ߬ߣߌ߬ߟߏ߲ ߕߎ߬ߡߊ߬ߙߋ߲߬ ߁߂ ߕߎߡߊ، ߥߟߌߟߌ ߓߡߊ߬ߞߐ߫ ߞߊ߬ ߕߊ߯ ߛߌ߬ߓߌ߫߸ ߕߎ߬ߡߊ߬ߙߋ߲߬ ߂߁: ߀߀ ߞߏߡߊߢߊ߮ ߟߎ߬ ߣߌ߫ ߞߙߎ߬ߞߊ߲߬ߝߎߞߊ߫ ߜߊ߬ߙߊ ߟߊ߬ߞߎ߬ߣߎ߲߬ߠߌ ߛߌ߲߬ߝߏ߲߬ߕߐ߲ ߠߎ߬ ߟߊ߫ ߘߊ߲߬ߕߍ߰ߟߌ ߟߎ߬߸ ߞߍ߲ߘߍߟߏ߲/ ߕߎ߬ߡߊ߬ߙߋ߲߬ ߈ :߀߀ ߟߐ߯ߓߊߟߐ، ߕߎ߬ߡߊ߬ߙߋ߲߬ ߁߆ ߡ ߀߀-߁߉:ߡ߀߀ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߝߘߏ߬ߓߊ߬ ߕߏ߲ߜߏ، ߁߉:ߡ߀߀ ߘߏ߲߬ߛߏ߬ ߢߣߊߜߍ. ߞߊߙߌߟߏ߲ : ߕߎ߬ߡߊ߬ߙߋ߲߬ ߉: ߡ߀߀ ߥߟߌߟߌ ߞߊ߬ ߓߐ߫ ߛߌ߬ߓߌ߫ ߞߊ߬ ߥߊ߫ ߞߊ߯ߓߊ߫ ، ߕߎ߬ߡߊ߬ߙߋ߲߬ ߁߂: ߡ ߀߀ ߞߵߊ߬ ߛߌ߰ ߁߄: ߡ߀߀ ߡߊ߲߬ߘߋ߲߫ ߖߏ߲߬ߖߏ߲ ߢߊߝߐߟߌ ߣߴߊ߬ ߟߊߦߟߍ߬ߟߌ/ߒߞߏ ߝߟߊߓߊ ߘߟߊߞߊ߬ߟߌ ߣߌ߫ ߖߊ߲߬ߖߏ߲ ߞߎ߲߬ߝߊ߰ߟߌ ߓߋߟߋ߲ߠߊ/ ߖߏ߲߬ߖߏ߲ ߟߊ߬ߖߌ߰ߟߌ ߣߌ߫ ߞߊ߯ߓߊߟߏߟߏ߲ ߞߎ߲ߝߊ߲ߓߐߟߌ.
ߢߐߢߐߟߌ ߟߎ߬ ߞߐ߫ ߟߋ߬ ߞߍ߫ ߘߊ߫ ߢߊ߰ߢߊ߮ ߘߊߡߌ߬ߣߊ ߣߌ߫ ߝߊ߬ߥߏ߬ߟߊ߬ߓߐ ߟߎ߬ ߘߌ߫߸ ߏ߬ ߟߎ߬ ߡߍ߲ ߠߎ߫ ߞߊ߬ ߡߐ߱ ߟߎ߬ ߟߊߦߟߍ ߣߌ߫ ߕߏߟߏ߲ߛߐ߬ߓߍ ߟߎ߬ ߘߌ߫. ߊ߬ߟߎ߬ ߦߋ߫ ߕߏߟߏ߲ ߠߋ߬ ߞߊ߲߬ ߝߊ߯ߛߌ߫ ، ߞߏ߬ߣߌ߲߬ ߞߎߡߊ߫ ߓߘߍߓߘߍ ߟߋ߬ ߓߐ߫ ߟߴߊ߬ߟߎ߬ ߘߊ߫، ߥߊ߬ ߸ ߞߎߡߊ ߟߎ߬ ߓߎ߲ߓߎ߲ߣߍ߲߫ ߕߘߍ߬ ߒߞߏ߫ ߞߊߙߊ߲ ߣߌ߫ ߞߙߎ߬ߞߊ߲߬ߝߎߥߊ߫ ߜߊ߬ߙߊ ߣߌ߫ ߡߊ߲߬ߘߋ߲߬ ߠߊ߫ ߞߍߞߋߟߋ߲ߘߌ ߟߋ߬ ߞߊ߲߬، ߊ߬ ߣߌ߫ ߞߏ߫ ߡߍ߲ ߠߎ߬ ߦߋ߫ ߞߍ߫ ߟߊ߫ ߒ߬ ߠߊ߫ ߓߐߕߏ߲ ߠߎ߬ ߟߊ߫ ߸ ߏ߬ ߘߏ߫ ߟߋ߬ ߕߘߍ߬ ߞߏ߫: ߝߊ߬ߡߊ ߟߎ߫ ߞߊ߬ ߡߐ߰ ߛߊ߬ߓߊ߫ ߟߋ߬ ߦߋ߫ ߓߐߕߏ߲ ߠߊ߫ ߦߏ߫ ߊ߬ߟߎ߫ ߘߋ߬ߙߌ߬ߟߋ߲߫ ߊ߬ ߞߍ߫ ߟߊ߫ ߢߊ ߡߍ߲ ߸ ߞߊ߬ ߡߐ߱ ߟߊߕߊ߬ߡߌ߲߬ ߞߋߟߋ߲ߞߋߟߋ߲߫ ߸ ߊ߬ߟߎ߫ ߞߊ߬ ߡߐ߰ ߝߟߐ ߡߍ߲ ߡߊߢߌ߬ߣߌ߲߬ߞߊ߬ ߞߏ߫ ߡߊߙߌߦߊߡߎ߲߫ ߕߙߊߥߟߋ߫߸ ߏ߬ ߞߍ߫ ߘߊ߫ ߡߊ߬ߟߌ߬ߞߊ ߟߋ߬ ߘߌ߫، ߊ߬ߟߎ߬ ߞߊ߲߫ ߞߵߏ߬ ߦߋ߫ ߛߍߝߺߺߺߊ߫ ߄߀߀ ߛߙߊ߬ ߸ ߏ߬ ߞߊ߲߫ ߞߏ߫ ߥߊߘߌ߫ ߕߴߊ߬ߟߋ ߓߟߏ߫ ߞߴ ߊ߬ ߣߊ߬ߕߐ߫ ߞߙߎ߬ߞߊ߲߬ߝߎߞߊ߫ ߜߊ߬ߙߊ ߟߊߞߎߣߎ߲ߠߌ ߞߣߍ ߟߋ߬ ߞߊ߲߬.
ߝߌߟߊߣߺߊ߲ ߞߍ߫ ߘߊ߫ ߖߌ߬ߣߍ߬ߞߊ ߟߋ߬ ߘߌ߫،ߊ߬ ߕߐ߯ ߞߏ߫ ߊߛߕߊ߫ ߕߙߊߥߟߋ߫، ߊ߬ߟߎ߬ ߞߊ߲߫ ߏ߬ ߡߊ߬ ߞߴߏ߬ ߞߍߕߐ߫ ߛߍߝߊ ߁߂߀߀ ߟߋ߬ ߛߙߊ߬. ߛߓߊߣߊ߲ ߏ߬ ߞߍ߫ ߘߊ߫ ߓߙߎߞߌߣߞߊ ߟߋ߬ ߘߌ߫، ߞߏ߫ ߊߓߎߓߞߊߙߌ߫ ߕߙߊߥߟߋ߫، ߖߊ߰ ߸ ߏ߬ ߝߣߊ߫ ߞߊ߫ ߖߎ߯ ߞߊ߬ ߕߊ߬ߡߌ߲߬ ߡߍ߲ ߠߎ߬ ߣߙߊߣߍ߲߫ ߢߐ߲߮ ߠߊ߫ ߘߌ߫. ߏ߬ ߕߊ ߛߋ߫ ߘߊ߫ ߛߍߝߊ ߂߀߀߀ ߘߐ߫߸ ߡߎ߲߬ ߞߊ߬ ߡߐ߱ ߟߎ߬ ߞߣߐߘߐ߫ ߓߊ߲߫ ߸ ߏ߬ ߟߋ߬ ߞߍ߫ ߘߊ߫ ߢߌ߲߬ ߠߎ߬ ߓߍ߯ ߞߍ ߘߌ߫ ߕߙߊߥߟߋ ߟߎ߬ ߘߌ߫. ߓߐߕߏ߲ߠߊߡߐ߮ ߟߎ߬ ߡߊ߫ ߛߋ߫ ߣߌ߲߬ ߢߊߦߋ߫ ߟߊ߫.
ߝߊ߬ߥߏ߬ߟߊ߬ߓߐ߬ߟߊ ߟߎ߫ ߞߊ߬ ߛߎ߯ ߛߌߦߊߡߊ߲߫ ߠߋ߬ ߦߌ߬ߘߊߞߊ߬ ߖߊ߬ߡߊ ߟߊ߫߸ ߏ߬ ߞߐ߫߸ ߡߤߊ߬ߡߎ߯ߘ ߛߊ߲ߞߊߙߋ߫ ߞߊ߬ ߞߎߡߊ ߕߊ߬ ߞߊ߬ ߞߎߡߊ߫ ߛߌߦߊߡߊ߲߫ ߝߐ߫. ߡߍ߲ ߠߎ߬ ߓߍ߯ ߟߊߞߎ߲߬ߘߎ߬ߣߍ߲߫ ߒ ߓߟߏ߫ ߡߍ߲ߞߊ߲߫ ߝߊߘߌ ߘߐ߫߸ ߣߴߊߟߊ߫ ߛߐ߲߬ ߘߊ߫ ߒ ߘߌߣߵߊ߬ ߞߎߡߊ ߣߌ߲߬ ߓߍ߯ ߛߓߍ߫ ߞߵߊ߬ߟߎ߬ ߟߊߦߟߍ߬ ߛߴߊ߬ ߞߎ߲ߝߊ߲ ߞߊߣߊ߬ ߕߏ߫ ߡߐ߰ ߛߌ߫ ߟߊ߫߸ ߏ߬ ߞߐ߫ ߸ ߞߙߎ߬ߞߊ߲߬ߝߎߞߊ߫ ߜߊ߬ߙߊ ߟߊ߬ߞߎ߬ߣߎ߲߬ߠߌ ߛߌ߲߬ߝߏ߲߬ߕߐ߲ ߠߎ߬ ߟߊ߫ ߘߊ߲߬ߕߍ߰ߟߌ ߟߎ߫ ߟߋ߬ ߕߎ߲߬ ߞߊ߫ ߞߊ߲߫ ߞߊ߬ ߕߎ߲߰ ߣߌ߲߬ ߠߊ߫ ߸ ߏ߬ ߞߏ߬ߣߌ߲߬ ߡߊ߫ ߛߋ߫ ߞߍ߫ ߟߊ߫ ߕߎ߬ߡߊ ߞߏߙߏ߲ ߞߏߛߐ߲߬، ߏ߬ ߕߏ߫ ߘߊ߫ ߘߎ߰ߛߊ߬ߜߍ ߟߋ߬ ߟߊ߫߸ ߂߃ߙߋ߲ ߡ ߄߀. ߏ߬ ߞߍ߫ ߘߴߏ߬ ߞߎ߲߬ߘߏ߲߬ߟߋ߲ ߘߌ߫.
ߏ߬ ߘߎ߰ߛߊ߬ߜߍ ߞߍ߲ߘߍߟߏ߲ ߛߐ߰ߡߊ߬ߘߊ ߞߍ߫ ߘߊ߫ ߟߐ߯ߓߊߟߐ ߟߋ߬ ߘߌ߫ ߸ ߞߊ߬ߝߊ ߟߎ߬، ߓߊߛߌ ߟߎ߬ ߣߌ߫ ߝߊ߰ߣߌ߲ ߠߎ߬، ߊ߬ ߣߌ߫ ߘߊߡߎ߲ߠߌ߲ ߝߋ߲ ߘߏ߫ ߟߎ߫، ߦߏ߫ ߛߌ߬ߘߊ߬-ߓߐ߲ߓߐ߲ ߠߎ߬، ߛߏ߬ߛߏ߫ ߞߊ߬ߟߊ ߟߎ߬߸ ߏ߬ ߟߎ߬ ߕߟߎߒߡߊ ߟߋ߬، ߞߵߊ߬ ߛߎ߬ߛߊ߬ ߝߊ߬ߘߌ ߟߎ߫ ߡߊ߬߸ ߊ߰ ߕߎ߬ߡߊ߬ߙߋ߲߫ ߈ ߠߋ߬ ߞߍ߫ ߟߊ߫ ߛߏ߬ߛߏ ߕߍ߫ ߛߎߛߍ߫ ߟߊ߫ ߡߊ߬ߘߏ߲߬ ߠߴߌ ߟߊ߫.
ߊ߲ ߡߙߌ ߕߎ߲߬ ߓߍ߫ ߞߏ߫ ߘߊ߲߬ߕߍ߰ߟߌ ߣߌ߲߬ ߓߍߣߊ߬ ߝߘߏ߬ߓߊ߬ߦߊ߫ ߞߵߊ߬ ߞߍ߫ ߖߊ߬ߡߊ ߢߣߊ߸ ߏ߬ ߡߊߣߊ߬ ߞߍ߫ ߸ ߊ߬ߟߎ߫ ߞߵߊ߬ ߞߍ߫ ߘߊ߲߬ߕߍ߰ߟߌ ߞߙߍߞߙߍߣߍ߲ ߠߋ߬ ߘߌ߫߸ ߖߊ߬ߡߊ ߓߍ߯ ߡߊ߫ ߕߘߍ߬ ߡߍ߲ ߘߐ߫ ߝߏ߫ ߞߙߎ߬ߞߊ߲߬ߝߎߞߊ߫ ߟߊߞߎߣߎ߲ ߛߌ߲߬ߝߏ߲߬ߕߐ߲ ߡߐ߰ ߝߌ߬ߟߊ߬-ߝߌ߬ߟߊ߬.
ߋ߯ ߣߌ߲߬ ߞߍ߫ ߘߊ߫ ߞߎ߲ߝߊ߲߫ ߞߏ߫ ߘߊ߲߭ ߠߋ߬ ߘߌ߫ ߸ ߛߓߌ߬ߞߊ ߦߴߊ߬ ߛߌ߲߬ߝߏ߲߬ߧߊ߬ߟߌ ߞߊ߲߬ ߘߏߣߍ߲߫ ߘߏߣߍ߲߫ ߸ ߊ߬ߟߎ߫ ߞߊ߬ ߢߍߡߌߘߊ ߘߏ߫ ߟߎ߫ ߘߐߓߍ߲߬ ߸ ߞߊ߬ ߓߊ߲߫ ߞߊ߬ ߘߏ߫ ߟߎ߫ ߟߊߟߐ߬ ߛߌߟߊߞߎ߲ ߠߊ߫ ߸ ߞߎ߲ߝߊ߲ߓߐߟߊ ߟߎ߬ ߦߋ߫ ߛߍߝߊ ߂߀߀ – ߂߀߀ ߟߋ߬ ߛߙߊ߬ ߟߊ߫ ߸ ߤߊߟߌ߬ ߣߌ߫ ߡߐ߰ ߆߀ ߟߋ߬ ߓߍ߫ ߞߐ߲߬ߛߏ ߞߣߐ߫ ߏ߬ ߟߎ߬ ߓߍ߯ ߞߍߕߐ߫ ߊ߬ߟߎ߬ ߟߊ߫ ߂߀߀-߂߀߀ ߟߋ߬ ߛߙߊ߬، ߞߏ߬ߣߌ߲߬ ߸ ߊ߬ߟߎ߫ ߞߊ߬ ߞߙߎ߬ߞߊ߲߬ߝߎߞߊ߫ ߟߊߞߎߣߎ߲ߠߊ ߟߎ߬ ߕߊ ߟߊߓߋ߬ ߟߋ߬. ߏ߬ ߘߐ߫ ߸ ߡߐ߱ ߝߋ߲߫ – ߋ-ߝߋ߲߫ ߕߎ߲߬ ߓߍ߫ ߜߊ߬ߙߊ ߞߣߍ߫ ߞߊ߲߬ ߣߴߏ߬ ߟߎ߬ ߕߊ߯ ߘߊ߫ ߸ ߊ߬ߟߎ߬ ߡߊ߫ ߥߊߘߌ߫ ߡߌ߬ߘߊ߬ ߒ߬ ߛߌ߫ ߟߊ߫.
ߊ߲ ߝߟߐ߫ ߘߊ߫ ߦߙߐ߫ ߡߍ߲ ߠߊ߫ ߸ ߏ߬ ߦߋ߫ ߞߙߎ߬ ߖߊ߲߬ߓߊ߫ ߟߋ߬ ߘߌ߫ ߸ ߡߍ߲ ߖߊ߲߬ߧߊ ߦߋ߫ ߛߋ߫ ߟߊ߫ ߜߟߊ߬ߜߟߊ߬ ߈߀ ߘߐ߫ ߸ ߡߐ߱ ߟߎ߬ ߦߋ߫ ߕߏ߫ ߟߊ߫ ߦߟߍ߬ ߟߴߏ߬ ߟߊ߫ ߣߌ߫ ߖߎ߬ߟߎ ߟߎ߬ ߘߌ߫، ߣߍ߱ ߘߏ߫ ߟߎ߫ ߜߊ߲ߜߊ߲ߣߍ߲ ߞߎ߬ߙߎ ߏ߬ ߦߟߍ߬ߘߊ ߝߍ߬ ߸ ߖߎ߬ߟߎ ߦߋ߫ ߓߊߟߊ߲߫ ߠߴߏ߬ ߟߎ߬ ߡߊ߬ ߞߊ߬ ߦߟߍ߬ߟߊ ߘߐߡߌ߬ߘߊ߬߸ ߣߍ߱ ߏ߬ ߓߴߛߋ߫ ߞߌߘߊ߫ ߅߀߀ ߘߐߡߌ߬ߣߊ߬ ߟߊ߫ ߸ ߊ߬ ߕߍ߫ ߓߎ߬ߐ߫ ߞߊ߬ ߓߐ߫ ߞߎ߬ߙߎ ߟߊ߫، ߥߊ߬ ߸ ߖߎ߬ߟߎ ߡߍ߲ ߦߋ߫ ߛߙߌ߬ ߟߊ߫ ߊ߬ߟߎ߬ ߟߊ߫ ߏ߬ ߝߣߊ߫ ߓߴߛߋ߫ ߞߙߌߕߌ߫ ߅ ߘߐߡߌ߬ߘߊ߬ ߟߊ߫ ߸ ߏ߬ ߞߘߐ ߟߋ߬ ߞߏ߫ ߌ ߓߊ߯ ߞߍ߫ ߦߟߍ߬ ߟߊ߫ ߞߎ߬ߙߎ ߏ߬ ߟߊ߫ ߸ ߖߎ߬ߟߎ ߕߍ߫ ߕߍ߰ ߸ ߓߐ߬ߟߐ ߏ߬ ߕߍ߫ ߓߐ߫ ߝߋߎ߫.
ߏ߬ ߞߐ߫ ߸ ߊ߲ ߛߋ߫ ߘߊ߫ ߞߡߊ߬ߖߊ߲߫ ߓߐߘߊ ߡߊ߬ ߸ ߏ߬ ߦߋ߫ ߞߙߎ߬ ߝߊ߲ߝߊ߲߫ ߘߏ߫ ߟߋ߬ ߘߌ߫، ߡߍ߲ ߥߏ߭ ߞߎ߲߬ߕߊ߰ߟߊ ߘߐߛߊ߲ ߓߴߛߋ߫ ߞߎߘߍ߫ ߂ ߖߊ߬ߕߋ ߡߊ߬ ߸ ߞߊ߬ ߓߐ߫ ߘߏ߲߬ߘߊ ߡߊ߬ ߞߊ߬ ߛߋ߫ ߓߐ߫ ߦߙߐ߫ ߡߊ߬ ߞߊ߬ߣߌ߲߬، ߒ߬ ߡߊ߫ ߛߐ߲߬ ߘߏ߲߬ ߠߊ߫ ߦߋ߲߬ ߘߋ߬.
ߛߏ߬ߟߏ ߝߙߊ߬ߓߊ-ߘߐ߫ ߛߌ߬ߛߋ߫