ߋ߯ ߡߊ߰ߙߌ߬ ߛߊߣߌ߲߹ ߊ߬ ߕߏߣߍ߲߫ ߛߊ߬ߦߊ ߟߋ߫ ߡߊ߬، ߞߊ߬ߙߊ߲߬ߡߐ߰ ߢߍߓߊ߮ ߎߛߎߡߊ߯ߣ ߞߋߕߊ߬ ߕߊ ߕߏ߫ ߘߊ߫ ߛߏߡߊߦߟߍߡߊ߲ ߡߊ߬ ߣߌߦߐߙߞ ߞߏ߲ߞߏߜߍ ߇/߇߈߉/߂߀߂߅.
ߊ߬ߟߋ߬ ߛߟߊߕߌ߯ ߢߍߓߊ߮ ߎߛߑߡߊߣ ߞߋߕߊ߬ ߡߏߦߌ߫ ߘߊ߫ ߞߏ߲ߞߏߘߌ߬ߓߌ ߕߟߋ߬ ߁߉/߁߉߇߈ ߣߐ߲߬ߜ߭ߏ߬ߥߊ߫/ ߜߞߋߘߎ߯ / ߖߌ߬ߣߍ߬ ߞߊ߲ߓߍ߲߫ ߸ ߊ߬ ߝߊ߬ ߕߐ߯ ߞߏ߫: ߊߡߊ߬ߘߎ߬ ߞߋߕߊ߬ ، ߊ߬ ߓߊ߫ ߕߐ߯ ߞߏ߫: ߊߡߌߣߊߕߊ߬ ߞߓߊ߬.
ߞߏ߬ߣߌ߲߬߸ ߣߴߌ ߞߵߌ ߡߙߌ߫ ߞߵߊ߬ ߦߋ߫ ߞߏ߫ ߡߐ߰ ߛߌ߫ ߡߊ߫ ߣߵߊ߬ ߖߘߍ߬ ߘߌ߫ ߘߎߢߊ ߣߌ߲߬ ߘߐ߫، ߓߍ߯ ߞߵߊ߬ ߖߘߍ߬ ߦߋ߫ ߦߊ߲߬ ߊߟߊ߫ ߟߊ߫ ߟߊ߬ߢߌߣߌ߲ ߣߴߊ߬ ߟߊ߫ ߟߊ߬ߕߍ߮ ߟߋ߫ ߡߊ߬ ߸ ߕߎ߬ߡߊ ߘߏ߫ ߣߌ߫ ߦߙߐ ߘߏ߫ ߣߌ߫ ߡߏߦߌߓߊ߮ ߘߏ߫ ߓߟߏ߫ ߸ ߡߍ߲ ߕߍ߫ ߡߐ߰ ߛߌ߫ ߟߊ߫ ߢߍߥߟߊߦߊߟߌ ߘߌ߫ ߞߊ߲߬ ߞߐ߲߰ ߌ ߟߊ߫ ߣߊ߬ߟߌ ߢߍ߫ ߘߎߢߊ߫ ߘߐ߫ ߦߊ߲߬، ߏ߬ ߟߋ ߞߏߛߐ߲߬߸ ߡߐ߰ ߛߌ߫ ߝߣߊ߫ ߛߋ߫ ߕߍ߫ ߞߐߛߊߦߌ߲ߠߌ߲ ߘߐ߫ ߞߊ߬ ߓߐ߫ ߘߎߢߊ߫ ߘߐ߫ ߦߊ߲߬ ، ߏ߬ ߝߣߊ߫ ߓߍ߯ ߦߋ߫ ߝߘߊ߫ ߟߊ߫ ߡߊ߰ߙߌ߬ߓߊ߬ ߞߟߊߒߞߋ߫ ߘߊ߲ߓߊ߯ ߛߋߕߌ߮ ߟߊ߫ ߢߍߥߟߊ ߣߴߊ߬ ߟߊ߫ ߟߊ߬ߕߍ߮ ߟߋ߬ ߟߊ߫.
ߊ߲ ߓߍ߯ ߞߏ߬ߣߌ߲ ߞߵߊ߬ ߟߐ߲߫ ߞߏ߫ ߛߊ߬ߦߊ ߕߍ߫ ߡߐߣߍ߫ ߛߌ߫ ߘߏ߲߬ ߠߊ߫ ߓߊ߯ߙߊ߫ ߞߍ߲ߘߍ߫ ߞߍߟߊ ߘߐ߫ ߝߊ߲߭ ߝߌ߬ߟߊ ߣߌ߲߬ ߛߌ߫ ߘߐ߫، ߞߌߢߍ߲߫ ߣߌ߫ ߛߎ߬ߟߊ߫ ߞߊ߬ߣߌ߲، ߓߊߏ߬ ߡߐ߱ ߡߍ߲ ߠߎ߬ ߟߐ߲ߣߍ߲߫ ߘߎߢߊ ߣߌ߲߬ ߘߐ߫߸ ߏ߬ ߟߋ ߞߏߢߣߡߊ߫ ߞߍߟߊ ߟߎ߬ ߘߌ߫، ߤߊߟߌ߬ ߡߍ߲ ߠߎ߬ ߟߊ߫ ߛߊ߬ߦߊ ߓߘߊ߫ ߛߊ߲߬ ߥߊ߯ ߦߙߌߞߊ ߓߐ߫، ߏ߬ ߘߏ߲߬ ߦߋ߫ ߕߋ߲߬ ߠߋ߬ ߝߏ߫ ߞߊ߬ ߘߎߢߊ߫ ߓߊ߲߫، ߛߎ߬ߟߊ߬ ߕߊ ߘߏ߲߬ ߝߣߊ߫ ߦߋ߫ ߢߊ߫ ߞߋߟߋ߲ ߏ߬ ߟߋ ߡߊ߬، ߓߊߏ߬ ߛߎ߬ߟߊ߫ ߢߊ߭ ߦߋ߫ ߓߐ߫ ߟߊ߫ ߞߌߢߍ߲߫ ߢߊ߬ߟߌ ߟߋ߬ ߘߐ߫، ߦߏ߫ ߊߟߊ߫ ߞߵߏ߬ ߝߐ߫ ߘߐ߬ߛߊ߬ߙߌ߬ߓߊ ߞߣߐ߫ ߢߊ ߡߍ߲ ߞߏ߫:
﴿ ߡߍ߲ ߓߊ߯ ߢߌ߬ߡߊ߬ ߞߍ߫ ߗߍ߬ߡߊ߲߬ ߘߐ߫ ߥߟߊ߫ ߡߛߏ߬ߡߊ߲߬ ߘߐ߫ ߸ ߊ߬ ߘߏ߲߬ ߦߋ߫ ߘߍ߲߬ߞߣߍ߬ߦߊ߬ߓߊ߯ ߘߌ߫، ߊ߲ ߘߌߣߵߏ߬ ߟߊߢߣߊߡߦߊ߫ ߢߣߊߡߦߊ߫ ߢߌߡߊ߫ ߟߊ߫، ߊ߬ ߣߴߊ߲ ߘߴߏ߬ ߟߎ߬ ߛߐ߫ ߊ߬ߟߎ߫ ߛߊ߬ߙߊ ߟߊ߫߸ ߞߵߊ߬ ߓߍ߲߬ ߊ߬ߟߎ߬ ߗߋߥߊߟߌ ߘߐ߫ ߢߌ߬ߡߊ ߡߊ߬﴾. ߟߞߌߛߍ ߟߝߊߙߌ ߉߇߲.
ߣߴߊ߲ ߞߊ߬ ߟߝߊߙߌ ߣߌ߲߬ ߞߘߐ ߢߊߦߋ߫، ߊ߲ ߕߍ߫ ߞߊ߬ߛߌ߬ ߟߊ߫ ߓߊߞߍ߫ ߢߍߓߊ߮ ߟߊ߫ ߛߏߛߊߦߌ ߘߐ߫، ߓߊߏ߬ ߓߊ߯ߙߊ ߢߌߡߊ ߟߎ߫ ߛߊ߬ߙߊ ߘߝߊߣߍ߲ ߕߊ߬ߕߐ߬ ߡߍ߲ ߘߌߦߊ߫ ߊ߬ߙߌ߬ߖߣߍ߫ ߡߍ߲ ߘߐ߫߸ ߏ߬ ߕߍ߫ ߛߋ߫ ߛߐ߬ߘߐ߲߬ ߠߊ߫ ߞߌߢߍ߲߫ ߘߎߢߊ߫ ߣߌ߲߬ ߘߐ߫ ߝߏ߫ ߌ ߓߊ߯ ߛߊ߬، ߏ߬ ߘߐ߫ ߛߏߡߊߦߟߍߡߊ߲ ߦߋ߫ ߖߘߍ߬ߞߟߏ߬ߦߊ߬ߓߊ߮ ߡߊ߬ ߤߙߍ ߟߋ߬ ߘߌ߫، ߞߊ߬ ߓߐ߫ ߘߎߢߊ߫ ߛߍ߱ ߣߌ߲߬ ߘߐ߫ ߞߊ߬ ߡߍ߲ߘߌߦߊ߫ ߣߊߞߐ ߡߊߜߍ߲߫.
ߊߟߊ߫ ߟߊ߫ ߞߋߟߊ ߡߊ߬ߡߊߘߌ߫ ߞߵߊ߬ ߦߌ߬ߘߊ߬ (ߕ.ߖ.) ߞߏ߫: [ ߞߌߢߍ߲߫ ߦߋ߫ ߖߘߍ߬ߞߟߏ߬ߦߊ߬ߓߊ߰ ߓߘߍ ߟߊ߫ ߥߛߎ ߟߋ߬ ߘߌ߫.
ߏ߬ ߝߣߊ߫ ߞߘߐ ߟߋ߬ ߞߏ߫ ߖߘߍ߬ߞߟߏ߬ߦߊ߬ߓߊ߰ ߓߘߍ ߛߊ߬ ߟߏ߲ ߦߴߊ߬ ߓߐ߫ ߟߏ߲ ߠߋ߬ ߘߌ߫ ߥߛߎ ߟߊ߫، ߓߍ߯ ߘߏ߲߬ ߞߵߊ߬ ߟߐ߲߫ ߞߏ߫ ߡߐ߱ ߓߐ߫ ߟߏ߲ ߥߛߎ ߟߊ߫߸ ߏ߬ ߦߴߊ߬ ߛߍߥߊ߫ ߟߏ߲ߓߊ ߘߏ߫ ߟߋ߬ ߘߌ߫.
ߤߊߟߌ߬ ߣߴߊ߲ߠߎ߫ ߞߊ߬ߛߌ߬ ߘߊ߫ ߓߌ߬߸ ߊ߲ߠߎ߬ ߟߊ߫ ߓߛߌ߬ߞߌ߬ߟߌ ߘߐ߫߸ ߊߟߋ ߛߍߥߊߣߍ߲ ߠߋ߬ ߓߌ߬ ߊ߬ ߟߊ߫ ߥߛߎ߫ ߟߊߓߐ ߟߊ߫ ߞߵߊ߬ ߝߊ߬ ߣߴߊ߬ ߓߋ߲ߓߊ߫ ߟߎ߫ ߣߌ߫ ߡߐ߰ߓߊ߬ ߓߘߍ߬ ߝߎߙߋ ߟߎ߬ ߡߊߜߍ߲߫.
ߞߵߊ߬ ߝߐ߫ ߞߏ߫ ߊ߬ ߡߊ߫ ߛߌ߬ ߖߊ߲߫ ߛߐ߬ߘߐ߲߬߸ ߍ߲߬ߍ߲ߍ߲߬ ߓߊ߯ߙߊ ߡߍ߲ ߡߐ߰ ߛߌ߭ ߖߊ߲߬ߧߊ߬ ߟߊ߫߸ ߊ߬ ߞߵߏ߬ ߘߏ߫ ߞߍ߫، ߌ ߘߏ߲߬ ߓߊ߯ ߊ߬ ߝߐ߫ ߥߛߎߟߊߡߐ߮ ߡߊ߬ ߞߏ߫ ߊ߬ ߦߴߊ߬ ߝߍ߬ ߞߊ߬ ߥߎ߬ߛߎ ߡߍ߲ ߞߍ߫ ߥߛߎ ߟߊ߫߸ ߊ߬ ߦߴߏ߬ ߛߓߍ߫ ߊ߬ ߖߍ߬ߘߍ߫ ߞߎ߲߬߸ ߒ ߡߴߊ߬ ߟߐ߲߫ ߣߌ߫ ߡߐ߰ ߘߌ߫ ߛߌߦߊߡߊ߲߫ ߛߓߍ߫ ߊ߬ ߖߍ߬ߘߍ߫ ߞߎ߲߬.
ߏ߬ ߘߐ߫߸ ߞߊ߬ߓߌ߯ ߊ߲ ߞߊ߬ ߢߍߓߊ߮ ߎߛߎߡߊߣ ߞߋߕߊ߬ ߟߊ߫ ߛߏߡߊߦߟߍߡߊ߲ߞߏ ߡߍ߲߫߸ ߊ߲ ߞߊ߬ ߒ߬ ߠߊ߫ ߣߊߡߎ߲ ߞߊ߲ ߠߋ߬ ߟߊߕߋߟߋ߲߫ ߝߟߐ߫ ߞߏ߫: ﴿ߒ߬ ߓߍ߯ ߦߋ߫ ߊߟߊ߫ ߟߋ߬ ߦߋ߫ ߸ ߒ߬ ߓߍ߯ ߘߏ߲߬ ߛߊ߬ߦߌ߬ߕߐ߫ ߊ߬ߟߋ ߟߋ߫ ߡߊ߬﴾ ߸ ߏ߬ ߞߐ߫ ߞߊ߬ ߕߌ߲ߞߌ߫ ߊ߬ ߦߋ߫ ߞߏ߫: ߊߟߊߡߊ߬ ߦߝߊ߬ ߞߍ߫ ߘߴߊ߬ ߡߊ߬، ߞߵߊ߬ ߟߊߦߙߐ ߛߎߡߊ߫، ߞߵߊ߬ ߝߙߊ߬ ߞߎ߲߬ߠߊ߲߬ߘߌ߬ ߝߎߙߋ ߟߎ߫ ߞߊ߲߬، ߞߵߊ߬ ߞߐ ߣߴߊ߬ ߢߍ ߘߐߓߍ߲߬، ߞߵߊ߬ ߓߐ߲ߛߐ߲ ߠߎ߬ ߟߊߢߊ߬.
ߏ߬ ߘߐ߫ ߣߌ߲߬ ߞߊ߬ߛߌ ߡߊ߲߫ ߖߊ߲߬، ߓߊߏ߬߸ ߊ߬ ߞߊ߬ ߓߊ߯ߙߊ ߓߘߍ ߣߌ߫ ߡߊ߲߬ߞߕߎ߬ ߢߌߡߊ ߡߍ߲ ߠߎ߬ ߕߏ߫ ߊ߬ ߞߐ߫߸ ߏ߬ ߟߎ߬ ߘߌ߫ ߥߛߊ߬ ߞߍ߫.
ߓߊߏ߬߸ ߓߍ߯ ߞߵߊ߬ ߟߐ߲߫ ߕߐ߬ߣߐ ߡߍ߲ ߦߋ߫ ߓߊ߯ߙߊ ߓߘߍ ߟߊ߫ ߘߎߢߊ߫ ߣߌ߫ ߟߊߞߌߙߊ߫߸ ߊ߬ ߦߋ߫ ߡߍ߲ ߢߊ߬ ߟߊ߫ ߡߐ߰ ߣߴߌ ߡߌ߬ߙߌ߲߬ߘߌ ߡߊ߬ ߘߎߢߊ߫ ߘߐ߫ ߦߊ߲߬ ߡߐ߰ ߡߴߏ߬ ߘߊ߲߬ ߟߐ߲߫߸ ߏ߬ ߕߐ߬ߣߐ ߓߊ߯ ߥߙߊ߬ ߢߊ-ߊ- ߢߊ߫ ߛߎ߬ߟߊ߬ ߕߊ ߓߏ߲߬ߓߊ߫ ߏ߬ ߘߌ߫ ߔߊߣߊ߲ߎ߫߸ ߓߊߏ߬ ߞߌߢߍ߲߫ ߕߊ ߣߌ߲߬ ߓߊ߲ߕߐ߫ ߟߋ߬، ߞߏ߬ߣߌ߲߫ ߛߎ߬ߟߊ߬ ߕߊ ߕߍ߫ ߓߊ߲߫. ߓߊߏ߬ ߖߏ߯ ߓߘߍ ߏ߬ ߟߎ߫ ߟߵߌ ߘߍ߬ߡߍ߲߬ ߠߴߊߟߊߢߌߣߌ߲߫ ߓߊ߯ߙߊ ߟߎ߫ ߡߊ߬ ߊ߬ ߣߌ߫ ߞߌߢߍ߲߫ ߖߛߎ߬ߛߎ߬ߡߊ߬ߞߏ ߟߎ߬ ߟߊ߫߸ ߣߴߌ ߛߊ߬ ߘߊ߫ ߞߵߏ߬ ߟߎ߬ ߕߏ߫ ߌ ߞߐ߫߸ ߞߊ߬ ߓߊ߲߫ ߞߵߌ ߞߐ ߘߐߓߍ߲߬، ߏ߬ ߟߋ ߞߏߛߐ߲߬߸ ߓߍ߯ ߦߴߊ߬ ߝߍ߬ ߏ߬ ߟߎ߬ ߦߋ߫ ߢߊ߬.
ߊߘߡߊߘߋ߲ ߠߊ߫ ߤߊ߬ߙߌ߬ߖߍ߰ ߝߟߐ ߘߏ߫ ߟߴߊ߬ ߡߏߦߌߓߊ߮ ߟߎ߬ ߣߴߊ߬ ߡߏߦߌ߫ ߦߙߐ ߣߴߊ߬ ߡߏߦߌ߫ ߕߎߡߊ ߟߎ߬ ߘߌ߫߸ ߏ ߓߍ߲߬ߛߋ߲߬ߡߊ ߟߋ߬ ߞߍߣߍ߲߫ ߡߐ߱ ߘߏ߫ ߟߎ߫ ߟߊ߫ ߢߍߕߊ߮ ߛߊߓߎ߫ ߘߌ߫ ߸ ߞߵߏ߬ ߛߐ߬ߘߐ߲߬ ߓߊߟߌߦߊ ߝߣߊ߫ ߞߍ߫ ߘߏ߫ ߟߎ߫ ߟߊ߫ ߞߐ߫ ߕߏ߫ ߝߣߊ߫ ߛߊߓߎ ߘߌ߫.
ߓߊߏ߬ ߸ ߊ߬ ߦߋ߫ ߝߐ߫ ߟߊ߫ ߡߊ߲߬ߘߋ߲߫ ߛߊ߲߬ߘߊ ߘߐ߫ ߏ߬ ߟߋ ߘߐ߫ ߞߏ߫: ߝߟߌ߬ ߕߍ߫ ߓߊ߲߬ߛߊ߬ ߢߐ ߝߍߘߍ߲ߕߟߏ ߡߊ߬)߸ ߓߍ߯ ߘߏ߲߬ ߞߵߊ߬ ߟߐ߲߫ ߞߏ߫ ߢߐ߭ ߕߍ߫ ߢߊ߬ ߣߌ߫ ߘߎ߰ ߘߌߡߊ߲ ߕߍ߫، ߡߐ߱ ߕߊ߫ ߘߎ߱ ߏ߬ ߟߴߊ߬ ߡߏߦߌߓߊ߮ ߣߴߊ߬ ߡߏߦߌ߫ ߦߙߐ ߣߴߊ߬ ߕߎߡߊ ߟߎ߬ ߘߌ߫، ߏ߬ ߟߋ ߞߏߛߐ߲߬ ߊ߬ ߝߐߣߍ߲߫ ߞߏ߫ ߘߋ߲ߓߘߍ ߝߊ߲߬ߓߊ ߓߍ߯ ߛߐ߬ߘߐ߲߬ߓߊ߮ ߞߊ߫ ߝߌ߬ߛߴߊ߬ ߘߌ߫ ߸ ߓߊߏ߬ ߸ߏ߬ ߟߎ߫ ߟߋ߬ ߢߌ߬ߡߊ߬ߦߊ ߛߌߟߊ ߓߌ߬ߟߊ߬ ߟߴߊ߬ ߞߘߐ߫، ߓߊߏ߬ ߡߐ߱ ߡߍ߲ ߦߋ߫ ߛߌߟߊ߫ ߢߌߡߊ ߘߏ߲߬ ߠߊ߫ ߡߐ߰ ߞߘߐ߫߸ ߏ߬ ߞߊ߫ ߝߌ߬ߛߊ߬ ߌ ߘߌ߫، ߏ߬ ߟߋ ߣߊ߬ ߞߋߟߊߡߐ߮ ߟߎ߫ ߝߌ߬ߛߦߊ߬ ߟߴߊ߬ߟߎ߫ ߡߊ߬ߕߏ߲ ߠߎ߬ ߘߌ߫، ߓߊ߬߸ ߏ߬ ߟߎ߫ ߟߋ߫ ߕߘߍ߬ ߛߌߟߊ߫ ߓߘߍ ߟߎ߫ ߘߏ߲߬ ߠߴߊ߬ߟߎ߫ ߡߌ߬ߙߌ߲߬ߘߌ ߟߎ߬ ߞߘߐ߫.
ߏ߬ ߘߐ߫߸ ߣߴߌ ߞߊ߬ ߓߍ߯ ߦߋ߫ ߞߎߡߊ߫ ߟߊ߫ ߓߌ߬ ߞߏ߫ ߎߛߎߡߊ߯ߣ ߞߋߕߊ߬، ߏ߬ ߟߊߒߡߊ ߟߋ߬ ߦߏ߫ ߌߓߎ߬ߙߊ߬ߤߌߡߊ߫ ߣߴߊ߬ ߘߋ߲ߞߍ߫ ߌߛߌ߬ߡߊ߬ߌߟߊ߫ ߟߊ߫ ߘߐ߬ߝߐ، ߓߊߏ߬߸ ߏ߬ ߞߵߊ߬ ߝߊ߬ ߟߊߓߊߕߏ߬ ߝߏ߫ ߊ߬ ߛߐ߲߬ ߘߊ߫ ߞߊ߲ߠߊߕߍ߯ߟߌ ߡߵߊ߬ ߝߊ߬ ߟߊ߫ ߟߐ߬ߒ߬ߗߋ߬ߟߊ ߟߊ߫، ߏ߬ ߘߐ߫ ߌߛߌ߬ߡߊ߬ߌߟߊ߫ ߡߞߊߓߊߣߍ߲߫ ߕߍ߫ ߘߋ߬߸ ߊ߬ ߝߊ߬ ߟߋ߬ ߡߞߊߣߍ߲߫ ߞߊ߬ ߕߊ߬ߡߌ߲߬ ߊ߬ߟߋ ߞߊ߲߬، ߏ߬ ߘߐ߫߸ߊ߬ߟߋ ߡߊ߲ߛߊ ߟߎ߫ ߟߋ߬ ߡߊߞߓߊߣߍ߲߫ ߡߍ߲ ߠߎ߬ ߞߵߊ߬ ߘߐߓߍ߲߬ ߓߌ߬ ߢߍ߫.
ߘߋ߲ ߏ߬ ߝߣߊ߫ ߓߊߢߊ߬ߟߌ ߞߏߛߐ߲߬߸ ߏ߬ ߛߋ߫ ߘߴߊ߬ ߝߊ߬ ߗߍ ߞߘߐ߫، ߓߊߏ߬ ߌ ߘߌ߫ ߘߋ߲ ߘߏ߫ ߘߐߓߍ߲߬ ߞߏ ߘߏ߫ ߞߊ߲ߡߊ߬߸ ߞߏ߬ߣߌ߲߬ ߣߴߊ߬ ߓߊ߫ ߡߊ߫ ߢߊ߬، ߊ߬ ߕߍ߫ ߛߴߏ߬ ߞߍ߫ ߟߊ߫،
ߒ ߣߊ߬ ߊߡߌߣߊߕߊ߬ ߞߓߊ߬ “ߕߊ߯ߓߊ߯ߕߐ ߢߍߓߊ߮ ߎߛߑߡߊߣߌ߲߬ ߞߋߕߊ߬ ߣߊ߫” ߊ߲ ߣߊ߫ ߡߛߏߞߘߐ ߏ߬ ߟߋ ߤߌߣߊ ߦߋ߫ ߒߠߋ ߟߊ߫ ߓߌ߬ ߸ ߊ߬ ߞߊߣߊ߬ ߞߊ߬ߛߌ߬߸ ߊ߬ ߞߊߣߊ߬ ߛߎ߬ߣߎ߲߬߸ ߊ߬ ߞߊߣߊ߬ ߦߌߟߊ߲ߦߌߟߊ߲߫، ߒߞߏ ߞߊߙߊ߲ߘߋ߲ ߓߍ߯ ߦߴߊ߬ ߘߋ߲ ߠߋ߬ ߘߌ߫، ߊ߬ ߞߊߣߵߊ߬ ߘߋ߲ߞߍ߫ ߞߊߡߋߙߋ߲ ߠߊ߫ ߛߏߛߊߦߌ ߖߊ߬ߕߋ߬ ߝߏߦߌ߬ ߘߌ߫ ߡߊ߰ߙߌ ߟߊ߫ ߞߕߌ ߣߴߊ߬ ߟߊ߫ ߟߊ߬ߕߍ߮ ߞߐ߫ ߞߊ߬ ߓߍ߲߬ ߛߕߊ ߕߎ߬ߡߊ ߛߋߟߌ ߡߊ߬، ߣߙߐ߬ߖߎ߯ ߕߍ߫ ߣߊ߬ߘߌ߬ ߕߍ߫ ، ߍ߲߬ߍ߲ߍ߲߲߬ ߸ ߣߙߐ߬ ߢߌߡߊ ߟߋ߬ ߝߊ߯ߛߌ߫ ߸ ߓߊߏ߬ ߞߋߟߓߊ߫ ߡߊ߬ߡߊߘߌ߫ ߟߋ߬ ߘߌߡߊ߲߫ ߊߟߊ߫ ߦߋ߫ ߓߍ߯ ߘߌ߫߸ ߞߏ߬ߣߌ߲߬ ߏ߬ ߘߋ߲ ߓߍ߯ ߛߊ߬ ߘߴߊ߬ ߢߍ߫ ߝߏ߫ ߞߋߟߋ߲߫ ߔߋ߫، ߊ߬ ߣߌ߫ …..
ߏ߬ ߘߐ߫߸ ߤߊߟߵߊ߲ ߛߌ߰ ߘߊ߫ ߦߊ߲߬߸ ߡߐ߰ ߕߍ߫ ߓߊ߲߫ ߊ߬ ߘߋ߲ߞߍ߫ ߟߊ߫ ߓߊ߯ߙߊ߫ ߢߌߡߊ߫ ߞߍߣߍ߲ ߠߎ߬ ߢߊߝߐ߫ ߟߊ߫ ߒߞߏߞߏ ߡߌߙߌ߲ߘߌ ߦߋ߫ ߸ ߊ߬ ߣߴߊ߬ ߘߎߢߊߘߐߕߍ߯ ߊߘߡߊߘߋ߲ ߠߎ߬ ߦߋ߫ ߊ߬ߟߎ߬ ߡߊߘߍ߬ߡߍ߲ ߘߐ߫.
ߞߊ߬ߓߌ߯ ߊ߬ ߞߊ߬ ߒߞߏ ߞߊߙߊ߲ ߘߊߡߌ߬ߘߊ߬ ߞ.ߜ. ߇߈߁/߂߀߁߅ ߟߊ߫ ߞ. ߖߌ߬ߓߙߌ߬ߟߊ߫ ߖߊ߰ߣߍ߫ ߝߍ߬ ߞߵߊ߬ ߕߏ߫ ߢߍߓߊ߯ߦߊ ߟߊ߫ ߛߌ߬ߟߡߊ ߓߍ߯ ߟߊ߫ ߕߊ߲ߓߊ߲ ߕߌ߲ߓߌߘߌ߲ߘߊ ߟߊ߫ (ߡߊߛߑߖߘߌ ߐߟ ߡߛߌߡ ߛߍ߲ߕߊ߬) ߞߵߊ߬ ߕߘߍ߬ ߘߐߛߊߙߌ ߕߊ߲߬ߞߊ߬ߣߴߊ߬ ߓߟߏ߫ ߊ߬ ߣߴߊ߬ ߦߋ߫ ߞߊ߬ߙߊ߲߬ ߞߊ߲߬ ߊ߲߬ߜ߭ߌ߬ߟߋ߬ ߞߊߙߊ߲ ߖߊ߯ߓߘߊ ߟߊ߫ ߞߴߊ߬ ߕߘߍ߬ ߊ߬ ߓߘߊ߫ ߓߊ߲߫ ߊߙߊߓߎ߫ ߞߊߙߊ߲߫ ߖߊ߯ߓߘߊ ߟߊ߫ ߛߎ߰ߘߎ߰ߟߊ߫، ߟߏ߲ ߺ ߏ ߺ ߟߏ߲߫ ߘߏ߫ ߟߋ߬ ߝߙߊ߬ ߟߴߊ߬ ߟߊ߫ ߒߞߏߞߏ ߛߣߐ߬ߡߍ߬ߘߐ߬ߦߊ ߣߴߊ߬ ߞߊ߬ߙߊ߲ ߣߴߊ߬ ߟߊߥߙߎߞߌ߫ ߓߊ߯ߙߊ ߟߎ߫ ߞߊ߲߬
ߏ߬ ߟߊߒߡߊ ߘߏ߫ ߟߎ߫ ߝߟߍ߫ ߣߌ߲߬: ߊߡߋߙߌߞߌ߬ ߞߊ߬ߝߏ߫ ߘߍ߬ߣߍ߲ ߒߞߏ ߕߐ߲ ߡߙߊ߬ߘߊ ߞߎߟߊߕߍ߮ ߛߓߍߘߊ ߡߍ߲ ߛߏ߯ߙߏ߫ ߘߊ߫ ߞ.ߜ. ߇߈߁ ߞߏ߲ߞߏߘߓߌ ߁߇/߂߀߁߆ ߊ߬ ߞߍ ߘߊ߫ ߏ߬ ߞߐߞߊ߲߫ ߞߏ ߟߎ߬ ߣߌ߫ ߕߍߓߊ߯ߦߊ ߞߟߊ߬ߕߌ߮ ߟߋ߬ ߘߌ߫ ߊ߬ ߣߌ߫ ߛߓߍߘߊ ߡߍ߲ ߛߎߥߊ߲ߘߌ߫ ߘߊ߫ (ߊߡߋߙߌߞߌ߬ ߞ.ߘ. ߒߞߏ ߕߐ߲) ߠߊ߫ ߝߘߏ߬ߓߊ߬ ߜߙߊ߬ ߛߓߊߣߊ߲ ߓߟߏ߫، ߓߍ߲ߗ߭ߊߡߍ߫ ߝߊߙߊ߲ߞߑߟߌ߲߫ ߝߘߏ߬ߓߊ߬ ߞߊߙߊ߲ߛߏ ߅߅ ߟߊ߫، ߄߅߀ ߛߍ߲ߔߏߟ، ߓߑߙߐ߲ߞߛ ߣߌߦߐߙߞ ߊߡߋߙߌߞߌ߬ ߞ.ߘ، ߞߊߙߌߟߏ߲ ߕߎߟߊߝߌ߲ ߃߀ ߞ.ߜ. ߇߈߃/߂߀߁߈، ߞߊ߬ ߞߍ߫ ߏ߬ ߞߏ߲߬ߘߏ߲߬ߕߌ߮ ߘߌ߫.
ߊ߬ ߣߌ߫ ߛߓߍߘߊ ߡߍ߲ ߛߎߥߊ߲ߘߌ߫ ߘߊ߫ (ߊߡߋߙߌߞߌ߬ ߞ.ߘ. ߒߞߏ ߕߐ߲) ߠߊ߫ ߝߘߏ߬ߓߊ߬ ߜߙߊ߬ ߄ߣߊ߲ ߠߋ߬ ߓߟߏ ߛߌ߬ߟߊ߬ߡߊ ߓߍ߯ ߟߊ߫ ߕߊ߲ߓߊ߲ ߕߌ߲ߓߌߘߌ߲ߘߊ ߟߊ߫، ߓߑߙߐ߲ߞߛ،ߣߌߦߐߙߞ ߊߡߋߙߌߞߌ߬ ߞߊߙߌߟߏ߲، ߞߏ߲ߞߏߘߓߌ ߁߁/߇߈߆/߂߀߂߁، ߞߊ߬ ߞߍ߫ ߏ߬ ߝߣߊ߫ ߞߏ߲߬ߘߏ߲߬ߕߌ߮ ߘߌ߫، ߊ߬ ߛߏߡߊߦߟߍߡߊ߲ߣߍ߲߫ ߞߵߊ߬ ߕߏ߫ ߟߐ߬ߘߎ߮ ߏ߬ ߟߋ ߘߐ߫ ߣߌ߲߬،
ߊ߬ ߣߌ߫ ߒߞߏ ߡߌߞߙߏߛߐߝߕ ߘߟߊߡߌߘߊ ߓߟߏߟߊߘߍ ߡߍ߲ ߘߊߡߌ߬ߣߊ߬ ߘߊ߫ ߞ.ߜ. ߇߈߂/߁߇/߂߀߁߇، ߊ߬ ߞߊ߬ ߊߡߙߌߞߌ߫ ߘߟߊ߫ ߁߀߀߀ ߠߋ߫ ߛߊ߬ߙߊ߫ ߏ߬ ߘߐ߫ [ߛߐ߲ߞߐ߫ ߇-߁ ߡߊߝߟߍ߫] ߸ ߞߊ߬ ߓߊ߲߫ ߞߵߊ߬ ߝߐ߫ ߞߏ߫ ߣߌ߫ ߒߞߏ ߡߊ߬ߞߏ ߟߐ߬ ߘߴߊ߬ ߟߋ߬ ߟߊ߫ ߞߏ߫ ߞߵߊ߬ ߝߙߋ߬ ߞߵߊ߬ ߘߏ߲߬ ߒߞߏߞߏ ߘߟߊ߫ ߞߏ߫ ߊ߬ ߓߘߴߊ߬ ߖߘߍ߬ ߘߌ߫ ߞߵߊ߬ ߞߍ߫ ߒߞߏ ߟߊߥߙߎߞߌߟߊ߲ ߘߌ߫ ، ߞߊ߬ߙߊ߲߬ߡߐ߯ ߓߊ߬ߓߊ߫ ߞߵߊ߬ ߝߐ߫ ߏ߬ ߟߋ ߛߋ߲߬ߝߍ߬ ߞߏ߫: “ߞߓߊߞߏ߫ ߸ ߒߞߏ ߘߋ߬ߙߌ߬ߣߍ߲߬ ߥߊߘߌ ߟߋ߫ ߛߐ߬ߘߐ߲߬ ߠߊ߫ ߓߟߏߟߊߘߍ ߘߌ߫ ߞߍ߬ߣߍ߲߬ ߸ ߞߏ߬ߣߌ߲߬ ߊ߬ ߣߊ߬ ߡߐ߱ ߟߋ߫ ߛߐ߬ߘߐ߲߬ ߠߊ߫ ߣߌ߲߬ߛߋ߲߭ ߣߊߟߌ߬ߡߎ߲߫ ߎߛߑߡߊߣߌ߲߬ ߞߋߕߊ߬ ߘߌ߫ ߸ ߞߊ߬ ߘߟߊ߫ ߁߀߀߀ ߟߴߊ߬ ߞߊ߲߬ ߞߵߊ߬ ߖߘߍ߬ ߣߌ߬ ߒߞߏ ߟߊ߫ ߞߊ߬ߣߌ߲߫ ߞߊ߬ ߞߍ߫ ߊ߬ ߟߊ߫ ߖߐ߲߭ ߘߌ߫”، ߏ߬ ߓߟߏߡߊ߬ ߤߊߟߌ߬ ߊ߬ ߡߊ߫ ߛߐ߲߬ ߊ߬ ߖߌ߬ߦߊ߬ߓߍ ߘߟߌ ߡߊ߬ ߕߐ߭ ߟߎ߬ ߕߊ ߞߍߢߊ ߞߊ߲߬ ߞߵߊ߬ ߣߘߐ߫ ߛߙߍߘߍ ߘߐ߫”.
ߊ߬ ߞߊ߬ ߛߙߋߓߍ߫ ߣߊ߯ߣߌ߲߫ ߣߌ߫ ߛߌ߲߬ߝߏ߲߬ ߔߊߔߘߊ ߝߌ߬ߟߊ߫ ߛߐ߬ߘߐ߲߬ ߞߊ߬ ߝߘߴߊߡߋߙߌߞߌ߬ ߞ.ߘ. ߒߞߏ ߕߐ߲߫ ߠߊ߫ ߕߊ߲߬: ߛߌ߲߬ߝߏ߲߬ ߛߙߋߓߍ ߣߌ߫ ߒߞߏ ߞߊߙߊ߲ ߜߍߢߋߟߋ߲ ߛߙߋߓߍ ߣߌ߫ ߥߊߟߋߢߌߡߊߟߐ߲߫ ߛߙߋߓߍ ߣߌ߫ ߒߞߏ ߞߊߙߊ߲ ߓߊߘߎ߲ ߛߙߋߓߍ، ߏ߬ ߟߎ߫ ߟߋ ߖߌ߬ߦߊ߬ߓߍ ߛߙߍߘߍ ߟߎ߬ ߝߟߍ߫ ߘߎ߰ߟߊ߫ ߣߌ߲߬.
ߒߞߏ ߣߌ߫ ߒߞߏ ߕߐ߲ ߠߊ߫ ߕߏ߰ߝߏ ߛߌ߫ ߡߊ߫ ߝߐ߫ ߊ߬ ߞߐ߫ ߊߡߋߙߌߞߌ߬ ߦߊ߲߬ ߝߏ߫ ߣߌ߫ ߡߍ߲ ߡߴߊ߬ ߛߐ߬ߘߐ߲߫ ߖߡߊ߬ߣߊ ߞߣߐ߫ ߦߊ߲߬ ߘߋ߬، ߞߵߊ߬ ߘߊߡߌ߬ߘߊ߬ ߟߊ߬ߘߍ ߟߎ߬ ߣߌ߫ ߓߟߏߟߊߘߍ ߟߎ߫ ߡߊ߬ ߞߊ߬ ߛߋ߫ ߜߊ߬ߙߊ ߟߎ߬ ߣߌ߫ ߞߊ߬ߙߊ߲ ߠߎ߬ ߣߌ߫ ߟߞߊ߬ߙߊ߲߬ߠߌ߲ ߠߎ߫ ߡߊ߬ ߸ ߏ߬ ߞߘߐ ߟߋ߬ ߞߏ ߒߞߏ ߞߊߙߊ߲ ߣߴߊ߬ ߟߊ߬ߞߐ߰ߟߌ ߟߎ߬ ߛߌ߫ ߡߊ߬ ߝߐ߫ ߊ߬ ߞߐ߫ ߣߌߦߐߙߞ ߞߣߐ߫ ߊ߬ ߣߌ߫ ߞߊ߬ߝߏ߬ ߜߘߍ ߘߏ߫ ߟߎ߫ ߦߏ߫: ߓߐߛߑߕߐ߲߫ ߤߊߙߑߝ߭ߊ߬ߘ ߖߊ߯ߓߊ ߣߌ߫ ߡߛߌߜ߭ߊ߲߫ ߣߌ߫ ߍ߲ߘߌߦߣߊ߫ ߖߊ߯ߓߘߊ ߣߌ߫ ….
ߕߎ߬ߡߊ߬ߣߍ߲߬ ߞߋߟߋ߲ ߏ߬ ߝߣߊ߫ ߟߊ߫߸ ߊ߲ ߧߋ߫ ߘߋ߲ߣߍ߲߫ ߞߊߙߊ߲ ߡߍ߲ ߠߎ߬ ߞߍ߫ ߟߊ߫߸ ߊ߬ ߕߎ߲߬ ߦߴߏ߬ ߞߊ߬ߙߊ߲߬ߡߐ߯ ߛߍ߰ߓߊߟߌ ߘߏ߫ ߟߋ߬ ߝߣߊ߫ ߘߌ߫ ߡߍ߲ ߕߍ߫ ߛߊ߬ߦߌ߬ ߟߊ߫ ߞߊ߬ߙߊ߲߬ ߦߙߐ߬ߘߐ߬ߕߊ߮ ߓߊ߯ߙߊ߫ ߜߍߟߍ߲ ߏ߬ ߘߐ߫ ߟߐ߬ߦߙߌ߬ ߛߌ߫ ߓߟߏ߫߸ ߤߊߟߵߊ߬ ߓߊ߯ ߛߌ߬ ߊ߬ ߢߣߴߊ߬ ߓߟߏߡߞߊ߫ ߓߊ߯ߙߊ ߟߋ߬ ߟߊ߫، ߊ߬ ߘߌ߫ ߛߎ߬ߣߐ߮ ߖߵߊ߬ ߢߊ ߘߐ߫ ߞߊ߬ ߣߊ߫ ߞߊ߬ߙߊ߲߬ ߦߙߐ ߘߐ߫، ߞߵߊ߬ ߕߘߍ߬ ߊ߬ ߦߙߐ߫ ߞߊ߫ ߖߊ߲߬ ߞߊ߬ߙߊ߲߬ ߦߙߐ ߟߊ߫ ߞߊ߬ߙߊ߲߬ߘߋ߲ ߣߌ߫ ߞߊ߬ߙߊ߲߬ߡߐ߮ ߓߍ߯ ߘߌ߫، ߞߊ߬ ߓߐ߫ ߝߏ߫ ߣߌߖߐߙߑߖ߭ߌ߬ ߞߊ߬ ߣߊ߬ ߣߌߦߐߙߞ ߞߵߏ߬ ߟߊ߫ ߛߌߟߊ ߖߐ߰ߣߍ ߞߊ߲߬ ߖߌߥߎ ߣߌ߫ ߛߌߟߊ ߟߊߒߞߎ߲ ߠߎ߬، ߊ߬ߟߋ ߘߏ߲߬ ߡߊ߫ ߛߐ߲߬ ߟߞߊ߬ߙߊ߲߬ߠߌ߲߬ ߛߙߊ ߡߌ߬ߘߊ߬ ߟߊ߫ ߟߏ߲߫ ߞߋߟߋ߲߫ ߛߌ߫ ߟߊ߫، ߞߵߏ߬ ߟߊ߫ ߡߎ߬ߢߎ߲ ߣߌ߫ ߛߍߥߊ ߞߊ߲߬، ߡߐ߰ ߛߌ߫ ߘߏ߲߬ ߡߴߊ߬ ߡߐߣߍߣߍ߲ ߦߋ߫ ߟߏ߲߫ ߞߋߟߋ߲߫ ߛߌ߫.
ߊ߬ߟߋ ߟߋ ߕߘߍ߬ ߒߞߏ ߕߐ߲ ߠߊ߫ ߢߍߓߊ߮ ߝߣߊ߫ ߘߌ߫߸ ߡߍ߲ ߦߋ߫ ߕߐ߲ ߠߊ߫ ߟߊ߬ߘߍ ߟߎ߬ ߜߊ߬ߙߊ ߟߎ߬ ߘߟߊߞߊ ߣߴߊ߬ ߘߊߘߎ߲߯ ߕߌ߲ߞߌ ߟߎ߬ ߝߣߊ߫ ߞߍ߫ ߟߊ߫، ߊ߬ ߞߊ߬ ߒߞߏ ߞߊߙߊ߲ߘߋ߲ ߠߎ߬ ߟߊ߫ ߓߋߟߋ߲ߠߊ߫ ߛߌߦߊߡߊ߲߫ ߞߊ߬ߙߊ߲߬ ߒߞߏ ߟߊ߫ ߜߊ߬ߙߊ ߟߎ߫ ߛߋ߲߭ߝߍ߬.
ߊ߬ ߛߏߛߊߦߌ߲ߣߍ߲߫ ߞߊ߬ ߛߌ߬ߟߡߊ߬ ߡߌߙߌ߲ߘߌ ߣߌ߫ ߒߞߏ ߡߌߙߌ߲ߘߌ ߓߟߏߝߊߣߍ߲ߓߊ ߣߌ߲߬ ߠߋ߬ ߕߏ߫ ߊ߬ ߘߐ߫ ߘߊߞߎ߲߫ ߛߌߦߊߡߊ߲߫ ߘߐ߫ ߸ ߡߍ߲ ߠߎ߬ ߓߍߣߊ߬ ߕߐ߬ߝߍ߬ߦߊ߫ ߕߎ߬ߡߊ߬ ߜߘߍ߫، ߏ߬ ߘߐ߫ ߸ ߊ߲ ߢߊߖߌߕߐ ߦߋ߫ ߞߎߡߊ ߟߊߟߐ߬ ߟߊ߫ ߦߊ߲߬ ߕߋ߲߬، ߓߊߏ߬ ߓߊߘߍߘߊ ߟߋ߬ ߸ ߣߴߊߟߊ߫ ߛߐ߲߬ ߘߊ߫ ߕߎ߬ߡߊ߬ ߜߘߍ߫ ߊ߲ ߘߌ߫ ߢߍߓߊ߮ ߞߊ߲߬ߞߎߡߊ ߕߐ߭ ߘߝߊ߫ ، ߓߊߏ߬ ߝߐ ߕߍ߫ ߞߎߡߊ ߓߊ߲߫ ߠߊ߫ ߦߟߌ ߟߴߊ߬ ߕߐ߭ ߘߝߊ߫ ߟߊ߫.
ߊߡߋߙߌߞߌ߬ ߞ.ߘ. ߒߞߏ ߕߐ߲ ߠߋ߬ ߟߐ߬ߣߍ߲߫ ߓߊߘߍ ߣߌ߲߬ ߖߐ߬ߣߍ ߣߌ߫ ߕߐ߲ ߛߌ߲߬ߝߏ߲߬ ߘߝߊߣߍ߲ ߓߍ߯ ߓߊߘߍ ߖߐ߬ߣߍ ߟߊ߫ ߊߡߋߙߌߞߌ߬ ߞߣߐ ߣߴߊ߬ ߞߐߞߊ߲ߠߊ ߓߍ߯ ߘߐ߫
ߊߟߊߡߊ߬ ߦߝߊ߬ ߞߍ߫ ߘߴߊ߬ ߡߊ߬، ߞߵߊ߬ ߟߊߦߙߐ ߛߎߡߊ߫، ߞߵߊ߬ ߝߙߊ߬ ߞߎ߲߬ߠߊ߲߬ߘߌ߬ ߝߎߙߋ ߟߎ߫ ߞߊ߲߬، ߞߵߊ߬ ߞߐ ߣߴߊ߬ ߢߍ ߘߐߓߍ߲߬، ߞߵߊ߬ ߓߐ߲ߛߐ߲ ߠߎ߬ ߟߊߢߊ߬، ߞߊ߬ ߦߝߊ߬ ߞߍ߫ ߞߊ߬ߙߊ߲߬ߡߐ߯ ߛߟߏ߬ߡߊ߰ߣߊ߬ ߞߊ߲ߕߍ߫ ߣߌ߫ ߒߞߏ ߞߊߙߊ߲ߘߋ߲ ߝߎߙߋ ߕߐ߭ ߟߎ߬ ߣߌ߫ ߡߐ߰ ߓߘߍ ߓߍ߯ ߡߊ߬، ߞߵߊ߲ ߕߐ߭ ߟߎ߬ ߝߣߊ߫ ߟߊߓߊ߲ ߢߊ߬، ߞߵߊ߲ ߓߍ߯ ߟߊߘߍ߬ ߡߍ߲ߘߌߦߊ ߣߊߞߐ ߘߐ߫.
ߕߌ߲ߞߌ ߣߌ߫ ߖߐ ߦߋ߫ ߞߋߟߓߊ߫ ߡߊ߬ߡߊߘߌ߫ ߡߊ߬.
ߞ/ ߖߌ߬ߓߙߌ߬ߟߊ߫ ߖߊ߰ߣߍ߬، ߒߞߏ ߕߐ߲ ߖߊ߯ߓߡߊ ߣߴߊߡߋߙߌߞߌ߬ ߞ.ߘ ߒߞߏ ߕߐ߲߫ ߝߘߏ߬ߓߊ߬ ߞߟߊ߬ߕߌ߮/ߣߌߦߐߙߞ ߊߡߋߙߌߞߌ߬ ߞ.ߘ.
ߢߍߓߊ߮ ߎߛߑߡߊߣ ߞߋߕߊ߬ ߟߊ߫ ߓߊߘߍ ߘߐ߫ ߞ.ߜ. ߇߈߉/߂߀߂߅ ߞߏ߲ߞߏߜߍ ߁߀
ߦߊ߲߬ ߛߐ߲߬ߞߌ߲߫ ߞߵߊ߬ ߟߊ߫ ߛߙߋߓߍ ߟߎ߬ ߣߴߊ߬ ߟߊ߫ ߒߞߏ ߖߐ߲ߓߐ߲ ߠߎ߬ ߘߐߜߍ߫
ߦߊ߲߬ ߛߐ߲߬ߞߌ߲߫ ߞߊ߬ ߟߊ߫ ߖߌ߬ߦߊ߬ߖߟߎ ߁ ߘߐߜߍ߫
ߦߊ߲߬ ߛߐ߲߬ߞߌ߲߫ ߞߵߊ߬ ߟߊ߫ ߖߌ߬ߦߊ߬ߖߟߎ ߂߲ ߘߐߜߍ߫
ߛߏ߬ߟߏ ߝߙߊ߬ߓߊ-ߘߐ߫