ߣߖ߭ߊ ߟߊ߫ ߘߐ߬ߛߏ߰ߟߊ߲ ߌ߲ߛߊߦߌߕ ߓߘߊ߫ ߖߌ߰ ߤߐߞߎ ߞߊ߲߬ ߞߎߣߎ߲߬

ߣߖ߭ߊ ߟߊ߫ ߘߐ߬ߛߏ߰ߙߋ߬ߟߊ߲߫ ߌ߲ߛߊߌߕ ߓߘߊ߫ ߖߌ߰ ߤߐߞߎ ߞߊ߲߬ ߞߎߣߎ߲߬ ߞߐ߬ߓߊ߬ߟߏ߲ ߡߊ߬߸ ߣߍߣߍߓߊ ߕߋ߬ߟߋ ߂߆ ߡߊ߬߸ ߡߌ߬ߛߍ߲߬ ߇ ߖߌ߰ߕߍ ߞߐ߫.
ߞߋ߬ߥߎ߬ߣߍ߲߬ߞߋߥߎ ߟߎ߬ ߓߊ߲ ߞߐ ߘߐ߫ ߛߊ߲߬ ߇ ߞߍ߫ ߟߊ߫ ߗߋߦߊߟߌ ߣߌ߲߬ ߘߐߓߍ߲߭ ߞߊ߲߬߸ ߊ߬ߟߎ߬ ߟߊ߫ ߤߊߡߌ߲ ߓߘߊ߫ ߛߴߊ߬ ߘߊ߲߭ ߠߊ߫. ߊ߬ߟߎ߬ ߣߊ߬ ߡߌ߬ߛߍ߲߬ ߇ ߏ߬ ߞߍ߫ ߟߊ ߖߐ߬ߘߐ ߘߐ߫߸ ߊ߬ߟߎ߬ ߟߊ߫ ߤߊߡߌ߲ ߓߘߊ߫ ߦߟߍ߬ߡߊ߲߫ ߞߊ߬ ߞߍ߫ ߛߍߥߊ ߘߌ߫ ߞߎߣߎ߲߬ ߞߐ߬ߓߊ߬ߟߏ߲ ߡߊ߬ ߣߍߣߍߓߊ ߂߆߸ ߁߉ ߙߋ߲: ߅߃ ߡߊ߬߸ ߞߊ߬ ߞߍ߫ ߛߍߥߊ ߣߌ߫ ߥߎ߬ߘߊ߲ ߘߌ߫. ߌ߲ߛߊߌߕ ߓߊ߲ ߞߐ ߘߐ߫ ߖߌ߰ ߟߊ߫ ߤߐߞߎ ߘߎ߰ߞߟߏ ߞߊ߲߬ ߞߐ߬ߓߊ߬ߟߏ߲ ߥߎ߬ߙߊ ߟߊ߫ ߣߍߣߍߓߊ ߂߆/߂߀߁߈ ߠߊ߫߸ ߊ߬ ߘߌ߫ ߣߊ߬ ߡߌ߬ߣߊ߲߬ ߛߘߍߡߊ߲߫ ߠߎ߫ ߟߊߓߐ߫߸ ߘߎ߰ߦߙߍߦߙߍ ߕߎ߬ߟߋ߬ ߦߋ߫ ߟߊ߫ ߡߍ߲ ߠߎ߬ ߘߐ߫߸ ߏ߬ ߓߍߣߊ߬ ߒ߬ ߠߊߞߍ߫ ߤߐߞߎ ߘߎ߱ ߞߘߐ߫ ߞߏ ߟߎ߬ ߞߊ߬ߟߊߡߊ߬.
ߞߏ߫ ߛߌ߫ ߡߴߊ߬ ߖߌ߰ߕߐ ߛߐ߬ߘߐ߲߬ ߤߐߞߎ ߣߴߊ߬ ߡߐ߲ߕߐ߲ ߕߍ߫.
ߦߏ߫ ߞߎ߳ߙߑߦߏߛߌߕߋ ߕߊ ߞߍ߫ ߘߊ߫ ߢߊ ߡߍ߲ ߂߀߁߂ ߟߊ߫߸ ߌ߲ߛߊߌߕ ߞߊ߬ ߤߐߞߎ ߡߊߛߐ߬ߘߐ߲߬ ߟߊ߬ߕߊ߲߬ߞߊ߬ߟߌ ߛߎ߮ ߓߍ߯ ߘߏ߫ ߘߐ߫߸ ߓߣߐ߬ ߛߌ߫ ߡߴߊ߬ ߛߐ߬ߘߐ߲߬ ߛߌߟߊ ߟߊ߫. ߊ߬ ߖߌ߱ ߘߊߡߌ߬ߣߊ߬ ߘߊ߫ ߁߉ ߙߋ߲ ߄߇ ߟߋ߬ ߡߊ߬߸ ߊ߬ ߖߌ߰ߕߐ߬ߟߊ ߞߊ߬ ߡߌ߬ߛߍ߲߬ ߇ ߟߋ߬ ߞߍ߫ ߛߌߟߊ ߟߊ߫߸ ߘߏ߯ߣߍ߲߫ ߞߵߊ߬ ߖߍ߲߬. ߊ߬ ߦߋ߫ ߢߊ ߡߊߝߊ߬ߟߋ߲߬ ߘߊ߫ ߟߋ߬ ߓߑߙߍߝ ߓߑߟߊߞ ߊߎߕ ߕߎ߬ߡߊ ߟߊ߫߸ ߤߊߟߌ߬ ߣߴߊ߬ ߕߘߍ߬ ߘߊ߫ ߞߴߏ߬ ߡߊߞߐ߬ߣߐ߲߬ߣߍ߲߫ ߕߘߍ߬ ߦߋ߫ ߞߘߐ߬ߡߊ߲߫. ߖߎߙߊ߲ߞߊߡߊ߲ ߠߊߞߊ߬ ߘߴߊ߬ ߢߊ ߡߊ߬߸ ߥߎߦߋ߲߫ ߞߐߘߙߍ ߞߵߊ߬ ߟߊ߫ ߓߊ߯ߙߊ ߞߍ߫߸ ߏ߬ ߞߍ ߣߖ߭ߊ ߟߊ߫ ߔߛߊߘߋߡߊ߫ ߖߍߕ ߔߑߙ߭ߏߔߎ߳ߟߑߛߋ ߟߊߓߏߙߊߕߏߙߋ߫ ߡߍ߲ ߦߋ߫ ߞߊߟߑߝߐߙߑߣߌ߫߸ ߏ߬ ߛߌ߲߬ߝߏ߲ ߠߎ߬ ߞߵߊ߬ ߟߊߥߊ߲߬ߞߊ߲߬ ߁߉ ߙߋ߲ ߅߃ ߟߊ߫߸ ߞߏ߫ ߊ߬ ߓߘߴߊ߬ ߛߌ߰ ߤߐߞߎߞߊ ( ߕߐߗ ߘߊ߲߬ߥ ߞߐ߲߬ߝߊߡߍߘ) ߟߎ߬ ߟߊ߫ ߘߎ߱ ߞߊ߲߬.
ߊ߬ ߛߋ ߤߐߞߎ ߞߊ߲߬ ߌߞߘߐ߫߸ ߊ߬ ߞߵߊ߬ ߟߊ߫ ߖߌ߬ߦߊ߬ߓߍ߬ ߝߟߐ ߟߊߣߊ߬߸ ߏ߬ ߡߍ߲ ߕߊ߬ ߣߍ߲߫ ߞߐߓߌߟߊ߫ ߢߟߋߢߟߋ߫ ߝߌ߬ߟߊ߬ ߟߎ߫ ߓߟߏ߫߸ ߣߊߟߌ߬ߡߎ߲߫ ߡߊߙߑߞߏ߫ ߊ ߣߌ߫ ߋ ߘߌ߫߸ ߞߐߓߌߟߊ ߏ߬ ߟߎ߬ ߕߏ߫ ߣߍ߲߫ ߤߐߞߎ ߡߐ߲ߕߐ߲ ߠߋ߬ ߘߐ߫ ߊ߬ ߜߋ߬ߟߎ߲߬ ߞߊ߲ߡߊ߬. ߡߍ߲ ߡߊߟߐ߲ߣߍ߲ߓߊ ߦߋ߫ ߖߌ߬ߦߊ ߏ߬ ߟߊ߫ ߞߏ ߘߐ߫߸ ߏ߬ ߟߋ ߦߋ߫ ߘߐ߬ߛߏ߰ߙߋ߬ߟߊ߲ ߖߌ߱ ߘߊ߫ ߤߐߞߎ ߕߛߊߞߙߊ߫ ߘߐߝߎߙߋ߲ߣߍ߲ ߘߏ߫ ߟߋ߬ ߘߐ߫߸ ߡߍ߲ ߜߊ߲߬ߜߊ߲ ߠߎ߬ ߞߍߣߍ߲߫ ߕߘߍ߬ ߦߋ߫ ߞߊ߬ ߘߐ߬ߛߏ߰ߙߋ߬ߟߊ߲ ߡߊߕߎߣߎ߲߫.
ߟߐ߯ߞߎ߲߫ ߝߌ߬ߟߊ߫ ߡߊߞߕߌߣߍ߲.
ߌ߲ߛߊߌߕ ߓߊ߲ ߞߐ ߘߐ߫ ߖߌ߰ ߟߊ߫ ߤߐߞߎ ߞߊ߲߬߸ ߊ߬ ߘߌ߫ ߣߵߊ߬ ߕߟߋ߬ ߡߌ߬ߘߊ߬ ߝߜߊ ߟߎ߬ ߟߊߝߎߙߋ߲߫ ߕߎ߬ߡߊ߬ߙߋ߲ ߣߊ߬ߕߐ ߟߎ߬ ߘߐ߫߸ ߞߵߊ߬ ߡߌ߬ߣߊ߲ ߠߎ߬ ߡߊߝߍߣߍ߲߫ ߣߌ߫ ߝߍ߬ ߡߊ߬ ߞߴߊ߬ߟߎ߬ ߟߊ߫. ߏ߬ ߟߋ ߞߐ߫ ߛߊ߫߸ ߟߐ߲ߞߏߕߌ߮ ߟߎ߬ ߘߌߣߊ߬ ߘߌ߲߬ߞߌߙߊ ߟߎ߬ ߘߐߥߟߏߡߊ߫ ߞߵߊ߬ߟߎ߬ ߘߐ߫ ߓߍ߬ߘߍ ߛߎߥߊ߲ߘߌ߫߸ ߊ߬ߟߎ߬ ߞߊߞߊ߲߫ ߞߊ߬ ߘߎ߰ߦߙߍߦߙߍ ߕߎ߬ߟߋ߬ ߓߌ߬ߟߊ߬ ߡߍ߲ ߘߐ߫߸ ߊ߬ ߣߌ߫ ߔߊߦߌߔߊߦߌ ߕߎ߬ߟߋ ߡߍ߲ ߞߍߕߐ߫ ߦߋ߫ ߘߎ߱ ߝߙߐߝߙߐ߫ ߟߊ߫ ߤߊ߲߯ ߗߍ߬ߟߐ߮ ߝߌ߬ߟߊ ߟߊ߫߸ ߜߟߊ߬ߜߟߊ߫ ߅. ߒ߬ ߘߌ߫ ߣߊ߬ ߞߴߊ߬ ߟߊ߫ ߞߍߣߍ߲ ߠߎ߬ ߞߊ߬ߟߊߡߊ߬ ߦߊߣߌ߬ ߛߊ߲߭ ߣߌ߲߬ ߓߊ߲߫ ߕߍ߫߸ ߘߎ߰ߦߙߍߦߙߍ ߕߎ߬ߟߋ߬ ߞߏ߬ߣߌ߲ ߕߊ ߕߍ߫ ߣߊ߬ ߟߐ߲߫ ߠߊ߫ ߦߊ߲߬ ߣߌ߫ ߂߀߁߉ ߕߙߊߓߊ ߕߍ߫.
ߏ߬ ߟߋ ߞߐ߫߸ ߟߐ߲ߞߏߕߌ߮ ߟߎ߬ ߘߌ߫ ߣߊ߬ ߞߍ߫ ߤߐߞߎ ߞߐߞߊ߲ߠߊ ߣߴߊ߬ ߞߘߐߟߊ ߣߴߊ߬ ߕߊ߲ߓߊ߲߫ ߕߘߋߕߘߋ ߟߎ߬ ߞߊ߬ߟߊߡߊ߬߸ ߊ߬ߟߎ߫ ߝߊ߲߭ ߘߌ߫ ߣߴߊ߬ ߟߐ߲߫ ߣߌ߫ ߤߐߞߎ ߞߘߐߟߊ ߘߐߖߊ߬ߙߊ߲ ߠߋ߬ ߥߟߴߊ߬ ߖߌߡߊ ߟߋ߬ (ߖߌ ߦߴߊ߬ ߞߘߐ߫). ߣߴߊ߲ ߠߊ߫ ߘߎ߱ ߞߊ߲߬ߠߊ ߟߋ߬߸ ߘߎ߰ߦߙߍߦߙߍ ߟߋ߬ ߦߋ߫ ߒ߬ ߜߙߋ߬ ߞߘߐ ߟߎ߬ ߟߊߝߊ߰ ߟߊ߫߸ ߒ߬ߞߊ߬ ߤߐߞߎ ߕߊ ߜߊߛߊ߲<ߟߊߟߐ߭> ߓߘߊ߫ ߛߊ߲߬ ߥߟߎ߬ߡߊ߫ ߃ ߓߐ߫ ߕߊ߲߬. ߤߐߞߎ ߘߎ߰ߦߙߍ߬ߦߙߍ߬ ߟߐ߲߬ߠߊ ߟߎ߬ ߦߟߌ߫ ߦߴߊ߬ ߟߊ߫߸ ߞߏ߫ ߣߴߊ߲ ߓߊ߲߫ ߘߊ߫ ߤߐߞߎ ߜߎ߲߬ߘߎ߬ ߟߎ߬ ߟߐ߲߫ ߠߊ߫߸ ߒ߬ ߓߘߊ߫ ߞߍ߫ ߖߊ߯ߓߊߟߌ ߟߎ߬ ߘߊ߲߫ ߢߊ ߞߊ߬ߟߊߡߊ߬ ߟߵߏ߬ ߘߌ߫, ߡߎ߲߬ߠߊ߫ ߛߌ߰ߟߏߟߏ ߞߍߣߍ߲߫ ߕߊߜߋߣߌ߲ ߘߌ߫؟ ߡߎ߬ߠߊ߫ ߘߎ߱ ߞߍ߫ ߘߊ߫ ߡߊ߬ߞߍ߬ߦߙߐ ߘߌ߫؟ ߊ߬ ߣߌ߫ ߡߎ߲߬ߠߊ߫ ߤߐߞߎ ߞߍ߫ ߘߊ߫ ߕߌ߬ߢߍ߬ߞߏ߲ߞߏ ߘߌ߫؟
ߤߐߞߎ ߟߋ߬ ߓߘߊ߫ ߞߍ߫ ߡߊ߲߬ߕߏ߲ ߠߎ߬ ߟߊ߫ ߢߐ߲߯ ߛߊ߲ߞߊߢߐ߲߯ߦߊ߫ ߖߊ߯ߓߊߟߌ ߘߌ߫ ߓߌ߬.
߁߭ ߛߏߝ߭ߌߦߋ ߘߍ߭ ߟߋ߬ ߝߟߐ߫ ߞߊ߬ ߤߐߞߎ ߡߊߜߍ߲߫ ߊ߬ ߟߊ߫ ߘߐ߬ߛߏ߰ߙߋ߬ߟߊ߲ ߘߌ߫߸ ߕߙߊߓߊ ߃ / ߁߉߇߁ ߠߊ߫߸ ߞߏ߬ߣߵߏ߬ ߗߌߙߏ߲߫ ߘߊ߫ ߟߋ߬, ߊ߬ ߦߙߐ ߘߏ߫ ߟߎ߫ ߞߏ߬ߣߌ߲ ߛߎߘߊ߲߫ ߘߊ߫.
߂߲ ߣߌ߫ ߃߲ ߊ.ߞ {ߣߖ߭ߊ} ߝߣߊ߫ ߞߵߊ߬ ߟߊ߫ ߝ߭ߌߞߌ߲ߜ߭ ߝߟߐߡߊ ߣߴߊ߬ ߂߲ ߠߎ߬ ߟߥߊ߫ ߁߉߇߆ ߟߊ߫߸ ߏ߬ ߟߎ߫ ߝߌ߬ߟߊ ߓߍ߯ ߛߎߘߊ߲߫ ߘߊ߫.
߄߲ ߣߖ߭ߊ ߟߊ߫ ߔߊߕ ߝߊ߲ߘߊ߬ ߛߎߘߊ߲߫ ߘߊ߫ ߁߉߉߇ ߟߊ߫.
߅߲ ߊ.ߞ ߞߊ߬ ߡߊߙߛ ߔߏߟߊߙ ߟߊ߲ߘߊ߬ ߝߣߊ߫ ߓߎ߰ߓߎ߬ߡߊ߬ ߘߊ߫ ߁߉߉߉ ߟߊ߫߸ ߏ߬ ߗߌߙߏ߲߫ ߘߊ߫.
߆߲. ߋߙߐߔߎ߬ ߘߍ߭ ߕߊ߫ ߝߟߐߡߊ ߗߌߙߏ߲߫ ߘߊ߫ ߂߀߀߃ ߟߊ߫.
߇߲ ߣߖ߭ߊ ߟߊ߫ ߏߔߐߙߑߕߣߌߕߋ߫ ߛߎߘߊ߲߫ ߘߊ߫ ߂߀߀߄ ߠߊ߫.
߈߲. ߣߖ߭ߊ ߟߊ߫ ߛߑߔߌߙ߭ߊߌߕ ߛߎߘߊ߲߫ ߘߊ߫ ߂߀߀߄ ߠߊ߫ ߕߎ߲߯.
߉߲. ߣߖ߭ߊ ߟߊ߫ ߝߏߋߣߌߞߛ ߛߎߘߊ߲߫ ߘߊ߫ ߂߀߀߈ ߠߊ߫.
߁߀߲ ߣߖ߭ߊ ߟߊ߫ ߞߎ߳ߙߑߦߏߛߌߕߋ ߛߎߘߊ߲߫ ߘߊ߫ ߂߀߁߂ ߟߊ߫.
߁߁߲ ߋߖ߭ߊ߸ ߋߙߐߔߎ߬ ߘߍ߭ ߟߊ߫ ߛ߭ߌߊߔߋߙߟߌ߫ ߗߌߙߏ߲߫ ߠߊ߫ ߂߀߁߆ ߟߊ߫.
߁߂߲ ߣߖ߭ߊ ߟߊ߫ ߌ߲ߛߊߌߕ ߛߋ߫ ߛߊ߲ ߠߋ߬ ߦߋ߫ ߣߌ߲߬߸ ߊ߬ ߗߌߙߏ߲߫ ߣߴߊ߬ ߛߎߘߊ߲߫ ߞߏ ߡߊ߫ ߟߐ߲߫ ߡߎߣߎ߲߬.

ߟߊ߲߭ߛߌ߬ߣߍ߬ ߞߎ߲ߝߊ߲ߕߐ߫ ߝߏߝߣߊ߫⁦ ߓߟߏ߫/ ߛߏ߬ߟߏ ߝߙߊ߬ߓߊ-ߘߐ߫ ߛߌ߬ߛߋ߫