ߊߟߎ߫ ߛߊ߲߬ߓߍߛߊ߲߬ߓߍ߫ ߡߊ߬ߘߋ߲߬ ߡߌߙߌ߲ߘߌ ߣߌ߫ ߒߞߏ ߘߏ߲߬ߞߏ ߟߎ߬

߹ߊߟߎ߫ ߛߊ߲߬ߓߍߛߊ߲߬ߓߍ߫ ߡߊ߬ߘߋ߲߬ ߡߌߙߌ߲ߘߌ ߣߌ߫ ߒߞߏ ߘߏ߲߬ߞߏ ߟߎ߬

ߣߌ߲߬ ߦߋ߫ ߒߞߏ ߥߙߎߞߟߌ߫ ߛߌ߲߬ߝߏ߲߬ߧߊ߬ߟߌ߬ ߖߊ߯ߓߡߊ (ߒ.ߥ.ߛ.ߖ.) ߟߊ߫ ߛߊ߲߬ߞߎ߬ߘߊ߬ ߝߏߟߌ ߟߋ߬ ߞߊ߬ ߓߍ߲߬ ߞߙߎ߬ߞߊ߲߬ߝߎߥߊ߫ ߜߊ߬ߙߊ ߛߊ߲߬ ߇߈߅ߣߊ߲ ߞߊߙߏ߫ ߝߟߐ ߞߏ߲ߞߏߘߓߌ ߕߟߋ߬ ߝߟߐ ߡߊ߬، ߞߊߙߏ ߏ߬ ߡߍ߲ ߝߣߊ߫ ߞߍߣߍ߲߫ ߒߞߏ ߛߓߍߛߎ߲߫ ߛߌ߲ߘߌ߲߫ ߞߊߙߏ ߘߌ߫ ߟߐ߲ߞߏߕߌ߯ ߛߟߏ߬ߡߊ߰ߣߊ߬ ߞߊ߲ߕߍ߫ ߓߟߏ߫ ߞߏ߲ߞߏߘߓߌ ߁߄ ߞ.ߜ.߇߁߄/ ߁߉߄߉ ߓߍ߲ߖ߭ߍ߲ߘߎ߯ ߜߋ߲ ߞߐ߰ߖߌߘߊ ߟߊ߫،ߓߊߏ߬߸ ߣߌ߫ ߘߍ߲ߖߘߍߟߦߊ ߕߊ߬ߞߎ߲ ߞߍߣߍ߲߫ ߞߍ߫ ߘߊ߫ ߥߙߎߞߌߞߏ ߘߌ߫، ߞߊ߬ ߖߡߊ߬ߣߊ ߛߐ߬ߘߐ߲߬ߝߋ߲ ߓߍ߯ ߞߍ߫ ߊ߬ ߕߊߓߍߛߎ߲ߓߍ ߘߌ߫، ߞߊ߬ ߡߐ߰ߦߊ ߞߊ߲ߠߓߌߟߊ ߘߝߊߣߍ߲ ߛߐ߲߬ߘߐ߲߬، ߤߊ߲ߞߟߌߡߊ ߓߍ߯ ߞߵߊ߬ ߟߐ߲߬ ߞߴߏ߬ ߛߐ߬ߘߐ߲߬ߢߊ߬ ߛߌ߫ ߕߍ߫ ߞߵߌ ߟߊ߫ ߞߊ߲ ߕߏ߫ ߖߐ߲߬ߧߊ ߘߐ߫، ߌߟߋ ߣߊ߬ ߡߐ߱ ߡߍ߲ ߠߎ߬ ߜߍ߲߫ ߠߊ߫ ߞߏ߫ ߊ߬ߟߎ߬ ߦߋ߫ ߓߐ߫ ߌ ߟߊ߫ ߖߡߊ߬ߣߊ ߘߐ߫߸ ߣߴߌߟߋ ߞߊ߲߫ ߞߏ߫ ߌ ߥߙߎߞߌߢߊ߫ ߕߍ߫ ߝߴߏ߬ ߟߎ߬  ߣߴߊ߬ߟߎ߬ ߟߊ߫ ߞߊ߲߸ ߏ߬ ߟߎ߬ ߜߍ߲ߞߎ߲ ߞߍߣߍ߲߫ ߡߎ߲߬ ߘߴ ߏ߬ ߘߐ߫ ߣߌ߫ ߖߘߍ߬-ߡߊ߬-ߦߟߍ ߕߍ߫، ߞߵߊ߬ ߕߘߍ߬ ߘߏ߲ ߞߊ߲߫ ߡߊ߲߫ ߝߌ߬ߛߊ߬ ߞߊ߲߫ ߘߌ߫߸ ߞߊ߲ ߕߌ߮ ߟߎ߫ ߟߋ߬ ߝߌ߬ߛߦߊ߬ ߟߊ߫ ߢߐ߲߮ ߘߌ߫ ߊ߬ߟߎ߬ ߟߊ߫ ߛߓߍ߬ߘߏ߲ ߞߏߛߐ߲߬ ߢߐ߲߯ ߘߌ߫

ߞߎߡߊ ߣߌ߲߬ ߓߍ߯ ߞߎ߲߭ ߠߋ߬߸ ߓߊߏ߬ ߡߐ߰ ߛߌߦߊߡߊ߲߫ ߡߊ߫ ߞߊ߲ ߝߐ ߣߌ߫ ߞߊ߲ ߞߊ߬ߙߊ߲߬ ߘߊ߲߬ߝߘߊ߬ߓߐ ߟߐ߲߫ ߝߟߐ߫߸ ߓߊߏ߬߸ ߊ߬ ߦߋ߫ ߘߏ߫ ߟߎ߫ ߢߣߊ߫ ߟߋ߬ ߞߏ߫ ߣߴߌ ߦߋ߫ ߛߋ߫ ߟߊ߫ ߞߎߡߊ߫ ߟߴߌ ߛߊ߬ߥߏ ߟߊ߫ ߞߊ߲ ߡߍ߲ ߘߐ߫߸ ߌ ߡߊ߲ߞߊ߲߫ ߞߵߏ߬ ߞߊ߬ߙߊ߲߬ ߡߎ߲߬ߕߎ߲߬، ߞߵߊ߬ ߕߘߍ߬ ߘߏ߲߬߸ ߏ߬ ߟߎ߬ ߕߍ ߞߊ߫ ߖߊ߲߬ ߢߐ߲߮ ߠߊ߫ ߢߊ ߡߊ߬߸ ߡߍ߲ ߘߏ߲߰ߣߍ߲߬ ߕߍ߫ ߤߊ߲ߞߟߌߡߊ߫ ߛߌ߫ ߟߊ߫ ߓߌ߬، ߓߊߏ߬߸ ߘߎߢߊ߫ ߖߡߊ߬ߣߊ߬ ߥߙߎߞߌߣߍ߲ ߓߍ߯ ߦߵߊ߬ ߟߊ߫ ߞߊ߲ ߠߋ߬ ߞߊ߬ߙߊ߲߬ ߠߊ߫، ߏ߬ ߘߐ߫߸ ߊ߲ ߝߣߊ߫ ߕߍ߫ ߥߙߎߞߌ߫ ߝߋߎ߫ ߣߴߊ߲ ߡߊ߫ ߒ߬ ߠߊ߫ ߞߊ߲ ߞߊ߬ߙߊ߲߬.

ߡߎ߲߬ ߞߏߛߐ߲߬ ߊ߲ߜ߭ߑߟߋ ߦߋ߫ ߛߊ߲߬ ߂߀ ߣߌ߫ ߞߐ߫ ߞߍ߫ ߟߊ߫ ߞߊ߬ߙߊ߲ ߠߴߊ߬ ߟߊ߫ ߞߊ߲ ߟߐ߲ߣߍ߲ ߞߐ ߊ߬ ߓߟߏ߫، ߡߎ߲߬ ߠߴߊߙߊߓߎ ߦߋ߫ ߛߊ߲߬ ߂߀ ߣߌ߫ ߞߐ߫ ߞߍ߫ ߟߊ߫ ߞߊ߬ߙߊ߲ ߠߴߊ߬ ߟߊ߫ ߞߊ߲ ߟߐ߲ߣߍ߲ ߞߐ ߊ߬ ߓߟߏ߫، ߡߋ߬ߘߋ ߞߏߛߐ߲߬ ߝߊ߬ߙߊ߲߬ߛߌ ߦߋ߫ ߛߊ߲߬ ߂߀ ߣߌ߫ ߞߐ߫ ߞߍ߫ ߟߊ߫ ߞߊ߬ߙߊ߲ ߠߴߊ߬ ߟߊ߫ ߞߊ߲ ߟߐ߲ߣߍ߲ ߞߐ ߊ߬ ߓߟߏ߫، ߊ߬ ߣߌ߫ ߏ߬ ߟߋ ߞߏߛߐ߲߬ ߌ ߦߋ߫ ߊ߲߬ߜ߭ߑߟߋ߬ ߛߌߦߊߡߊ߲߫ ߦߋ߫ ߟߴߊ߬ ߓߘߊ ߞߵߊ߬ ߕߘߍ߬ ߊ߬ ߡߊ߫ ߞߍ߫ ߝߏߦߌ߬ ߘߌ߫، ߞߵ ߊ߬ߙߊ߬ߓߎ߬ ߥߙߍߓߊ ߦߴߊ߬ ߓߘߊ ߊ߬ ߡߊ߫ ߞߍ߫ ߝߋ߲߫ ߘߌ߫، ߞߊ߬ ߝߊ߬ߙߊ߲߬ߛߌ߬ ߞߙߎ ߦߴߊ߬ ߓߘߊ ߊ߬ ߡߊ߫ ߞߏߢߊ߬، ߊ߬ ߣߌ߫ … ߞߵߊ߬ ߕߘߍ߬ ߏ߬ ߟߎ߬ ߓߍ߯ ߦߴߊ߬ߟߎ߬ ߟߊ߫ ߞߊ߲ ߠߎ߬ ߝߐ߫ ߟߊ߫، ߡߎ߲߬ ߞߵߏ߬ ߟߎ߬ ߕߏ߫ ߞߐ߫؟ ߏ߬ ߝߊ߲߬ߓߊ ߞߎ߲߭ ߦߋ߫ ߞߊ߬ߙߊ߲߬ߓߊ߬ߟߌ߬ߦߊ ߣߌ߫ ߖߏ߯ ߓߘߍ߫ ߕߊ߲ߢߊ ߟߋ߬ ߘߌ߫.

ߦߏ߫ ߊ߲ߠߎ߬ ߝߊ߲߬ߓߊ ߛߊ߲߬ ߛߌߦߊߡߊ߲ ߦߋ߫ ߣߊ߲߬ߝߟߏ߬ ߢߌߣߌ߲ ߠߊ߫ ߢߊ ߡߍ߲ ߣߌ߲߬߸ ߞߵߊ߬ ߕߘߍ߬ ߊ߲ ߡߊ߫ ߞߍ߫ ߓߣߊ߬ ߘߌ߫، ߓߊߏ߬ ߡߐ߰ ߛߌߦߊߡߊ߲߫ ߓߘߊ߫ ߛߊ߲߬ ߃߀ ߞߍ߫ ߥߊߘߌ߫ ߢߌߣߌ߲ ߠߊ߫߸ ߞߵߊ߬ ߕߘߍ߬ ߘߟߊ߫ ߥߊ߯ ߓߌߛߓߊ߬ ߟߊߡߙߊ߬ߣߍ߲߬ ߕߴߊ߬ ߓߟߏ߫، ߞߵߊ߬ ߕߘߍ߬ ߘߏ߲߬ ߡߐ߰ ߛߌ߫ ߕߍ߫ ߛߋ߫ ߛߊ߲߬ ߃߀ ߞߍ߫ ߟߊ߫ ߟߐ߲ߠߌ߲߫ ߢߌߣߌ߲ ߠߊ߫߸ ߣߴߌ ߡߊ߬ ߞߏ߲߬ߓߏ߬ߦߊ ߣߌ߫ ߞߊ߬ߙߊ߲߬ߝߊ߬ߦߊ ߛߐ߬ߘߐ߲߬

ߓߊߏ߬߸ ߓߍ߯ ߞߵߊ߬ ߟߐ߲߫ ߞߏ߫ ߟߐ߲ߠߌ߲ ߡߍ߲ ߡߐ߰ ߞߍ߫ ߟߊ߫ ߝߋ߲߫ ߘߌ߫ ߸ ߏ߬ ߛߓߍߣߍ߲ ߠߋ߬، ߣߴߌ ߡߊ߫ ߛߋ߫ ߛߓߍ ߏ߬ ߟߋ ߞߊ߬ߙߊ߲߬ ߠߊ߫ ߞߵߊ߬ ߓߟߏߦߊ߫߸ ߌ ߕߍ߫ ߞߍ߫ ߝߋ߲߫ ߘߌ߫ ߝߋߎ߫، ߟߐ߲ߠߌ߲ ߏ߬ ߛߐ߬ߘߐ߲߬ ߛߌ߬ߟߊ߬ ߛߎߘߎ߲ ߠߋ߫ ߘߏ߲߬ ߦߋ߫ ߝߊ߬ߞߊ߲߬ ߞߊߙߊ߲ ߘߌ߫، ߏ߬ ߟߋ ߣߵߊ߬ ߞߍ߫ ߟߊ߫ ߥߊߟߌ߫ ߞߊ߲߫ ߞߊߙߊ߲ߠߊ ߟߎ߬ ߕߍ߫ ߞߎ߲߫ ߠߊ߫ ߝߊ߬ߞߊ߲߬ ߞߊ߬ߙߊ߲߬ߠߊ ߟߎ߬ ߘߐ߫ ߢߍߕߊ߯ߞߏ߫ ߛߌ߫ ߘߐ߫، ߊ߲ ߧߋ߫ ߥߙߎߞߌ ߡߍ߲ ߛߍ߬ߘߏ߲ ߠߊ߫ ߕߎ߬ߡߊ ߓߍ߯߸ ߏ߬ ߟߐ߬ߛߋ߲ ߠߋ߬ ߦߋ߫ ߘߍ߲ߖߘߍߟߦߊ ߡߍ߲ ߘߌ߫߸ ߏ߬ ߝߣߊ߫ ߞߎ߲߬ߞߟߏ ߦߋ߫ ߖߘߍ߬ߞߊ߲߬ ߞߊߙߊ߲ ߠߋ߬ ߘߌ߫߸ ߝߘߊ߬ߝߌ߲߬ߠߊ ߝߣߊ߫ ߓߘߴߏ߬ ߟߋ ߛߓߍߛߎ߲ ߘߏ߫ ߛߐ߬ߘߐ߲߫ ߣߌ߲߬ ߡߍ߲ ߕߐ߯ ߞߏ߫: (ߒߞߏ)، ߛߓߍߛߎ߲ ߏ߬ ߡߍ߲ ߘߌ߫ ߝߘߊ߬ߝߌ߲߬ߠߊ߬ ߓߍ߯ ߖߌ߰ߡߊ߬ߝߊ߫ ߢߍߕߊ߯ ߛߌߟߊ ߓߍ߯ ߞߊ߲߬ ، ߞߎߡߊ߫ ߕߍ߫ ߡߊ߲߬ߘߋ߲ ߠߎ߫ ߡߊ߬߸ ߞߵߊ߲ ߓߐ߫ ߦߟߌ߫ ߖߐ߲ߧߊ ߘߐ߫ ߟߐ߲ߠߌ߲ ߓߏߟߏ߲ ߓߍ߯ ߘߐ߫: ߟߐ߲ߠߌ߲ߦߊ ߣߌ߫ ߣߊߡߎ߲ ߣߌ߫ ߟߐ߲ߞߏ ߣߌ߫ ߘߐ߬ߝߐ ߣߌ߫ ߛߋߒߞߏߟߊߘߐߦߊ ߣߌ߫….

ߡߐ߰ ߛߌ߫ ߘߏ߲߬ ߕߴߛߋ߫ ߕߋ߬ߟߋ ߓߊ߬ߟߌ߬ ߟߊ߫ ߓߐߟߌ ߟߊ߫، ߏ߬ ߘߐ߫߸ ߒߞߏ ߟߊ߫ ߕߋ߬ߟߋ ߓߘߊ߫ ߓߐ߫، ߏ߬ ߟߋ ߣߊ߬ ߘߎߢߊ߫ ߝߊ߲߬ ߜߘߍ߫ ߟߎ߫ ߢߊ ߟߐ߬ ߟߴߊ߬ ߘߐ߫ ߞߵߊ߬ ߞߊ߬ߙߊ߲߬، ߣߴߌߟߋ ߡߴߊ߬ ߞߊ߬ߙߊ߲߬ ߏ߬ ߘߐ߫߸ ߌ ߦߴߏ߬ ߞߍ߫ ߟߴߌ ߖߘߍ߬ ߟߋ߬ ߟߊ߫، ߏ߬ ߘߐ߫߸ ߣߴߊ߲ ߧߴߊ߬ ߝߍ߬ ߞߊ߬ ߝߘߊ߬ߝߌ߲߬ߠߊ߫ ߦߟߍ߬ߡߊ߲߬ ߞߋߟߋ߲ߘߌ߫ ߞߵߊ߬ ߟߊߕߊ߯ ߥߙߎߞߌ ߛߌߟߊ ߞߊ߲߬߸ ߝߏ߫ ߣߴߊ߲ ߞߵߏ߬ ߞߍ߫ ߒߞߏ ߞߊ߬ߙߊ߲ ߣߴߊ߬ ߛߓߍߟߌ ߟߊ߫ ߒ߬ ߠߊ߫ ߞߊ߬ߙߊ߲߬ ߦߙߐ ߟߎ߬ ߓߍ߯ ߘߐ߫ ߞߐߘߍ߫،

ߓߊߏ߬߸ ߖߡߊ߬ߣߊ߬ ߛߌ߫ ߕߍ߫ ߛߋ߫ ߘߍ߲ߖߘߍߟߦߊ ߛߐ߬ߘߐ߲߬ ߠߊ߫ ߞߎߡߊ߫ ߕߍ߫ ߞߊ߬ ߥߙߎߞߌ߫ ߞߵߊ߬ ߟߊ߫ ߞߊ߲ ߕߏ߫ ߖߐ߲߬ߧߊ ߘߐ߫، ߊ߲ ߠߊ߫ ߛߎߘߊ߲ߠߌ߲ ߏ߬ ߘߏ߲߬ ߦߴߊ߲ ߖߍ߬ߘߍ ߣߴ ߊ߲ ߓߟߏߝߋ߲ ߠߎ߬ ߟߊߒߞߏߦߊ ߟߋ߬ ߓߟߏ߫. ߏ߬ ߓߟߏߡߊ߬  ߒߞߏ ߘߍߞߙߎ ߟߎ߬ ߦߋ߫ ߡߊ߲߬ߘߋ߫ ߛߊ߲߬ߞߎ߲ ߣߌ߲߬ ߛߊ߲߬ߦߟߍߡߊ߲ ߞߍ߫ ߟߊ߫ ߢߊ߫ ߝߌ߬ߟߊ߫ ߟߋ߫ ߡߊ߬، ߘߏ߫ ߟߎ߫ ߦߴߊ߬ ߞߍ߫ ߟߊ߫ ߞߊ߬ ߓߍ߲߬ ߘߎߢߊ߫ ߖߡߊ߬ߣߊ ߝߊ߲߬ߓߊ ߟߊ߫ ߛߊ߲߬ ߦߟߍߡߊ߲ ߡߊ߬، ߌ.ߛ. ߡߏߦߌ ߛߊ߲߬ߞߎ߲ ߞߊ߬ߣߌ߲߬، ߞߊ߬ ߓߌ߲ߠߊߥߎߟߋ߲ ߞߍ߫ ߛߊ߲߭ ߞߊߙߏ߫ ߝߟߐ ߘߌ߫، ߞߵߊ߬ ߣߌ߫ ߌߛߊߟߞߊ ߟߎ߬ ߛߊ߲߭ ߞߊߙߏ ߟߎ߬ ߓߍ߲߬ ߢߐ߲߮ ߡߊ߬߸

ߞߏ߬ߣߌ߲߬ ߒߞߏ ߕߐ߲߫ ߖߊ߯ߓߡߊ ߞߵߊ߬ ߢߊߦߋ߫ ߕߞߌߦߊ ߡߍ߲ ߛߌߟߊ ߝߍ߬߸ ߏ߬ ߟߋ ߞߏ߫ ߊ߲ ߠߊ߫ ߛߊ߲߬ߞߎ߲ ߘߍ߬ߡߍ߲߬ߘߌ߬ߣߍ߲߫ ߞߎ߲߬ߙߎ߲߬ߞߊ߲߬ߝߎ߬ߥߊ߫ ߡߍ߲ ߠߊ߫߸ ߞߊ߬ ߜߊ߬ߙߊ ߏ߬ ߖߍ߬ߘߍ ߞߍ߫ ߕߎߡߊ ߞߍ߫ ߛߊ߲߭ ߘߊߡߌߘߊ ߘߌ߫߸ ߣߴߏ߬ ߦߋ߫ ߞߏ߲ߞߏߘߓߌ ߣߌ߲߬ ߘߌ߫، ߓߊߏ߬ ߘߎߢߊ߫ ߛߊ߲߬ߞߎ߲ ߝߊ߲߬ߓߊ ߓߍ߯ ߦߋ߫ ߕߋ߲߬ ߠߋ߬، ߒߞߏ ߛߓߍߛߎ߲ ߝߣߊ߫ ߛߌ߲ߘߌߣߍ߲߫ ߞߏ߲ߞߏߘߌ߬ߓߌ ߢߌ߲߬ ߠߋ߬ ߟߊ߫.

ߏ߬ ߞߐ߫: ߢߌ߬ߣߊ߲߫ ߛߊ߲߬ߦߟߍߡߊ߲ ߓߘߊ߫ ߓߍ߲߬ ߘߎߢߊ߫ ߓߍ߯ ߖߊ߬ߞߊߙߏ ߡߊ߬ ߡߎߙߊߥߢߊ ߓߟߏ߫߸ ߞߊߙߏ ߣߌ߲߬ ߡߍ߲ ߦߋ߫ ߒߞߏߞߏ ߟߊߞߎߣߎ߲ߠߌ߲߫ ߛߊ߲ߞߊߥߟߌ߫ ߜߙߊ ߟߎ߬ ߞߍ ߕߎߡߊ ߘߌ߫ ߡߊ߬ߘߋ߲߬ ߞߣߐߟߊ ߣߴߊ߬ ߞߐߞߊ߲ߠߊ ߟߎ߬ ߘߐ߫، ߊ߲ ߧߋ߫  ߕߌ߲ߞߌ ߣߌ߫ ߓߊߛߌ߫ ߢߌߣߌ߲ ߣߌ߫ ߕߌߙߌ߲ߠߌ߲ ߢߌߣߌ߲߫ ߠߊ߫ ߒߞߏ ߘߏ߲߬ߞߏ ߟߎ߬ ߝߍ߬ ߘߎߢߊ߫ ߞߣߐ߬ߘߐ߬ߝߟߌ߬ߞߏ ߣߌ߲߬ ߘߐ߫߸ ߛߊ߫ ߏ߬ ߓߍ߲߬ߛߋ߲߬ߡߊ ߘߌ߫ ߞߍ߫ ߒߞߏ ߟߊ߫ ߖߘߍ߬ߡߊ߬ߛߐߘߐ߲ ߣߌ߫ ߢߍߕߊ߮ ߛߌߟߊ ߛߐ߬ߘߐ߲߬ߣߍ߲ ߘߌ߫.

ߊߟߎ߫ ߛߊ߲߬ߓߍߛߊ߲߬ߓߍ߫ ߡߊ߲߬ߘߋ߲߫ ߡߌ߬ߙߌ߲߬ߘߌ߹  ߊߟߊߡߊ߬ ߛߊ߲߬ ߛߌߦߊߡߊ߲߫ ߘߌ߫ ߘߴߊ߲ ߡߊ߬ ߛߌ߬ ߖߊ߲ ߣߌ߫ ߞߍ߲ߘߍߦߊ ߣߌ߫ ߟߐ߲ߠߌ߲߫ ߕߣߐߡߊ ߣߌ߫ ߖߏ߯ߓߘߍ ߣߌ߫ ߖߛߎ߬ߛߎߡߊ ߞߣߐ߫.

ߊߟߎ߫ ߣߌ߫ ߗߋ߫ ߊߟߎ߫ ߣߌ߫ ߖߐ߫.

ߒߞߏ ߕߐ߲߫ ߖߊ߯ߓߡߊ ߝߘߏ߬ߓߊ߬ ߞߟߊ߬ߕߌ߬ߘߊ:

ߞ. ߖߌ߬ߓߙߌ߬ߟߊ߫ ߖߊ߰ߣߍ߬/ߒߞߏ ߕߐ߲߫ ߖߊ߯ߓߡߊ ߝߘߏ߬ߓߊ߬ ߞߟߊ߬ߕߌ߮ ߣߌߦߐߙߞ/ ߊߡߋߙߌߞߌ߬ ߞߊ߬ߝߏ߫ ߘߍ߬ߣߍ߲