ߊ߲ ߓߊߘߋ߲߫ ߝߎߟߊ ߟߎ߬ ߓߘߊ߫ ߝߟߐ߫ ߊ߬ߟߎ߬ ߡߊߘߏ߲߬ ߠߊ߫ ߒߞߏ ߟߊ߫ ߡߊ߬ߟߌ߬ߓߊ ߟߊ߫، ߊ߬ ߓߘߊ߫ ߕߎ߬ߡߊ߬ ߞߎߘߎ߲߫ ߓߐ߫، ߊ߲ ߓߊߘߋ߲߫ ߝߎߟߊ ߘߏ߫ ߟߎ߫ ߓߘߊ߫ ߝߟߐ߫ ߒߞߏ ߞߊ߬ߙߊ߲߬ ߠߊ߫، ߞߊ߬ ߓߊ߲߫ ߞߊ߬ ߞߎ߬ߙߊ߬ߣߊ ߘߟߊߡߌ߬ߘߊ߬ ߝߎߟߊߞߊ߲ ߘߐ߫ ߒߞߏ ߛߓߍߟߌ ߘߐ߫߸ ߊ߲ ߘߌߣߴߏ߬ ߢߍߛߐ߲ ߘߏ߫ ߦߌ߬ߘߵߊߟߎ߫ ߟߊ߫ ߦߊ߲߬ ߛߌߛߍ߲߬߸ߊ߲ ߓߐߣߍ߲߫ ߊ߲ ߓߊߘߋ߲߫ ߝߎߟߊ߫ ߒߞߏ ߞߙߊߡߐ߯ ߞߎߘߊ ߏ߬ ߡߍ߲ ߞߊ߬ߟߊߡߊ߬ ߝߎߟߊߞߊ߲ ߞߊ߬ߙߊ߲ ߘߐ߫ ߒߞߏ ߛߓߍߛߎ߲ ߠߊ߫، ߊ߲ ߞߍߕߐ߫ ߏ߬ ߟߋ ߟߌ߬ߤߟߊ ߟߎ߬ ߝߐ߫ ߟߊ߫ ߦߊ߲߬ ߛߌߛߍ߲߬߸ ߏ߬ ߓߟߏߡߊ߬ ߓߊߘߋ߲ ߠߎ߬، ߊ߲ ߓߘߋ߲߫ ߝߎߟߊ ߢߌ߲߬ ߕߐ߯ ߟߋ߬ ߞߏ߫ ” ߞߙߊ߬ߡߐ߯ ߤߡߊߘߌ߫ ߓߊߓߊ߫ ߖߊߟߏ߫” ߊ߬ ߟߋ߬ ߓߘߊ߫ ߒߞߏ ߞߊ߬ߙߊ߲߬ ߝߛߊߦߌ߫ ߞߵߊ߬ ߟߐ߲߫߸ ߦߴߌ ߟߐ߲߫ ߣߌ߫ ߡߐ߱ ߞߊ߬ ߞߏ߫ ߓߘߍ߫ ߤߊߞߟߌߣߊ߲ ߦߋ߫ ߦߙߐ߫ ߛߌ߫، ߣߴߊ߬ ߘߌ߫ ߡߎߣߊ߲ߝߊ߲ ߠߊߛߴߌ ߓߊߘߋ߲ ߠߎ߫ ߡߊ߬، ߡߐ߰ ߓߘߍ ߓߍ߯ ߞߊ߫ ߞߊ߲߫ ߞߵߏ߬ ߟߋ߬ ߞߏ߫ ߛߎ߮ ߟߎ߬ ߟߊߛߋ߫ ߌ ߓߊߘߋ߲ ߠߎ߫ ߡߊ߬، ߣߌ߫ ߛߌߦߊߥߟߏߡߊ߫ ߕߴߊ߬ ߟߊ߫߸ ߞߙߊ߬ߡߐ߯ ߤߡߊߘߘߌ߫ ߓߊߓߊ߫ ߖߊߟߏ߫ ߦߴߏ߬ ߡߐ߰ ߛߎ߮ ߘߏ߫ ߟߋ߬ ߘߌ߫ ߞߊ߬ ߓߐ߫ ” ߞߟߏߞߊߣߌ߲߫” ߡߊ߬ߟߌ߬ߓߊ ߟߊ߫߸ ߊ߬ ߞߵߊ߬ ߦߋ߫ ߞߏ߫ ߛߌ߬ߟߡߊ߬ߦߊ ߣߊߡߎ߲ ߢߊߝߐ ߝߎߟߊߞߊ߲ ߘߐ߫، ߞߴߏ߬ ߟߋ߬ ߣߊߡߎ߲ ߠߊߥߙߎߞߌ߫ ߟߊ߫ ߖߏߣߊ߫، ߦߏ߫ ߒߞߏ ߡߐ߮ ߟߎ߬ ߦߴߊ߬ ߞߊ߲߬ ߢߊ ߡߍ߲، ߏ߬ ߟߋ߬ ߞߋߟߋ߲߬ ߞߏߛߐ߲߬، ߌ ߘߌ߫ ߞߏ ߘߏ߫ ߟߊߝߟߐߣߍ߲ ߦߋ߫ ߝߘߊ߬ߜߍ߬ ߖߡߊߣߊ ߘߏ߫ ߘߐ߫، ߌ ߘߴߊ߬ ߦߋ߫، ߝߘߊ߬ߜߍ߬ ߖߡߊ߬ߣߊ߬ ߛߌߦߊߡߊ߲߫ ߓߘߊ߫ ߦߟߍߡߊ߲߫ ߏ߬ ߞߏ߫ ߞߋߟߋ߲߬ ߏ߬ ߞߊ߲߬߸ ߏ߬ ߟߋ ߣߵߊ߬ ߞߍ߫ ߟߊ߫ ߝߣߊ߫ ߋߙߐߔߎ߬ ߖߡߊ߬ߣߊ ߓߍ߯ ߦߴߊ߬ ߟߊ߫ ߞߊ߲ ߞߊ߬ߙߊ߲߬ ߠߊ߫ ߛߓߍߛߎ߲߫ ߞߋߟߋ߲߫ ߘߐ߫، ߣߊߟߌߡߎ߲߫ ߟߊ߬ߕߍ߲߬ ߛߓߍߛߎ߲ ߘߌ߫،
ߞߐ߬ߣߌ߬ ߡߐ߰ ߛߌߦߊߡߊ߲߫ ߕߍ߫ ߟߌ߬ߤߟߊ ߏ߬ ߞߊ߬ߟߊߡߊ߬، ߤߊߟߌ߫ ߞߵߊ߬ ߟߐ߲߫ ߖߍ߬ߘߍ ߞߏ߫ ߝߊ߬ߙߊ߲߬ߛߌ߬ߞߊ߲ ߦߋ߫ ߛߓߍ߫ ߟߊ߫ ߛߓߍߛߎ߲߫ ߡߍ߲ ߠߊ߫ ߣߌ߲߬، ߞߴߏ߬ ߕߍ߫ ߝߊ߬ߙߊ߲߬ߛߌ߫ ߕߊ߫ ߘߌ߫، ߊ߬ ߘߏ߲߬ ߕߍ߫ ߊ߲߬ߜ߭ߑߟߋ ߕߊ߫ ߘߌ߫، ߞߎߡߊߕߍ߫ ߋߙߐߔߎ߬ ߓߌ߭ߓߌ߬ ߞߊ߲߫ ߢߣߊߡߊ ߟߎ߫ ߡߊ߬߸ ߞߐ߬ߣߌ߬ ߡߐ߱–ߐ߯-ߡߐ߬ ߣߴߊ߬ ߞߊ߬ߙߊ߲߬ߣߍ߲߫، ߊ߬ ߘߏ߲߬ ߦߋ߫ ߘߏ߫ ߞߊ߬ߟߊߡߊ߬ ߞߊ߲ߞߏ ߣߌ߫ ߛߓߍߟߌߞߏ ߘߐ߫، ߏ߬ ߓߍ߯ ߞߵߊ߬ ߟߐ߲߫ ߞߏ߫ ߋߙߐߔߎ߬ ߞߊ߲ ߠߎ߬ ߦߋ߫ ߛߓߍ߫ ߟߊ߫ ߛߓߍߛߎ߲ ߡߍ߲ ߠߊ߫ ߣߌ߲߬، ߞߏ߫ ߟߊ߬ߕߍ߲߬ ߠߎ߬ ߕߊ ߟߴߏ߬ ߘߌ߫، ߟߊ߬ߕߍ߲ ߏ߬ ߟߎ߫ ߦߋ߫ ߋߙߐߔߎ߬ ߛߌߦߊ߫ ߞߘߐ ߘߏ߫ ߟߋ߬ ߘߌ߫، ߡߍ߲ ߠߎ߫ ߝߊ߲߬ߞߊ߲߬ ߥߙߊ߬ߘߊ ߕߎ߬ߡߊ ߘߏ߫ ߟߊ߫، ߟߊ߬ߕߍ߲߬ ߛߓߍߛߎ߲ ߝߣߊ߫ ߓߐߣߍ߲߫ ߜ߭ߙߍ߬ߞߌ߬ ߡߍ߲ ߘߐ߫، ߊ߬ ߣߌ߫ ߜ߭ߙߍ߬ߞߌ߬ ߝߣߊ߫ ߓߐߣߍ߲߫ ߝߋߣߌߞ ߡߍ߲ ߘߐ߫، ߊ߬ ߣߴߏ߬ ߓߐߣߍ߲߫ ߝߘߊ߬ߝߌ߲߬ ߠߊ߫ ߡߌ߬ߛߌ߬ߙߊ߲߬ ߢߊ ߡߍ߲، ߊ߲ ߕߴߏ߬ ߟߎ߬ ߝߐ߫ ߘߊߞߎ߲߫ ߘߐ߫ ߦߊ߲߬. ߏ߬ ߓߟߏߡߊ߬، ߊ߲ ߓߊߘߋ߲߫ ߤߡߊߘߌ߫ ߓߊߓߊ߫ ߖߊߟߏ߫ ߡߍ߲ ߦߴߊ߬ ߝߍ߬ ߣߌ߲߬ ߞߊ߬ ߞߎ߬ߙߊ߬ߣߊ ߦߟߍ߬ߡߊ߲߫ ߝߎߟߊߞߊ߲ ߘߐ߫ ߒߞߏ ߛߓߍߟߌ߫ ߟߊ߫، ߏ߬ ߛߌ߰ߣߍ߲߫ ߞߟߏߞߊߣߌ߲߫ ߠߋ߬ ߡߊ߬ߟߌ߬ߓߊ ߟߊ߫، ߊ߬ ߘߏ߲߬ ߓߘߊ߫ ߝߟߐ߫ ߡߐ߰ ߛߌߦߊߡߊ߲߫ ߞߊ߬ߙߊ߲߬ ߠߊ߫ ߝߎߟߊߞߊ߲ ߠߊ߫ ߒߞߏ ߛߓߍߛߎ߲ ߘߐ߫،
ߊ߬ ߓߘߴߊ߲ ߓߊߘߋ߲߫ ߝߎߟߊ߫ ߛߌߦߊߡߊ߲߫ ߞߊ߬ߙߊ߲߬ ߒߞߏ ߛߓߍߛߎ߲ ߠߊ߫ ߛߊ߲߬ ߂ ߕߊ߬ߡߌ߬ߣߍ߲ ߢߌ߲߬ ߞߘߐ߫، ߊ߬ ߕߏߣߍ߲߫ ߏ߬ ߟߋ߬ ߘߊߞߘߐ߫، ߓߊߘߋ߲ ߝߘߊ߬ߝߌ߲߬ߟߊ߲߬ߘߌ߫ ߣߊߡߎ߲ߟߊ߲ߘߌ ߘߏ߫ ߞߊ߬ ߞߐ߲߬ߛߏ߬ ߡߊߞߟߏߣߍ߲߫ ߘߏ߫ ߘߴߊ߬ ߡߊ߬، ߞߴߊ߬ ߦߴߊ߬ ߘߐߖߊ߬ ߛߌߟߊ ߢߌ߲߬ ߠߎ߬ ߞߊ߲߬ ߞߏߛߓߍ߫، ߡߍ߲ ߘߌ߫ ߛߌ߬ߟߡߊ߬ߦߊ߬ ߣߊߡߎ߲ ߠߊߥߙߎߞߌ߫߸ ߊ߬ ߣߌ߫ ߞߴߊ߬ ߦߋ߫ ߕߌ߲ߞߌ߲߫ ߝߣߊ߫، ߓߊߏ߬، ߞߴߊ߬ ߦߴߊ߬ ߝߍ߬ ߞߊ߬ ߞߐ߲߬ߛߏ ߣߌ߲߬ ߞߍ߫ ߞߐ߬ߛߏ߲߬ ߞߎߘߊ ߟߋ߬ ߘߌ߫، ߞߴߊ߬ ߦߴߊ߬ ߓߟߏ ߛߌ߰ ߣߌ߲߬ ߞߘߐ߫ ߡߎߣߎ߲߬، ߦߊߣߴߊߟߊ߫ ߦߴߏ߬ ߣߐ߰ߦߊ߫، ߊߟߎ߫ ߢߊ߫ ߦߋ߫ ߞߐ߲߬ߛߏ ߏ߬ ߟߋ߬ ߖߌ߬ߦߊ߬ߓߍ ߟߊ߫ ߕߋ߲߬، ߞߙߊ߬ߡߐ߯ ߤߡߊߘߌ߫ ߓߊߓߊ߫ ߖߊߟߏ߫ ߟߊ߫ ߞߊ߬ߙߊ߲߬ߘߋ߲ ߘߏ߫ ߝߣߊ߫ ߓߘߴߊ߬ ߥߊ߬ߞߊߟߌ߫ ߞߵߊ߬ ߟߊ߫ ߓߊ߯ߙߊ ߓߍ߯ ߓߟߏߞߊ߬، ߞߵߊ߬ ߖߘߍ߬ߓߐ߫ ߞߊ߬ ߣߊ߬ ߞߙߊ߬ߡߐ߯ ߤߡߊߘߌ߫ ߖߊߟߏ߫ ߡߊߞߊ߬ߙߊ߲߬ ߦߙߐ ߞߐ߲߬ߛߏ ߢߌ߲߬ ߠߊ߫، ߛߴߊ߬ߟߎ߬ ߘߌ߫ ߞߟߏߞߊߣߌ߲߫ ߣߴߊ߬ ߟߊߡߌߣߌ߲ ߓߍ߬ߙߍ߲߬ߓߍߙߍ߲߫ ߢߊ ߡߍ߲، ߏ߬ ߕߐ߯ ߞߏ߫ ” ߊߡߊߘߎ߫ ߖߊ߬ߙߊ߫ ” ߕߐ߲ߖߊ߯ߓߡߊ ߦߋ߫ ߝߛߌߙߌ߫ ߞߍߟߊ ߢߌ߲߬ ߞߏߢߌߡߊߟߐ߲߫ ߠߊ߫ ߞߏߛߓߍ߫، ߊߟߊ߫ ߦߴߊ߬ ߞߍ߫ ߓߙߊ߬ߦߌ߫ ߘߌ߫، ߊߟߊ߫ ߦߴߊ߬ ߞߍ߫ ߢߌߛߌ߯ ߢߌߡߊ߫ ߘߌ߫ ߟߐ߬ߓߊ ߟߏ߲߸ ߊ߬ ߓߐߣߍ߲߫ ߣߊ߲߬ߝߟߏ ߡߍ߲ ߘߐ߫، ߞߵߏ߬ ߓߎ߯ ߥߢߊߡߊ߲ߕߊ߲߫. ߖߊ߲߬ߕߏ߲߬ߒ߬ߘߐ߫: ߝߛߌߙߌ߫ ߞߍߟߊ ߢߌ߲߬ ߞߵߊ߬ ߡߊߜߟߍ߬ߦߊ߫ ߟߋ߬ ߞߴߊ߬ ߕߐ߯ ߞߣߊ߫ ߝߐ߫߸ ߏ߬ ߞߏߛߐ߲߬ ߊߟߎ߫ ߘߌ߫ ߦߊ߬ߝߴߊ߲ ߡߵߊ߬ ߕߐ߮ ߛߓߍߓߊߟߌߦߊ ߘߐ߫.
ߛߏ߬ߟߏ ߝߙߊ߬ߓߊ-ߘߐ߫