ߞߐ߬ߘߎ߯ ߡߊ߲ߞߊ߲ ߓߍ߲߬ߒߘߐ ߛߌ߲߬ߝߏ߲ ߠߎ߬ ߦߋ߫ ߓߙߊߓߐ ߟߊ߬

ߟߌ߲ߓߊ߲ ߡߊ߲ߞߊ߲ ߞߐ߬ߘߎ߯ ߓߍ߲߬ߞߊ߲ ߢߌ߲߬ߧߊ ߛߌ߲߬ߝߏ߲ (ߏߕߊ߲߫) ߠߎ߬ ߦߋ߫ ߓߙߊߓߐ ߓߟߋߓߟߋ ߘߏ߫ ߞߊ߲߬ ߕߊ߲߬ ߣߐߙߑߝ߭ߍߗ߭߸ ߞߵߊ߬ ߟߊߥߟߌ߬ ߝߊ߲߬ߞߊ߬ ߡߊ߬ߦߌߘߊ ߡߊ߬ ߌ߬ߙߌ߬ߛߌ߫ ߟߊ߫.
ߓߙߊߓߐ ߣߌ߲߬ ߘߊߡߌ߬ߣߊ߬ ߘߊ߫ ߓߌߟߏ߲ ߠߋ߬ ߡߊ߬߸ ߞߏ߲ߓߌߕߌ߮ ߂߅/߂߀߁߈ ߠߊ߫߸ ߊ߬ ߞߎ߲߭ߘߏ߲߬ ߕߐ߫ ߣߍߣߍߓߊ ߕߟߋ߬ ߇ ߟߋ߬ ߡߊ߬߸ ߊ߬ߟߋ߬ ߂߀߁߈ ߞߋߟߋ߲ ߣߌ߲߬ ߠߊ߫.
ߞߊ߬ߦߌ߯ ߞߟߍ߬ ߜߟߌߟߌ ߓߊ߲߫ ߘߊ߫߸ ߟߌ߲ߓߊ߲ ߡߊ߲ߞߊ߲ ߞߐ߬ߘߎ߯ ߓߍ߲߬ߞߊ߲ ߢߌ߲߬ߧߊ ߛߌ߲߬ߝߏ߲ ߠߎ߬ ߕߘߍ߬ ߡߊ߫ ߣߌ߲߬ ߢߐ߲߰ߘߐ߫ ߓߙߊߓߐ߫ ߜߘߍ߫ ߞߍ߫ ߡߎߣߎ߲߬.
ߓߙߊߓߐ ߣߌ߲߬ ߛߏ߯ߙߏߣߍ߲߫ ߦߋ߫ ߣߊ߲߬ߕߌ߰ ߥߊ߯ ߅߀߸ ߜߙߋ ߣߌ߫ ߖߌ߫ ߞߟߍߛߘߍ߫ ߥߊ߯ ߁߀߸ ߊ߬ ߣߌ߫ ߞߟߍ߬ߞߍ߬ ߛߊ߲ߡߊߞߎߟߎ߲߫ ߂߅߀ ߟߎ߫ ߟߋ߬ ߟߊ߫.
ߟ.ߡ.ߞ.ߓ (ߏߕߊ߲ ߥߟߊ߫ ߣߋߕߏ) ߞߊ߬ ߛߌߟߊ ߘߌ߫ ߣߊ߲߬ߕߌ߮ ߟߎ߫ ߡߊ߬ ߓߌߟߏ߲ ߠߋ߬ ߡߊ߬ ߞߏ߲ߓߌߕߌ߮ ߂߅ ߂߀߁߈ ߠߊ߫߸ ߞߏ߫ ߞߊ߬ ߣߊ߲߬ߕߌ߮ ߟߎ߬ ߡߊߞߊ߬ߙߊ߲߬ ߌ߬ߙߌ߬ߛߌ߬ ߢߊߞߘߐ߫߸ ߊ߬ ߢߐ߲߰ߘߐ߫ ߣߵߊ߬ ߣߊ߬ߘߊ߫ ߓߍ߲߬ ߛߌ߲߬ߝߏ߲ ߘߏ߫ ߜߏ߬ߙߏ ߡߊ߬ ߌ߬ߙߌ߬ߛߌ߫ ߓߟߏ߫߸ ߏ߬ ߡߍ߲ ߦߴߊ߬ ߝߐ ߞߊ߲߬ ߞߏ߫ ߣߊ߲߬ߕߌ߰ ߕߏߟߏ߲ ߣߌ߲߬ ߞߍ ߦߵߌ ߘߐ߫ ߊ߬ߟߋ ߛߌ߬ߣߊ߬ߦߊ ߟߋ߬ ߡߊ߬.
ߞߐ߲߬ߛߏ߬ ߁߀߀߀߀߸ ߕߊߞߎߟߎ߫ ߃߅߸ ߣߊ߲߬ߕߌ߰ ߅߀.߀߀߀߸ ߊ߬ ߣߌ߫ ߛߊ߲ߡߊߞߎߟߎ߲߫ ߂߅߀߸ ߞߊ߬ ߓߐ߫ ߞߊ߬ߝߏ߬ ߃߅ ߘߐ߫߸ ߏ߬ ߟߎ߫ ߟߋ߬ ߞߵߊ߬ߟߎ߫ ߕߏ߲߬ߘߊ ߕߊ߬ ߟߊ߫߸ ߞߊ߬ ߥߊ߫ ߕߘߍ߬ ߝߊ߲߬ߞߊ߬ ߡߊ߬ߦߌߘߊ ߕߏߟߏ߲ ߣߌ߲߬ ߘߐ߫߸ ߌ߬ߙߌ߬ߛߌ߫ ߛߌ߰ߢߐ߲߰ ߖߡߊߣߊ ߣߌ߲߬ ߘߐ߫.
ߟ.ߡ.ߞ.ߓ ߗߋߕߌ߮ ߖߍ߲ߛ ߛߑߕߏߟߑߕߏ߲ߓߍߙߜ߭ ߞߍߕߐߟߊ ߞߍߣߍ߲ ߟߞߊ߬ߟߌ߬ ߓߋߟߋ߲ߠߊ ߞߊ߬ߙߊ߲߬ ߠߊ߫߸ ߊ߬ ߞߊ߲߫ ߞߏ߫ ߋߙߐߔߎ߬ ߟߊ߬ߞߊ߲߬ߘߊ߬ߟߌ ߓߘߴߊ߬ ߞߐߕߊ߲߫ ߛߊ߲߬ ߘߊ߲ߘߐ߫ ߕߊ߬ߡߌ߲߬ߣߍ߲ ߢߌ߲߬ ߠߎ߬ ߞߘߐ߫, ߒ߬ ߠߊ߫ ߝߊ߲߬ߞߊ߬ ߡߊ߬ߦߌߘߊ ߣߌ߲߬ ߞߍߕߐ߫ ߗߋߞߊ߲ ߘߏ߫ ߟߋ߬ ߗߋ߫ ߟߊ߫ ߒ߬ ߡߌ߬ߙߌ߲߬ߘߌ ߟߎ߬ ߡߊ߬߸ ߊ߬ ߣߌ߫ ߟߊߒߖߘߍ߬ߟߊ ߡߍ߲ ߠߎ߬ ߦߋ߫ ߛߌߛߌߘߐߜߊߛߌ ߞߊ߲߬߸ ߟ.ߡ.ߞ.ߢ.ߓ ߕߍߣߵߊ߬ߟߎ߬ ߞߍ߫ ߟߊ߫ ߡߐ߱ ߞߊ߲߬ ߘߋ߬߸ ߞߏ߬ߣߌ߲߬ ߊ߬ߟߎ߬ ߘߌ߫ ߞߐ߲߬ߞߐ߲߬ߡߊ߬ߟߌ ߓߍ߯ ߟߊߢߐ߬ߣߌ߲߬ ߞߊ߬ ߓߐ߫ ߛߌ߲߬ߝߏ߲ ߠߎ߬ ߞߊ߲߫.
ߤߊߞߟߌߣߊ߲ ߛߎ߮ ߓߍ߯ ߘߏ߫ ߟߋ߬ ߦߋ߫ ߌ߬ߙߌ߬ߛߌ߬ ߟߊ߫ ߕߊ߲߬߸ ߞߊ߬ ߓߍ߲߬ ߕߌ߲߬ߞߎߘߎ߲ ߛߌ߰ߝߊߘߌ ߡߊ߬߸ ߓߊ ߤߊߟߌ߬ ߣߴߊ߬ ߕߘߍ߬ ߘߊ߫ ߞߴߊ߬ ߞߏߢߐ߲ ߡߊ߫ ߜߍߘߐ߫ ߘߊ߲ߕߍ߯ߟߌ߫ ߜߘߍ߫ ߞߍ߫߸ ߊ߬ ߘߏ߲߬ ߞߎߘߍ߫ ߁߉߈ ߓߐߕߏ߲ ߠߋ߬ ߦߋ߫ ߣߐߙߑߝ߭ߍߗ߭ ߣߌ߫ ߌ߬ߙߌ߬ߛߌ߬ ߕߍ߫. ߎ߳ߞߍߙߍ߲ߣ ߕߟߋ߬ߓߐ ߘߐߕߏ߰ߝߏ߬ߕߊ߯ߝߊ߫ ߣߍ߲߫ ߌ߬ߙߌ߬ߛߌ߬ ߡߊߛߎߘߎ߲ߧߊߓߊ߮ ߘߍ߲ߖߘߍߟߦߊ߫ ߢߌߣߌ߲ߠߊ ߟߎ߬ ߟߋ߬ ߓߟߏ߫߸ ߎ߳ߞߍߙߍ߲ߣ ߣߌ߫ ߟ.ߡ.ߞ.ߢ.ߓ ߠߎ߬ ߦߴߊ߬ ߓߛߌ߬ߞߌ߬ ߟߊ߫ ߞߏ߫ ߌ߬ߙߌ߬ߛߌ߫ ߟߵߏ߬ ߟߎ߬ ߞߐߞߘߐ߫. ߌ߬ߙߌ߬ߛߌ߫ ߟߋ߬ ߥߊߘߴߊ߬ ߡߊߞߍ߫ ߞߙߌߡߋ߫߸ ߊ߬ ߣߴߊ߬ ߞߊ߬ ߣߊ߲߬ߕߌ߰ ߝߊ߲߬ߞߊ߬ ߡߊ߬ߦߌߘߊ ߘߍ߰ߜߍ ߘߏ߫ ߞߍ߫ ߕߟߋ߬ߓߐ ߘߐ߫ ߕߎߟߊߝߌ߲߫ ߕߊ߬ߡߌ߲߬ߣߍ߲ ߠߊ߫.
ߌ߬ߙߌ߬ߛߌ߬ ߞߊ߲߯ ߠߋ߫ ߞߏ߫ ߊ߬ߟߋ ߛߌ߬ߣߦߊ߬ ߓߙߊߓߐ ߟߋ߬ ߦߵߌ ߘߐ߫ ߕߋ߲߬.
ߌ߬ߙߌ߬ߛߌ߬ ߟߊ߫ ߟߊ߬ߛߌ߰ߘߋ߲ ߡߍ߲ ߦߋ߫ ߏߛߑߟߏ߫߸ ߏ߬ ߞߊ߲߲߯ ߞߏ߫ ߕߟߋ߬ߖߌ߰ߞߊ ߟߎ߬ ߦߴߊ߬ ߝߐ ߞߊ߲߬ ߕߋ߲߬ ߝߛߊߦߌ߫߸ ߞߏ߫ ߊ߬ߟߎ߬ ߦߋ߫ ߡߊ߬ߞߊ߲߬ߞߊ߲߬ߠߌ߲ ߠߋ߬ ߞߊ߲߬߸ ߞߏ߬ߣߌ߲߬ ߕߟߋ߬ߖߌ߮ ߕߍ߫ ߘߏ߫ ߜߘߍ߫ ߞߊ߲߬ ߊ߬ߟߎ߬ ߟߊ߫ ߣߊ߲߬ߕߌ߮ ߟߎ߫ ߘߊ߬ߙߌ ߞߐ߫ ߞߐ߬ߘߎ߮ ߣߍߣߍ߫ ߜߍߟߍ߲ ߠߊ߫. ߌ߬ߙߌ߬ߛߌ߬ ߦߴߊ߬ ߝߐ ߞߊ߲߬ ߞߏ߫ ߣߌ߲߬ ߦߋ߫ ߞߟߍ߬ߕߍ߰ ߓߙߊߓߐ ߟߋ߬ ߘߌ߫߸ ߊ߬ߟߎ߬ ߟߊ߫ ߕߍߓߊ߯ߦߊ ߗߋߕߌ߮ ߡߊߙߌߦߊ߫ ߖ߭ߞߊߙߏߝ߭ߊ߫ ߞߊ߲߫߸ ߞߏ߫ ߣߌ߲߬ ߛߎ߮ ߢߐ߲߰ ߓߊߟߌ߫ ߕߛߋ߫ ߕߏ߫ ߟߊ߫.
ߊ߬ߟߎ߬ ߕߍ߯ߟߊ ߦߋ߫ ߕߊ߬ߡߌ߲߬ ߠߊ߫ ߝߊ߬ߝߊ߬ ߟߊ߫ ߟߋ߬.
ߕߟߋ߬ߖߌ߰ ߖߡߊߣߊ ߟߎ߬ ߝߊ߲߬ߓߊ ߟߎ߫ ߟߊ߫ ߣߊ߲߬ߕߌ߮ ߟߎ߬ ߦߋ߫ ߕߊ߬ߡߌ߲߬ ߣߴߊ߬ߟߎ߬ ߡߍ߬ߙߍ߲߬ ߠߊ߫ ߟߋ߬ ߌ߬ߙߌ߬ߛߌ߬ ߓߐߕߏ߲ ߠߊ߫߸ ߏ߬ ߘߏ߲߬ ߡߊ߲ߘߌ߫ ߌ߬ߙߌ߬ߛߌ߬ ߢߍ߫߸ ߊ߬ ߘߐߞߏߟߏ߲ ߕߏ߫ ߡߊ߲ߘߌ߫. ߞߊ߬ߝߏ߫ ߘߍ߬ߣߍ߲ ߞߊ߲ߕߌ߯ ߘߏߣߊߟߘ ߕߑߙ߭ߐߔ ߓߊ߲ߞߐ ߘߐ߫ ߊ߬ ߢߌ߬ߣߊ߬ߓߐ߫ ߟߊ߫ ߜߙߋ ߟߎ߬ ߣߌ߫ ߢߐ߲߯ߕߍ߫ ߝߕߌߝߏߘߏ߲ ߓߍ߲߬ߞߊ߲ ߘߐ߫ ߞߊ߬ߝߏ߫ ߝߌ߬ߟߊ ߕߍ߫߸ ߏ߬ ߡߍ߲ ߞߟߊ߬ߣߐ߰ߦߊ߬ ߘߊ߫ ߁߉߈߇ ߟߊ߫߸ ߏ߬ ߓߘߊ߫ ߕߊ߬ߡߌ߲߬ ߊ߬ߟߎ߬ ߕߍ߯ߜߟߍ߬ߦߊ߬ ߟߊ߫ ߓߘߍߞߍ߭.
ߖߡߊ߬ߣߊ ߂߉ ߟߎ߫ ߟߋ߬ ߓߐߣߍ߲߫ ߝߊ߲߭ ߕߐ߭ ߟߎ߬ ߘߐ߫ ߞߊ߬ ߣߊ߬߸ ߞߵߏ߬ ߟߎ߫ ߓߍ߯ ߟߊ߫ ߛߑߥߍߘ ߣߌ߫ ߣߐߙߑߝ߭ߍߗ߭ ߞߊ߲߬.
ߟߊ߲߭ߛߌ߬ߣߍ߬ ߞߎ߲ߝߊ߲ߕߐ߫ ߝߏߝߣߊ߫// ߛߏ߬ߟߏ ߝߙߊ߬ߓߊ-ߘߐ߫ ߛߌ߬ߛߋ߫ ߓߟߏ߫